មន្ត្រីមន្ទីរពេទ្យបង្អែកនៅបន្ទាយមានជ័យរងការចោទថាមិនយកចិត្តទុកដាក់ព្យាបាលអ្នកជំងឺ
2014.12.09
ផែនទីខេត្តបន្ទាយមានជ័យ
ប្រជាពលរដ្ឋមួយចំនួននៅក្រុងសិរីសោភ័ណ ខេត្តបន្ទាយមានជ័យ រិះគន់មន្ត្រីបម្រើការនៅមន្ទីរពេទ្យបង្អែកមិត្តភាពកម្ពុជា-ជប៉ុន នៅស្រុកមង្គលបុរី ថាមិនយកចិត្តទុកដាក់ព្យាបាលដល់អ្នកជំងឺ ដែលសម្រាកក្នុងមន្ទីរពេទ្យនោះទេ ហើយបើទោះជាឈឺធ្ងន់ទៅអង្វរគ្រូពេទ្យយ៉ាងណាក៏ដោយ។ ប្រជាពលរដ្ឋថ្លែងបែបនេះ គឺបន្ទាប់ពីពួកគាត់នាំអ្នកជំងឺទៅសម្រាកព្យាបាលក្នុងមន្ទីរពេទ្យនេះ កាលពីថ្ងៃទី៨ ធ្នូ កន្លងទៅ។
ប្រជាពលរដ្ឋដែលនាំអ្នកជំងឺទៅព្យាបាលនៅមន្ទីរពេទ្យមិត្តភាពកម្ពុជា-ជប៉ុន ស្រុកមង្គលបុរី អំពាវនាវឲ្យមន្ទីរសុខាភិបាលខេត្តបន្ទាយមានជ័យ និងមន្ត្រីពាក់ព័ន្ធ ចាត់វិធានការទៅលើមន្ត្រីពេទ្យខិលខូចដែលមិនមើលថែអ្នកជំងឺជាបន្ទាន់ ដើម្បីកុំឲ្យគ្រោះថ្នាក់ដល់អាយុជីវិតប្រជាពលរដ្ឋនៅថ្ងៃខាងមុខ។
ប្រជាពលរដ្ឋម្នាក់រស់នៅភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ថ្លែងមិនឲ្យបញ្ចេញឈ្មោះនៅថ្ងៃទី៩ ធ្នូ ថា មន្ត្រីទាំងតូចធំនៅមន្ទីរពេទ្យបង្អែកមិត្តភាពកម្ពុជា-ជប៉ុន ស្រុកមង្គលបុរី ខេត្តបន្ទាយមានជ័យ មិនយកចិត្តទុកដាក់ព្យាបាលដល់អ្នកជំងឺ ដែលទៅសម្រាកព្យាបាលក្នុងមន្ទីរពេទ្យនោះឡើយ គឺបើទោះជាអ្នកជំងឺនោះឈឺធ្ងន់ទៅអង្វរគ្រូពេទ្យឲ្យមកព្យាបាលយ៉ាងណាក៏ដោយ ក៏ពួកគេមិនព្រមជួយដែរ។ ពលរដ្ឋរូបនេះថ្លែងបន្តថា អ្នកជំងឺជាច្រើននាក់ដែលទៅព្យាបាលនៅមន្ទីរពេទ្យនេះ តែងត្អូញត្អែរចំពោះបញ្ហានេះដូចៗគ្នា តែដោយសារជីវភាពក្រីក្រគ្មានជម្រើស គឺម្នាក់ៗចេះតែទ្រាំព្យាបាលទាំងលំបាកលំបិន៖ «ពិបាកណាស់ទៅហៅគ្រូពេទ្យឲ្យមកព្យាបាលអ្នកជំងឺ តាំងពីព្រឹករហូតដល់ថ្ងៃត្រង់យ៉ាងម៉េច ក៏គ្រូពេទ្យមិនមកដែរ។ បានអីពេលអ្នកជំងឺទៅប្រាប់អីដើរមកអើតអ្នកជំងឺតែបន្តិច ក៏អស់ចិត្តដែរ អានេះដល់ពេលឲ្យថ្នាំអ្នកជំងឺបានមកអើតម្ដង ធ្វើអ៊ីចឹងវាមិនសមសោះ ធ្វើឲ្យយើងចំណាយពេលវេលានៅមន្ទីរពេទ្យខាតពេលឥប្រយោជន៍»។
ឆ្លើយតបនឹងបញ្ហានេះ ប្រធានមន្ទីរសុខាភិបាលខេត្តបន្ទាយមានជ័យ លោក កែវ សុភត្រា មានប្រសាសន៍បញ្ជាក់ថា សម័យនេះទៅហើយគ្មានគ្រូពេទ្យណាម្នាក់មិនយកចិត្តទុកដាក់ព្យាបាលដល់អ្នកជំងឺនោះទេ។ តែយ៉ាងណា លោកទទួលស្គាល់ថា ការទៅព្យាបាលអ្នកជំងឺយឺតយ៉ាវបន្តិចបន្តួចកន្លងមក អាចកើតមានម្ដងម្កាលខ្លះមែន ដែលបញ្ហានេះកើតឡើងដោយសារតែពេលខ្លះគ្រូពេទ្យប្រចាំការមានចំនួនតិចជាងអ្នកជំងឺ៖ «អ៊ីចឹងទម្រាំចាក់ថ្នាំអស់បានគេមក ហើយដល់ពេលល្ងាចបានគេមកម្ដងទៀត។ អ៊ីចឹងអ្នកជំងឺខ្លះចង់ឲ្យគ្រូពេទ្យទៅថ្នាក់ថ្នម ទៅអង្អែលគាត់អ៊ីចឹង វាបានដូចបំណងទេ។ ហើយអារឿងយើងទុកអ្នកជំងឺឲ្យងាប់វាអត់មានទេ ពីព្រោះរដ្ឋមន្ត្រីលោកបានណែនាំថា មើលថែអ្នកជំងឺដោយមិនគិតថវិកា ឬជាអ្នកមានអ្នកក្រនោះទេ ប៉ុន្តែមនុស្ស គឺពិបាកតម្រូវចិត្តណាស់»។
ទោះយ៉ាងនេះក្ដី មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបន្ទាយមានជ័យ លោក ស៊ុំ ច័ន្ទគា កត់សម្គាល់ថា កន្លងទៅតែងសង្កេតឃើញគ្រប់មន្ទីររដ្ឋទាំងអស់ មិនថាមន្ទីរពេទ្យបង្អែកកម្ពុជា-ជប៉ុន ស្រុកមង្គលបុរី នោះទេ គឺតែងតែប្រើពាក្យអសុរោះ និងមិនយកចិត្តទុកដាក់ព្យាបាលដល់អ្នកជំងឺជានិច្ច។ តែយ៉ាងណាលោកថា ករណីបែបនេះកើតឡើងភាគច្រើនទៅលើមន្ត្រីពេទ្យតូចតាច មានប្រាក់បៀវត្សរ៍តិចតួច។ ចំពោះមន្ត្រីពេទ្យតំណែងធំៗដែលមានប្រាក់ចំណូលខ្ពស់ ពុំមានជាបញ្ហាចោទនោះទេ៖ «ទាក់ទងនឹងកត្តាលុយកាត់នេះ គឺពួកគាត់មិនសូវមានអំពើពុករលួយកើតនៅក្នុងស្ថាប័ននេះ ទើបបណ្ដាលឲ្យពួកគាត់កើតជាជំងឺផ្លូវចិត្តមិនចង់ព្យាបាលអ្នកជំងឺ។ ហើយម្យ៉ាងទៀត ដោយសារគ្រូពេទ្យទាំងនោះជួបប្រទះអ្នកជំងឺរាល់ថ្ងៃ ចាត់ទុកថាជារឿងធម្មតា ចំណែកអ្នកជំងឺវិញ គិតពីទុក្ខលំបាកជាធំដែលខុសពីការគិតរបស់គ្រូពេទ្យ»។
ទោះយ៉ាងនេះក្ដី លោកថា អាជ្ញាធរពាក់ព័ន្ធមិនត្រូវបណ្ដែតបណ្ដោយឲ្យមន្ត្រីពេទ្យខិលខូចទាំងនោះ បង្កផលលំបាកដល់ប្រជាពលរដ្ឋទៀតទេ ហើយប្រសិនពុំមានការដោះស្រាយទាន់ពេលទេនោះ ប្រជាពលរដ្ឋនឹងជួបគ្រោះថ្នាក់ដល់អាយុជីវិតនាពេលអនាគតជាពុំខាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ