ប្រជាពលរដ្ឋ​និង​សង្គម​ស៊ីវិល​រិះគន់​រដ្ឋាភិបាល​ជុំវិញ​ការ​បញ្ហា​ទិញ​ក្ដារ​មឈូស​ពី​ប្រទេស​ថៃ

ដោយ មួង ណារ៉េត
2021-07-06
Share
ប្រជាពលរដ្ឋ​និង​សង្គម​ស៊ីវិល​រិះគន់​រដ្ឋាភិបាល​ជុំវិញ​ការ​បញ្ហា​ទិញ​ក្ដារ​មឈូស​ពី​ប្រទេស​ថៃ ក្ដារ​មឈូស​ថៃបានដឹកមកតម្កល់នៅក្នុងវត្តមួយនៅជាប់ព្រំដែនប្រទេសថៃ ក្រោយពីការបញ្ជាទិញពីកម្ពុជាកាលពីថ្ងៃទី៣ ខែកក្កដា ឆ្នាំ២០២១។
រូប៖ គេ​ផ្ដល់​ឱ្យ

ប្រជា​ពលរដ្ឋ​​មួយ​​​ចំនួន​​រិះ​​គន់​រដ្ឋាភិបាល​លោក ហ៊ុន សែន អសមត្ថ​ភាព ដែល​ទិញ​ក្ដារ​មឈូស​ពី​ប្រទេស​ក្រៅ​ដើម្បី​បូជា​សព​អ្នក​ស្លាប់​ដោយ​សារ​ជំងឺ​កូវីដ១៩។ ពួក​គាត់​យល់​ថា វិធាន​ការ​បែប​នេះ​ពុំ​មែន​ជា​ដំណោះ​ស្រាយ​ជួយ​រំលែក​ទុក្ខ​កង្វល់​របស់​ប្រជា​ពលរដ្ឋ​នោះ​ទេ។ មន្ត្រី​សង្គម​ស៊ីវិល​ជំរុញ​ឱ្យ​រដ្ឋាភិបាល​ផ្សព្វ​ផ្សាយ​ព័ត៌មាន​ឱ្យ​បាន​ទូលំ​ទូលាយ​ដើម្បី​ស្រាយ​មន្ទិល​របស់​ពលរដ្ឋ និង​បង្កើន​ប្រសិទ្ធ​ភាព​អនុវត្ត​ការ​ងារ​របស់​រដ្ឋាភិបាល។

ប្រជា​ពលរដ្ឋ​មួយ​​ចំនួន​យល់​ថា​រដ្ឋាភិបាល​គួរ​គិត​គូរ​ពង្រឹង​សេវា​សុខាភិបាល ផ្គត់ផ្គង់​ជីវភាព​ពលរដ្ឋ ជា​ពិសេស​ចាត់​វិធាន​កាត់​ផ្ដាច់​ការ​ចម្លង​ជំងឺ​កូវីដ១៩ ឱ្យ​បាន​ឆាប់​រហ័ស​ទើប​ជា​ដំណោះ​ស្រាយ​ត្រឹម​ត្រូវ​ដើម្បី​ធានា​នូវ​ប្រក្រតី​ភាព​ឡើង​វិញ។

ប្រជា​ពលរដ្ឋ​រស់​នៅ​ខេត្ត​បាត់ដំបង កញ្ញា ពៅ​ ណា លើក​ឡើង​ថា​ការ អាជ្ញាធរ​​របប​​ក្រុង​​ភ្នំពេញ​ទិញ​ក្តារ​មឈូស​ពី​ក្រៅ​ប្រទេស​បង្ហាញ​អំពី​ការ​អសមត្ថភាព​របស់ របប​ឯក​បក្ស​ដែល​មិន​បាន​ប្រើ​ប្រាស់​ធន​ធាន​ខាង​ក្នុង​ប្រទេស​ឱ្យ​អស់​លទ្ធ​ភាព។ កញ្ញា​មិន​ពេញ​ចិត្ត រដ្ឋាភិបាល​ដែល​ប្រកាស​រៀបចំ​ក្ដារ​មឈូស​ទុក​ឱ្យ​ពលរដ្ឋ​ខ្លួន ដែល​ធ្វើ​ឱ្យ​ប្រជា​ពលរដ្ឋ​ភាគ​ច្រើន​រួម​ទាំង​ម្ដាយ​របស់​កញ្ញា​ផង​តក់​ស្លុត ស្រប​ពេល​ចំនួន​អ្នក​ឆ្លង​កូវីដ១៩ និង​ស្លាប់​កើន​ឡើង​ឥត​ស្រាក​ស្រាន្ត។ កញ្ញា​ចាត់​ទុក ការ​ត្រៀម​ក្ដារ​មឈូស​ទុក​មុន​នេះ​គឺ​ជា​ការ​ប្រមាថ​អាយុ​ជីវិត​របស់​ពលរដ្ឋ​ខ្មែរ៖ «នៅ​សម័យ​នេះ​គឺ​បង​ប្អូន​ប្រជា​ជន​ខ្មែរ​យើង​ខ្វះ​ស្បៀងអាហារ​គួរ​តែ​ចែក​អង្ករ​ចែក​លុយ​ដល់​ពួក​គាត់​មិន​មែន​មក​យក​លុយ​ទៅ​ចំណាយ​ទិញ​ក្ដារ​មឈូស​ដល់​ស្រុក​គេ​រាប់​រយ​រាប់​ពាន់​យក​មក​ត្រៀម​ទុក​អ៊ីចឹង​ទេ​យើង​គួរ​តែ​មាន​វិធាន​ការ​ទប់​ស្កាត់​ឬ​មួយ​ដោះ​ស្រាយ​ជីវភាព​ពួក​គាត់​ប្រចាំ​ថ្ងៃ​គាត់​ធ្វើ​ការ​ធ្វើ​ងារ​អត់​បាន​គួរ​គិត​ឃើញ​ត្រង់​ហ្នឹង ឈើ​ចាប់​បាន​រាប់​តោន​រាប់​ម៉ឺន​ឈើ​មិន​ព្រម​ថា​ធ្វើ​ស្រុក​ឯង​ស្ងាត់​ស្ងៀម​ទៅ​គ្រាន់​តែ​ប៉ុណ្ណឹង​សោះ​ធ្វើ​មិន​កើត​សូម្បី​មឈូស​សោះ​ហើយ​តើ​មក​ដឹង​នាំ​ប្រទេស​មិច​ទៅ»

ស្រដៀង​​គ្នា​​នេះ​​ដែរ ប្រជា​ពលរដ្ឋ​នៅ​ខេត្ត​បន្ទាយ​មាន​ជ័យ លោក អ៊ិន អាត ថ្លែង​ថា​ពលរដ្ឋ​សព្វ​ថ្ងៃ​កំពុង​បារម្ភ​ខ្លាច​ឆ្លង​ជំងឺ​កូវីដ១៩ ដែល​ពួក​គាត់​ត្រូវ​ការ​រដ្ឋាភិបាល​ជួយ​​ផ្សព្វ​ផ្សាយ​អប់​រំ​សុខ​ភាព ផ្តល់​ស្បៀង​អាហារ និង​ដោះ​ស្រាយ​បញ្ហា​ជីវភាព​របស់​ពួក​គាត់​ជា​ដើម។ អាជីវ​ករ​រូប​នេះ​ស្តោក​ស្ដាយ​ដែល​រដ្ឋាភិបាល​ចំណាយ​ថវិកា​ទិញ​ក្តារ​មឈូស​ពី​ប្រទេស​ថៃ ស្រប​ពេល​ដែល​ប្រជា​ពលរដ្ឋ​កំពុង​រស់​ទាំង​នៅ​ត្រដាបត្រដួស និង​ជំពាក់​បំណុល​ធនាគារ​វ័ណ្ឌក៖ «យើង​មាន​ការ​បញ្ជា​ទិញ​យើង​មិន​គួរ​បញ្ចេញ​ជា​សាធារណៈ​អា​ហ្នឹង​រឿង​មិន​គួរ​បញ្ចេញ យើង​គួរ​បញ្ចេញ​ទី​មួយ​អប់រំ​ប្រជា​ជន​ឱ្យ​មានការ​ការ​ពារ ការ​ទប់​ស្កាត់ ដូច​ជា​រាល់​ថ្ងៃ​អាជ្ញាធរ​ក៏​គាត់​មិន​សូវ​គិត​ដែរ គាត់​មិនសូវ​សម្លឹង​មើល គាត់​ទៅ​សំខាន់​ក្ដារ​មឈូស​សម្រាប់​ដុត​មនុស្ស​ទៅ​វិញ​យើង​គិត​អា​អ្នក​នៅ​រស់​នេះ​គ្នា​ដែល​ខ្វះ​ខាត អ្នក​ខ្លះ​ជំពាក់​ធនាគារ​រក​ឡើង​មិន​បាន អ្នក​ខ្លះ​ក៏​អត់​អី​ហូប​យើង​គិត​អា​ហ្នឹង​វិញ​បាន​ត្រឹម​ត្រូវ»

ប្រតិកម្ម​របស់​ពលរដ្ឋ​នេះ គឺ​ក្រោយ​ពេល​អាជ្ញាធរ​របប​ក្រុង​​ភ្នំពេញ​​បាន​​ទិញ​ក្ដារមឈូស​ជា​​ច្រើន​​សម្រាប់​បូជា​សព ​បន្ទាប់​ពី​លោក​នាយក​រដ្ឋមន្ត្រី ហ៊ុន សែន កាល​ពី​ថ្មីៗ​ប្រកាស​ឱ្យ​មន្ត្រី​របស់​លោក​យក​ឈើ​ដែល​រឹប​អូស​បាន​រៀប​ចំ​ធ្វើក្តាម​ឈូស និង​ក្រសួង​សេដ្ឋ​កិច្ច​និង​ហិរញ្ញ​វត្ថុ​និង​ត្រៀម​ប្រមូល​ទិញ​ក្ដារ​មឈូស​សម្រាប់​អ្នក​ស្លាប់​ដោយ​សារ​ជំងឺ​កូវីដ​១៩។

វិទ្យុ​អាស៊ី​សេរី​មិន​អាច​ទាក់ទង​អ្នក​នាំ​ពាក្យ​ក្រសួង​សុខាភិបាល លោក​ស្រី ឱ វណ្ណ​ឌីន អ្នក​នាំ​ពាក្យ​ក្រសួង​សេដ្ឋ​កិច្ច និង​ហិរញ្ញ​វត្ថុ លោក មាស សុខ​សេនសាន និង​អភិបាល​រង​ខេត្ត​បន្ទាយ​មានជ័យ លោក ង៉ោ ម៉េនជ្រួន ដើម្បី​​បកស្រាយ​ជុំវិញ​​រឿង​​នេះ​​បាន​​ទេ នៅ​​ថ្ងៃ​ទី៦ កក្កដា ដោយ​ទូរស័ព្ទ​ចូល​ពុំ​មាន​អ្នកទទួល។ ប៉ុន្តែ​លោក ង៉ោ ម៉េង​ជ្រួន បាន​ប្រាប់​សារ​ព័ត៌មាន​ក្នុង​ស្រុក​នៅ​ថ្ងៃ​ទី៥ កក្កដា​ថា រដ្ឋាភិបាល​បាន​បញ្ជា​ទិញ​ក្ដារ​មឈូស​ពី​ប្រទេស​ថៃ​ចំនួន ៣.០០០ សម្រាប់​សម្រាប់​អ្នក​ស្លាប់​ដោយ​សារ​ជំងឺ​កូវីដ១៩។

ជុំវិញ​រឿង​នេះ អ្នក​នាំ​ពាក្យ​ក្រសួង​ធម្មការ និង​សាសនា លោក សេង សុមុនី ប្រាប់​ថា​លោក​មិន​អាច​បក​ស្រាយ​ជុំវិញ​ការ​បញ្ជា​ទិញ​ក្ដារ​មឈូស​ពី​ប្រទេស​ថៃ និង​បាន​ទេ ដោយ​លោក​រុញ​ឱ្យ​ទៅ​សួរ​គណៈ​កម្មការ​បូ​ជា​សព និង​អាជ្ញាធរ​តាម​ខេត្ត​វិញ។ តែ​លោក​បញ្ជាក់​ថា​ការ​រៀបចំ​ក្ដារ​ឈូស​ទុក​មុន​នេះ មិន​ប៉ះពាល់​ដល់​អារម្មណ៍ ឬ​បំភិត​បំភ័យ​ដល់​ពលរដ្ឋ​នោះ​ទេ តែ​ករណី​នេះ គឺ​ជា​បុណ្យ​កុសល​តាម​ជំនឿ​របស់​ខ្មែរ​ទៅ​វិញ៖ « តាម​ពិត​ខ្មែរ​យើង​មាន​ជំនឿ​មួយ​ថា បើ​កូន​ចៅ​ណា​បាន​រៀប​ចំ​គេ​ហៅ​ថា​ឈើ​ចាស់​ទុំ ក្ដារ​ចាស់​ទុំ​ដែល​អនិច្ចកម្ម​ទៅ​ហ្នឹង​គឺ​បាន​បុណ្យ​នៅ​ក្នុង​ជំនឿ​ហ្នឹង។ អ៊ីចឹង​ការ​គិត​គូរ​នេះ​គឺ​ជា​បុណ្យ​កុសល​វិញ​ទេ​បាទ សូម​កុំ​ឱ្យ​យល់​ច្រឡំ រហូត​ដល់​អ្នក​ខ្លះ​គេ​ធ្វើ​ចេតិយ​ទុក​ខ្លួន​ឯង​ធ្វើ​មឈូស​ទុក​ខ្លួន​ឯង ហើយ​មាន​គម្ពីរ​សាស្ត្រា​មួយ​លោក​បាន​សរសេរ​ថា​អ្នក​ដែល​បាន​គិត​គូរ​ធ្វើ​ចេតិយ​ទុក​មឈូស​ទុក​គឺ​អាយុ​វែង​ទៅ​ទៀត»

ទោះ​ជា​យ៉ាង​ណា​អ្នក​លេង​បណ្ដាញ​សង្គម​ហ្វេសប៊ុក​រិះគន់​របប​លោក ហ៊ុន សែន ថា​គិត​តែ​រៀប​ចំក្តារ​មឈូស​ឱ្យ​ប្រជា​ពលរដ្ឋ​ដែល​ស្លាប់​ដោយ​សារ​ជំងឺ​កូវីដ១៩ ប៉ុន្តែ​លោក​មិន​បាន​យក​ចិត្ត​ទុក​ពី​ជីវភាព​របស់​ប្រជា​ពលរដ្ឋ​ដែល​កំពុង​រង​ទុក្ខវេទនា​ផ្នែក​ជីវភាព​ដោយសារ​វិបត្តិ​កូវីដ១៩ ជា​ពិសេស​ការ​ផ្តល់​សេ​វា​សុខាភិបាល​ត្រឹម​ត្រូវ​ជូន​ពលរដ្ឋ​នោះ​ទេ។

ជុំវិញ​រឿង​នេះ​ប្រធាន​អង្គ​ការ​តម្លាភាព​​​កម្ពុជា លោក ប៉ិច ពិសី មាន​​​​ប្រសាសន៍​ថា កម្រិត​ចំនួន​អ្នក​ស្លាប់​ដោយ​សារ​ជំងឺ​កូវីដ១៩ ដូច​បច្ចុប្បន្ន​នេះ​ពុំ​ធ្វើ​ឱ្យ​​កម្ពុជា​ខ្វះ​ក្ដារ​មឈូស​​នោះ​ទេ។ លោក​​​គាំទ្រ​ការ​សម្រេច​ចិត្ត​របស់​រដ្ឋាភិបាល​បញ្ជាទិញ​ក្ដារ​មឈូស​ដើម្បី​ត្រៀម​ខ្លួន ប៉ុន្តែ​រដ្ឋាភិបាល​គួរ​លើក​ទឹក​ចិត្ត​និង​ជជែក​ជា​មួយ​អ្នក​ផលិត​ក្ដារ​មឈូស ក្នុង​ស្រុក អំពី​លទ្ធ​ភាព​ផលិត​មុន​បញ្ជា​ទិញ​ទៅក្រៅ​ប្រទេស។

សង្គម​ស៊ីវិល​រូប​នេះ​មើល​ឃើញ​ថា​ប្រតិ​កម្ម​របស់​ប្រជាពលរដ្ឋ​ដោយ​សារ​ពួក​គាត់ ទទួល​ព័ត៌មាន​មិន​ច្បាស់​លាស់ ដែល​ធ្វើ​ឱ្យ​ពួក​គាត់​ភ័យ​ខ្លាច ដូច្នេះ​លោក​ស្នើ ឱ្យ​គណៈ​កម្មការ​ប្រយុទ្ធ​ប្រឆាំង​ជំងឺ​កូវីដ១៩ គួរ​បញ្ចេញ​ព័ត៌មាន​ផ្លូវ​ការ​ឱ្យ​បាន​ច្រើន​ដល់​ពលរដ្ឋ ដើម្បី​បង្កើន​ជំនឿ​ចិត្ត​លើ​ការ​អនុវត្ត​មុខ​ងារ​សាធារណៈ​របស់​ខ្លួន​និង​ផ្តល់​​ប្រយោជន៍​ដល់​រដ្ឋាភិបាល៖ «ហៅ​អ្នក​ផលិត​មឈូស​ហ្នឹង​មក​ជជែក​គ្នា​ ជា​ពិសេស សមាគម​មឈូស​ហ្នឹង យើង​ជជែក​ជា​មួយ​គាត់​ទៅ​ថា​គាត់​មាន​សមត្ថ​ភាព​ផលិត​មឈូស​បាន​កម្រិត​ណា ខ្ញុំ​គិត​ថា​បើ​យើង​មាន​ចំនួន​ស្លាប់​ត្រឹម​ប៉ុណ្ណឹង​ខ្ញុំ​គិត​ថា មិន​គួរ​ខ្លះ​មឈូស​ទេ សំខាន់​យើង​ហៅ​អញ្ជើញ​ជំនាញ​ផលិត​មឈូស​នឹង​មក​ជជែក​គ្នា​ឥឡូវ​សមត្ថ​ភាព​គាត់​ផលិត​បាន​ប៉ុណ្ណេះ​បើ​យើង​ស្ទង់​ទៅ​លើ​ការ​ស្លាប់​ច្រើន​អ៊ីចឹង​យើង​អាច​បញ្ជា​ពី​ប្រទេស​ជិត​ខាង​អី​ហ្នឹង​ទៅ តែ​បើ​សមាគម​ក្នុងស្រុក​អ្នក​រក​ស៊ី​អាច​ផលិត​បាន​យើង​គួរ​កុម្ម៉ង់​ទិញ​ពី​គាត់​វិញ​បាទ»

ប្រជា​ពលរដ្ឋ​យល់​ថា​ការ​បញ្ជា​ទិញ​ក្ដារ​មឈូស​ពី​ក្រៅ​ប្រទេស​នេះ​បង្ហាញ​អំពី​ការ​ដឹក​នាំ​ខ្វះ​ចន្លោះ​របស់​រដ្ឋាភិបាល​លោក ហ៊ុន សែន ដែល​ខ្វះ​ខាត​សូម្បីតែ​ក្ដារ​មឈូស។ ពួក​គាត់​ចង់​ឃើញ​រដ្ឋាភិបាល​យក​ចិត្ត​ទុក​ដាក់​អំពី​ជីវភាព​ពលរដ្ឋ​ដែល​កំពុង​រង​គ្រោះ​ដូច​ជា​បង្កើន​គុណ​ភាព​សេវា​សុខាភិបាល ស្បៀង​អាហារ ដោះ​ស្រាយ​បំណុល ដើម្បី​កាត់​ផ្ដាច់​ជំងឺ​កូវីដ១៩ និង​បង្កើន​ទំនុក​ពី​ប្រជាពលរដ្ឋ​ទើប​ល្អ​ប្រសើរ។ ជាក់​ស្ដែង​ស្ថាន​ការណ៍​នេះ​បាន​ធ្វើ​ពួក​គាត់ តក់​ស្លុត ភ័យ​ខ្លាច ស្រប​ពេល​ចំនួន​អ្នក​ឆ្លង​ជំងឺ​កូវីដ១៩ កើន​ឡើង​ជា​បន្ត​បន្ទាប់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល