អាជីវករផ្សារសាមគ្គីខេត្តសៀមរាបត្អូញត្អែរពីក្លិនស្អុយនៃគំនរសំរាម
2013.09.28
ក្រុមអាជីវករលក់ដូរក្នុងផ្សារសាមគ្គី និងប្រជាពលរដ្ឋមួយចំនួន ដែលរស់នៅសង្កាត់ស្លក្រាម ក្រុងសៀមរាប បានសម្ដែងការមិនសប្បាយចិត្តចំពោះក្លិនស្អុយខ្លាំង ដែលភាយចេញពីគំនរសំរាមជារៀងរាល់ថ្ងៃ។
ក្រុមអ្នកលក់ដូរ និងប្រជាពលរដ្ឋដែលនៅជិតទីតាំងដាក់សំរាម បានឱ្យដឹងថា ជារៀងរាល់ថ្ងៃ ចាប់តាំងពីព្រឹកព្រលឹម រហូតដល់ល្ងាច គឺគំនរសំរាមដែលមានកាកបន្លែ និងផ្លែឈើរលួយ បានជះក្លិនស្អុយឆួលពិបាកទ្រាំ។
ស្ត្រីម្នាក់ដែលមានកូនតូចពរនៅក្នុងដៃ ជាអាជីវករផ្សារសាមគ្គី មានតូបលក់ដូរនៅទល់មុខគ្នានឹងគំនរសំរាមនោះ។ គាត់បានមានប្រសាសន៍ថា ជារៀងរាល់ថ្ងៃ គាត់មានកង្វល់ជាខ្លាំង ដោយសារគំនរសំរាមដែលមានក្លិនស្អុយនេះ។ ស្ត្រីដដែលបានបញ្ជាក់ថា គាត់មានអារម្មណ៍ធុញថប់នឹងក្លិនស្អុយ ហើយនៅពេលខ្លះ សំរាមជះក្លិនស្អុយខ្លាំង គឺគាត់បាននាំកូនតូចដើរចេញពីតូបលក់ដូរ ឬក៏បង្ខំចិត្តបិទតូបផ្អាកលក់សិនក៏មាន៖ «ឡានជួនកាលវាខូច សំរាមនៅទីនោះទៅថ្ងៃណាវារហ័សទៅ យើងបានធូរទៅ។ ស្អុយគរគំនរ ថ្ងៃណាអត់សូវស្អុយ យើងនៅ ថ្ងៃណាស្អុយខ្លាំង យើងខានលក់ទៅ។ ដើរគេចខ្លះដែរណា ចង់ឱ្យជួយសម្រួលឱ្យបានស្អាតជាងនេះទៅ បើបានអាចផុតពីកន្លែងនេះល្អ»។
ចំណែកបុរសឈ្មោះ ថោង ច័ន្ទសោភឹម ជាម្ចាស់កន្លែងកីឡាកម្សាន្តមួយនៅជាប់គ្នានឹងគំនរសំរាមនោះដែរ បានមានប្រសាសន៍ថា គំនរសំរាមនៅផ្សារសាមគ្គី គឺមានក្លិនស្អុយខ្លាំង នៅពេលដែលគេប្រើគ្រឿងចក្រកើបដាក់ឡានម្ដងៗ។ លោក សោភឹម បានបញ្ជាក់ទៀតថា ពេលខ្លះជនបរទេស និងជនជាតិខ្មែរដែលចូលទៅលេងកីឡានៅកន្លែងលោក គឺរត់រកម៉ាស់មកពាក់បិទច្រមុះ ដោយសារតែក្លិនស្អុយខ្លាំង៖ «ខ្ញុំនៅរាល់ថ្ងៃ គឺប៉ះពាល់ដល់សុខភាពខ្លាំងតែម្ដង។ ពេលម៉ោងខ្ញុំរកស៊ី ជាពិសេសពេលដែលគេកើបហ្នឹង គឺក្លិនខ្លាំងមែនទែន ទ្រាំអត់បានហ្មង ឡើងចង់ក្អួត។ ខ្ញុំសូមគេថាឥឡូវម៉ោងខ្ញុំរកស៊ីហ្នឹង ពេលកើបហ្នឹង ធ្វើអត់កើតទេ ជួនកាលគេព្រងើយជាមួយយើង។ ដូចកន្លែងខ្ញុំកន្លែងកីឡាអីចឹង ហើយអ្នកខ្លះគេមកដើម្បីសុខភាព ហើយស្រាប់មកគេធុំតែក្លិនសំរាម ហើយមិនមែនតែខ្ញុំដែលធុំរឿងហ្នឹងទេ ទៅក្រោយៗក្លិនស្អុយទៅដល់ខាងណោះទៀត។ ពេលភ្លៀងមក ទឹកស្អុយហូរខ្មៅវិកចូលក្នុងរបងដីខ្ញុំ។ ហៅមកមើល គេមិនដែលមកទេ»។
មិនត្រឹមតែអាជីវករ និងប្រជាពលរដ្ឋខ្លះដែលមានលំនៅឋាននៅប៉ែកខាងជើងនៃបរិវេណផ្សារសាមគ្គី ប៉ុណ្ណោះទេ ដែលមិនសប្បាយចិត្តចំពោះក្លិនស្អុយពីគំនរសំរាមនេះ សូម្បីតែម្ចាស់សណ្ឋាគារ ២-៣កន្លែងក្បែរៗនោះ ក៏រអ៊ូរទាំដែរ។ ម្ចាស់សណ្ឋាគារខ្លះបានឱ្យដឹងថា ក្លិនស្អុយសំរាមចេញពីផ្សារសាមគ្គី គឺធ្វើឱ្យប៉ះពាល់ដល់ភ្ញៀវទេសចរខ្លះ ដែលក្រោកពីព្រលឹមទៅមើលថ្ងៃរះនៅអង្គរវត្ត។
អ្នកភូមិបាននិយាយថា គេធ្លាប់បានប្ដឹងបញ្ហានេះទៅអាជ្ញាធរសង្កាត់ស្លក្រាម ឱ្យជួយដោះស្រាយ ក៏ប៉ុន្តែគេមិនដែលឃើញមានលទ្ធផលអ្វីទេ។
ក្រុមអាជីវករ និងប្រជាពលរដ្ឋខ្លះ ចង់ឱ្យអ្នកគ្រប់គ្រងទីផ្សារ និងអាជ្ញាធរមូលដ្ឋានយកចិត្តទុកដាក់ទៅលើបញ្ហាសំរាមទាំងនោះ ដើម្បីជួយដល់សុខភាពសាធារណៈ។
នាយកក្រុមហ៊ុន ហ្កា អ៊ីយ៉ា (Ga ea) សម្អាតទីក្រុង លោក ផូ ផល្គុណ បានមានប្រសាសន៍ថា ក្រុមហ៊ុនរបស់លោក គឺជាអ្នកទទួលដឹកយកសំរាមចេញពីផ្សារសាមគ្គី នោះ។ លោក ផូ ផល្គុណ បានបញ្ជាក់ថា នៅផ្សារសាមគ្គី គឺឡានរបស់ក្រុមហ៊ុនតែងទៅដឹកសំរាមយកចេញក្នុង១ថ្ងៃម្ដង ហើយជាធម្មតា សំរាមទាំងនោះ គឺក្រុមហ៊ុនបានយកកុងតឺន័រធំមួយទៅដាក់ ប៉ុន្តែទាល់តែដល់ម៉ោងកំណត់ ទើបឡានទៅដឹកចេញ។ ទោះយ៉ាងណា នាយកក្រុមហ៊ុនប្រមូលសំរាមបានបញ្ជាក់ថា លោកគ្មានមធ្យោបាយណាដើម្បីបញ្ចៀសបញ្ហាក្លិនស្អុយនៅមុនពេលដែលសំរាមដឹកចេញនោះទេ។
លោក ផូ ផល្គុណ៖ «សម្រាប់ឥឡូវនេះ ខ្ញុំអត់ដឹងថាត្រូវដោះស្រាយយ៉ាងម៉េចទេ? អីចឹងអាក្លិនស្អុយក្លិនឆ្អេះក្លិនឆ្អាបចេញពីសំរាមនេះ មិនមែនតែនៅផ្សារសាមគ្គី ទេ ប៉ុន្តែប្រហែលជានៅទីតាំងផ្សេងៗទៀត វាមានក្លិនដូចគ្នា ពីព្រោះយើងអត់មានកាលវិភាគទៅយកកន្លែងណា ១ថ្ងៃ ២ ឬ ៣ដងទេ។ តាមការជជែកគ្នា គឺយើង គឺ ១ថ្ងៃទៅយកម្ដង។ ឥឡូវនេះ វាអត់មានការចាំបាច់ណាមួយពីខាងផ្សារ ដែលគាត់ទំនាក់ទំនងឱ្យយើងត្រូវទៅយក ១ថ្ងៃ ២ដង ឬក៏ ៣ដងឯណា»។
ក្រុមហ៊ុនសម្អាតទីក្រុង បានឱ្យដឹងថា សំរាមនៅផ្សារសាមគ្គី មានចំនួនប្រហែល ៣តោនក្នុង១ថ្ងៃៗ។ ចំណែកភាគីម្ចាស់ផ្សារវិញបានអះអាងថា ខ្លួនបានបង់លុយប្រមាណជាង ៧០០ដុល្លារសហរដ្ឋអាមេរិក ក្នុង១ខែៗ ឱ្យទៅក្រុមហ៊ុន ដឹកសំរាមយកចេញ ក៏ប៉ុន្តែបញ្ហានេះ ក្រុមហ៊ុនមិនបានទទួលខុសត្រូវខ្ជាប់ខ្ជួនឡើយ ទើបបណ្ដាលឱ្យមានគំនរសំរាម និងក្លិនស្អុយ។
ប្រធានផ្សារសាមគ្គី លោក តាន់ សាវី បានមានប្រសាសន៍ថា កាលពីមុន លោកបានទិញត្រាក់ទ័រ និងរ៉ឺម៉កសម្រាប់ដឹកជញ្ជូនសំរាមទាំងនេះចេញពីទីផ្សារដោយខ្លួនឯង មិនដែលមានបញ្ហាអ្វីទេ ក៏ប៉ុន្តែក្រោយមក ក្រុមហ៊ុនសំរាមបានសុំដេញថ្លៃដឹកជញ្ជូនសំរាមទាំងនេះ។ លោក តាន់ សាវី បានបញ្ជាក់ថា ការមានគំនរសំរាមជះក្លិនស្អុយ មិនមែនជាកំហុសរបស់លោកទេ គឺជាកំហុសរបស់ក្រុមហ៊ុនដឹកសំរាម ដែលមកដឹកជញ្ជូនមិនទៀងទាត់ ដោយពេលខ្លះទុកសំរាមចោល ២-៣ថ្ងៃក៏មាន៖ «សំរាមនេះធម្មតាបើដឹករៀងរាល់ថ្ងៃ គឺវាមិនដែល គឺវាមិនដែលស្ទះទេ ប៉ុន្តែ ២ថ្ងៃមុននេះ គេថាឡានគេហ្នឹងវាខូច។ អារឿងហ្នឹង បើយើងនិយាយអំពីកំហុស សំរាមអត់មានមកទាក់ទងនឹងខាងផ្សារខ្ញុំទេ ព្រោះខ្ញុំបញ្ចេញទៅក្រៅឱ្យគេយកដាក់ធុងដឹកចេញឱ្យអស់ តែគេអត់មកដឹក។ ជារៀងរាល់លើកដែលវាធ្វើឱ្យមានបញ្ហាធ្វើឱ្យស្អុយបន្តិចបន្តួចនៅកន្លែងនោះ វាច្រើនតែគេអត់ដឹកឱ្យអស់ ព្រោះសំរាមនេះវាមានកិច្ចសន្យារវាងគេ ហើយនិងខ្ញុំ។ គេត្រូវតែទទួលខុសត្រូវដឹកចេញឱ្យអស់ អត់មាននិយាយពីរឿងដឹកមានកំណត់ទេ»។
ក្រុមអាជីវករ និងប្រជាពលរដ្ឋរស់នៅជិតផ្សារសាមគ្គី បានឱ្យដឹងថា ពួកគេបានទទួលរងការប៉ះពាល់ពីក្លិនស្អុយរបស់សំរាមរយៈពេលជាង ២ឆ្នាំមកហើយ។
អភិបាលស្ដីទីក្រុងសៀមរាប លោក សូ ប្លាតុង បានមានប្រសាសន៍ថា លោកបានដឹងអំពីបញ្ហាក្លិនស្អុយរបស់សំរាមដែលធ្វើឱ្យប៉ះពាល់សុខភាពអាជីវករ ប្រជាពលរដ្ឋ និងអ្នកទេសចរមួយចំនួន ដែលរស់នៅ និងស្នាក់នៅតាមសណ្ឋាគារជិតៗនោះ។ លោក សូ ប្លាតុង បានបញ្ជាក់ថា លោកមិនអាចសម្ងំស្ងៀមចំពោះបញ្ហានេះបានទេ គឺសាលាក្រុងសៀមរាប មានគម្រោងនឹងជួបជជែកជាមួយក្រុមហ៊ុនដឹកជញ្ជូនសំរាម នៅពេលឆាប់ៗ ដើម្បីជំរុញឱ្យមានវិធានការជាបន្ទាន់ក្នុងការបំបាត់បញ្ហាទាំងនោះ៕