អ្នកជំងឺកូវីដ-១៩ ចំនួន ១៣នាក់ទៀតបានស្លាប់ ដែលធ្វើឱ្យករណីស្លាប់ដោយសារជំងឺនេះកើនឡើងដល់ជាង ១ពាន់ ៩រយនាក់ (១.៩១៦) ហើយ គិតត្រឹមថ្ងៃទី១ខែកញ្ញា។ ករណីឆ្លងថ្មីមានចំនួន ៤៥៥នាក់ ក្នុងនោះ ៨០ នាក់ ជាករណីនាំចូលពីក្រៅប្រទេស។ មួយរយៈនេះ នៅខេត្តបន្ទាយមានជ័យ នៅតែមានអ្នកឆ្លងថ្មីច្រើនជាងគេ គឺមានអ្នកឆ្លងជំងឺកូវីដ១៩ជាង១០០នាក់ក្នុងមួយថ្ងៃ។
គិតត្រឹមព្រឹកថ្ងៃទី១ ខែកញ្ញា កម្ពុជាមានអ្នកកើតជំងឺកូវីដ-១៩ ជាង ៩ម៉ឺន ៣ពាន់នាក់(៩៣.៥១០)ក្នុងនោះអ្នកជាសះស្បើយមានជាង ៨ម៉ឺន ៩ពាន់នាក់(៨៩.១១៤)។ ចំពោះការចាក់វ៉ាក់សាំងបង្ការជំងឺកូវីដ-១៩វិញ ក្រសួងសុខាភិបាលប្រកាសថា គិតត្រឹមថ្ងៃទី៣១ ខែសីហារដ្ឋាភិបាលចាក់វ៉ាក់សាំងជូនពលរដ្ឋបានជាង ៩២ភាគរយហើយក្នុងចំណោមអ្នកដែលត្រូវចាក់សរុប ១០លាននាក់។ ចំណែកកុមារ និងយុវជនដែលមានអាយុពី ១២ឆ្នាំ ដល់ ១៧ឆ្នាំវិញ ក្រសួងប្រកាសថា ចាក់វ៉ាក់សាំងបានជិត ៧៩ភាគរយ ក្នុងចំណោមអ្នកដែលត្រូវចាក់សរុប ប្រមាណ ២លាននាក់។
ជាមួយគ្នានេះក្រសួងអប់រំយុវជននិងកីឡា នៅរសៀលថ្ងៃទី១ ខែកញ្ញា បានប្រជុំណែនាំដល់អាជ្ញាធរខេត្តរាជធានី ឱ្យពិនិត្យមើលលទ្ធភាពដើម្បីត្រៀមបើកដំណើរការគ្រឹះស្ថានសិក្សាចំណេះទូទៅគ្រប់កម្រិតនៅតំបន់ដែលមានការឆ្លងជំងឺកូវីដ-១៩ តិចតួចឡើងវិញ ក្នុងពេលឆាប់ៗខាងមុខ។ គម្រោងបើកសាលាឡើងវិញនេះ ដោយក្រសួងអប់រំ តម្រូវឱ្យសិស្សនិងគ្រូបង្រៀនត្រូវអនុវត្តន៍គម្លាតសុវត្ថិភាពនិងអនុវត្តតាមការណែនាំរបស់ក្រសួងសុខាភិបាលឱ្យបានខ្ជាប់ខ្ជួន។ក្រសួងអប់រំ ថា តំបន់ប្រជុំជន និងទីក្រុងដែលមានការឆ្លងតិច ដោយសិស្សដែលបានចាក់វ៉ាក់សាំងបង្ការជំងឺកូវីដរួចហើយ នឹងត្រូវអនុញ្ញាតឱ្យបើកសាលារៀនវិញបាន ប៉ុន្តែត្រូវមានសិស្សមិនលើសពី ១៥ នាក់ ក្នុងមួយថ្នាក់។ រីឯតំបន់ដែលមានហានិភ័យនៃការឆ្លងជំងឺកូវីដខ្ពស់ នឹងតម្រូវឱ្យសិស្សរៀនតាមអនឡាញដដែល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។