ប៉ូលិសចាប់ខ្លួនពលរដ្ឋម្នាក់ពាក់ព័ន្ធករណីជួញដូរគ្រឿងញៀន
2011.07.10
អ្នកយកព័ត៌មានវិទ្យុអាស៊ីសេរី លោក រដ្ឋា វីសាល រាយការណ៍នៅថ្ងៃអាទិត្យ ទី១០ ខែកក្កដា ឆ្នាំ២០១១ ឲ្យដឹងថា នេះជាការបង្ក្រាបការជួញដូរគ្រឿងញៀនមួយករណីថ្មីទៀត បន្ទាប់ពីជនជាប់ចោទត្រូវបានប៉ូលិសឆែកឆេររកឃើញគ្រឿងញៀននោះនៅជាប់និងខ្លួនក្នុងការប៉ុនប៉ងនាំយកគ្រឿងញៀននេះពីភូមិមួយ នៅជាប់នឹងព្រំដែនប្រទេសឡាវ។
បុគ្គលិកផ្នែកអង្កេតសមាគមអាដហុក ខេត្តស្ទឹងត្រែង លោក ហូ សំអុល ឲ្យដឹងថា ជនជាប់សង្ស័យក្នុងការជួញដូរគ្រឿងញៀននេះ មានឈ្មោះ ថៃ សាឡឺម អាយុ២២ឆ្នាំ រស់នៅភូមិក្បាលកោះឈើទាលតូច ក្នុងឃុំព្រះរំកិល ត្រូវប៉ូលិសចាប់ខ្លូងកាលពីថ្ងៃទី៨ ខែកក្កដា ឆ្នាំ២០១១ នៅចំណុចកំពង់ចម្លងឃុំអូរស្វាយ ៖ "បាទនៅនឹងខ្លូងវា កំពុងតែឆ្លងដរអូរស្វាយ ឆ្លងក្បាលកោះឈើទាលតូចហ្នឹង។ ខ្ញុំកំពុងតែតាមដានតើគេបញ្ជូនទៅតុលាការឬនៅ ព្រោះអីតាំងពីថ្ងៃ៨ គេមិនដែលទុក"។
ប្រធានការិយាល័យប៉ូលិសប្រឆាំងការជួញដូរគ្រឿងញៀនលោក នូ ហន មានប្រសាសន៍បញ្ជាក់ថា ជនជាប់សង្ស័យត្រូវបានគេជួលឲ្យនាំគ្រឿងញៀនពីភូមិរបស់ខ្លួន នាំមកកាន់ឃុំសាមគ្គី ដើម្បីប្រគល់ឲ្យឈ្មួញអ្នកជួញដូរ ប៉ុន្តែប៉ូលិសបានទទួលព័ត៌មានពីករណីនេះទើបស្ទាក់ចាប់បាន។
លោកបន្តថា ជនសង្ស័យត្រូវស្ថាប័នអយ្យការធ្វើការចោទប្រកាន់ និងត្រូវនាំទៅឃុំខ្លួនជាបណ្ដោះអាសន្ននៅពន្ធនាគារខេត្តរួចហើយ ដើម្បីបើកការស៊ើបអង្កេតបន្ត។
អាជ្ញាធរប៉ូលិសប្រឆាំងគ្រឿងញៀនខេត្តស្ទឹងត្រែង កាលពីថ្ងៃទី៦ ខែមិថុនា ឆ្នាំ២០១១ បានចាប់ឃាត់ខ្លួនជនសង្ស័យជួញដូរគ្រឿងញៀនចំនួនបីនាក់ និងរិបអូសបានគ្រឿងញៀនប្រភេទមេតំហ្វេតាមីន (Methamphetamine) ចំនួនជាង ៣ម៉ឺនគ្រាប់ ក្នុងការប៉ុនប៉ងនាំចូលពីតំបន់ព្រំដែនប្រទេសឡាវ ចូលមកខេត្តស្ទឹងត្រែង៕