សាលា​ក្រុង​ចាប់​ផ្ដើម​ពង្រឹង​ការ​អនុវត្ត​បម្រាម​ជក់​បារី​នៅ​កន្លែង​ធ្វើ​ការ​និង​ទី​សាធារណៈ

ដោយ ឡេង ម៉ាលី
2014.03.26
ថ្នាំ​ជក់ ៣០៥ ក្រុម​យុវជន​កាយរឹទ្ធិ​ចុះ​ហែក​ស្លាក​ផ្សព្វផ្សាយ​ពាណិជ្ជកម្ម​បារី នៅ​ក្បែរ​វត្ត​ភ្នំ រាជធានី​ភ្នំពេញ នៅ​ថ្ងៃ​ទី​៦ ខែមិថុនា ឆ្នាំ​២០១៣។
RFA

សាលា​រាជធានី​ភ្នំពេញ ចាប់​ផ្ដើម​ពង្រឹង​ការ​អនុវត្ត​សារាចរ​លេខ​០០៣ ស្ដីពី​ការ​ហាមប្រាម​លើ​ការ​ជក់​បារី និង​បង្ហុយ​ផ្សែង​ផលិតផល​ថ្នាំ​ជក់​នៅ​កន្លែង​ធ្វើ​ការ និង​កន្លែង​សាធារណៈ។ ការ​ពង្រឹង​នេះ គឺ​ចាប់​ផ្ដើម​ពី​មន្ត្រី​សាធារណៈ​នៅ​តាម​ឃុំ​សង្កាត់​មុន​គេ។

មាន​មន្ត្រី​ឃុំ​សង្កាត់​នៃ​រាជធានី​ភ្នំពេញ ជិត ២០០​នាក់ ត្រូវ​បាន​សាលា​រាជធានី​ភ្នំពេញ បើក​វគ្គ​បណ្ដុះ​បណ្ដាល​ស្ដីពី​ការ​អនុវត្ត​សារាចរ​លេខ​០០៣ ស.ន.ក ដែល​ហាម​ជក់ និង​បង្ហុយ​ផ្សែង​ផលិតផល​ថ្នាំ​ជក់​នៅ​កន្លែង​ធ្វើ​ការ និង​កន្លែង​សាធារណៈ នៅ​ព្រឹក​ថ្ងៃ​ទី​២៥ មីនា។

អភិបាល​រង​រាជធានី​ភ្នំពេញ អ្នកស្រី ម៉ក់ វណ្ណស៊ីថា មាន​ប្រសាសន៍​ថា គោល​បំណង​នៃ​វគ្គ​បណ្ដុះ​បណ្ដាល​នេះ គឺ​សំដៅ​ពង្រឹង​សមត្ថភាព និង​ចំណេះ​ដឹង​ដល់​អាជ្ញាធរ​មូលដ្ឋាន ស្ថាប័ន​មាន​សមត្ថកិច្ច និង​ផ្នែក​ពាក់ព័ន្ធ ឱ្យ​ជ្រួតជ្រាប​កាន់​តែ​ច្បាស់​អំពី​គ្រោះថ្នាក់​សុខភាព ដែល​បង្ក​ដោយសារ​ការ​ជ្រៀតជ្រែក​យ៉ាង​ស្ងៀមស្ងាត់​ពី​ផ្សែង​ផលិតផល​ថ្នាំ​ជក់ ហើយ​រួម​គ្នា​រិះរក​មធ្យោបាយ និង​លទ្ធភាព​គ្រប់​បែប​យ៉ាង ដើម្បី​ទប់ស្កាត់ និង​ការពារ​សុខុមាលភាព​របស់​ប្រជាពលរដ្ឋ។

អ្នកស្រី ម៉ក់ វណ្ណស៊ីថា បន្ត​ថា ការ​ហាម​ជក់ ឬ​បង្ហុយ​ផ្សែង​បារី​នេះ គឺ​ជា​របត់​កែ​ទម្លាប់​ថ្មី​មួយ​ចំពោះ​ការ​ជក់​បារី ហើយ​អ្នកស្រី​ណែនាំ​ដល់​មន្ត្រី​អាជ្ញាធរ​មូលដ្ឋាន ឱ្យ​អនុវត្ត​សារាចរ​លេខ​០០៣ ឱ្យ​មាន​ប្រសិទ្ធភាព៖ «បច្ចុប្បន្ន ប្រជាពលរដ្ឋ​យើង​មិន​សូវ​ចាប់​អារម្មណ៍​នឹង​ហានិភ័យ​ដែល​បណ្ដាល​មក​ពី​ផ្សែង​ផលិតផល​ថ្នាំ​ជក់​នោះ​ទេ។ ប៉ុន្តែ ប្រជាពលរដ្ឋ​ខ្លះ​មិន​អាច​ទទួល​យក​បាន​នូវ​ក្លិន​ឈ្ងៀម អ្នក​ខ្លះ​ងាក់ងើ ឬ​រក​កល​ចង់​ក្អួត​នៅ​ពេល​គេ​រង​ផល​ប៉ះពាល់​ពី​ផ្សែង​បារី។ ពិសេស​ផលិតផល​នេះ​ប៉ះពាល់​ដល់​ស្ត្រី និង​កុមារ។ ក្នុង​នាម​យើង​ជា​អាជ្ញាធរ​មូលដ្ឋាន ត្រូវ​មាន​ភារកិច្ច​អនុវត្ត​សារាចរ​នេះ​ឱ្យ​មាន​ប្រសិទ្ធភាព​ខ្ពស់»

នាយក​អង្គការ​ចលនា​ដើម្បី​សុខភាព​កម្ពុជា លោក​វេជ្ជបណ្ឌិត មុំ គង់ ពន្យល់​ថា ថ្នាំ​ជក់​ជា​កត្តា​ចម្បង​មួយ​ដែល​បង្ក​ឱ្យ​មាន​ជំងឺ ជាពិសេស​ជំងឺ​មហារីក៖ «នៅ​ពេល​ដែល​យើង​ប្រើប្រាស់​ថ្នាំ​ជក់ វា​បង្ក​ឱ្យ​មាន​ជំងឺ​ជាច្រើន​មុខ មិន​ចំពោះ​តែ​សួត​យើង​មួយ​ទេ តែ​រួម​មាន​ជក់​បារី​ហ្នឹង​មាន​ជំងឺ​មហារីក។ មហារីក​ហ្នឹង​មិន​កើត​តែ​លើ​សួត​ទេ វា​កើត​ឡើង​តាំង​ពី​មាត់ បំពង់​ក បំពង់​អាហារ សួត ក្រពះ និយាយ​រួម​គ្រប់​សរីរាង្គ​ទាំងអស់។ ពេល​ដែល​យើង​ជក់​បារី​ទៅ ផ្សែង​ពុល​ជាតិ​ផ្សិត និង​ជាតិ​ថារ៍ នៅ​ក្នុង​ថ្នាំ​ជក់​ជ្រាប​ចូល​ក្នុង​ឈាម​យើង ហើយ​ធ្វើ​ចលនា​ទៅ​គ្រប់​សរីរាង្គ។ អ៊ីចឹង​សរីរាង្គ​ណា​ក៏​អាច​ទទួល​ផល​ប៉ះពាល់​ពី​ការ​កើត​ជំងឺ​មហារីក​នេះ​ដែរ។ បន្ទាប់​ពី​ហ្នឹង​ទៀត មហារីក​ប្រូស្តាត មហារីក​ឈាម ហើយ​និង​មហារីក​ដោះ​ចំពោះ​ស្ត្រី»

លោក​វេជ្ជបណ្ឌិត មុំ គង់ មាន​ប្រសាសន៍​ដែរ​ថា អ្នក​ដែល​មិន​ជក់​បារី ក៏​អាច​មាន​ជំងឺ​ធ្ងន់ធ្ងរ​ដូច​គ្នា​ដែរ កាល​ណា​នៅ​ក្បែរ​អ្នក​ជក់​បារី ដោយសារ​តែ​ការ​ស្រូប​ផ្សែង​បារី​ពី​អ្នក​ជក់៖ «អ៊ីចឹង​ចំពោះ​មនុស្ស​ពេញ​វ័យ អាច​ដាច់​សរសៃ​ឈាម​ខួរ​ក្បាល​ដូច​អ្នក​ជក់​ដែរ រលាក​ច្រមុះ មហារីក​ច្រមុះ មហារីក​សួត រលាក​សួត​រ៉ាំរ៉ៃ។ ចំពោះ​កុមារ ជំងឺ​ដុះ​សាច់​ក្នុង​ខួរ​ក្បាល ដំបៅ​ត្រចៀក ឡើង​កូន​កណ្ដុរ ជំងឺ​ផ្លូវ​ដង្ហើម និង​សួត ដំណើរ​ការ​មិន​ប្រក្រតី ជំងឺ​ហឺត។ល។»

តំណាង​អង្គការ​សុខភាព​ពិភពលោក ប្រចាំ​កម្ពុជា លោក​វេជ្ជបណ្ឌិត យ៉ិល ដារ៉ាវុធ ថ្លែង​ថា អត្រា​អ្នក​ស្លាប់​នៅ​លើ​ពិភពលោក​ដោយសារ​ការ​ប្រើប្រាស់​ផលិតផល​ថ្នាំ​ជក់ ដូច​ជា ចុក​ថ្នាំ និង​ជក់​បារី បាន​កើន​ឡើង​ខ្ពស់​ជា​លំដាប់។ នៅ​ប្រទេស​កម្ពុជា អ្នក​ប្រើប្រាស់​ផលិតផល​ថ្នាំ​ជក់ ទាំង​ជក់ និង​ចុក មាន​ចំនួន ២​លាន​នាក់។ លោក​វេជ្ជបណ្ឌិត​ថ្លែង​ថា អត្រា​អ្នក​ចុក​ថ្នាំ និង​អ្នក​ជក់​បារី មិន​បាន​ថយ​ចុះ​ទេ ហើយ​អត្រា​អ្នក​ស្លាប់​ភាគ​ច្រើន​ជា​បុរស៖ «ធ្វើ​វិភាគ​ទៅ​ឃើញ​ថា ប្រជាពលរដ្ឋ​យើង​ស្លាប់​ក្នុង​មួយ​ឆ្នាំ​មាន​ប្រមាណ​ជិត​មួយ​ម៉ឺន​នាក់។ ប៉ុន្តែ បើ​យើង​គណនា​ពី​ស្ត្រី​វិញ ស្ត្រី​ស្លាប់​ដោយ​ការ​ប្រើប្រាស់​ថ្នាំ​ជក់​មាន ៣.២២៣​នាក់ បុរស ៦.៥០០​នាក់ គឺ​បុរស​ច្រើន​ជាង​ស្ត្រី​ក្នុង​មួយ​ឆ្នាំ ស្លាប់​បណ្ដាល​មក​ពី​ការ​ជក់​បារី (ថ្នាំ​ជក់)។ បុរស​ច្រើន​ជាង​ស្ត្រី​ជិត​ពីរ​ដង។ ហេតុផល​ដោយសារ​អត្រា​ជក់​បារី​ច្រើន​សម្រាប់​បុរស​តួលេខ​ស្លាប់។ អ៊ីចឹង​ក្នុង​មួយ​ឆ្នាំ​យើង​ខាត​មនុស្ស​អស់​មួយ​ម៉ឺន​នាក់ មួយ​ថ្ងៃ ៣០​នាក់ វ័យ​កណ្ដាល ស្លាប់​តាំង​ពី​អាយុ ៣០​ឆ្នាំ​ទៅ។ អ្នក​ខ្លះ ៤០​ជាង​ស្លាប់។ វ័យ​នេះ គឺ​វ័យ​ដែល​នៅ​កម្លាំង​នៅ​ឡើយ អ៊ីចឹង​យើង​ខាត​ធនធាន​ទៀត»

ការ​ហាម​ជក់ និង​ការ​បង្ហុយ​ផ្សែង​ផលិតផល​ថ្នាំ​ជក់​នៅ​កន្លែង​ធ្វើ​ការ និង​កន្លែង​សាធារណៈ គឺ​ជា​កិច្ច​ប្រឹងប្រែង​មួយ​របស់​កម្ពុជា ក្នុង​ការ​អនុវត្ត​តាម​អនុសញ្ញា​គ្រប់គ្រង​ថ្នាំ​ជក់​របស់​អង្គការ​សុខភាព​ពិភពលោក ដែល​ប្រទេស​កម្ពុជា ជា​ភាគី​ដែរ។

ទាក់ទង​នឹង​កិច្ច​ប្រឹងប្រែង​កាត់​បន្ថយ​គ្រោះថ្នាក់​សុខភាព​ដោយសារ​ផ្សែង​បារី ក្រសួង​សុខាភិបាល បាន​ចេញ​សារាចរ​មួយ​កាល​ពី​ថ្ងៃ​ទី​៤ កុម្ភៈ ដែល​ណែនាំ​ដល់​អ្នក​គ្រប់គ្រង ឬ​ម្ចាស់​កន្លែង​ធ្វើ​ការ ឬ​កន្លែង​សាធារណៈ ដូច​ជា​មន្ទីរពេទ្យ គ្រឹះស្ថាន​សិក្សា ទារកដ្ឋាន សួន​កុមារ គ្រឹះស្ថាន​សាសនា សារមន្ទីរ រមណីយដ្ឋាន​វប្បធម៌​ប្រវត្តិសាស្ត្រ និង​កន្លែង​ងាយ​ឆាបឆេះ ត្រូវ​ហាម​អ្នក​ជក់ ឬ​បង្ហុយ​ផ្សែង​ផលិតផល​ថ្នាំ​ជក់​នៅ​កន្លែង​ទាំង​នោះ។ អ្នក​គ្រប់គ្រង ឬ​ម្ចាស់​កន្លែង​ធ្វើ​ការ ឬ​កន្លែង​សាធារណៈ ត្រូវ​ហាម​អ្នក​ជក់​នៅ​កន្លែង​ទាំង​នោះ ឬ​អញ្ជើញ​ឱ្យ​អ្នក​ជក់​ចេញ​ក្រៅ ឬ​រក​អន្តរាគមន៍​ពី​អាជ្ញាធរ​មាន​សមត្ថកិច្ច៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។