ក្រសួង​សុខាភិបាល​អំពាវនាវ​ជា​ថ្មី​ទៀត​មាតាបិតា និង​អាជ្ញាធរ​ចូលរួម​ទប់​ស្កាត់​ការ​រីក​រាលដាល​ជំងឺ​គ្រុន​ឈីក

ដោយ សេក បណ្ឌិត
2020-09-28
អ៊ីម៉ែល
មតិ
Share
បោះពុម្ព
ក្រសួងសុខាភិបាល
ក្រសួងសុខាភិបាល
រូប៖ ពលរដ្ឋ

ក្រសួងសុខាភិបាល​អំពាវនាវ​ជា​ថ្មី​ទៀត​ដល់​មាតា​បិតា និង​អាជ្ញាធរ​ពាក់ព័ន្ធ​ចូលរួម​ទប់​ស្កាត់​ការ​រីក​រាលដាល​នៃ​ជំងឺ​គ្រុន​ឈីក (CHIK= Chikungunya) ដែល​កំពុង​រីក​រាលដាល​នៅ​កម្ពុជា ជា​ពិសេស នៅ​តំបន់​ជន​បទ។

ជាមួយ​គ្នា​នេះ​ក្រសួង​បាន​ដាក់​ចេញ​វិធានការ​សំខាន់​មួយ​ចំនួន ដែល​ត្រូវ​ការពារ​ចាំបាច់ និង បច្ចុប្បន្នភាព​ នៃ​ជំងឺ​គ្រុន​ឈីក​នេះ។

ក្នុង​នោះ​រួម​មាន​ បង្ការ​កុំ​ឲ្យ​មូស​ខ្លា​ញី​ខាំ ហើយ​ចូលរួម​កម្ចាត់​ជម្រក​សត្វ​មូស។ អាណាព្យាបាល កុមារ​គ្រប់​រូប រួម​ទាំង​អាជ្ញាធរ​មូលដ្ឋាន​ផង ត្រូវ​សកម្ម​កម្ចាត់​ដង្កូវ​ទឹក នៅ​តាម​ទី​កន្លែង​ដែល​មាន​ទឹក​ដក់។

សេចក្ដី​ប្រកាស​ដដែល ក៏តម្រូវ​ឲ្យ​គ្រប់​គ្នា​ប្រកាន់​ខ្ជាប់​នូវ​ទម្លាប់​រស់នៅ​ស្អាត ធ្វើ​អនាម័យ​ផ្ទះ​សម្បែង ផ្ទះ​មាន​ពន្លឺ​ចេញ​ចូល ទុក​ដាក់​របស់​របរ សំលៀក​បំពាក់​ក្នុង​ក្រៅ​ផ្ទះ ឱ្យ​មាន​សណ្ដាប់ធ្នាប់ លុប​បំបាត់​ព្រៃ​ស៊ុបទ្រុប​ជុំវិញ​ផ្ទះ ដើម្បី​កាត់​បន្ថយ​ជម្រក​សត្វ​មូស។ នៅ​ពេលថ្ងៃ ត្រូវ​ស្លៀក​សំលៀក​បំពាក់​មាន​ដៃ​វែង​ជើង​វែង គេង​ក្នុង​មុង​ជា​ប្រចាំ ទាំង​ថ្ងៃ​ទាំង​យប់ និង​មិន​ត្រូវ​អង្គុយ​លេង​នៅ​ជិត​ទី​កន្លែង ងងឹតៗ នោះ​ឡើយ។

បើ​សិន​មានករណី​មាន​រោគ​សញ្ញា​ក្ដៅ​ខ្លួន​ខ្លាំង​ភ្លាមៗ ត្រូវ​ប្រញាប់​នាំ​អ្នក​ជំងឺ​ទៅ​រក​សេវា​ពិនិត្យ និង​ព្យាបាល​ជាមួយ​គ្រូពេទ្យ​ជំនាញ​ជា​បន្ទាន់។

ក្រសួង​សុខាភិបាល​ក៏​ជំរុញ​ឲ្យ​គ្រប់​មន្ទីរ​សុខាភិបាល​រាជធានី​ខេត្ត​ទាំង ២៥ ត្រូវ​មាន​កិច្ច​សហការ​ជាមួយ​ផ្នែក​ពាក់ព័ន្ធ​ទាំង​អស់ និង​អង្គការ​ដៃគូ​អភិវឌ្ឍន៍ នៅ​ក្នុង​សមត្ថកិច្ច​របស់​ខ្លួន ដើម្បី​ពិនិត្យ និង​ដាក់​ចេញ​នូវ​វិធានការ​នានា ព្រម​ទាំង​ជំរុញ​ការ​ផ្សព្វផ្សាយ​សារ​អប់រំ​សុខភាព​ទប់​ស្កាត់​ការ​រាតត្បាត​ជំងឺ​គ្រុន​ឈីក និង​គ្រុន​ឈាម និង​ចលនា​ឱ្យ​មាន​ការ​គាំទ្រ ចូលរួម​យ៉ាង​សកម្ម និង​ទូលំទូលាយ​ក្នុង​ការ​ប្រយុទ្ធ​នឹង​ជំងឺ​គ្រុន​ឈីក និង​គ្រុន​ឈាម​នេះ។

ការ​ចេញ​វិធានការ​នេះ ស្រប​ពេល​ដែល ប្រជាពលរដ្ឋ​ប្រមាណ​ជិត ១រយ​នាក់ រស់​នៅ​ភូមិ​ពាម​ស្តី ឃុំ​ព្រែក​ឫស្សី ស្រុក​ល្វាឯម ខេត្ត​កណ្ដាល កំពុង​មាន​បញ្ហា​ឆ្លង​ជំងឺ​គ្រុន​ឈីក។

ក្រសួង​សុខាភិបាល បាន​ធ្វើ​បច្ចុប្បន្ន​ព័ត៌មាន​អំពី​ការ​រីក​រាលដាល​នៃ​ជំងឺ​គ្រុន​ឈីក​នេះ កាល​ពី​ថ្ងៃ​ទី២៧ កញ្ញា​ម្សិលមិញ បាន​ឲ្យ​ដឹង​ថា ក្រសួង​រក​ឃើញ​ថា គិត​ត្រឹម​ថ្ងៃ​ទី​២៧​កញ្ញា មាន​មនុស្ស​សរុប​ចំនួន​ជិត ៦ពាន់​នាក់ (.៩៩៨) កំពុង​សង្ស័យ​មាន​ជំងឺ​គ្រុន​ឈីក​នេះ ហើយ​ភាគ​ច្រើន​បាន​កើត​នៅ​ខេត្ត​សៀមរាប តាកែវ និង​ព្រះវិហារ។

ក្រសួង​សុខាភិបាល​ឲ្យ​ដឹង​ទៀត​ថា ការ​ចម្លង​ជំងឺ​គ្រុន​ឈីក​នេះ មាន​សមាមាត្រ​ខុស​គ្នា តាម​ក្រុម​អាយុ ហើយ​បើ​យោង​តាម​របាយការណ៍​តាម​ប្រព័ន្ធ​ឃ្លាំមើល​ជំងឺ​គ្រុន​ឈាម បង្ហាញ​ថា ៥៤ភាគ​រយ នៃ​ករណី​ទាំង​នោះ​ជា​មនុស្ស​ពេញ​វ័យ ៣១ភាគ​រយ ជា​កុមារ​អាយុ ៥ឆ្នាំ​ឡើង និង ១៥ភាគ​រយ ជា​កុមារ​អាយុ​ក្រោម ៥ឆ្នាំ៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល