សុន្ទរកថា១៥នាទីដែលអានដោយរដ្ឋលេខាធិការក្រសួងការបរទេស លោក អ៊ុច បូរិទ្ធ កាលពីម្សិលមិញ បានបង្ហាញពីឆន្ទៈរាជរដ្ឋាភិបាលកម្ពុជាចំពោះសកម្មភាពប្រឆាំងភេរវកម្ម ឆន្ទៈបំផ្លាញគ្រឿងសព្វាវុធធុនតូចនិងធុនស្រាលខ្លះដើម្បីរួមចំណែកទ្រទ្រង់សន្តិភាព ការបញ្ជូនក្រុមអ្នកដោះមីនខ្មែរទៅប្រទេសស៊ូដង់ បញ្ហាបារម្ភនឹងការកើននៃកម្ដៅផែនដីដែលញ៉ាំងឲ្យមានការធ្វើយុទ្ធនាការដាំដើមឈើឡើងវិញនោះជាដើម។
មន្ត្រីតំណាងរាជរដ្ឋាភិបាលខ្មែរ នៅក្នុងពេលនោះ បានអំពាវនាវឲ្យអង្គការសហប្រជាជាតិរៀបចំកិច្ចប្រជុំពិភពលោកមួយស្តីពីបញ្ហាប្រែប្រួលធាតុអាកាសពិភពលោកដើម្បីឲ្យបណ្តាប្រទេសនានាអនុវត្តតាមវិធានការជាក់លាក់ដែលបានដាក់ចុះក្នុងគោលដៅកាត់បន្ថយគ្រោះថ្នាក់ពីការកើនកម្ដៅពិភពលោក៕