តើ​ហេតុ​អ្វី​បាន​ជា​ការ​ធាត់​ដុះ​ក្បាល​ពោះ​ខ្លាំង នាំ​ឲ្យ​មាន​គ្រោះថ្នាក់​ដល់​សុខភាព?

ដោយ ម៉ៅ សុធានី
2020-08-12
Share
ខ្លាញ់ក្បាលពោះ ពណ៌លឿងៗ ដែល​បង្ហាញ​ពី​ខ្លាញ់ក្បាលពោះ
រូប៖ WebMD

ក្រុម​អ្នក​ស្រាវជ្រាវ​វេជ្ជសាស្ត្រ​រក​ឃើញ​ថា អ្នក​ធាត់​ដុះ​ក្បាល​ពោះ​ខ្លាំង គឺ​បណ្ដាល​ឲ្យ​កើត​ជំងឺ​បេះដូង និង​ជំងឺ​ទឹក​នោម​ផ្អែម។ ការ​សិក្សា​ស្រាវជ្រាវ​ដ៏​ធំ​មួយ​ទៅ​លើ​ប្រជាពលរដ្ឋ​នៅ​សហភាព​អឺរ៉ុប​ប្រមាណ ៣៦ម៉ឺន​នាក់ រយៈ​ពេល ១០ឆ្នាំ បង្ហាញ​ថា អ្នក​ដែល​មាន​ខ្លាញ់​ក្បាល​ពោះ​ច្រើន​បំផុត គឺ​មាន​ហានិភ័យ​ទ្វេ​ដង នៃ​ការ​ស្លាប់​មុន​អាយុ ជាង​អ្នក​ដែល​មាន​ខ្លាញ់​ក្បាល​ពោះ​តិច​បំផុត។

តើ​គេ​មាន​វិធី​ណា​ខ្លះ ដើម្បី​អាច​កម្ចាត់​ខ្លាញ់​ក្បាល​ពោះ​នេះ​បាន?

ក្រុម​វេជ្ជបណ្ឌិត​ជំនាញ​រក​ឃើញ​ថា ខ្លាញ់​ក្បាល​ពោះ គឺ​ជា​សរីរាង្គ​មួយ គេ​ហៅ​ថា ខ្លាញ់ វីសសឺរ៉ល់ (Visceral fat) ដែល​មិន​មែន​ជា​ខ្លាញ់​ល្អ​ឡើយ។ នៅ​ពេល​ដែល​ខ្លាញ់​នេះ ដុះ​រីក​ធំធាត់​កាន់​តែ​ច្រើន​នៅ​ជុំវិញ​ដង​ខ្លួន និង​សរីរាង្គ​ពោះ (abdominal organs) គឺ​វា​បណ្ដាល​ឲ្យ​ប៉ះពាល់​ធ្ងន់ធ្ងរ​ដល់​សុខភាព។

គ្រូពេទ្យជំនាញវះកាត់ក្រពេញ​ប្រូស្តាត​ដ៏​ល្បីល្បាញ​មួយ​រូប នៅ​មន្ទីរពេទ្យ​ក្នុង​ក្រុង​ញូវយ៉ក លោក​វេជ្ជបណ្ឌិត ដេវីឌ សាម៉ាឌី (David Samadi) បញ្ជាក់​ប្រាប់​ទូរទស្សន៍ Fox News ថា នៅ​ពេល​លោក​ថត​ឆ្លុះ មុន​ពេល​វះកាត់​អ្នក​ជំងឺ​ដែល​មាន​ក្បាល​ពោះ​ធាត់​ខ្លាំង រូបភាព​បង្ហាញ​យ៉ាង​ច្បាស់​ពី​ជាតិ​ខ្លាញ់​ដ៏​ច្រើន ហ៊ុំ​ព័ទ្ធ​នៅ​ជុំវិញ​សរីរាង្គ​ខាង​ក្នុង។ លោក​បន្ត​ថា កាល​ពី​មុន ក្រុម​គ្រូពេទ្យ​ជំនាញ​មិន​យល់​ពី​គ្រោះថ្នាក់​នៃ​ខ្លាញ់​ក្បាល​ពោះ​ទេ ក៏​ប៉ុន្តែ​បច្ចុប្បន្ន​នេះ គេ​បាន​រក​ឃើញ​ថា ខ្លាញ់​ក្បាល​ពោះ​ដ៏​ច្រើន​សន្ធឹក​សន្ធាប់​នេះ វា​បង្ក​ឲ្យ​មាន​បញ្ហា​រលាក​សរីរាង្គ​ខាង​ក្នុង (Inflammatory process)«ប្រការ​ដែល​កោសិកា​រលាក​ច្រើន​នេះ​ហើយ គឺ​វា​អាច​បណ្ដាល​ឲ្យ​កើត​ជំងឺ​មហារីក​ពោះវៀន​ធំ (Colon cancer) និង​មហារីក​លំពែង (Pancreatic cancer)។ កោសិកា​រលាក​នេះ គឺ​ជា​ប្រភព​នៃ​ជំងឺ​មហារីក។ ខ្លាញ់​ដ៏​ច្រើន​នេះ​ក៏​បាន​ទៅ​រួម​រឹត​ថ្លើម ហើយ​យន្តការ​គ្រប់គ្រង​កូលេស្តេរ៉ុល (Cholesterol) ទាំង​មូល​គឺ​មិន​អាច​ដំណើរ​ការ​បាន។ នេះ​មាន​ន័យ​ថា កម្រិត​កូលេស្តេរ៉ុល​អាក្រក់​កើន​ឡើង ប៉ុន្តែ​កូលេស្តេរ៉ុល​ល្អ​បែរ​ជា​ធ្លាក់​ចុះ​ទៅ​វិញ។ កម្រិត​ខ្លាញ់​ក្នុង​ក្បាល​ពោះ​ដ៏​ច្រើន​នេះ ក៏​វា​សង្កត់​ទៅ​លើ​ក្រលៀន និង​នាំ​ឲ្យ​សម្ពាធ​ឈាម​ឡើង​ខ្ពស់។ ដូច​នេះ​ នៅ​ពេល​កូលេស្តេរ៉ុល អាក្រក់​កើន​ខ្លាំង បណ្ដាល​ឱ្យ​សម្ពាធ​ឈាម​ខ្ពស់ និង​ប៉ះ​ទង្គិច​ភាព​ធន់​នៃ​សារធាតុ​អ័រម៉ូន អាំងសូលីន (Insulin Hormone) គឺ​ធ្វើ​ឲ្យ​ប៉ះពាល់​ដល់​ប្រសិទ្ធភាព​នៃ​សាច់​ដុំ ដែល​នេះ​គេ​ហៅ​ថា រោគ​សញ្ញា​រំលាយ​អាហារ (Metabolic syndrome)។ បញ្ហា​នេះ​ហើយ គឺ​ជា​មូលហេតុ​ចម្បង​នាំ​ឲ្យ​កើត​ជំងឺ​បេះដូង និង​ជំងឺ​ដាច់​សរសៃ​ឈាម​ក្នុង​ខួរ​ក្បាល។ ដូច្នេះ​ប្រសិន​បើ​អាច​បំបាត់​ខ្លាញ់​ក្បាល​ពោះ​ឲ្យ​អស់​កាន់​តែ​ឆាប់ នោះ​ជា​ការ​ប្រសើរ​បំផុត ពីព្រោះ​វា​មាន​សារ​សំខាន់​ណាស់»

 

តើ​អ្វីទៅ​ជា​ខ្លាញ់ វីសសឺរ៉ល់ (Visceral fat)?

គេហទំព័រសុខភាព WebMD ឲ្យ​ដឹង​ថា ខ្លាញ់ វីសសឺរ៉ល់ (Visceral fat) គឺ​ស្ថិត​នៅ​ខាង​ក្នុង​ស្បែក​ដ៏​ជ្រៅ រុំ​ព័ទ្ធ​ជុំវិញ​ដង​ខ្លួន ក្បាលពោះ ជា​ពិសេស នៅ​រុំព័ទ្ធ​ថ្លើម លំពែង ពោះវៀនធំ និង​ក្រលៀន។ ការណ៍​ដែល​មាន​ខ្លាញ់ វីសសឺរ៉ល់ ដ៏​ច្រើន​ពេក​នោះ​ហើយ គឺ​វា​នាំ​ឲ្យ​រលាក​សរីរាង្គ​ទាំង​នោះ និង​នាំ​ឲ្យ​មាន​សម្ពាធ​ឈាម​ខ្ពស់ ដែល​បង្ក​គ្រោះថ្នាក់​ដល់​អាយុ​ជីវិត។ គេហទំព័រ​ដដែល​បន្ត​ថា អ្នក​ធាត់​ដុះ​ក្បាល​ពោះ​ខ្លាញ់​ច្រើន បណ្ដាល​ឲ្យ​កើត​ជំងឺ​ទឹក​នោម​ផ្អែម​ ជំងឺ​ថ្លើម ជំងឺបេះដូង កម្រិត​ជាតិ​ខ្លាញ់​ខ្ពស់​ក្នុង​ឈាម សម្ពាធ​ឈាម​ឡើង​ខ្ពស់ មហារីក​សុដន់ មហារីក​ពោះវៀន ក្រពះ និង​មហារីក​លំពែង។ បន្ថែម​ពី​នេះ មនុស្ស​ធាត់​ដុះ​ក្បាល​ពោះ​ខ្លាំង ឆ្អឹង​របស់​ពួក​គេ​ខ្សោយ ឆាប់​ពុក និង​ស្រួយ ហើយ​ងាយ​បាក់​នៅ​ពេល​រង​គ្រោះថ្នាក់ ដូច​ជា ដួល ជា​ដើម។

តើ​មូលហេតុ​អ្វី​បាន​ជា​ទាំង​ស្ត្រី និង​បុរស​មាន​ខ្លាញ់ វីសសឺរ៉ល់ (Visceral fat)?

គេហទំព័រ​សុខភាព​ជា​ច្រើន ឲ្យ​ដឹង​ដែរ​ថា មូលហេតុ​ធំៗ ៣យ៉ាង ដែល​នាំ​ឲ្យ​ដុះ​ខ្លាញ់​ពោះ​ច្រើន គឺ​របប​អាហារ​ទទួលទាន​ប្រចាំ​ថ្ងៃ​មាន​ជាតិ​កាឡូរី(Calories) ច្រើន​ពេក  ហាត់ប្រាណ​មិន​បាន​គ្រប់គ្រាន់ ដើម្បី​ដុត​បំផ្លាញ​ជាតិ​កាឡូរី​ក្នុង​ខ្លួន និង​វ័យ​ចាស់។ ទោះ​ជា​យ៉ាង​នេះ​ក៏​ដោយ អ្នក​មាន​វ័យ​ក្មេង ប្រសិន​បើ​ទទួល​ទាន​អាហារ និង​ភេសជ្ជៈ​ផ្អែម​ច្រើន​ពេក ប៉ុន្តែ​ហាត់​ប្រាណ​តិចតួច គឺ​នឹង​នាំ​ឲ្យ​ឡើង​ទម្ងន់ និង​ដុះ​ខ្លាញ់​ក្បាល​ពោះ​ផង​ដែរ។ ប្រភព​ដដែល​បន្ត​ថា បុរស​ភាគ​ច្រើន មាន​អត្រា​ដុះ​ខ្លាញ់​ក្បាល​ពោះ ច្រើន​ជាង​ស្ត្រី​មុន​អស់​រដូវ​ទៅ​ទៀត ដែល​បញ្ហា​នេះ បណ្ដាល​មក​ពី​ការ​ទទួល​ទាន​អាហារ​មាន​ជាតិ​ខ្លាញ់​ច្រើន មាន​កាឡូរី​ខ្ពស់ និង​សេព​សុរា និង​ស្រាបៀ​ច្រើន​ហួស​ហេតុ។

ចំពោះ​ស្ត្រី​វិញ​នៅ​ពេល​អស់​រដូវ (Menopause) គឺ​ច្រើន​ឡើង​ទម្ងន់ និង​ធាត់​ដុះ​ក្បាល​ពោះ ហើយ​ប្រសិន​បើ​វាស់​ជុំវិញ​ចង្កេះ ឃើញ​ទំហំ​លើស​ពី ៨៩ សង់ទីម៉ែត្រ (35 Inches) ហើយ​បុរស​វិញ បើ​វាស់​ជុំវិញ​ចង្កេះ ទំហំ​លើស​ពី​មួយ​ម៉ែត្រ (40 Inches) គឺ​បង្ហាញ​ថា មាន​ខ្លាញ់ Visceral ច្រើន និង​បង្ក​បញ្ហា​ដល់​សុខភាព ដែល​តម្រូវ​ឲ្យ​ស្រក​ទម្ងន់ និង​ផ្លាស់​ប្ដូរ​ការ​ទទួល​ទាន​អាហារ និង​របៀប​របប​រស់​នៅ។ សំខាន់​បំផុត ក្រុម​អ្នក​ជំនាញ​សុខភាព​ផ្តល់​ដំបូន្មាន​ថា ទាំង​ស្ត្រី និង​បុរស ត្រូវ​ជួប​ពិគ្រោះ​យោបល់​ និង​ពិនិត្យ​សុខភាព​ទៀងទាត់ ជាមួយ​គ្រូពេទ្យ​ជំនាញ។

តើ​គេ​មាន​វិធី​ណា​ខ្លះ ដើម្បី​អាច​កម្ចាត់​ខ្លាញ់​ក្បាល​ពោះ​នេះ​បាន?

គេហទំព័រ​សុខភាព​ដដែល​បញ្ជាក់​ថា ដើម្បី​កម្ចាត់​ខ្លាញ់ វីសសឺរ៉ល់ នេះ វិធី​ងាយ​ស្រួល​បំផុត​គឺ​ការ​ហាត់​ប្រាណ ដូច​ជា ដើរ ឬ​រត់​ជា​ដើម។ ប្រសិន​បើ​អង្គុយ​ច្រើន​នៅ​ពេល​ធ្វើការ​គឺ​ត្រូវ​ងើប​រៀងរាល់​កន្លះ​ម៉ោង​ម្ដង ឬ​ព្យាយាម​ងើប​ឈរ​នៅ​ក្បែរ​តុ​ធ្វើការ ឬ​កន្លែង​ណា​មួយ ដោយ​អនុវត្ត​វិធី​ពត់​ដៃ​ជើង។

សាស្ត្រាចារ្យផ្នែកវេជ្ជសាស្ត្រ​នៃ​សកលវិទ្យាល័យ​នូវយ៉ក វេជ្ជបណ្ឌិត ម៉ាក ស៊ីហ្គិល (Marc Siegel) ឲ្យ​ដឹង​ថា ស្ត្រី​ដែល​អស់​រដូវ ខ្លាញ់​ភាគ​ច្រើន គឺ​វា​ស្ថិត​នៅ​ដើម​ដៃ កដៃ និង​ក្បាលពោះ។ ក៏​ប៉ុន្តែ​ចំពោះ​បុរស​វិញ គឺ​ខ្លាញ់​ទាំង​នោះ វា​ច្រើន​ទៅ​ផ្គុំ​នៅ​កន្លែង​ក្បាល​ពោះ​តែ​ម្ដង ដែលគេ​ឲ្យ​ឈ្មោះ​ថា “Beer Belly” ដោយសារ​ការ​ទទួលទាន​ប៊ីយ៊ែរ​ច្រើន។ លោក​សាស្ត្រាចារ្យ​រូប​នេះ បន្ត​ថា វិធី​ដ៏​ល្អ​បំផុត ដើម្បី​អាច​បំបាត់ ឬ​កម្ចាត់​ខ្លាញ់​ក្បាល​ពោះ​បាន​នេះ គឺ​ដើរ​ហាត់​ប្រាណ យ៉ាង​តិច​ឲ្យ​បាន​មួយ​ម៉ោង​ក្នុង​មួយ​ថ្ងៃ និង​ផ្លាស់ប្ដូរ​របៀប​របប​អាហារ​ទទួល​ទាន​រាល់​ថ្ងៃ៖ «ខ្លាញ់​ធាត់​នៅ​នឹង​ក្បាល​ពោះ​នេះ វា ​ជា​ខ្លាញ់​ដែល​ងាយ​ធ្វើ​ឲ្យ​ស្រក​ជាទី​បំផុត។ នេះ​មាន​ន័យ​ថា លោក​អ្នក​ត្រូវ​ទទួលទាន​បន្លែ និង​ផ្លែ​ឈើ​ឲ្យ​បាន​ច្រើន កាត់​បន្ថយ​ការ​បរិភោគ​ច្រើន​ហួស​ហេតុ តែ​អាច​បរិភោគ​តិចៗ ច្រើន​ដង។ គេង​ឲ្យ​បាន​គ្រប់​គ្រាន់ កាត់​បន្ថយ​ភាព​តានតឹង​ក្នុង​ចិត្ត កាត់​បន្ថយ​ការ​ទទួលទាន​សុរា​ច្រើន និង​បញ្ឈប់​ការ​ជក់បារី។ បន្ថែម​ពី​នេះ ជៀសវាង​ការ​ទទួល​អាហារ​បំពង អាហារ​ផ្អាប់​ទុក​យូរ ម្ហូប​អាហារ និង​ភេសជ្ជៈ ដែល​ដាក់​ជាតិ​ស្ករ​ច្រើន។ រត់​ហាត់​ប្រាណ ឬ​ដើរ​ឲ្យ​បាន​រាល់​ថ្ងៃ ហើយ​ប្រសិន​មាន​ក្បាល​ពោះ លោក​អ្នក​អាច​កម្ចាត់​វា​បាន»

បន្ថែម​ពី​នេះ លោក​វេជ្ជបណ្ឌិត ម៉ាក ស៊ីហ្គិល (Marc Siegel) ផ្តល់​ដំបូន្មាន​ថា ដើម្បី​កាត់​បន្ថយ​ខ្លាញ់​ក្បាល​ពោះ​នេះ គួរ​ទទួលទាន​សាច់​សុទ្ធ ដូច​ជា ត្រី សាច់​មាន់ គ្រាប់​ធញ្ញជាតិ កាត់​បន្ថយ​ជាតិ​ខ្លាញ់ និង​ជាតិ​ប្រៃ​ច្រើន។ បន្ថែម​ពី​នេះ​គឺ ជៀសវាង​ការ​ទទួល​អាហារ​បំពង អាហារ​ផ្អាប់​ទុក​យូរ ម្ហូប​អាហារ និង​ភេសជ្ជៈ ដែល​ដាក់​ជាតិ​ស្ករ​ច្រើន។

គេហទំព័រ​សុខភាព WebMD ឲ្យ​ដឹង​ផង​ដែរ​ថា ទោះ​បី​ការ​ដុះ​ខ្លាញ់​ក្បាល​ពោះ​ខ្លាំង ដែល​គេ​និយម​ហៅ​ថា "beer belly" នោះ​ក៏​ដោយ ក៏​មិន​អាច​បន្ទោស​ការ​ទទួលទាន​ប៊ីយ៊ែរ​តែ​មួយ​មុខ​នោះ​ទេ។ តាមពិត ការ​ទទួលទាន​ភេសជ្ជៈ​សូដា​ច្រើន ដូច​ជា Coke ឬ​ភេសជ្ជៈ​ផ្អែម​នោះ ក៏​ជា​មូលហេតុ​ចំបង ដែល​នាំ​ឲ្យ​មាន​ខ្លាញ់​នៅ​ក្បាល​ពោះ​នេះ​ដែរ។ វិធី​ប្រសើរ​បំផុត​គឺ​ទទួល​ទាន​ទឹក និង​តែ​បៃតង (Green tea)​ ដែល​ការ​ស្រាវជ្រាវ​រក​ឃើញ​ថា ក្នុង​តែ​បៃតង គឺ​មាន​ជាតិ​អង់ទីអុកស៊ីដែន (Antioxidants) ដែល​អាច​ជួយ​កម្ចាត់​ខ្លាញ់ Visceral នេះ​បាន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។