ពលរដ្ឋ​នៅ​ក្រុង​ប៉ោយប៉ែត​មិន​ឲ្យ​អាជ្ញាធរ​ដោះដូរ​មណ្ឌល​សុខភាព​នៅ​ជាប់​ព្រំដែន​ទៅ​ឲ្យ​ឯកជន​​

ដោយ ម៉ៅ សុធានី
2018-11-28
អ៊ីម៉ែល
មតិ
Share
បោះពុម្ព
មណ្ឌល​សុខភាពប៉ោយប៉ែត ១  ដែល​ពលរដ្ឋ​តវ៉ា​មិន​ឲ្យ​ដោះដូរ​ជា​ឯកជន។
មណ្ឌល​សុខភាពប៉ោយប៉ែត ១ ដែល​ពលរដ្ឋ​តវ៉ា​មិន​ឲ្យ​ដោះដូរ​ជា​ឯកជន។
រូបថត៖ សមាគម​សិទ្ធិមនុស្ស ADHOC

ប្រជាពលរដ្ឋ​នៅ​ក្រុង​ប៉ោយប៉ែត​ ខេត្ត​បន្ទាយមានជ័យ​ បាន​ប្រតិកម្ម​នឹង​អាជ្ញាធរ​ដែល​មាន​គម្រោង​ដោះដូរ​មណ្ឌល​សុខ​ភាព​ប៉ោយប៉ែត​ទៅ​ដាក់​នៅ​ទីតាំង​ថ្មី​ថា ជា​ការ​ប្រព្រឹត្ត​អំពើពុករលួយ​។ ពលរដ្ឋ​ព្រួយបារម្ភ​​ថា ​​ការ​ដោះដូរ​​​នេះ​​ធ្វើ​ឲ្យ​ខាតបង់​ទ្រព្យសម្បត្តិ​របស់​​រដ្ឋ ព្រោះ​ដី​នៅ​ទីតាំង​ចាស់​ចំ​កណ្ដាល​ទីប្រជុំជន​ដែល​មាន​តម្លៃ​ខ្ពស់​ ហើយ​ដូរ​ទៅ​ដាក់​នៅ​ទីតាំង​ថ្មី​​ឆ្ងាយ​ពី​ទី​ប្រជុំ​ជន​ជា​រឿង​មិន​ល្អ​នោះ​ទេ។

ប្រជាពលរដ្ឋ​នៅ​ក្រុង​ប៉ោយប៉ែត​ លោក វន វ័ន​ ឲ្យ​ដឹង​នៅ​ថ្ងៃ​ទី​២៧​វិច្ឆិកា​ថា ទីតាំង​មណ្ឌល​សុខភាព​ប៉ោយប៉ែត​សព្វ​ថ្ងៃ​សមរម្យ​ជា​ទីកន្លែង​សម្រាប់​ព្យាបាល​ជំងឺ​ ដែល​​ពលរដ្ឋ​ងាយស្រួល​ក្នុង​ការ​ធ្វើ​ដំណើរ​ទៅ​ពិនិត្យ​ជំងឺ​ឆាប់​ដល់​មន្ទីរ​ពេទ្យ​ ហើយ​​មិន​បាច់​ចំណាយ​ពេល​យូរ​នោះ​ទេ​ ​ព្រោះ​នៅ​ជាប់​ផ្លូវ​ជាតិ​លេខ​ប្រាំ ក្បែរ​រង្វង់​មូល​ច្រក​ព្រំដែន​កម្ពុជា ថៃ ជា​ទីប្រជុំជន​ ហើយ​​​ផ្លូវ​​ស្រួល​ធ្វើ​ដំណើរ​។លោក​រិះគន់​អាជ្ញាធរ​ក្រុង​នេះ​ថា ទំនង​ឃុបឃិត​គ្នា​ប្រព្រឹត្ត​អំពើ​ពុករលួយ​ហើយ​បាន​ជា​ចង់​ប្ដូរ​ទីតាំង​មណ្ឌល​សុខភាព​មួយ​នេះ​ទៅ​ដាក់​នៅ​ឆ្ងាយ​ពី​ទីប្រជុំ​នោះ។លោក​ វន វ័ន​បន្ថែម​ទៀត​ថា​ ប្រជាពលរដ្ឋ​នៅ​ក្រុង​ប៉ោយប៉ែត​មិន​គាំទ្រ​ឲ្យ​មាន​ការ​ផ្លាស់​ប្ដូរ​ទីតាំង​មណ្ឌលសុខភាព​នេះ​ជា​ដាច់ខាត​ ព្រោះ​ជា​ការ​​ធ្វើ​ឲ្យ​ហិនហោច​ទ្រព្យ​សម្បត្តិ​ជាតិ៖ «បញ្ហា​នេះ​បើ​សិន​មិន​មាន​អំពើពុករលួយ​ទេ​ អាជ្ញាធរ​ធ្វើ​មណ្ឌល​សុខភាព​កន្លែង​ផ្សេង​មួយ​ទៀត​ ហើយ​ទុក​មណ្ឌល​សុខភាព​ចាស់​នៅ​ដដែល​ទៅ​ រឿង​នេះ​មាន​ន័យ​ថា​ដូរដោះ​ពី​កន្លែង​ថ្លៃ​ទៅ​កន្លែង​ដី​ថោក​ ហើយ​នៅ​ឆ្ងាយ​ពី​ប្រជាពលរដ្ឋ​រស់​នៅ​ ដូច្នេះ​ខ្ញុំ​មិន​សប្បាយចិត្ត​ទេ​ហើយ​ខ្ញុំ​មិន​ចង់​ឲ្យ​ប្ដូរ​ទៅ​ដាក់​កន្លែង​ណា​ឆ្ងាយ​ទេ សំខាន់​បង្កើត​ថ្មី​បន្ថែម​ទៀត​ ដោយសារ​ប្រជាពលរដ្ឋ​កាន់​តែ​កើន​ច្រើន»

ប្រតិកម្ម​របស់​ពលរដ្ឋ​នេះ​ដោយសារ​ថ្មី​នេះ​ពួកគាត់​ទទួល​ដំណឹង​ថា​អាជ្ញាធរ​ពាក់ព័ន្ធ​ត្រៀម​ដោះដូរ​ទី​តាំង​មណ្ឌល​សុខភាព​ប៉ោយប៉ែត​សព្វ​ថ្ងៃ​ទៅ​ឲ្យ​ឯកជន​ដើម្បី​សង់​អាគារ​សម្រាប់​បម្រើ​ប្រយោជន៍​ឯកជន​ ហើយ​ទីតាំង​ថ្មី​នៅ​ឆ្ងាយ​ពី​ទីប្រជុំជន ហើយ​ផ្លូវ​ស្ងាត់​និង​ពិបាក​ធ្វើ​ដំណើរ។ ទោះ​បី​យ៉ាង​ណា​ក្ដី

ចៅ​សង្កាត់​ប៉ោយប៉ែត លោក ភោគ លន មាន​ប្រសាសន៍​ថា មណ្ឌល​សុខភាព​ប៉ោយប៉ែត​នៅតែ​ជា​មណ្ឌល​សុភាព​នៅ​​ទីតាំង​ចាស់​ដដែល​ ដោយ​មិន​មាន​ការ​ផ្លាស់​ប្ដូរ​​ដី​​​​ទៅ​ឲ្យ​ក្រុម​ហ៊ុន ឯកជន​​ដូច​ការ​ព្រួយបារម្ភ​របស់​ពលរដ្ឋ​​នោះ​ឡើយ៖ «មិន​មាន​ទេ វា​ជា​រឿង​អតីតកាល​ទេ​កាល​ពី​៥ឆ្នាំ​មុន​ឯណោះ​ទេ តែ​សព្វ​ថ្ងៃ​មិន​អាច​ទេ​ ព្រោះ​ដី​ជា​របស់​រដ្ឋ​ហើយ​មិន​អាច​ចេះ​តែ​ដោះដូរ​បាន​ទេ។ប៉ុន្តែ​កន្លង​មក​ខ្ញុំ​សំណូម​ពរ​ឲ្យ​ធ្វើ​មណ្ឌល​សុខភាព​ថ្មី​នៅ​ភូមិ​ទំនប់​ក​ប្រាំ​ តែ​អត់​បាន»

សព្វ​ថ្ងៃ​នៅ​ក្រុង​ប៉ោយប៉ែត​មាន​ប្រជាពលរដ្ឋ​រស់​នៅ​ច្រើន​ ហើយ​មាន​មណ្ឌល​សុខភាព​តែ​មួយ​ទេ ដូច្នេះ​ធ្វើ​ឲ្យ​លំបាក​ដល់​ការ​ព្យាបាល​ជំងឺ​​របស់​ពលរដ្ឋ​មិន​បាន​ទូលំទូលាយ​​ ជា​ពិសេស​ពលរដ្ឋ​ដែល​រស់​នៅ​ជាប់​ព្រំដែន​ទី​ដាច់ស្រយាល នៅ​ខែ​វស្សា​ផ្លូវ​ពិបាក​ធ្វើ​ដំណើរ។

មន្ត្រី​សម្របសម្រួល​សមាគម​ការពារ​សិទ្ធិមនុស្ស​ អាដហុក (Adhoc)ខេត្ត​បន្ទាយមានជ័យ​លោក ស៊ុំ ច័ន្ទគា លើក​ឡើង​ថា​ លោក​ក៏​បាន​ទទួល​ដំណឹង​ពី​ដោះដូរ​ដី​មណ្ឌល​សុខភាព​នេះ​ដែរ ហើយ​​លោក​សោក​ស្ដាយ​ បើ​សិន​ជា​អាជ្ញាធរ​ដោះដូរ​ដី​នោះ​មែន​ ព្រោះ​ទីតាំង​ចាស់​នៅ​ជាប់​ផ្លូវ​ធំ​ ដែល​ប្រជា​ពលរដ្ឋ​ងាយ​​ស្រួល​ទៅ​ព្យាបាល​ជំងឺ ជាពិសេស​ស្ត្រី​សម្រាល​កូន​ពេល​យប់​ព្រលប់។ លោក ស៊ុំ ច័ន្ទគា បន្ថែម​ទៀត​ថា រឿង​នេះ​ជា​ការ​ដោះដូរ​ដើម្បី​បាន​ផល​កម្រៃ​ទៅ​លើ​បុគ្គល​ច្រើន​ជាង​ហេតុផល​ផ្សេង​ ព្រោះ​ដោយសារ​តែ​កំណើន​ជនជាតិ​ចិន​ហូរ​ចូល​មក​ក្រុង​ប៉ោយប៉ែត​កាន់​តែ​ច្រើន​ ទើប​​ធ្វើ​ឲ្យ​ដី​នៅ​តំបន់​ព្រំដែន​ក្រុង​ប៉ោយប៉ែត​ឡើង​ថ្លៃ ដូច្នេះ​បាន​ជា​មាន​ការ​ដោះដូរ​ទីតាំង​ថ្មី​នោះ​កើត​ឡើង៖ «ខ្ញុំ​គិត​ថា​របស់​រដ្ឋ​នៅ​គួរ​តែ​ឲ្យ​នៅ​កន្លែង​ដើម​នឹង​ហើយ ហើយ​កុំ​គិត​ថា​នៅ​កន្លែង​នឹង​វា​ជា​ឆ្អឹង​ទទឹង​ក វា​អត់​មាន​មក​ប៉ះពាល់​បរិស្ថាន​ទេ យើង​នាំគ្នា​កែធ្វើមិច​ឲ្យ​ល្អ​ច្រើន​ជាង​នឹង​ទៅ​វា​ប្រសើរ​ហើយ​ វាមិន​​​បាច់​ចាំ​យក​ដីរដ្ឋ​ហើយ​នាំ​គ្នា​រត់​ការ​អី​បែប​នេះ​ទេ នាំ​តែ​ក្មេង​ជំនាន់​ក្រោយ​ទិតៀន​គេ​រិះគន់​ខ្មាស​ក្មេង​ទេ​ ទម្រាំ​តែ​ក្មេង​គេ​ដឹង​រឿង​ពិត​ណា​មួយ​មិន​ល្អ​កើត​ចេញ​ពី​ដោះដូរ​ដី​នោះ​ខ្មាស​គេ»

មន្ត្រី​សង្គម​ស៊ីវិល​រូប​នេះ​បន្ថែម​ទៀត​ថា នៅ​ខេត្ត​បន្ទាយមានជ័យ​កន្លង​មក​អាជ្ញាធរ​បាន​ដោះដូរ​ដី​នៅ​ក្នុង​ស្ថាប័ន​រដ្ឋ មាន​ដូច​ជា​ ការ​ដោះដូរ​ពន្ធនាគារ​ពី​តំបន់​ទី​ប្រជុំ​ជន​ទៅ​ទី​ទំនាប​​ដាច់​ស្រយាល ត្រូវ​​ទឹក​ជំនន់​លិច​ជា​ញឹកញាប់ និង​ដី​ស្នងការ​នគរបាល​ខេត្ត​ចាស់​​ប្រែ​ក្លាយ​ទៅ​ជា​របស់​ឯកជន​ ដោយ​ការ​ធ្វើ​ផ្សារ​ និង​ផ្ទះ​ល្វែង ហើយ​សាងសង់​អាគារ​ស្នងការ​ថ្មី​នៅ​ឆ្ងាយ​ពី​តាំង​ចាស់​​ប្រមាណ​ ៣គីឡូម៉ែត្រ។លោក​ថា ការ​ដោះដូរ​នេះ​ អាជ្ញាធរ​សុទ្ធតែ​មិន​បាន​ឲ្យ​ប្រជាពលរដ្ឋ​បាន​ដឹង​ជា​សាធារណៈ អំពី​តម្លៃ​​ពិត​ប្រាកដ​យ៉ាង​ណា​ឡើយ៕

ព័ត៌មាន (0)
Share
គេហទំព័រ​ទាំងមូល