ក្រសួង​ត្រៀម​បុគ្គលិក​ពេទ្យ​ជាង ២​ពាន់​នាក់​ដើម្បី​តាមដាន​និង​ឆ្លើយ​តប​ករណី​មាន​ជំងឺឆ្លង​កូវីដ​-១៩

ដោយ អាស៊ីសេរី
2020-02-29
អ៊ីម៉ែល
មតិ
Share
បោះពុម្ព
លោក​នាយក​រដ្ឋមន្ត្រី ហ៊ុន សែន ទទួល​ស្វាគមន៍​អ្នក​ដំណើរ​បរទេស ចុះ​ពី​លើ​កប៉ាល់ Westerdam ពេល​ចូល​ចត​នៅ​កំពង់ផែ​ក្រុង​ព្រះសីហនុ កាល​ពី​ថ្ងៃ​ទី១៤ ខែ​កុម្ភៈ ឆ្នាំ២០២០។
លោក​នាយក​រដ្ឋមន្ត្រី ហ៊ុន សែន ទទួល​ស្វាគមន៍​អ្នក​ដំណើរ​បរទេស ចុះ​ពី​លើ​កប៉ាល់ Westerdam ពេល​ចូល​ចត​នៅ​កំពង់ផែ​ក្រុង​ព្រះសីហនុ កាល​ពី​ថ្ងៃ​ទី១៤ ខែ​កុម្ភៈ ឆ្នាំ២០២០។
រូប៖ ហ្វេសប៊ុក​លោក ហ៊ុន សែន

ក្រសួង​សុខាភិបាល​កម្ពុជា ប្រកាស​ថា ក្រសួង​មាន​ក្រុម​ការងារ​ឆ្លើយតប​បន្ទាន់​មួយ ដែល​មាន​បុគ្គលិក​ជាង ២​ពាន់​នាក់ ដែល​ទទួល​បាន​ការ​បណ្ដុះ​បណ្ដាល ដើម្បី​តាមដាន និង​ឆ្លើយតប​ជំងឺ​កើតឡើង​ថ្មីៗ នេះ និង​ត្រៀម​លក្ខណៈ​រួច​ជា​ស្រេច ក្នុង​ករណី​មាន​ជំងឺកូវីដ-១៩ (COVID-19) កើត​ឡើង។

ក្នុង​សេចក្ដីប្រកាស​របស់​ខ្លួន​ចុះ​ថ្ងៃ​ទី​២៨ កុម្ភៈ ក្រសួង​សុខាភិបាល ក៏​បាន​ត្រៀម​បន្ទប់​ដាក់​អ្នកជំងឺ ដាច់​ដោយឡែក​នៅ​មន្ទីរពេទ្យ​មិត្តភាព​ខ្មែរ​-​សូវៀត ក្នុង​ករណី​រក​ឃើញ​មាន​ជំងឺ​កូវីដ​-១៩ ហើយ​នៅ​តាម​បណ្ដា​ខេត្ត​នានា ក៏​មាន​ត្រៀម​សម្ភារៈ បរិក្ខារ​ពេទ្យ និង​ឱសថ​ចាំបាច់​សម្រាប់​ការ​ព្យាបាល​ផង​ដែរ។

ទន្ទឹម​គ្នា​នេះ ក្រសួង​សុខាភិបាល តម្រូវ​ឱ្យ​មន្ទីរ​សុខាភិបាល​ទាំង ២៥​រាជធានី ខេត្ត ចុះ​អប់រំ​ពលរដ្ឋ នៅ​តាម​សហគមន៍ អំពី​វិធី​បង្ការ​ជំងឺ កូវីដ-១៩ និង​ផ្ដល់​ដំណឹង​ជាបន្ទាន់​ដល់​ក្រសួង បើ​មាន​ករណី​សង្ស័យ។

គិត​មក​ដល់​ថ្ងៃ​ទី​២៩ កុម្ភៈ ក្រសួង អះអាង​ថា មិន​ទាន់​មាន​ពលរដ្ឋ​ខ្មែរ​ណា​ម្នាក់ ត្រូវ​បាន​រក​ឃើញ​ថា មាន​ជំងឺ​កូវីដ-១៩ នោះ​ទេ។

ថ្មី​នេះ ប្រធាន​អង្គការ​សុខភាព​ពិភព (WHO) លោក ថែ​តរ៉ូស អាដាណម (Tedros Adhanom Ghebreyesus) ថ្លែង​ក្នុង​សន្និសីទកាសែត ថា ការ​ឆ្លង​រាលដាល​នៃ​ជំងឺ​កូវីដ​-១៩ គឺ​ឡើង​ដល់​ចំណុច​មួយ ដែល​ប្រទេស​សមាជិក​ទាំងអស់​ត្រូវ​ឆ្លើយតប​ឱ្យ​បាន​លឿន​បំផុត​។ លោក​បញ្ជាក់​ថា ចំពោះ​ប្រទេស​ដែល​ថា​ខ្លួន នឹង​មិន​មាន​ជំងឺ​នេះ គឺជា​កំហុស​ឆ្គង​ដ៏​គ្រោះថ្នាក់​បំផុត។

តួលេខ​អ្នក​កើត​ជំងឺ​កូវីដ​-១៩ នៅ​ទូទាំង​ពិភពលោក គិត​ត្រឹម​ល្ងាច​ថ្ងៃ​ទី​២៩ ខែ​កុម្ភៈ បាន​កើន​ឡើង​ដល់​ជាង ៨​ម៉ឺន ៥​ពាន់​នាក់ (៨៥.៤០៦​នាក់​)​។ ចំនួន​នេះ គឺ​ឡើង​លើស​ថ្ងៃ​ម្សិលមិញ​ចំនួន​ជិត ២​ពាន់​នាក់ (.៩៩៩​នាក់​)​។ រីឯ​អ្នក​ស្លាប់​ដោយសារ​ជំងឺ​នេះ បាន​កើន​ឡើង​ដល់​ចំនួន​ជិត ៣​ពាន់​នាក់​(.៩២៤​នាក់​) ហើយ​។ ដោយឡែក អ្នក​ដែល​បាន​ព្យាបាល​ជាសះស្បើយ​វិញ មាន​ចំនួន​ជាង ៣​ម៉ឺន ៩​ពាន់​នាក់ (៣៩.៥៤៩​នាក់)។អ្នក​ស្លាប់ និង​អ្នក​ឆ្លង​ភាគ​ច្រើន​បំផុត គឺ​នៅ​ប្រទេស​ចិន​។ បន្ទាប់ពី​ចិន គឺ​ប្រទេស​កូរ៉េខាងត្បូង ដែល​មាន​ពលករ​ខ្មែរ​រស់នៅ​ធ្វើការ​នៅ​ទី​នោះ​ដែរ ពេល​នេះ ក៏​កំពុង​មាន​សន្ទុះ​ឆ្លង​ខ្លាំង ដល់​ជិត ៣​ពាន់​នាក់ (.៩៣១​នាក់)

អង្គការ​សុខភាព​ពិភពលោក WHO ទទូច​ឱ្យ​ប្រទេស​នីមួយៗ ចាត់វិធានការ​ត្រៀម​ទប់​ទល់នឹង​ការ​ឆ្លង​រាតត្បាត​នៃ​ជំងឺ​កាច​សាហាវ​នេះ ដោយ​ព្រមាន​ថា មនុស្ស​រាប់​លាន​នាក់ អាច​នឹង​ឆ្លង​ជំងឺ​នេះ នៅ​ពេល​ខាងមុខ។

ស្រប​ពេល​ដែល​ជំងឺ​នេះ​កំពុង​ឆ្លង​រាលដាល​ដល់​ប្រទេស​ជាង ៤០ លើ​ពិភពលោក ប្រធានាធិបតី​សហរដ្ឋអាមេរិក បាន​សម្រេច​លុបចោល​គម្រោង​កិច្ចប្រជុំ​កំពូល​ពិសេស អាស៊ាន​-​អាមេរិក ដែល​ក្នុង​នោះ មេដឹកនាំ​កម្ពុជា​ក៏​បាន​គ្រោង​ទៅ​ចូលរួម​ដែរ។ ដោយ​ឡែក នៅ​ឯ​ប្រទេស​អូស្ត្រាលី​វិញ អាជ្ញាធរ​សុខាភិបាល រដ្ឋ​ញូសៅវេល (New South Wale) ក៏បាន​ក្រើន​រំឭក​ពលរដ្ឋ​ឱ្យ​មាន​ការប្រុងប្រយ័ត្ន​ក្នុង​ការ​តាមដាន​ខ្លួនឯង លើ​រោគសញ្ញា​ផ្លូវ​ដង្ហើម ឬ​គ្រុនក្ដៅ​ពេល​វិលត្រឡប់​មកពី​ប្រទេស​កម្ពុជា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល