មន្ត្រី​សង្គម​ស៊ីវិល ស្វាគមន៍​ការ​បង្រួម​តំបន់​ក្រហម​នៅ​ភ្នំពេញ មក​ត្រឹម​បិទ​ខ្ទប់​ភូមិ ​ឬ​ក្នុង​ផ្ទះ​​វិញ​ ក្រោយ​​ពេល​ករណី​កូវីដ១៩ ថយ​ចុះ

ដោយ មាន ឫទ្ធិ
2021-05-10
Share
មន្ត្រី​សង្គម​ស៊ីវិល ស្វាគមន៍​ការ​បង្រួម​តំបន់​ក្រហម​នៅ​ភ្នំពេញ មក​ត្រឹម​បិទ​ខ្ទប់​ភូមិ ​ឬ​ក្នុង​ផ្ទះ​​វិញ​ ក្រោយ​​ពេល​ករណី​កូវីដ១៩ ថយ​ចុះ ទិដ្ឋភាព​​រាំងខ្ទប់​នៅ​តំបន់​ក្រហម​មួយ​ក្នុង​រាជធានី​ភ្នំពេញ នៅ​ថ្ងៃ​ទី៨ ខែឧសភា ឆ្នាំ២០២១។
រូប៖ ពលរដ្ឋផ្ដល់ឱ្យ

មន្ត្រី​សង្គម​ស៊ីវិល ស្វាគមន៍​​​គម្រោង​​​បង្រួម​​តំបន់​បិទ​ខ្ទប់ នៅ​ក្នុង​រាជធានី​ភ្នំពេញ ពី​កម្រិត​សង្កាត់ មក​នៅ​​​​ត្រឹម​​បិទ​ខ្ទប់​ត្រឹម​ភូមិ ឬ​ដាក់ឲ្យ​នៅ​ផ្ទះ​​វិញ​។ វិធាន​ការ​នេះ ធ្វើ​ឡើង​បន្ទាប់​ពី​អាជ្ញាធរ ​​​វាយ​តម្លៃ​ថា ចំនួន​អ្នក​ឆ្លង​ជំងឺ​កូវីដ១៩ (Covid-19) នៅ​ទីក្រុង​ភ្នំពេញ បាន​ថយ​ចុះ។

ការ​បង្ហើប​ពី​គម្រោង​បង្រួម​តំបន់​បិទ​ខ្ទប់​នេះ គឺ​ក្រោយ​ពេល​តួលេខ​អ្នក​ឆ្លង​ជំងឺ​កូវីដ១៩ នៅ​ភ្នំពេញ ទើប​តែ​ធ្លាក់​ចុះ បាន​មួយ​ថ្ងៃ កាល​ពី​ថ្ងៃ​ទី៨ ឧសភា។ អភិបាល​រាជធានី​ភ្នំពេញ លោក ឃួង ស្រេង ប្រាប់​ក្រុម​អ្នក​កាសែត​ក្នុងស្រុក​ កាល​ពី​ថ្ងៃ​ទី៩ ឧសភា ក្នុង​ពេល​ដែល​លោក​ចុះ​ទៅ​ពិនិត្យ​តំបន់​ក្រហម នៅ​សង្កាត់​បឹង​សាឡាង ខណ្ឌ​ទួលគោក​ថា គម្រោង​បង្រួម​តំបន់​ហានិភ័យ​នេះ កំពុង​ស្ថិត​ក្នុង​ដំណាក់​កាល​សិក្សា​របស់​អាជ្ញាធរ និង​អ្នក​បច្ចេកទេស​នៅ​ឡើយ។

តែ​យ៉ាង​ណា លោក​អះអាង​ថា ក្រោយ​ការ​បង្រួម​នេះ​រួច​ហើយ អាជ្ញាធរ​នឹង​នៅ​តែ​បន្ត​​បិទ​ខ្ទប់​យ៉ាង​តឹងរ៉ឹង​ដដែល ក្នុង​ទីតាំង​ក្រហម​នោះ៖ «ខ្ញុំ​កំពុង​តែ​វាយ​តម្លៃ​ជា​មួយ​អ្នក​បច្ចេកទេស​ ហើយ​ខ្ញុំ​កំពុង​សម្លឹង​មើល​តំបន់​ក្រហម។ ម្សិល​មិញ​នេះ នៅ​រាជ​ធានី​ភ្នំពេញ មាន​តែ​ ២រយ​នាក់ នេះ​ជា​ចំណុច​មួយ​ដែល​យើង​ទទួល​បាន​ជោគជ័យ ហើយ​បង្រួម​ពី​សង្កាត់​មក​ភូមិ ហើយ​ពី​ភូមិ​មក​តាម​ផ្ទះ។ ចំណុច​ក្រហម​ខ្ញុំ​នឹង​ដាក់​តាម​ផ្ទះ ហើយ​ទូលាយ​ភូមិ​ហ្នឹង​ឲ្យ​ធ្វើ​ដំណើរ​ ប៉ុន្តែ​យើង​ឃ្លុំបេ​អ្នក​ជំងឺ​ណា​ឲ្យ​នៅ​ផ្ទះ ដើម្បី​តាម​ដាន​ជំងឺ​ទៀត។ ចប់​ ខ្ញុំ​នឹង​ផ្សាយ​បញ្ហា​នេះ»

តួលេខ​អ្នក​ឆ្លង​ជំងឺ​កូវីដ១៩ នៅ​ភ្នំពេញ បាន​ធ្លាក់​ចុះ​កាល​ពី​ថ្ងៃ​ទី៨ ឧសភា មក​នៅ​ត្រឹម ២១៩នាក់។ នេះ​ជា​តួលេខ​ធ្លាក់​ចុះ​ដំបូង​បំផុត ចាប់​តាំង​ពី​​រដ្ឋាភិបាល ដាក់​បម្រាម​បិទ​ខ្ទប់​ក្រុង​មក។ មុន​ថ្ងៃ​ទី៨ ឧសភា តួលេខ​អ្នក​ឆ្លង​នៅ​ភ្នំពេញ មាន​ជាង ៥០០នាក់ ហើយ​អ្នក​ឆ្លង​​ភាគច្រើន គឺ​ជា​ពលរដ្ឋ​ក្រីក្រ រស់​នៅ​ក្នុង​តំបន់​ក្រហម។

អាស៊ី​សេរី មិន​អាច​សុំ​ការ​បញ្ជាក់​ពី​អ្នក​នាំ​ពាក្យ​សាលា​រាជធានី​ភ្នំពេញ លោក ម៉េត មាស​ភក្ដី និង​​ប្រធាន​មន្ទីរ​សុខាភិបាល​រាជធានី​ភ្នំពេញ​ លោក ងី មាន​ហេង បាន​ទេ នៅ​ថ្ងៃ​ទី១០ ឧសភា ដោយ​ពួក​លោក​មិន​លើក​ទូរស័ព្ទ។ ក៏​ប៉ុន្តែ លោក ម៉េត មាសភក្តី ប្រាប់​សារព័ត៌មាន​ក្នុងស្រុក​ថា អាជ្ញាធរ​ក្រុង​កំពុងតែ​អាច​គ្រប់គ្រង​បាន​ការ​ឆ្លង​រាលដាល​នៃ​ជំងឺ​កូវីដ១៩ ដោយ​ករណី​ឆ្លង​ថ្មី​កើតមាន​តែ​ក្នុង​តំបន់​ក្រហម និង​មិន​រាលដាល​ដល់​តំបន់​ដទៃ។

ពលរដ្ឋ និង​មន្ត្រី​សង្គម​ស៊ីវិល មិន​ជំទាស់​នឹង​​ការ​បង្រួម​តំបន់​បិទ​ខ្ទប់​នេះ​ទេ។ អតីត​​អ្នក​​រស់​ក្នុង​តំបន់​ក្រហម ក្នុង​​ខណ្ឌ​ពោធិ៍​សែន​ជ័យ លោកស្រី ស៊ុន សាម៉ៃ ប្រាប់​ថា អាជ្ញាធរ​បាន​ដាក់​តំបន់​ ដែល​លោកស្រី កំពុង​​រស់​នៅ​ ជា​តំបន់​ពណ៌​លឿង​វិញ។ លោកស្រី​ ថា ពេល​នេះ អ្នក​រស់​នៅ​តាម​បន្ទប់​ជួល​ភាគ​ច្រើន ​អាច​ដើរ​ហើរ​ និង​ទៅ​ផ្សារ​ទិញ​ម្ហូប​បាន តែ​អ្នក​ខ្លះ​គ្មាន​លុយ​ទៅ​ផ្សារ ដោយ​សារ​អត់​ចំណូល​​មួយ​ខែ​មក​ហើយ។

លោកស្រី ស៊ុន សាម៉ៃ យល់​ស្រប​ចំពោះ​ការ​បង្រួម​តំបន់​ក្រហម​នេះ ព្រោះ​ពួក​គាត់​អាច​ធ្វើ​ដំណើរ​ចេញ​ក្រៅ​ផ្ទះ​បាន និង​អាច​រក​បេះ​បន្លែ​ក្បែរ​ផ្ទះ​បរិភោគ​បាន។ យ៉ាង​ណា លោកស្រី​នៅ​តែ​មិន​ទាន់​ហ៊ាន​ដើរ​ឆ្ងាយ​ពី​ផ្ទះ និង​ជួបជុំ​អ្នក​ក្បែរ​ខាង​នៅ​ឡើយ​ទេ៖ «ចាស! គេ​បង្រួញ គ្រាន់​យើង​ចេញ​ទៅ​ក្រៅ ទិញ​អ្វី​បាន​ហូប​ខ្លះ។ យើង​បាន​រើស​ខ្ចង​បេះ​ត្រកួន​អី​បាន​ខ្លះ។ ចេះ​តែ​ខ្លាច​ដែរ​ហ្នឹង ទោះ​បី​ជា​គេ​បើក​ពេក ក៏​យើង​អត់​ហ៊ាន​ដើរ​ទៅ​ណា»

រីឯ ប្រធាន​សមាគម​ឯករាជ្យ​នៃ​សេដ្ឋកិច្ច​ក្រៅ​ប្រព័ន្ធ លោក វន់ ពៅ ស្វាគមន៍​ផែនការ​បង្រួម​តំបន់​បិទ​ខ្ទប់​នេះ ឲ្យ​តូច​បំផុត ដើម្បី​ជា​ប្រយោជន៍ ដល់​អ្នក​ប្រកប​របរ​ក្រៅ​ប្រព័ន្ធ និង​ពលរដ្ឋ​ក្រីក្រ​ទាំង​អស់។ លោក​ស្នើ​ថា បន្ថែម​ពី​លើ​វិធានការ​នេះ អាជ្ញាធរ​គួរ​បង្កើន​ការ​ផ្សព្វផ្សាយ​ឲ្យ​បាន​ច្រើន​បន្ត​ទៀត ហើយ​អាជ្ញាធរ ក៏​គួរ​រៀបចំ​ឲ្យ​ពលរដ្ឋ មាន​លទ្ធភាព​រក្សា​គម្លាត​សុវត្ថិភាព និង​ខិតខំ​ប្រឹងប្រែង​ទប់​ស្កាត់ កុំ​ឲ្យ​កើត​មាន​ការ​ឆ្លង​ព្រឹត្តិការណ៍​សហគមន៍​ជា​ថ្មី​ទៀត៖ «រដ្ឋ​ត្រូវ​មាន​អភិបាល​កិច្ច និង​សហការ​ជាមួយ​អង្គការ​សង្គម​ស៊ីវិល ឬ​ក៏​ភាគី​ដើម្បី​កុំ​ឲ្យ​មាន​ព្រឹត្តិការណ៍​អ្វី​បន្ថែម​ទៀត ពី​ព្រោះ​ព្រឹត្តិការណ៍​កន្លង​មក​ជា​ការ​ធ្វេសប្រហែស​របស់​អាជ្ញាធរ​ហ្នឹង​តែ​ម្ដង»

ទោះ​ជា​យ៉ាង​ណា ពលរដ្ឋ និង​មន្ត្រី​សង្គម​ស៊ីវិល មិន​អាច​វាយ​តម្លៃ​ថា ស្ថានភាព​ជំងឺ​កូវីដ១៩ នៅ​ភ្នំពេញ ថយ​ចុះ​ពិត​មែន ឬ​យ៉ាង​ណា​ទេ គឺ​ពឹង​ផ្អែក​ទាំង​ស្រុង លើ​របាយ​ការណ៍​របស់​ក្រសួង​សុខាភិបាល និង​តួលេខ​របស់​អាជ្ញាធរ។ ចំណែក​ពលរដ្ឋ​ខ្លះ​ទៀត យល់​ថា អាជ្ញាធរ​បង្រួម​តំបន់​ក្រហម​នេះ ព្រោះ​ខ្វះ​លទ្ធភាព​ផ្ដល់​ស្បៀង​អាហារ​ឲ្យ​ពលរដ្ឋ ក្នុង​ពេល​ដែល​អ្នក​រស់​នៅ​ក្នុង​តំបន់​បិទ​ខ្ទប់ ស្រែក​ដង្ហោយ​រក​អំណោយ​រាល់​ថ្ងៃ​ដោយសារ​ដាច់​ស្បៀង៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល