អ្នកជាប់ឃុំ​នៅពន្ធនាគារ​ខេត្តព្រះវិហារ​ចំនួន​១៤៧នាក់​សង្ស័យ​មាន​ជំងឺ​ផ្ដាសាយធំ

ដោយ សុជីវី
2020-09-01
Share
Prisoners-AmnestyInternestional-05-2020.jpg អ្នកជាប់ឃុំដេកប្រជ្រៀតគ្នាក្នុងពន្ធនាគារមួយ​នៅកម្ពុជា កាលពីខែឧសភាឆ្នាំ២០២០។
រូបថតពីវីដេអូរបស់ Amnesty International

ក្រសួងសុខាភិបាល​សង្ស័យថា ​អ្នកជាប់ឃុំ​ជិត១៥០នាក់​នៅ​ក្នុង​ពន្ធនាគារ​ខេត្តព្រះវិហារ​​មានកើត​ជំងឺ​ផ្ដាសសាយធំ។

សេចក្ដី​ប្រកាស​ព័ត៌មាន​របស់​អ្នកនាំពាក្យ​ក្រសួងសុខាភិបាល​អោយដឹង​នៅថ្ងៃទី១ ខែកញ្ញា​នេះថា ​អ្នកជាប់ឃុំ​ចំនួន​១៤៧នាក់​ក្នុង​នោះមាន​ស្រ្តី​១៩នាក់​បាន​កើតជំងឺ​ផ្ដាសសាយធំ ដែល​ហៅ​ជាភាសាអង់គ្លេស​ថា Influenza A។ ក្រុមគ្រូពេទ្យ​បានសម្រេច​ដាក់អ្នកទាំងនោះ​អោយ​នៅដាច់​ដោយឡែក និង​យក​សំណាក ដើម្បី​ធ្វើតេស្ដ​រក​វីរូស​ជំងឺ​កូវីដ-១៩។

អ្នកនាំពាក្យ​អគ្គនាយកដ្ឋាន​ពន្ធនាគារ លោក នុត សាវនា ប្រាប់អាស៊ីសេរី​​ថា ខាងពន្ធនាគារ​បាន​អនុវត្ត​តាម​ការណែនាំ​របស់​អ្នកបច្ចេកទេស​សុខាភិបាល។ លោកថា​មកដល់ពេល​នេះ​គឺ​ពុំមាន​អ្នកឆ្លង​ជំងឺ​នេះ​បន្តទៀត​ទេ។ លោកថា ​ចំពោះអ្នកជាប់ឃុំ​ផ្សេងទៀត​ក៏ត្រូវ​ណែនាំ​អោយ​អនុវត្ត​អនាម័យ​ការពារ​ការឆ្លង​ជំងឺនេះ៖ «យើងរម្លែកអ្នកណាឈឺ យើង​ដាក់ជាមួយ​អ្នកឈឺ អ្នកណាមិនទាន់ឈឺយើងញែកគាត់កុំអោយឆ្លង។ វិធានការ​យើងជំរុញ​អោយគាត់​បង្កើន​ការធ្វើអនាម័យ​សម្រាប់​ខ្លួនគាត់ បោកខោអាវ​អោយបាន​ញឹកញាប់ គេង​អោយ​បាន​ច្រើន ទៀតទាត់ ព្រោះ​អ្នកខ្លះ​អត់គេង​យប់ឡើង គាត់រវល់​ព្រោកប្រាជ្ញ​អីចឹង​គាត់គេង​អត់បានច្រើន​អាហ្នឹង​វាអាច​ជា​បញ្ហា ហើយ​រដូវនេះ​ជា​រដូវភ្លៀង ចឹង​វាអាចងាយ​នឹង​ឆ្លង​ជំងឺផ្ដាសសាយ មួយ​ទៀត​យើង​បាន​បាញ់​សម្លាប់​មេរោគ​ដោយ​សារធាតុ​ក្លរ នេះ​ជាវិធានការ​សម្រាប់​អ្នកជាប់ឃុំ​ផ្សេងទៀត ដែល​អត់ទាន់​ឆ្លង។»

ក្រៅពី​អ្នកទាំង១៤៧នាក់​ដែល​មានអាការៈសញ្ញាថា​មាន​ជំងឺ​ផ្ដាសសាយធំ​នេះហើយ ក្រសួងសុខាភិបាលក៏​បាន​រកឃើញ​ទៀតថា​នៅ​មាន​អ្នកជាប់ឃុំ​១១នាក់​ផ្សេងទៀត​ក្នុងពន្ធនាគារ​ខេត្តវិហារព្រះវិហារដដែល​សង្ស័យថា ​ឆ្លងជំងឺនេះដែរ ហើយ​ក៏ត្រូវ​ដាក់​អោយ​នៅដាច់ដោយឡែក​ក្នុង​បន្ទប់​ផ្សេង​មួយទៀត។ ជាមួយគ្នា​នេះ​មាន​អ្នកជាប់ឃុំ​ចំនួន៣២៦​នាក់ផ្សេងទៀត ដែល​មិន​សង្ស័យថា​ឆ្លង​ជំងឺនេះ​ តែ​តម្រូវ​អោយ​ដាក់​នៅក្នុង​បន្ទប់​ដោយឡែក​ដែរ។

នាយករងទទួលបន្ទុក​ផ្នែក​សិទ្ធិមនុស្ស​នៃអង្គការ​លីកាដូ លោក អំ សំអាត បារម្ភ​ពីសខុភាព​របស់​អ្នកជាប់ឃុំ​នៅតាម​ពន្ធនាគារ មិនថា​តែ​នៅ​ក្នុង​ពន្ធនាគារ​ខេត្ត​ព្រះវិហារនេះទេ នៅពេលដែល​ស្ថានភាព​ក្នុង​ពន្ធនាគារ​នៅ​មាន​បញ្ហា​ចោទ​ជាច្រើន​មិន​ទាន់ដោះស្រាយបាន ដែល​ក្នុង​នោះរួមមាន៖ ភាពចង្អៀតណែន របប​ចំណីអាហារ​មិនគ្រប់គ្រាន់ បញ្ហា​អនាម័យ និង​សេវាថែទាំ​សុខភាព​អ្នកជាប់ឃុំ​ជាដើម។

លោក អំ សំអាត បន្ត​ថា​ចាំបាច់ណាស់ ដែល​អាជ្ញាធរ​ត្រូវធានា​កាត់បន្ថយ​ភាពចង្អៀតណែន​ក្នុងពន្ធនាគារ​តាម​គ្រប់​លទ្ធភាព ដែល​អាច​ធ្វើ​បាន។

រដ្ឋមន្រ្តីក្រសួង​មហាផ្ទៃ លោក ស ខេង ធ្លាប់​លើកឡើង​ពីក្ដីបារម្ភ​ពីបញ្ហា​សុខភាព​អ្នកជាប់ឃុំ នៅពេល ដែលចំនួន​អ្នកជាប់ឃុំ​ដោយសារ​បទល្មើសគ្រឿងញៀន​កើនឡើង​យ៉ាងគំហុក។ លោកថា​ចំនួន​អ្នកជាប់ឃុំ​នៅ​ទូទាំងប្រទេស​គឺ​មាន​ចំនួន​ជាង៤ម៉ឺននាក់។

ចំណែក​ក្នុង​របាយការណ៍​របស់​អង្គការលើកលែង​អន្តរជាតិ(Amnesty International) ដែលចេញ​កាលពី​ខែឧសភា ឆ្នាំ២០២០ វាយតម្លៃថា​ការកើនឡើង​នូវភាពចង្អៀតណែន​ក្នុងពន្ធនាគារ​នាំអោយ​ការរំលោភបំពាន​សិទ្ធិអ្នកជាប់ឃុំ​ក៏​កើនឡើងដែរ ព្រមទាំង​បង្ក​អោយ​មាន​ភាពងាយ​រងគ្រោះ​ដល់សុខភាព​សាធារណៈ និង​បង្កើតឱកាស​អោយមាន​អំពើ​ពុករលួយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។