ប្រទេស​ចិន​ផ្ដល់​ម៉ាស​ជាង ១លាន ដល់​កម្ពុជា​ដើម្បី​ការ​ពារ​ជំងឺ​កូវីដ-១៩

ដោយ ហេង រស្មី
2021-01-30
Share
ប្រទេស​ចិន​ផ្ដល់​ម៉ាស​ជាង ១លាន ដល់​កម្ពុជា​ដើម្បី​ការ​ពារ​ជំងឺ​កូវីដ-១៩ អគ្គ​កុងស៊ុល​កម្ពុជា​ប្រចាំ​ទីក្រុង​ជីណាន ខេត្ត​សានទុង ប្រទេស​ចិន​ កាល​ពី​ថ្ងៃ​ទី​ ៣០​ មករា​ បាន​ទទួល​ម៉ាស់​ចំនួន​ជាង​ ១លាន​ម៉ាស់​ពី​ក្រុម​ហ៊ុន​ឯកជន​ចិន​។
រូបថត៖ក្រសួងការបរទេស

អគ្គ​កុងស៊ុល​កម្ពុជា​ប្រចាំ​ទីក្រុង​ជីណាន ខេត្ត​សានទុង ប្រទេស​ចិន បាន​ទទួល​ម៉ាស់​ចំនួន​ជាង​ ១លាន​ម៉ាស់ (១.៤៣២.៥០០ម៉ាស់) មាន​តម្លៃ​ជាង ៧សែន​ដុល្លារ (៧១៥.២០៨ដុល្លារ) ពី​ក្រុមហ៊ុន​ឯកជន​ចិន​ឈ្មោះ បៅជី ថាយដាកាង មេឌីខល តិចណូឡូជី (Baoji Taidakang Medical Technology Co., Ltd) ដើម្បី​សម្រាប់​ពាក់​ការពារ​ជំងឺ​កូវីដ១៩។ ជំនួយ​ថ្មី​របស់​ចិន​នេះ កើត​មាន​ឡើង​ក្រោយ​ពី​កម្ពុជា​ប្រកាស​យកវ៉ាក់សាំងចិន ដែលអង្គការសុខភាពពិភពលោក មិន​ទាន់​ទទួល​ស្គាល់ យក​មក​ចាក់​ឲ្យ​ពលរដ្ឋ​ខ្មែរ។

ប្រទេស​ចិន​សន្យា​ថា នឹង​ផ្ដល់​វ៉ាក់សាំង​កូវីដ-១៩ ចំនួន ៣០ម៉ឺន​ដូស​មក​កម្ពុជា នៅ​ក្នុង​ខែ​កុម្ភៈ​ខាង​មុខ ហើយ​ចិន​នឹង​បន្ត​ផ្តល់​ឲ្យ​កម្ពុជា​ជា​បន្ត​បន្ទាប់​ទៀត រហូត​គ្រប់​ចំនួន ១លាន​ដូស។

បក្ស​ប្រឆាំង​រិះគន់​ថា រដ្ឋាភិបាល​លោក ហ៊ុន សែន កំពុង​យក​អាយុ​ជីវិត​ពលរដ្ឋ​ទៅ​លេង​សើច ដើម្បី​ផល​ប្រយោជន៍​នយោបាយ​របស់​ខ្លួន​ជា​មួយ​ចិន។

អនុប្រធាន​គណបក្ស​សង្គ្រោះ​ជាតិ​លោក អេង ឆៃអ៊ាង មាន​ប្រសាសន៍​ថា ការ​ផ្ដល់​ម៉ាស់​ពី​ក្រុម​ហ៊ុន​ចិន​មក​ដល់​របប​ក្រុង​ភ្នំពេញ គ្រាន់​តែ​ជា​រូប​ភាព​នយោបាយ​ប៉ុណ្ណោះ ពី​ព្រោះ​កម្ពុជា​មិន​ខ្វះ​ម៉ាស់​សម្រាប់​កូវីដ-១៩ ទេ៖​ «ទង្វើ​របស់​ចិន​មិន​ស្រប​ទៅ​តាម​តម្រូវ​ការ​របស់​ខ្មែរ។ តាម​ពិត​យើង​មើល​ស្ថាន​ភាព​ស្រុក​ខ្មែរ​ បច្ចុប្បន្ន​វា​យ៉ាប់យ៉ឺន​ជាង។ អីចឹង អ្វី​ដែល​ចិន​ជួយ​ម៉ាស់​ស្អី​ហ្នឹង មិន​ស្រប​តាម​សភាពការណ៍​ទេ។ នេះ​គ្រាន់​តែ​រូបភាព​ថា​ជួយ​តែ​ប៉ុណ្ណោះ»។

ពាក់ព័ន្ធ​ជំងឺ​កូវីដ-១៩ នេះ ក្រសួង​សុខាភិបាល​រក​ឃើញ​ពលករ​ខ្មែរ​ម្នាក់​ទៀតឆ្លង​ថ្មី នៅថ្ងៃទី២៩ មករា។ អ្នក​ជំងឺ​រូប​នោះ មាន​អាយុ ៣៧ឆ្នាំ និង​មាន​ទីលំនៅ​នៅ​ក្រុង​បាត់ដំបង ខេត្ត​បាត់​ដំបង។ គាត់​បាន​ធ្វើដំណើរ​ពី​ប្រទេស​ថៃ​មក​ដល់​កម្ពុជា​កាល​ពី​ថ្ងៃ​ទី១៥ មករា ហើយ​ពេល​នេះ​កំពុង​សម្រាក​ព្យាបាល​នៅ​មន្ទីរពេទ្យ​បង្អែក​ខេត្ត​ប៉ៃលិន។

នៅ​ថ្ងៃ​ដដែល​នេះ មាន​អ្នក​ជំងឺ ៥នាក់ បាន​ជា​សះ​ស្បើយ ក្នុង​នោះ ៤នាក់​ជា​ពលករ​ខ្មែរ ដែល​ត្រឡប់​មក​ពី​ប្រទេស​ថៃ និង​ម្នាក់​ទៀត គឺ​ជា​ជន​ជាតិ​ជប៉ុន។ ក្រុម​គ្រូពេទ្យ​បាន​អនុញ្ញាត​ឱ្យ​ពួក​គាត់​ចាក​ចេញ​ពី​មន្ទីរពេទ្យ​ហើយ ក្រោយ​ព្យាបាល​ជា​សះ​ស្បើយ។

ក្រសួង​សុខាភិបាល​ឱ្យ​ដឹង​ថា គិត​ត្រឹម​ព្រឹក​ថ្ងៃ​ទី៣០ មករា កម្ពុជា​មាន​អ្នក​កើត​ជំងឺ​កូវីដ-១៩ សរុប​ចំនួន ៤៦៤ករណី ក្នុង​នោះ​អ្នក​ជា​សះ​ស្បើយ​មាន​ចំនួន ៤៤៣នាក់ និង​អ្នក​កំពុង​សម្រាក​ព្យាបាល​ចំនួន ២១នាក់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល