កិច្ច​ប្រជុំ​ពេញអង្គ​សាលា​ក្ដី​ខ្មែរ​ក្រហម​អនុម័ត​សំណើ​សុំ​ធ្វើ​សវនកម្ម​៥​ចំណុច

កិច្ចប្រជុំ​ពេញ​អង្គ​លើក​ទី​៩ របស់​សាលាក្ដី​ខ្មែរ​ក្រហម​ដែល​បាន​ចាប់​ផ្ដើម​កាល​ពី​ថ្ងៃ​២១ កុម្ភៈ ត្រូវ​បាន​បញ្ចប់​ហើយ​នៅ​ថ្ងៃ​២៣ កុម្ភៈ ឆ្នាំ​២០១១​នេះ ដោយ​បាន​ពិចារណា​លើ​សំណើ​សុំ​ធ្វើ​សវនកម្ម​លើ​វិធាន​ផ្ទៃក្នុង ដើម្បី​ទិសដៅ​រៀបចំ​សវនាការ​ឱ្យ​មាន​ប្រសិទ្ធភាព និង​ធ្វើ​ឱ្យ​នីតិវិធី​ជំនុំ​ជម្រះ​ក្ដី​បាន​ឆាប់​រហ័ស​ជាង​មុន។
ដោយ ឡេង ម៉ាលី
2011.02.23
Share on WhatsApp
Share on WhatsApp

នៅ​ក្នុង​សេចក្ដី​ប្រកាស​ព័ត៌មាន​ដែល​ចេញ​ផ្សាយ​នៅ​ថ្ងៃ​ពុធ ទី​២៣ ខែ​កុម្ភៈ បាន​បង្ហាញ​លទ្ធផល​ថា កិច្ចប្រជុំ​ពេញ​អង្គ​លើក​ទី​៩ បាន​អនុម័ត​លើ​សំណើ​សុំ​ធ្វើ​សវនកម្ម ៥​ចំណុច​ពាក់ព័ន្ធ​ទៅ​នឹង​សាលា​ដំបូង ដែល​ក្នុង​នោះ​មាន​ជា​អាទិ គឺ​ការ​ទទួល​យក​បណ្តឹង​ដិត​ចិត្ត​ចំពោះ​ចៅក្រម​ណា​ម្នាក់​ប្រសិន​បើ​មាន។

មន្ត្រី​ទទួល​បន្ទុក​ព័ត៌មាន​ផ្នែក​កិច្ចការ​សាធារណៈ​របស់​សាលាក្ដី​ខ្មែរ​ក្រហម លោក ឌឹម សុវណ្ណារុំ ថ្លែង​បញ្ជាក់​ថា ៖ «បណ្ដឹង​ដិត​ចិត្ត​មាន​ន័យ​ថា បណ្ដឹង​សុំ​ដក​ចៅក្រម​ណា​ម្នាក់»

សេចក្ដី​អនុម័ត​មួយ​ទៀត គឺ​កិច្ចប្រជុំ​ពេញ​អង្គ​បាន​សម្រេច​ឱ្យ​អង្គ​ជំនុំ​ជម្រះ​អាច​បន្ត​សវនាការ​របស់​ខ្លួន​បាន ដោយ​មិន​ចាំបាច់​មាន​វត្តមាន​របស់​ជន​ជាប់​ចោទ​នៅ​ក្នុង​អង្គ​ជំនុំ​ជម្រះ។

លោក ឌឹម សុវណ្ណារុំ បញ្ជាក់​បន្ថែម ៖ «បទបញ្ញត្តិ​មួយ​ចំនួន​បាន​អនុញ្ញាត​ដំណើរ​ការ​ដោយ​គ្មាន​វត្តមាន បើ​ទោះ​ជា​មាន​ការ​យល់​ព្រម​ពី​ជន​ជាប់​ចោទ ឬ​គ្មាន​ក៏ដោយ។ មាន​ន័យ​ថា អង្គ​ជំនុំ​ជម្រះ​រៀបចំ​ឱ្យ​មាន​ប្រព័ន្ធ​វីឌីអូ link (ខ្សែ) ភ្ជាប់​ពី​សាល​សវនាការ​ទៅ​កាន់​បន្ទប់​គាត់​ស្នាក់នៅ»

លោក​បន្ត​ថា ការ​សម្រេច​នេះ​គឺ​ជា​ការ​ឆ្លើយ​តប​ចំពោះ​សំណើ​សុំ​របស់​ជន​ជាប់​ចោទ អៀង សារី ដែល​កន្លង​មក​ធ្លាប់​បាន​សុំ​ឱ្យ​មាន​សវនាការ​តែ​កន្លះ​ថ្ងៃ ដោយសារ​តែ​បញ្ហា​សុខភាព និង​ជរាភាព​មិន​អាច​ចូល​រួម​បាន។ មួយ​ទៀត ប្រការ​ដែល​ជន​ជាប់​ចោទ​សុំ​មិន​ចូល​រួម​សវនាការ​តាម​រយៈ​វីដេអូ​នោះ ឥឡូវ​នេះ​កិច្ច​ប្រជុំ​ពេញ​អង្គ​សម្រេច​ថា អង្គ​ជំនុំ​ជម្រះ​អាច​បង្គាប់​ជន​ជាប់​ចោទ​ត្រូវ​តែ​ចូល​រួម​តាម​មធ្យោបាយ ​វីដេអូ ដើម្បី​ផលប្រយោជន៍​យុត្តិធម៌ និង​បង្ការ​កុំ​ឱ្យ​យឺត​យ៉ាវ​ដល់​នីតិវិធី។

កាល​ពី​ខែ​មករា ឆ្នាំ​២០១១ មេធាវី​ការពារ​ក្ដី បាន​សុំ​ឱ្យ​សាលាក្ដី​ខ្មែរ​ក្រហម​ដោះ​លែង​ជន​ជាប់​ចោទ​ក្នុង​ករណី​ដែល​ជន​ជាប់​ចោទ​ត្រូវ​ឃុំ​ខ្លួន​បន្ត​រយៈពេល ៤​ខែ​ទៀត ហើយ​គេ​មិន​បាន​នាំ​ខ្លួន​ទៅ​ធ្វើ​សវនាការ​ចំពោះ​មុខ​សាលា​ដំបូង។

លោក ឌឹម សុវណ្ណារុំ ថ្លែង​ថា ចំណុច​នេះ​សាលា​ដំបូង​បាន​ធ្វើ​រួច​ហើយ កាល​ពី​ថ្ងៃ​ទី​៣១ ខែ​មករា ហើយ​នៅ​ថ្ងៃ​ទី​១៦ ខែ​កុម្ភៈ សាលាដំបូង​បាន​សម្រេច​ឱ្យ​ឃុំ​ខ្លួន​បន្ត​រហូត​ដល់​ការ​ប្រកាស​សាលក្រម​របស់​អង្គ​ជំនុំ​ជម្រះ​សាលា​ដំបូង៕

រឿង​ដែល​គេ​អាន​​ច្រើន​បំផុត
RFA
ធនាគារ​ABA មិន​ព្រម​បើកប្រាក់​ជាង​១​ម៉ឺន ៥​ពាន់​ដុល្លារ ដែល​ឧបត្ថម្ភ​ដល់​បុគ្គលិក​ណាហ្គាវើលដ៍
រឿង​ដែល​គេ​អាន​​ច្រើន​បំផុត
ព័ត៌មាន​ថ្មីៗ
លោក ហ៊ុន សែន បន្ត​ប្រកាស​ថា ​​​នឹង​ការពារ​មិន​ឱ្យ​មាន​​​រដ្ឋប្រហារ​ ដើម្បី​​​អភិវឌ្ឍប្រទេស​ឱ្យ​រីក​ចំរើន
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។