ក្រសួងសុខាភិបាល រកឃើញអ្នកឆ្លងជំងឺកូវីដ-១៩ ចំនួន ១៧ករណីថ្មីទៀត ដែលសុទ្ធតែជាវីរុសអូមីក្រុង (Omicron) ឆ្លងក្នុងសហគមន៍ទាំងអស់។
គិតត្រឹមព្រឹកថ្ងៃទី១២ មេសា កម្ពុជាមានអ្នកកើតជំងឺកូវីដ-១៩ ជាង ១សែន ៣ម៉ឺន ៥ពាន់នាក់ (១៣៥.៩៨០) ក្នុងនោះអ្នកជាសះស្បើយមានជាង ១៣ម៉ឺននាក់ ២ពាន់នាក់ (១៣២.៦៦៦) និងអ្នកស្លាប់មានចំនួន ៣ពាន់ ៥៥នាក់ (៣.០៥៥)។
ចំពោះការចាក់វ៉ាក់សាំងបង្ការជំងឺកូវីដ១៩ វិញ ក្រសួងសុខាភិបាលប្រកាសថា គិតត្រឹមថ្ងៃទី១១ មេសា រដ្ឋាភិបាលចាក់ជូនពលរដ្ឋ ដែលមានអាយុចាប់ពី ៣ឆ្នាំឡើងបានជាង ១៤លាន ៨សែននាក់ សម្រាប់ដូសទី១ រីឯដូសទី២ ចាក់បានជាង ១៤លាននាក់ ហើយដូសទី៣ និងដូសទី៤ រដ្ឋាភិបាលចាក់ជូនពលរដ្ឋបានជាង ៩លាន ២សែននាក់។
ជាមួយគ្នានេះ វ៉ាក់សាំងបង្ការជំងឺកូវីដ១៩ ចំនួន ២សែនដូស (២០០.០០០) ដែលជាជំនួយរបស់រដ្ឋាភិបាលឥណ្ឌា ត្រូវបានដឹកមកដល់កម្ពុជា នៅរសៀលថ្ងៃទី១១ និងបានប្រគល់ជូនកម្ពុជា ព្រឹកថ្ងៃទី១២ មេសា។ លោក ហ៊ុន សែន បានបង្ហោះសារនៅក្នុងហ្វេសប៊ុករបស់លោក នៅថ្ងៃទី១២ មេសាថា វ៉ាក់សាំងជាង ១២ម៉ឺនដូន (១២៤.០០០) បន្ថែមទៀត នឹងមកដល់កម្ពុជានៅថ្ងៃទី១៤ មេសា។ ហ្វេសប៊ុកលោក ហ៊ុន សែន បញ្ជាក់ថា វ៉ាក់សាំងទាំងនេះ ជាជំនួយសប្បុរសធម៌របស់រដ្ឋាភិបាលឥណ្ឌា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។