តើ​គេ​គួរ​ពាក់​ម៉ាស់​នៅ​ទី​សាធារណៈ ដើម្បី​​បង្ការ​ការ​ឆ្លង​មេរោគ​សារស៍​ស៊ីអូវី២ បង្ក​​ជំងឺ​កូវិត-១៩ ដែរ​ឬ​ទេ?

ដោយ ម៉ៅ សុធានី
2020-04-02
អ៊ីម៉ែល
មតិ
Share
បោះពុម្ព
ពលរដ្ឋ​ក្មេង​ចាស់​ចំនួន​ភាគ​ច្រើន​នៅ​ក្រុង​ភ្នំពេញ នាំ​គ្នា​ពាក់​ម៉ាស់​បង្ការ​ការ​ឆ្លង​មេរោគ កូរ៉ូណា​វីរុស ប្រភេទ​ថ្មី (Coronavirus) ខណៈ​កម្ពុជា​មាន ១ករណី ម៉ាស់​ឡើង​ថ្លៃ​ទ្វេ​ដង។
ពលរដ្ឋ​ក្មេង​ចាស់​ចំនួន​ភាគ​ច្រើន​នៅ​ក្រុង​ភ្នំពេញ នាំ​គ្នា​ពាក់​ម៉ាស់​បង្ការ​ការ​ឆ្លង​មេរោគ កូរ៉ូណា​វីរុស ប្រភេទ​ថ្មី (Coronavirus) ខណៈ​កម្ពុជា​មាន ១ករណី ម៉ាស់​ឡើង​ថ្លៃ​ទ្វេ​ដង។
រូប៖ ពលរដ្ឋ

មជ្ឈមណ្ឌល​ប្រឆាំង​នឹង​ជំងឺ​ឆ្លង​នៅ​សហរដ្ឋ​អាមេរិក (CDC) កំពុង​ពិចារណា ណែនាំ​ឲ្យ​ពលរដ្ឋ​ពាក់​ម៉ាស់ នៅ​ទី​សាធារណៈ ដើម្បី​ជួយ​ទប់​ស្កាត់​ការ​ឆ្លង មេរោគ​សារស៍​ស៊ីអូវី២ (SARS-CoV2) នៃ​ជំងឺ​កូវិដ-១៩ (Covid-19) ដែល​កំពុង​រាតត្បាត​យ៉ាង​ខ្លាំង​ជា​សកល។

ការ​ផ្លាស់​ប្ដូរ​ជំហរ​របស់ CDC នេះ បន្ទាប់​ពី​ស្ថិតិ​ស្រាវជ្រាវ រក​ឃើញ​ថា អត្រា​ឆ្លង​ជំងឺ Covid-19 ក្នុង​ប្រទេស​មួយ​ចំនួន ដែល​ប្រើប្រាស់​ម៉ាស់ មាន​កម្រិត​អ្នក​ឆ្លង​ទាប និង​អាច​ទប់​ស្កាត់​ការ រាល​ដាល​ជំងឺ​នេះ​មាន​ប្រសិទ្ធភាព។

មជ្ឈមណ្ឌល​ប្រយុទ្ធ​នឹង​ជំងឺ​ឆ្លង​នៅ​សហរដ្ឋ​អាមេរិក (CDC) និង​អង្គការ​សុខភាព​ពិភពលោក (WHO) ធ្លាប់​បាន​ប្រកាស​ថា ​អ្នក​ដែល​ចាំបាច់​ត្រូវ​ពាក់​ម៉ាស់ គឺ​ជា​អ្នក​ជំងឺ​ខ្លួន​ឯង​ផ្ទាល់ ក្រុម​វេជ្ជបណ្ឌិត និង​បុគ្គលិក​ពេទ្យ ព្រម​ទាំង​អ្នក​ដែល​ប្រាស្រ័យ​ទាក់ទង​ដោយ​ផ្ទាល់​ជាមួយ​អ្នក​ជំងឺ ដូច​ជា ក្រុម​អ្នក​ធ្វើ​ការ​ផ្នែក​សង្គ្រោះ​បន្ទាន់ នៅ​ពេល​ដឹក​អ្នក​ជំងឺ​ពី​ផ្ទះ ទៅ​មន្ទីរ​ពេទ្យ​ជាដើម។

ក៏​ប៉ុន្តែ​ថ្មីៗ នេះ នាយក​នៃ​មជ្ឈមណ្ឌល​ប្រយុទ្ធ​នឹង​ជំងឺ​ឆ្លង​នៅ​សហរដ្ឋ​អាមេរិក (CDC) លោក រ៉ូបឺត រេដហ្វៀល (Robert Redfield) បាន​ឲ្យ​ដឹង​ថា CDC កំពុង​ពិចារណា​ឡើង​វិញ នូវ​ការ​ណែនាំ​របស់​ខ្លួន អំពី​ការ​ប្រើ​ម៉ាស់​នៅ​ទី​សាធារណៈ ដើម្បី​ទប់​ស្កាត់​ការ​ឆ្លង​រាល​ដាល​នៃ​ជំងឺ​កូវិត-១៩ (Covid-19។ ចំណែក​នាយក​វិទ្យាស្ថាន​ជាតិ ផ្នែក​ជំងឺ​ឆ្លង​នៅ​សហរដ្ឋអាមេរិក លោក​វេជ្ជបណ្ឌិត អិនថូនី ហ្វូស៊ី (Anthony Fauci) មាន​ប្រសាសន៍​នៅ​ថ្ងៃ​ទី១ ខែ​មេសា​ថា ការ​ណែនាំ​ឲ្យ​ប្រើ​ម៉ាស់ សម្រាប់​ពលរដ្ឋ​អាមេរិកាំង​គ្រប់ៗ គ្នា​នេះ គឺ​កំពុង​ពិភាក្សា​ដោយ​យក​ចិត្តទុកដាក់ ប៉ុន្តែ​មិន​មែន​ម៉ាស់​ម៉ាក N-95 ទេ ពី​ព្រោះ​ម៉ាស់​ប្រភេទ​នេះ គឺ​ប្រើ​ចាំបាច់ សម្រាប់​ក្រុម​វេជ្ជបណ្ឌិត និង​អ្នក​បម្រើ​សេវា​សុខភាព។

លោក គ្រូពេទ្យ ឆាន់ ទូច គ្រូ​ពេទ្យ​ប្រចាំ​គ្រួសារ គ្លីនីក​នៅ​ទីក្រុង លីន (Lynn) រដ្ឋ​ម៉ាស្សាឈូសេត មាន​ប្រសាសន៍​ប្រាប់​អាស៊ី​សេរី​តាម​ទូរស័ព្ទ​ថា ការ​ប្រើ​ម៉ាស់​តែ​មួយ​មុខ ក៏​មិន​អាច​ជួយ ទប់​ស្កាត់​ការ​ឆ្លង​រាល​ដាល​នៃ​ជំងឺ​កូវិត-១៩នោះទេ។ លោក​បន្ត​ថា សំខាន់​បំផុត ក្នុង​ស្ថានភាព​ឆ្លង​រាល​ដាល​ខ្លាំង​បែប​នេះ ពលរដ្ឋ​គ្រប់ៗ គួរ​តែ​នៅ​ផ្ទះ កុំ​ចេញ​ទៅ​ក្រៅ ឬ​ជួប​ជុំ​គ្នា​ឲ្យ​សោះ៖ «ជា​ដំបូង CDC ថា ការ​ឲ្យ​ពាក់​ម៉ាស់​ហ្នឹង គឺ​សម្រាប់​អ្នក​ជំងឺ ព្រោះ​ពេល​ក្អក​ឬ​កណ្ដាស់ មេរោគ​ហ្នឹង​មិន​ចូល​ក្នុង​លំហ​អាកាស អ្នក​ដែល​មិន​ឈឺ មិន​បាច់​ពាក់​ទេ។ ប៉ុន្តែ​យើង​អត់​ដឹង​ថា នរណា​ឈឺ ឬ​មិន​ឈឺ។ ប៉ុន្តែ​ប៉ុន្មាន​ថ្ងៃ​មុន​នេះ គឺ​ថា គេ​យល់​ព្រម​គួរ​តែ​ពាក់​ដែរ ប៉ុន្តែ​មិន​ធានា​ថា មិន​ឆ្លង​ជំងឺ​ទេ លុះ​ណា​តែ​ម៉ាស់ N-95 ទើប​អាច​ការពារ​បាន។ ជា​ទូទៅ ខ្លះ​យក​ក្រណាត់​ដេរ ក៏​មិន​អាច​ការពារ​បាន​ទាំង​អស់​ដែរ»

ការ​ប្តូរ​ជំហរ​របស់​មជ្ឈមណ្ឌល​ប្រឆាំង​នឹង​ជំងឺ​ឆ្លង​នៅ​សហរដ្ឋ​អាមេរិក ដែល​តម្រូវ​ឲ្យ​ពលរដ្ឋ​ពាក់​ម៉ាស់​នេះ ក្រោយ​ដែល​បច្ចុប្បន្ន​នេះ សហរដ្ឋអាមេរិក គឺ​ជា​ប្រទេស​ទី១ ហើយ ដែល​មាន​ចំនួន អ្នក​ឆ្លង​ច្រើន​ជាង​គេ​បំផុត រហូត​ដល់​ទៅ​ចំនួន​ជាង ២សែន​នាក់ និង​មាន​អ្នក​ស្លាប់​ជាង ៤ពាន់​នាក់ ក្នុង​ចំណោម​អ្នក​ឆ្លង​សរុប​ចំនួន​ជាង ៩សែន​នាក់ នៅ​ទូទាំង​សកល​លោក។

ទាំង​មជ្ឈមណ្ឌល​ប្រឆាំង​នឹង​ជំងឺ​ឆ្លង​នៅ​សហរដ្ឋ​អាមេរិក (CDC)​ និង​អង្គការ​សុខភាព​ពិភព​លោក (WHO) អះអាង​ដូច​គ្នា​ថា អ្នក​ដែល​ត្រូវ​ពាក់​ម៉ាស់ គឺ​ក្រុម​អ្នក​ផ្ដល់​សេវា​ព្យាបាល និង​អ្នក​ធ្វើ​ការ​ដោយ​ផ្ទាល់ និង​អ្នក​ឈឺ​ខ្លួន​ឯង​តែ​ម្ដង។ ក៏​ប៉ុន្តែ ផ្ទុយ​ពី​ការ​លើក​ឡើង​នេះ អគ្គនាយក​នៃ​មជ្ឈមណ្ឌល​ប្រឆាំង​នឹង​ជំងឺ​ឆ្លង​នៅ​ប្រទេស​ចិន លោក​ហ្យក ហ្គាវ (George Gao) បាន​ប្រាប់​ទស្សនាវដ្ដី វិទ្យាសាស្ត្រ (Science) ថា នេះ​ជា​កំហុស​ដ៏​ធំ​មួយ​នៃ​ការ​ណែនាំ​របស់​ស្ថាប័ន​សុខាភិបាល​នៅ​សហរដ្ឋ​អាមេរិក និង​នៅ​សហភាព​អឺរ៉ុប (EU) ដែល​មិន​តម្រូវ​ឲ្យ​ពាក់​ម៉ាស់​នៅ​ទី​សាធារណៈ។ លោក​បន្ត​ថា ការណ៍ ដែល​មិន​តម្រូវ​ឲ្យ​ពាក់​ម៉ាស់​នៅ​ទី​សាធារណៈ​នេះ​ហើយ គឺ​ជា​មូល​ហេតុ​នាំ ឲ្យ​មាន​ការ​ឆ្លង​រាលដាល​យ៉ាង​ខ្លាំង​នៃ​មេរោគ​សារ្យកូវី២ (SARS-CoV2) នៃ​ជំងឺ​កូវិត-១៩ (Covid-19) ពី​ព្រោះ​អ្នក​ផ្ទុក​ជំងឺ​ភាគ​ច្រើន ដែល​មាន​ប្រព័ន្ធ​ការពារ​ខ្លួន​ខ្លាំង (Immune Systems) ពុំ​មាន​ចេញ​រោគ​សញ្ញា​នោះ​ទេ ហើយ​អាច​ឆ្លង​ទៅ​អ្នក​ដទៃ​បាន ដោយ​មិន​ដឹង​ខ្លួន។

អ្នក​ជំនាញ​ផ្នែក​អតិសុខុម​ជីវសាស្ត្រ (Microbiology) នៃ​សកល​វិទ្យាល័យ បឺកឃឺលី (Berkeley) ក្នុង​រដ្ឋ​កាលីហ្វ័រញ៉ា លោក អេឌ្រៀន បឺជ (Adrien Burch) អះអាង​ថា គេ​គ្មាន​ភស្តុតាង​ណា ដែល​បញ្ជាក់​ថា ការ​ពាក់​ម៉ាស់​មិន​មាន​ប្រយោជន៍​នោះ​ទេ។ ក៏​ប៉ុន្តែ​តាម​ពិត លោក​ថា ការ​ពាក់​ម៉ាស់ គឺ​ជួយ​ការពារ​ការ​ឆ្លង​នៃ​មេរោគ​ផ្សេងៗ រួម​មាន​មេរោគ​សារ្យកូវី២ (SARS-CoV2) នៃ​ជំងឺ​កូវិដ-១៩ (Covid-19) ដែល​កំពុង​រាតត្បាត​ជា​សកល​នេះ។ លោក Adrien Burch បន្ត​ថា តាម​ការ​ស្រាវជ្រាវ​បង្ហាញ​យ៉ាង​ច្បាស់​ថា ការ​ពាក់​ម៉ាស់​របស់​ពលរដ្ឋ នៅ​ក្រុង​ប៉េកាំង (Beijing) ក្នុង​អំឡុង​ពេល ផ្ទុះ​ការ​រីក​រាល​ដាល​ជំងឺ​សារស៍ (SARS) កាល​ពី​ឆ្នាំ២០០៣ គឺ​បាន​កាត់​បន្ថយ​អត្រា​ឆ្លង​ដល់​ទៅ ៧០%។ លោក​ថា មេ​រោគ​សារស៍ ក៏​ដូច​ជា ជំងឺ​កូវិដ-១៩ (Covid-19) ដែរ គឺ​ជា​ប្រភេទ​មេ​រោគ កូរ៉ូណា​តែ​មួយ​ដូច​គ្នា ដែល​បណ្ដាល​ឲ្យ​ប៉ះពាល់​ធ្ងន់ធ្ងរ​ដល់​ផ្លូវ​ដង្ហើម​របស់​អ្នក​ឆ្លង។

ក្រុម​វេជ្ជបណ្ឌិត​ជំនាញ​ជា​ច្រើន នៅ​ប្រទេស​មួយ​ចំនួន រួម​មាន នៅ​តៃវ៉ាន់ កូរ៉េខាងត្បូង​និង​ប្រទេស​ចិន អះអាង​ស្រប​គ្នា​ថា ប្រជា​ពលរដ្ឋ​របស់​ខ្លួន ដែល​នាំ​គ្នា​ពាក់​ម៉ាស់​នៅ​ទី​សាធារណៈ គឺ អត្រា​ឆ្លង​មាន​កម្រិត​ទាប និង​អាច​មាន​លទ្ធភាព​ទប់​ស្កាត់​មាន​ប្រសិទ្ធភាព​នៃ​ការ​ឆ្លង​រាលដាល​នៃ​ជំងឺ​ដ៏​កាច​សាហាវ​មួយ​នេះ។

វេជ្ជបណ្ឌិត​ជំនាញ​ផ្នែក​ជំងឺ​ឆ្លង​នៃ​សកល​វិទ្យាល័យ​វេជ្ជសាស្ត្រ​ហុងកុង​​លោក អ៊ីវ៉ាន ហុង (Ivan Hong) ប្រាប់​ទូរទស្សន៍ ស៊ីអិនអិន (CNN) ថា បើ​ពិនិត្យ​អត្រា​អ្នក​ឆ្លង​នៅ​ហុងកុង ការ​ពាក់​ម៉ាស់ គឺ​មាន សារ​សំខាន់​ណាស់ ដើម្បី​ទប់​ស្កាត់​ការ​ឆ្លង​ជំងឺ​កូវិដ-១៩ នេះ។ កាល​ពី​ដើម​ខែ​មីនា ហុងកុង​ មាន​អ្នក​ឆ្លង​ប្រមាណ ១៥០នាក់ ប៉ុន្តែ​ដល់​ថ្ងៃ​ទី១ ខែ​មេសា អត្រា​អ្នក​ឆ្លង​នៅ​ហុងកុង គឺ​កើន​ឡើង​ដល់​ចំនួន ៧៦៥នាក់ ក្នុង​នោះ​មាន​អ្នក​ស្លាប់​តែ ៤នាក់​ប៉ុណ្ណោះ។

មជ្ឈមណ្ឌល​ប្រឆាំង​នឹង​ជំងឺ​ឆ្លង​នៅ​សហរដ្ឋ​អាមេរិក (CDC)​ និង​អង្គការ​សុខភាព​ពិភព​លោក (WHO) អះអាង​ផង​ដែរ​ថា វិធី​ដ៏​ល្អ​ជា​ទី​បំផុត ដើម្បី​ការពារ​ការ​ឆ្លង និង​រីក​រាល​ដាល​នៃ​ជំងឺ​នេះ គឺ​មាន ៥ចំណុច​សំខាន់ៗ ទី១ លាង​ដៃ​នឹង​សាប៊ូ​ឲ្យ​បាន​ញឹក​ញាប់ ទី២ ប្រសិន​បើ​ក្អក ឬ​ក្រដាស ត្រូវ​ប្រើ​ក្រដាស​ខ្ទប់​មាត់​ច្រមុះ រួច​បោះ​ចោល​ភ្លាម ឬ​ប្រើ​កែង​ដៃ​ខ្ទប់​មាត់​ច្រមុះ។ ទី៣ ក្នុង​លក្ខណៈ​ដែល​ពុំ​ទាន់​បាន​លាង​ដៃ សូម​កុំ​ប៉ះ​ភ្នែក​ច្រមុះ និង​មាត់​ឲ្យ​សោះ ដើម្បី​ទប់​ស្កាត់ កុំ​ឱ្យ​មេរោគ​ឆ្លង​ចូល​ទៅ​ក្នុង​ខ្លួន។ ទី៤ ផ្អាក​ការ​ប្រាស្រ័យ ទាក់ទង​ជា​មួយ​អ្នក​ដទៃ ប្រសិន​បើ​ចេញ​ទៅ​ក្រៅ​ផ្ទះ ត្រូវ​នៅ​ឆ្ងាយ​ពី​គ្នា ប្រមាណជាង១ម៉ែត្រ ព្រោះ​អ្នក​ផ្ទុក​មេរោគ​ខ្លះ ពុំ​មាន​រោគ​សញ្ញា​នោះ​ទេ។ ចំណែក​ទី៥ វិញ ប្រសិន​បើ​មិន​ស្រួល​ខ្លួន ត្រូវ​នៅ​ផ្ទះ ហើយ​បើ​មាន​រោគ​សញ្ញា​ណា​មួយ ដូច​ជា គ្រុន​ក្ដៅ​លើស​ពី ៣៨អង្សា​សេ ក្អក និង​មាន​បញ្ហា​ផ្លូវ​ដង្ហើម គឺ​ត្រូវ​ទៅ​ជួប​គ្រូពេទ្យ​ជា​បន្ទាន់ ដើម្បី​ទទួល​ការ​ព្យាបាល។

ចំណែក​គ្រូពេទ្យ​ប្រចាំ​គ្រួសារ​នៅ​សហរដ្ឋ​អាមេរិក លោក គ្រូពេទ្យ ឆាន់ ទូច មាន​ប្រសាសន៍​បន្ថែម​ថា ការ​នៅ​ក្នុង​ផ្ទះ មិន​ចេញ​ក្រៅ​ក្នុង​អំឡុង​ពេល ៣ ឬ ៤សប្តាហ៍ គឺ​ជួយ​កាត់​បន្ថយ​ច្រើន នៃ​អត្រា​ឆ្លង​នៃ​មេរោគ ដ៏​កាច​សាហាវ​មួយ​នេះ៖ «ទី១ នៅ​ពេល​យើង​នៅ​ផ្ទះ​រយៈ​ពេល ៣ ឬ ៤អាទិត្យ អ្នក​ដែល​មាន​ជំងឺ គឺ​ចេញ​រោគ​សញ្ញា​អស់​ហើយ​ ដូច​នេះ​យើង​ដឹង​ពិត​ប្រាកដ យើង​អាច​យក​អ្នក​ជំងឺ​នោះ ទៅ​ព្យាបាល ឬ​ដាក់​នៅ​ដាច់​ដោយ​ឡែក។ ទី២ អ្នក​ដែល​ឈឺ ពេល​កណ្ដាស់ ឬ​ក្អក​ទៅ មាន​តំណក់​ទឹក​មាត់ លើ​បង្កាន់​ដៃ ឬ​កន្លែង​អង្គុយ គឺ​ប្រសិន​បើ​អត់​មាន​អ្នក​ចម្លង​ត​ទេ គឺ​មេរោគ​នោះ គឺ​វា​ងាប់​ហើយ ព្រោះ​មេរោគ​នោះ​អាច​រស់​បាន ពី៣ឬ៤ម៉ោង ទៅ ១អាទិត្យគឹងាប់អស់ហើយ។ សូម​អំពាវនាវ​ឲ្យ​បង​ប្អូន នៅ​ផ្ទះ​ទាំង​អស់​គ្នា»

ក្រុម​អ្នក​ជំនាញ​សុខភាព​ជា​ច្រើន​បង្ហាញ​ថា ដើម្បី​ឲ្យ​ការ​ប្រើ​ម៉ាស់​មាន​ប្រសិទ្ធភាព​ខ្ពស់ គឺ​ត្រូវ​ឧស្សាហ៍​លាង​ដៃ​នឹង​សាប៊ូ​ឲ្យ​បាន​ញឹក​ញាប់ ឬ​ប្រើ​អាកុល​ជូត​សំអាត​ដៃ។ ​ អ្នក​ពាក់​ម៉ាស់ គឺ​ជា​ក្រុម​អ្នក ផ្ដល់​សេវា​ព្យាបាល អ្នក​ធ្វើការ​ដោយ​ផ្ទាល់​ជាមួយ​អ្នក​ជំងឺ និង​អ្នក​ឈឺ​ខ្លួន​ឯង​តែ​ម្ដង។ ការ​ពាក់​ម៉ាស់​នេះ គឺ​ដើម្បី​កុំ​ឲ្យ​ឆ្លង​ដល់​អ្នក​ដទៃ នៅ​ពេល​ក្អក ឬ​ក្រដាស។ ការ​យល់​ដឹង​ពី​វិធី​ប្រើ​ម៉ាស់ ក៏​មាន​សារ​សំខាន់​ផង​ដែរ គឺ​ថា មុន​ពាក់​ម៉ាស់ ត្រូវ​លាង​ដៃ​ជាមួយ​ទឹក និង​សាប៊ូ​ឲ្យ​ស្អាត ឬ​ប្រើ​អាកុល​ជូត​ដៃ។ ម៉ាស់​នោះ​ត្រូវ​គ្រប​ពី​លើ​មាត់​ច្រមុះ និងត្រូវទាញឲ្យតឹងគ្របមុខ កុំ​ឲ្យ​មាន​ចន្លោះ​ប្រហោង។ កុំ​យក​ដៃ​ប៉ះ​ម៉ាស់​ឲ្យ​សោះ​នៅ​ពេល​ប្រើ ប៉ុន្តែ​បើ​ប៉ះ​វា ត្រូវ​លាង​ដៃ​នឹង​សាប៊ូ​ភ្លាម ឬ​ប្រើ​អាកុល​សំអាត​ដៃ។  បន្ថែម​ពី​នេះ ត្រូវ​ផ្លាស់​ប្ដូរ​ម៉ាស់​ថ្មី នៅ​ពេល​វា​ទទឹក ឬ សូម​កុំ​ប្រើ​ម៉ាស​ដដែល ២ដង។ នៅ​ពេល​ដោះ​ម៉ាស់​ចេញ​ពី​មុខ គឺ​ទាញ​ដោះ​វា​ចេញ​ពី​ក្រោយ កុំ​ប៉ះ​មុខ​ម៉ាស់​ឲ្យ​សោះ រួច​ហើយ​បោះ​វា​ចោល​ក្នុង​ធុង​សំរាម និង​លាង​ដៃ​ចេញ​ជា​ប្រញាប់​ជាមួយ​ទឹក និង​សាប៊ូ។

គិតមកត្រឹមថ្ងៃ១ខែមេសានេះ អ្នក​ស្លាប់​ដោយ​សារ​ជំងឺ​កូវិដ-១៩ (Covid-19) មាន​ចំនួន​ជាង ៤ម៉ឺន ៥ពាន់នាក់ ក្នុង​ចំណោម​អ្នក​ឆ្លង​សរុប ជាង៩សែននាក់។ ក្រៅ​ពី​សហរដ្ឋ​អាមេរិក ដែល​មាន​ចំនួន​អ្នក​ឆ្លង​ច្រើន​ជាង​គេ​រហូត​ដល់​ជាង ២សែន​នាក់ នៅ​សហភាព​អឺរ៉ុប​អ្នក​ឆ្លង​ច្រើន​ជាង​គេ គឺ​នៅ​ប្រទេស​អ៊ីតាលី មាន​ចំនួន ជាង១សែននាក់ និង​ស្លាប់​ជាង ១ម៉ឺន ៣ពាន់​នាក់។ ចំណែក​នៅ​ប្រទេស​អេស្ប៉ាញ​វិញ ក៏​មាន​ចំនួន​អ្នក​ស្លាប់​រហូត​ដល់​ទៅ​ជាង ៩ពាន់​នាក់ ក្នុង​ចំណោម​អ្នក​ឆ្លង​ជាង ១សែន​នាក់៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល