ព្រៃសហគមន៍ធម្មជាតិបឹងទន្លេម្រេចដែលមានផ្ទៃដីជាង ២ ពាន់ហិកតារ ( ២៣៥១ ) ឋិតនៅស្រុករវៀង ខេត្តព្រះវិហារ បានទទួលរងការកាប់ទន្ទ្រានយកដី និងឈើមានតម្លៃអស់ស្ទើរទាំងស្រុងនៅរយៈពេលប៉ុន្មានឆ្នាំចុងក្រោយនេះ។ សហគមន៍តំបន់នោះ បានទម្លាក់កំហុសករណីនេះ លើក្រុមហ៊ុន ទ្រី ភាព ថាបានបើកទីតាំងកាប់រំលំឈើធ្វើអាជីវកម្ម និងឈូសឆាយហ៊ុមព័ទ្ធទន្ទ្រានព្រៃខុសច្បាប់ ដើម្បីដាំកៅស៊ូអស់ជាង ១ពាន់ហិកតារ។
ប្រជាសហគមន៍ការពារព្រៃឈើរស់នៅភូមិ អូរពោធិ៍ ឃុំរមណីស្រុករវាង ឲ្យដឹងនៅថ្ងៃទី១០ វិច្ឆិកា ថា បើទោះបីជាព្រៃការពារបឹងទន្លេម្រេច បានចុះបញ្ជីជាព្រៃការពារក្តី ក៏ប៉ុន្តែព្រៃអភិរក្សមួយនេះ បានទទួលរងការកាប់ឈើមានតម្លៃ និងឈូសឆាយទន្ទ្រានព្រៃយកដី ធ្វើកសិកម្មអស់ស្ទើរទាំងស្រុង។ សហគមន៍ថា ក្រុមហ៊ុន ទ្រី ភាព បានប្រើប្រាស់ប្រព័ន្ធតុលាការប្តឹងពលរដ្ឋណាដែលហ៊ានចេញមុខការពារព្រៃឈើនៅតំបន់នោះ។
ប្រជាសហគមន៍ការពារព្រៃឈើបឹងទន្លេម្រេច ថ្លែងមិនហ៊ានបញ្ចេញឈ្មោះ ឲ្យដឹងថា ព្រៃសហគមន៍បឹងទន្លេម្រេច ដែលធ្លាប់ជាម្លប់បៃតងស្រស់បំព្រង និងផ្ដល់ប្រយោជន៍ច្រើនដល់សហគមន៍ ត្រូវបានក្រុមហ៊ុន ទ្រី ភាព ច្បាមយកឈើមានតម្លៃ និងឈូសឆាយហ៊ុមព័ទ្ធទន្ទ្រានព្រៃយកដីអស់ជាង ១ ពាន់ហិកតារ និងមានផ្នែកខ្លះក្រុមហ៊ុនបានធ្វើរបងហ៊ុមព័ន្ធ។ លោកថា ពលរដ្ឋដែលឈឺឆ្អាលរឿងបទល្មើសព្រៃឈើតំបន់នោះ ត្រូវក្រុមហ៊ុនប្តឹងទៅតុលាការ ដែលជាហេតុនាំឲ្យអ្នកភូមិភ័យខ្លាចមិនហ៊ានងើបតវ៉ា៖ «ក្នុងក្រុមហ៊ុន ទ្រី ភាព កាប់អស់ព្រៃហើយ ចាប់ផ្ដើមនៅសល់ដី កាប់ដាំៗ តាំងពីកៅស៊ូខ្លះ និងស្វាយចន្ទីខ្លះទៅ។ ចប់ហើយ ការចូលព្រៃបោចវល្លិ៍សម្រាប់ចិញ្ចឹមជីវភាព ឥឡូវបាត់អស់ហើយ»។
បុរសដដែលបន្ថែមថា កន្លងទៅតំណាងក្រុមហ៊ុន ទ្រី ភាព បានសន្យាចំពោះមុខពលរដ្ឋថា នឹងទុកដី ១៥ហិកតារ ឋិតនៅបណ្ដោយផ្លូវជាតិ លេខ៦២ បំណងឲ្យពលរដ្ឋកសាងវត្តអារាម និងសាលារៀន ក៏ប៉ុន្តែក្រុមហ៊ុនបែរជាធ្វើរបង ហ៊ុមព័ន្ធយកដីទាំងនោះសាងសង់រោងចក្រទៅវិញ៖ «វាពិបាកដែរ ក្រុមហ៊ុនធ្វើបាន តែពលរដ្ឋធ្វើបន្តិចបន្តួចប្ដឹងគ្នា ចាប់ដាក់គុក។ ក្រុមហ៊ុនគេធ្វើតាមអំពើចិត្ត ចង់យកដីកន្លែងណាក៏បាន ស្រេចតែចិត្តគេឥឡូវ»។
កាលពីឆ្នាំ២០១៤ សមត្ថកិច្ចស្រុករវៀងបានឃាត់ខ្លួនពលរដ្ឋម្នាក់ឈ្មោះ ឃិន ថា ទៅឃុំខ្លួននៅស្នងការដ្ឋានខេត្តនេះអស់មួយយប់ និងបានដោះលែងវិញ ក្រោយពីអ្នកភូមិរាប់រយនាក់បានលើកគ្នាទៅតវ៉ា។ ការឃាត់ខ្លួននេះផ្អែកលើពាក្យបណ្ដឹងរបស់ក្រុមហ៊ុន ទ្រី ភាព។
ព្រៃសហគមន៍ការពារធម្មជាតិបឹងទន្លេម្រេច មានផ្ទៃដីជាង ២ពាន់ហិកតារ (២.៣៥១) ឋិតនៅផ្នែកមួយនៃដែនជម្រកសត្វព្រៃ បឹងពែរ ដែលបានបានចុះបញ្ជីជាព្រៃអភិរក្សពីក្រសួងបរិស្ថាន កាលពីឆ្នាំ ២០១០ ឋិតនៅឃុំរមណី ស្រុករវៀង ខេត្តព្រះវិហារ។ ព្រៃនេះសំបូរដោយដើមឈើមូលធំៗ ស្រស់បំព្រង អមដោយបឹងធម្មជាតិធំធេងសំបូរត្រីសាច់ និងសត្វស្លាបជាច្រើនប្រភេទ ក៏ប៉ុន្តែក្រោយពីមានវត្តមានក្រុមហ៊ុន ទ្រី ភាព ព្រៃឈើព័ទ្ធជុំវិញបឹងបានក្លាយជាវាលរហោឋាន រីឯត្រីសាច់ ជីវចម្រុះ និង សត្វស្លាបជាច្រើនប្រភេទបានថយចុះបន្តិចម្តងៗ។ ចំណែកដីព្រៃសហគមន៍មួយផ្នែកធំ ក៏ត្រូវបានក្រុមហ៊ុនដាំកៅស៊ូ។
អាស៊ីសេរីមិនទាន់ទាក់ទង តំណាងក្រុមហ៊ុន ទ្រី ភាព ដើម្បីសុំការបញ្ជាក់រឿងនេះបាននៅឡើយទេនៅថ្ងៃទី១១ វិច្ឆិកា។
យ៉ាងណាមេឃុំរមណី លោក ឃុត រី ថ្លែងថា បច្ចុប្បន្នព្រៃសហគមន៍ការពារធម្មជាតិបឹងទន្លេម្រេច មានការកាប់រុករានជាច្រើនប្រភព និងមានផ្នែកខ្លះត្រូវក្រុមពលរដ្ឋសាងសង់លំនៅឋានបង្កើតជាភូមិ និងដាំដំណាំចិញ្ចឹមជីវិតអស់មួយផ្នែកធំ។ លោកទទួលស្គាល់ថា ពិតជាមានវត្តមានក្រុមហ៊ុន ទ្រី ភាព វិនិយោគតំបន់នោះមែន ក៏ប៉ុន្តែភារកិច្ចដោះស្រាយចំពោះការចោទប្រកាន់របស់ពលរដ្ឋ គឺហួសពីសមត្ថភាពអាជ្ញាធរឃុំ៖ «ក្រុមហ៊ុនហើយ ប៉ុន្តែសហគមន៍ការពារព្រៃមិនបាន ចេះតែរុករានធ្វើជាកម្មសិទ្ធិ ឥឡូវគេសង់ផ្ទះនៅត្រៀបត្រាអស់ហើយ។ យើងមិនដឹងធ្វើម៉េច គេចេះតែរុករាន ទន្ទ្រានកាន់កាប់ ឥឡូវវាលអស់ កើតជាភូមិហើយ»។
មន្ត្រីស៊ើបអង្កេតសមាគមអាដហុក ខេត្តព្រះវិហារលោក ឡោ ចាន់ អង្កេតឃើញថា វត្តមានក្រុមហ៊ុនទ្រី ភាព វិនិយោគទីនោះ គឺមិនបានផ្ដល់ប្រយោជន៍ដល់ពលរដ្ឋមូលដ្ឋាននោះទេ តែផ្ទុយទៅវិញអ្នកភូមិមួយចំនួនត្រូវបានក្រុមហ៊ុនប្ដឹង បង្កឲ្យពួកគេភ័យខ្លាច។ លោកថា កិច្ចសន្យាផ្ដល់ដី ១៥ ហិកតារសម្រាប់ប្រើប្រាស់ជាសមូហភាពសហគមន៍ក៏ត្រូវក្រុមហ៊ុនបំពានដែរ ដែលធ្វើឲ្យពលរដ្ឋខកចិត្ត៖ «គួរអោយសោកស្ដាយបំផុត ដែលមានក្រុមហ៊ុនវិនិយោគទីនោះ បែរជាមិនផ្ដល់ប្រយោជន៍ជូនសង្គមជាតិ និងពលរដ្ឋ បែរជាធ្វើឲ្យពលរដ្ឋរងទុក្ខវេទនា និងទទួលរងបណ្ដឹងជាការបំភិតបំភ័យ»។
សហគមន៍បន្ថែមថា អាជ្ញាធរពាក់ព័ន្ធ ខេត្តព្រះវិហារ ហាក់លម្អៀងទៅរកភាគីក្រុមហ៊ុនទៀតសោត បើទោះបីជា ក្រុមហ៊ុនឈូសឆាយព្រៃខុសច្បាប់អស់រាប់រយហិកតារក្តី ក៏គេមិនឃើញអាជ្ញាធរចុះអនុវត្តច្បាប់ដែរ ក៏ប៉ុន្តែបើពលរដ្ឋកាប់ទន្ទ្រានព្រៃរេចរឹលសូម្បីតែ ១ហិកតារនឹងត្រូវប្រឈមចំពោះមុខច្បាប់៕