ប្រជាពលរដ្ឋនិងសង្គមស៊ីវិលលើកឡើងថា ប្រព័ន្ធសុខាភិបាលនៅកម្ពុជាមិនទាន់មានភាពល្អប្រសើរដែលអាចគាំពារសុខមាភាពរបស់ពលរដ្ឋក្រីក្រគ្មានលទ្ធភាពក្នុងការទទួលសេវាកម្មព្យាបាលក្នុងមន្ទីរពេទ្យរបស់ស្ថាប័នរដ្ឋ។ ពួកគេមើលឃើញថា មន្ត្រីសុខាភិបាលមួយចំនួនមិនបានគោរពតួនាទីទៅតាមវិជ្ជាជីវៈដើម្បីផ្តល់ទំនុកចិត្តដល់អ្នកជំងឺនៅឡើយ។ ប្រតិកម្មនេះធ្វើឡើងបន្ទាប់ពីលោកនាយករដ្ឋមន្រ្តី ហ៊ុន សែន ប្រកាសសម្ពោធដាក់ឱ្យប្រើប្រាស់មន្ទីរពេទ្យមិត្តភាពកម្ពុជា-ចិននៅរាជធានីភ្នំពេញថា នឹងបង្កើនសេវាព្យាបាលជូនប្រជាពលរដ្ឋឱ្យបានប្រសើរឡើង។
ប្រជាពលរដ្ឋនិងមន្ត្រីសង្គមស៊ីវិល ចង់ឃើញរដ្ឋាភិបាលលោក ហ៊ុន សែន ពង្រឹងគុណភាពប្រព័ន្ធសុខាភិបាលប្រកបដោយគុណភាព និងសមធម៌ក្នុងការផ្តល់សេវាកម្មព្យាបាលដោយមិនមានការរើសអើងទៅលើប្រជាពលរដ្ឋក្រីក្រ។ ប្រជាពលរដ្ឋរិះគន់ថា មន្ត្រីសុខាភិបាលនៅតាមស្ថាប័នរដ្ឋមួយចំនួនពុំបានបំពេញតួនាទីទៅតាមវិជ្ជាជីវៈក្នុងការផ្តល់ទំនុកចិត្តព្យាបាលអ្នកជំងឺដែលជាអ្នកក្រីក្រមកពីទីជនបទនោះឡើយ។
ពលរដ្ឋម្នាក់រស់នៅខេត្តកណ្ដាល លោក សេរី ប្រាប់វិទ្យុអាស៊ីសេរីនៅថ្ងៃទី២១មីនាថា កាលពីអំឡុងឆ្នាំ២០២០កន្លងទៅលោកបានសម្រាកព្យាបាលនៅក្នុងមន្ទីរពេទ្យព្រះកុសុមៈឬពេទ្យលោកសង្ឃក្នុងរាជធានីភ្នំពេញប៉ុន្តែពុំមានការយកចិត្តទុកដាក់ពីសំណាកក្រុមគ្រូពេទ្យឡើយ។ លោកបញ្ជាក់ថាគ្រូពេទ្យភាគច្រើននិយាយគ្មានក្រមសីលធម៌និងព្រងើយកន្តើយ ដោយសារតែគ្រានោះលោកគ្មានប្រាក់គ្រប់គ្រាន់សម្រាប់ការព្យាបាល។
លោករិះគន់ថា ទង្វើមន្ត្រីសុខាភិបាលបែបនេះដោយសារមានប្រព័ន្ធអំពើពុករលួយចាក់ស្រេះក្នុងស្ថាប័នរដ្ឋ ប្រការនេះទើបធ្វើឱ្យមហាជនទូទៅបាត់បង់ទំនុកចិត្តលើប្រព័ន្ធសុខាភិបាលក្នុងស្រុក៖ «កាលពីមុនព្យាបាលនៅសុរិន្ទ ដោយសារនៅខ្មែរទាមទារឱ្យវះកាត់ប៉ុន្តែខ្ញុំអត់ទុកចិត្ត។ ខ្ញុំក៏ទៅព្យាបាលនៅសុរិន្ទ។ រវាងស្រុកគេនិងស្រុកខ្មែរ សុជីវធម៌ក្នុងការងារខុសគ្នាឆ្ងាយណាស់។ នៅស្រុកគេបើយើងខុសគេមិនដែលប្រើពាក្យអសុរោះធ្វើឱ្យយើងអាក់អន់ចិត្តគេមានតែការថ្នាក់ថ្នម »។
ស្រដៀងគ្នានេះ សកម្មជនសង្គមដែលតែងឈឺឆ្អាលបញ្ហាជាតិលោក កើត សារ៉ាយ សង្កេតឃើញថា ពលរដ្ឋភាគច្រើនដែលមកពីទីជនបទពួកគាត់ពុំសូវមានថវិកាគ្រប់គ្រាន់ដើម្បីបង់ថ្លៃសេវាព្យាបាលឡើយ។ លោកបន្តថា រដ្ឋាភិបាលគួរតែជំរុញដល់មន្ត្រីសុខាភិបាលប្រកាន់ភ្ជាប់វិជ្ជាជីវៈជាគ្រូពេទ្យក្នុងការជួយសង្គ្រោះពលរដ្ឋគ្រប់ស្រទាប់វណ្ណៈដោយគ្មានការរើសអើង៖ «នៅពេលដែលមានការរៀបចំមន្ទីរពេទ្យឆ្លើយតបតម្រូវការប្រជាពលរដ្ឋ រដ្ឋាភិបាលគួរតែធ្វើការអភិវឌ្ឍសមត្ថភាពបច្ចេកទេសលើវិស័យសុខាភិបាល។ ជាពិសេសផ្នែកសីលធម៌វិជ្ជាជីវៈគ្រូពេទ្យ។ អ្នកណាក៏គេនិយាយដូចគ្នាថាពេទ្យស្រុកខ្មែរមិនត្រឹមតែអន់ជំនាញទេ អន់ទាំងសីលធម៌ »។
ដោយឡែក ប្រធានសហភាពសហជីពកម្ពុជា (CCU) លោក រ៉ុង ឈុន មានប្រសាសន៍ថាប្រជាពលរដ្ឋដែលទទួលសេវាកម្មព្យាបាលពីស្ថាប័នរដ្ឋនៅតែមានកម្រិតហើយតម្លៃព្យាបាលទៀតសោតក៏មានតម្លៃខ្ពស់។ លោករិះគន់ថាប្រព័ន្ធសុខាភិបាលបច្ចុប្បន្នហាក់បង្កើតឡើងមានស្តង់ដារពីរចំពោះអ្នកមាននិងវណ្ណៈកសិករ។ លោកកត់សម្គាល់ឃើញថាប្រជាពលរដ្ឋក្រីក្រដែលរកសេវាព្យាបាលពីមន្ត្រីសុខាភិបាលហាក់មិនអើពើផ្តល់កិច្ចគាំពារជួយសង្គ្រោះពួកគេបានភ្លាមៗនោះឡើយ៖« ស្រ្តីឆ្លងទន្លេដែលរងគ្រោះនៅតាមមន្ទីរពេទ្យរហូតបាត់បង់ជីវិតដោយសារខ្វះខាតថវិកាដែលពេទ្យមិនបានយកចិត្តទុកដាក់ពួកគាត់ »។
ប្រតិកម្មរបស់ពលរដ្ឋនិងសង្គមស៊ីវិលនេះ ធ្វើឡើងក្រោយពីលោកនាយករដ្ឋមន្ត្រី ហ៊ុន សែន នៅថ្ងៃទី២១មីនា សម្ពោធដាក់ឱ្យប្រើប្រាស់មន្ទីរពេទ្យមិត្តភាពកម្ពុជា-ចិនព្រះកុសុមៈដែលជាជំនួយឥតសំណងរបស់រដ្ឋាភិបាលចិនចំណាយថវិកាក្នុងការសាងសង់ជាង ៨០លាន (៨០.០០០.០០០) ដុល្លារ។ លោក ហ៊ុន សែន អះអាងការបង្កើតមន្ទីរពេទ្យនេះឡើងដើម្បីសម្រួលឱ្យប្រជាពលរដ្ឋមិនចាំបាច់ត្រូវចំណាយថវិកាក្នុងការព្យាបាលជំងឺនៅក្រៅប្រទេស៖ « គ្រាន់តែយើងចង់ឱ្យប្រជាពលរដ្ឋបានដឹងថាអាចធ្វើបានក្នុងប្រទេសរបស់យើង ដើម្បីកាត់បន្ថយធ្វើដំណើរទៅក្រៅប្រទេស។ អ្នកខ្លះទៅហើយទៅដេកចាំទៀតទម្រាំរកពេទ្យបាន។ សម្រាប់ប្រទេសរបស់យើងធ្វើបានតាំងពីជាង១០ឆ្នាំមុន។ មន្ទីរពេទ្យល្អត្រូវតែខិតខំធ្វើយ៉ាងម៉េចពិនិត្យព្យាបាលត្រូវតែល្អ »។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងសុខាភិបាលអ្នកស្រី ឱ វណ្ណឌីន ដើម្បីសាកសួរបន្ថែមជុំវិញពីក្ដីកង្វល់ប្រជាពលរដ្ឋបានទេនៅថ្ងៃទី២១ ខែមីនា។
ជុំវិញរឿងនេះ ប្រធានសមាគមគ្រូពេទ្យគុណធម៌កម្ពុជាលោក អ៊ូច វុទ្ធី សង្កេតឃើញថា នៅតាមស្ថាប័នផ្នែកសុខាភិបាលប្រជាពលរដ្ឋក្រក្រីមានការលំបាកច្រើន ដោយសារខ្វះការយកចិត្តទុកដាក់អើពើជួយសង្គ្រោះពួកគាត់។ លោកវេជ្ជបណ្ឌិតបន្តថា ពលរដ្ឋភាគច្រើនដែលមកពីតាមទីជនបទមានអ្នកខ្លះបាត់បង់ជីវិត ហើយគ្រូពេទ្យពុំត្រូវបានជួយសង្គ្រោះឡើយ។
លោកបន្ថែមថា ក្នុងស្ថាប័នសុខាភិបាលក៏មានក្រុមគ្រូពេទ្យជាច្រើនគ្មានក្រមសីលធម៌គិតតែផលប្រយោជន៍ផ្ទាល់ខ្លួន មិនបានយកចិត្តទុកដាក់ក្នុងព្យាបាលអ្នកជំងឺដែលគ្មានលទ្ធភាពឱ្យពួកគាត់ទទួលបានភាពកក់ក្ដៅឡើយ៖ « មន្ទីរពេទ្យរដ្ឋនីមួយៗ ត្រូវការជួយមើលរាស្រ្តដោយគ្មានការរើសអើង។ កាលណាយើងឃើញជនក្រីក្រយើងត្រូវតែជួយគាត់តែមន្ត្រីខិលខូចតែងយកប៉ុង។ ជាការខ្វះខាតមួយរវាងមន្ត្រីពុករលួយនៅពេញស្រុកខ្មែរមិនមែនអ្នកតូចតាចទេ គឺមានអ្នកធំជំរុញឱ្យបង់លុយតែម្ដង។ ដល់អញ្ចឹងទៅ អ្នកដែលកាន់លុយម៉ត់ចត់ រវល់តែសួរនាំរឿងបង់លុយ ប្តីទៅរកលុយ ទៅលក់គោក្របី មកវិញប្រពន្ធកូនស្លាប់បាត់ »។
មន្ទីរពេទ្យមិត្តភាពកម្ពុជា-ចិនព្រះកុសុមៈ ឬហៅពេទ្យលោកសង្ឃនេះ ត្រូវបានសាងសង់លើទំហំដីជាង ១៣ពាន់ម៉ែត្រក្រឡា មានកម្ពស់ ១១ជាន់ ជាមួយប្រវែង ៥៣ម៉ែត្រ។ លោក ហ៊ុន សែន ប្រកាសថាមន្ទីរពេទ្យនេះត្រូវបានបំពាក់បរិក្ខារទំនើបផ្នែកសង្គ្រោះបន្ទាន់វះកាត់ផ្លាស់ប្តូរសេរីរាង្គ ផ្នែកសម្ភព ព្រមទាំងសេវាជំនួយផ្សេងៗទៀតដោយមានគ្រែទទួលអ្នកជំងឺក្នុងសម្រាកព្យាបាលចំនួន៤រយគ្រែ(៤០០)។
បើទោះបីជា លោក ហ៊ុន សែន អះអាងប្រាប់ប្រជាពលរដ្ឋពីគុណភាពមន្ទីរពេទ្យក្រោមជំនួយឥតសំណងរបស់មិត្តដែកថែបរបស់លោកក្ដី ប៉ុន្តែលោក ហ៊ុន សែន និងគ្រួសាររបស់គាត់ហាក់មិនមានជំនឿក្នុងការទទួលសេវាព្យាបាលពីមន្ត្រីរបស់លោកឡើយ។ ជាញឹកញយ លោក ហ៊ុន សែន និងក្រុមគ្រួសារ ព្រមទាំងក្រុមមន្ត្រីមេឈ្មួញគ្រាកៗដែលស្និតនឹងលោកពេលមានជំងឺធ្ងន់ធ្ងរម្ដងម្កាលតែងតែនាំគ្នាវេចលុយរាប់ម៉ឺនដុល្លាដើម្បីទៅព្យាបាលក្រៅប្រទេស។ ប្រជាពលរដ្ឋយល់ថា បញ្ហានេះកាន់តែឆ្លុះបញ្ចាំឱ្យឃើញថា ក្រុមគ្រួសារនិងបក្សពួករបស់លោកក៏មិនមានទំនុកចិត្តលើគុណភាពក្នុងការទទួលសេវាកម្មសុខាភិបាលក្រោមការដឹកនាំរបស់លោកដែរ។
ប្រជាពលរដ្ឋ និងមន្ត្រីសង្គមស៊ីវិលរិះគន់ថា ទង្វើប្រមុខរដ្ឋាភិបាលបែបនេះជាគំរូអាក្រក់មួយដែលធ្វើឱ្យប្រជាពលរដ្ឋបាត់បង់ទំនុកចិត្តលើក្រុមគ្រូពេទ្យក្នុងស្រុក និងធ្វើឱ្យប្រព័ន្ធផ្នែកសុខាភិបាលពុំសូវមានតម្លៃ។ ពួកគេទាមទារឱ្យរដ្ឋាភិបាលពង្រឹងផ្នែកសុខាភិបាលនេះឱ្យមានគុណភាពជាងបច្ចុប្បន្ន និងធ្វើការអប់រំណែនាំមន្រ្តីសុខាភិបាលជាប្រចាំដើម្បីឱ្យគោរពតួនាទីអនុវត្តតាមវិជ្ជាជីវៈ ដើម្បីផ្តល់អទិភាពក្នុងការជួយសង្រ្គោះជូនប្រជាពលរដ្ឋដែលមានជីវភាពក្រីក្រឱ្យពួកគាត់មានទំនុកចិត្តនិងទទួលបានភាពកក់ក្តៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។