វ៉ាក់សាំង​ជំនួយ​របស់​ជប៉ុន ១លានដូស​ មកដល់​កម្ពុជា​នៅ​ថ្ងៃសុក្រនេះ

ដោយ អាស៊ីសេរី
2021.07.22
វ៉ាក់សាំង​ជំនួយ​របស់​ជប៉ុន ១លានដូស​ មកដល់​កម្ពុជា​នៅ​ថ្ងៃសុក្រនេះ លោក មិកាមិ ម៉ាសាហ៊ីរ៉ូ (MIKAMI Masahiro) ឯកអគ្គរាជទូតជប៉ុន ប្រចាំកម្ពុជាបានប្រកាស​ពីការផ្ដល់ជំនួយ​វ៉ាក់សាំង​អាស្ត្រាហ្សេនីកា (AstraZeneca) ១ លានដូស​ដល់​កម្ពុជា កាលពីថ្ងៃទី១៣ ​ខែកក្កដា ឆ្នាំ២០២១។
រូប៖ ស្ថានទូតជប៉ុនប្រចាំនៅកម្ពុជា

វ៉ាក់សាំង​អាស្ត្រាហ្សេនីកា (AstraZeneca) ផលិត​នៅ​ជប៉ុន ចំនួន ១លានដូស ដែល​ជាជំនួយ​របស់​រដ្ឋាភិបាល​ជប៉ុន នឹង​ដឹក​មក​ដល់​កម្ពុជា នៅថ្ងៃសុក្រ ទី២៣ ខែកក្កដានេះ។

រដ្ឋាភិបាល​ជប៉ុនប្រកាស​ថា ជំនួយ​វ៉ាក់សាំង AstraZeneca នេះ​ធ្វើឡើង​ស្របតាម​ចំណង​មិត្តភាព​រវាង ជប៉ុន និង​កម្ពុជា ដោយ​ផ្អែកលើ​​​ស្ថានភាព​ការរាលដាល​ខ្លាំង​នៃ​ជំងឺកូវីដ-១៩ បច្ចុប្បន្ននៅ​កម្ពុជា។

ស្ថានទូត​ជប៉ុន​ប្រចាំ​នៅ​កម្ពុជាឱ្យដឹង​ថា គិតមក​ទល់​ពេល​នេះ រដ្ឋាភិបាល​ជប៉ុន​បានផ្ដល់​ជំនួយ​សរុប​ប្រមាណ​ជាង​ ៥០ លានដុល្លារ​អាមេរិកដល់​កម្ពុជា ក្នុងនោះ រួម​មាន​បរិក្ខារពេទ្យ ការកែ​លម្អ​មន្ទីរ​ពេទ្យ ការគាំទ្រ​ដល់​គម្រោង​របស់​អង្គការ​អន្តរជាតិ​នានា សម្រាប់វិធានការ​ទប់ស្កាត់​ការចម្លង​ជំងឺ​កាច​សាហាវ​នេះ នៅតាម​ព្រំដែន ព្រមទាំង​ផ្ដល់​បរិក្ខារ​សម្រាប់​ដឹកជញ្ជូន និង​រក្សាទុក​វ៉ាក់សាំង​ឱ្យ​បាន​ត្រឹម​ត្រូវផងដែរ។ ទន្ទឹមនេះ រដ្ឋាភិបាលជប៉ុន ក៏បាន​ផ្ដល់​ជា​កម្ចីប្រមាណ ២២៧ លានដុល្លារ​អាមេរិក សំរាប់​ប្រើប្រាស់​ក្នុង​កម្មវិធី​ឧបត្ថម្ភសាច់​ប្រាក់​ដល់​ប្រជាពលរដ្ឋខ្មែរ ​ដែលរងផល​ប៉ះពាល់​ដោយ​សារ​កូវីដ១៩ និង​សម្រាប់​ការពង្រឹង​ប្រព័ន្ធសុខាភិបាល។

ពាក់ព័ន្ធ​នឹង​ចំនួន​អ្នក​ស្លាប់​ដោយ​ជំងឺ​កូវីដ-១៩នេះដែរ ​តួលេខ​អ្នក​ស្លាប់បាន​កើន​ឡើង​ជិត​ ១ពាន់ ​២០០​នាក់ (.១៦៨) ​ហើយ បន្ទាប់ពីមាន​អ្នកជំងឺ១៩​នាក់​បន្ថែម​ទៀតបានស្លាប់​ កាលពី​ថ្ងៃ​ទី២១ ខែកក្កដា។ គិត​ត្រឹម​ព្រឹក​ថ្ងៃ​ទី២១ ខែកក្កដា កម្ពុជា​មាន​អ្នក​កើត​ជំងឺ​កូវីដ-១៩ ជិត ៧ម៉ឺន​នាក់ (៦៩.៦០៨) ក្នុង​នោះ អ្នក​ជា​សះ​ស្បើយ​មាន​ជិត​ ៦ម៉ឺន២ពាន់​នាក់ (៦១.77៩)

ចំពោះ​ការ​ចាក់​វ៉ាក់​សាំង​ការពារ​ជំងឺ​នេះ​វិញ ក្រសួង​សុខាភិបាល​ប្រកាស​ថា គិត​ត្រឹម​ថ្ងៃ​ទី២០ ខែ​កក្កដា មាន​ពលរដ្ឋ​​ជិត​ ៦លាន​៣សែន​នាក់​ ឬ​ស្នើ​​ជិត​៦៣% បាន​ចាក់​វ៉ាក់សាំង ក្នុង​ចំណោម​អ្នក​ដែល​ត្រូវ​ចាក់​សរុប ១០លាន​នាក់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។