ករណីអ្នកឆ្លងជំងឺកូវីដ-១៩ ប្រចាំថ្ងៃនៅទូទាំងប្រទេស មានច្រើនជាងតួលេខដែលក្រសួងសុខាភិបាលប្រកាសឲ្យដឹងជាសាធារណៈ។ ជាក់ស្ដែង កាលពីថ្ងៃទី ១៨ ខែសីហា ក្រសួងសុខាភិបាលប្រកាសថា មានករណីឆ្លងថ្មីចំនួនតែ ៥៣៣ នាក់ប៉ុណ្ណោះ ដែលក្នុងនោះករណីនាំចូលពីក្រៅប្រទេសមាន ១៤៥ នាក់។ ប៉ុន្តែនៅក្នុងថ្ងៃនោះ គ្រាន់តែតួលេខអ្នកឆ្លងថ្មីនៅខេត្តបន្ទាយមានជ័យ មានរហូតដល់ទៅ ៦៨៩ នាក់ទៅហើយ។ ក្នុងនោះមនុស្សជាង ៦០០ នាក់ ( ៦០១ នាក់) ឯណោះ ដែលស្នាក់នៅមណ្ឌលជីវិតថ្មីភ្នំបាក់ កន្លែងបន្សាបគ្រឿងញៀន នៅក្នុងខេត្តនេះ មានផ្ទុកជំងឺកូវីដ-១៩ ក្នុងមួយថ្ងៃទី១៨ ខែសីហា នោះ។
ចាប់តាំងពីថ្ងៃទី២ ខែសីហា ក្រសួងសុខាភិបាល ប្រកាសតួលេខអ្នកឆ្លងជំងឺកូវីដ-១៩ នៅទូទាំងប្រទេស ទាំងឆ្លងក្នុងសហគមន៍ និងករណីនាំចូលនៅក្រោម ៦០០ នាក់ជារៀងរាល់ថ្ងៃ។ ប៉ុន្តែក្នុងពេលជាមួយគ្នានេះ គ្រាន់តែតួលេខអ្នកឆ្លងនៅខេត្តបន្ទាយជ័យ មានថ្ងៃខ្លះ រដ្ឋបាលខេត្តនេះ ផ្សាយតាមទំព័រហ្វេសប៊ុករបស់ខ្លួនថា មានរហូតដល់ជិត ៧០០នាក់។
វិទ្យុអាស៊ីសេរីមិនអាចសុំការបំភ្លឺជុំវិញរឿងពីអ្នកនាំពាក្យក្រសួងសុខាភិបាលអ្នកស្រី ឱ វណ្ណឌីន បានទេដោយសារអ្នកស្រីមិនឆ្លើយទូរស័ព្ទ។
ទោះជាយ៉ាងនេះក្ដីក្រសួងសុខាភិបាលតាំងពីដើមខែឧសភា លែងផ្សាយតួលេខអ្នកឆ្លងជំងឺនេះទៅតាមខេត្តក្រុងនីមួយៗដូចមុនដោយផ្សាយតែតួលេខសរុប និងសង្ខេបនៅទូទាំងប្រទេសតែប៉ុណ្ណោះ។ប៉ុន្តែក្នុងពេលជាមួយគ្នានេះ រដ្ឋបាលខេត្តក្រុងនីមួយៗផ្សាយតួលេខអ្នកឆ្លងជំងឺកូវីដ-១៩ប្រចាំខេត្តនៅតាមទំព័រហ្វេសប៊ុករបស់ខ្លួន។ប៉ុន្តែខេត្តក្រុងមួយចំនួនដូចជារដ្ឋបាលក្រុងភ្នំពេញដែលមានតួលេខអ្នកឆ្លងច្រើនប្រចាំថ្ងៃដែរនោះបានផ្អាកផ្សាយទៅវិញ។
រដ្ឋបាលកុ្រងភ្នំពេញដែលធ្លាប់ផ្សាយតួលេខអ្នកឆ្លងជំងឺនេះប្រចាំថ្ងៃដោយផ្សាយទាំងអត្តសញ្ញាណរបស់អ្នកជំងឺដែលផ្ទុយក្រមសីលធម៌ក្នុងការផ្សព្វផ្សាយនិងបំពានសិទ្ធឯកជនរបស់អ្នកជំងឺផងនោះតាំងពីចុងខែមិថុនា លែងផ្សាយចំនួនអ្នកឆ្លងថ្មីតទៅទៀត ដោយមិនបញ្ជាក់មូលហេតុ។
គិតមកត្រឹមថ្ងៃទី២២ ខែសីហា ម្សិលមិញ អ្នកស្លាប់ដោយសារជំងឺកូវីដ-១៩ កើនឡើងដល់ជិត ១ពាន់៨រយនាក់ (១.៧៩២) ហើយ បន្ទាប់ពីអ្នកជំងឺ១៤នាក់ទៀតបានស្លាប់។ ចំពោះករណីឆ្លងថ្មីវិញមានជិត ៥រយនាក់ (៤៩៦) នៅថ្ងៃដដែលនេះ ក្នុងនោះជិត ២រយនាក់ (១៧៦) ជាករណីនាំចូលពីក្រៅប្រទេស។
ជាមួយគ្នានេះ ក្រសួងសុខាភិបាល ឱ្យដឹងថា គិតចាប់ពីថ្ងៃទី៣១ ខែមីនា រហូតដល់ថ្ងៃទី ២១សីហា កម្ពុជារកឃើញអ្នកឆ្លងជំងឺកូវីដ-១៩ ប្រភេទឌែលតា (Delta)ជិត១ពាន់នាក់(៩៩៩) ដោយក្នុងនោះ មួយចំនួនជាពលករត្រឡប់ពីប្រទេសថៃ និងវៀតណាម អ្នកដំណើរតាមយន្តហោះ មន្ត្រីរាជការ យោធា ពិរុទ្ធជន អ្នកបកប្រែភាសា ជនជាតិបរទេស បុគ្គលិករោងចក្រកាត់ដេរ បុគ្គលិកធនាគារ និងពលរដ្ឋក្នុងសហគមន៍។ មេរោគបំប្លែងថ្មីនេះបានរាតត្បាតចូលដល់ខេត្តក្រុង២៣ លើកលែងតែខេត្តកែប និងខេត្តក្រចេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។