ក្រសួង​សុខាភិបាល​បង្កើន​ការ​យក​ចិត្ត​ទុក​ដាក់​ទៅ​លើ​ការ​បង្ការ​វីរុស​កូរ៉ូណា

ដោយ អូន ភាព
2020-02-04
អ៊ីម៉ែល
មតិ
Share
បោះពុម្ព
សិស្ស​នៅ​សាលា​តម្រង់​ជួរ​លាង​ដៃ ដើម្បី​បង្ការ​ការ​ឆ្លង​មេរោគ​វីរុស កូរ៉ូណា (Coronavirus)។
សិស្ស​នៅ​សាលា​តម្រង់​ជួរ​លាង​ដៃ ដើម្បី​បង្ការ​ការ​ឆ្លង​មេរោគ​វីរុស កូរ៉ូណា (Coronavirus)។
រូប៖ ក្រសួង​អប់រំ យុវជន និង​កីឡា

សង្គម​ស៊ី​វិល​ចង់​ឲ្យ​រដ្ឋាភិបាល​បង្កើន​ការ​យក​ចិត្ត​ទុក​ដាក់​ និង​មាន​វិធានការ​ជាក់លាក់​ទៅ​លើ​ការ​បង្ការ​ជំងឺ​ឆ្លង​ដែល​បង្ក​ដោយ​វីរុសកូរ៉ូណា​ថ្មី ដើម្បីឲ្យ​ប្រជា​ពល​រដ្ឋ​មាន​ទំនុក​ចិត្ត​។​ ប៉ុន្តែ​មន្ត្រី​ក្រសួង​សុខាភិបាល​អះ​អាង​ថា​ខ្លួន​កំពុង​គិតគូរ​អំពី​រឿង​នេះ ដោយ​បាន​​ដាក់​ពង្រាយ​បុគ្គលិក​ពេទ្យ​ជិត​ (៣០០០) នាក់​នៅ​តាម​ច្រក​ចេញ​ចូល​ក្នុង​ប្រទេស​ទាំង​អស់​ ដែល​នៅ​ជាប់​ប្រទេស​វៀតណាម ឡាវ និង​ថៃ។

សង្គម​ស៊ីវិល​សម្ដែង​ក្ដី​បារម្ភ​អំពី​ភ្ញៀវ​ទេសចរ​ចិន ដែល​បន្ត​ធ្វើ​ដំណើរ​ចូល​មក​កម្ពុជា​ ​ក្នុង​ខណៈ​ជំងឺ​រលាក​ផ្លូវ​ដង្ហើម​ដែល​បង្ក​ដោយ​វីរុស​កូរ៉ូណា​ថ្មី​នេះ កំពុង​រីក​រាល​ដាល​ខ្លាំង ប៉ុន្តែ​កម្ពុជា​ហាក់​មិន​សូវ​យក​ចិត្ត​ទុក​ដាក់​ទៅ​លើ​ការ​ឆ្លង​វីរុស​នេះ​ទេ។

ប្រធាន​មជ្ឈមណ្ឌល​ប្រជា​ពលរដ្ឋ​ ដើម្បី​អភិវឌ្ឍន៍​និង​សន្តិភាព​លោក យង់ គឹមអេង ប្រាប់​អាស៊ី​សេរី​នៅ​ថ្ងៃ​ទី៣ ខែ​កុម្ភៈ​ថា ក្រសួង​សុខាភិបាល​គួរ​យក​ចិត្ត​ទុក​ដាក់​បន្ថែម​ទៀត ទៅ​លើ​ការ​ត្រួត​ពិនិត្យ​អ្នក​ឆ្លង​ជំងឺ​រលាក​ផ្លូវ​ដង្ហើម​​នេះ​ ដើម្បី​ធ្វើ​ឲ្យ​ប្រជា​ពល​រដ្ឋ​ខ្មែរ​មាន​ទំ​នុក​ចិត្ត​ចំ​ពោះ​វិធាន​ការ​របស់​របស់​រដ្ឋាភិបាល៖ «យើង​ឃើញ​ថា​ បើ​សិន​ដូចជា​ការ​ចុះ​ផ្សាយ​របស់​កាសែត​ចិន​មែន​ ហើយ​ករណី​នេះ​នៅ​មាន​បន្ត​ទៀត​ គឺ​និង​អាច​ឲ្យ​គេ​ដាក់​ការ​សង្ស័យ​ទៅ​លើ​ហានិភ័យ​មួយ​ចំនួន​ដែល​ពាក់​ព័ន្ធ​ជា​មួយ​នឹង​កម្ពុជា​យើង​ដែរ​ ពី​ព្រោះ​ថា​គេ​អាច​នឹង​ដាក់​ការ​សង្ស័យ​ថា​តើ​កម្ពុជា​អាច​និង​គ្រប់​គ្រង​បាន ឬ​ត្រួត​ពិនិត្យ​បាន​ចំពោះ​បញ្ហា​វិធាន​ការ​របស់​ខ្លួន​ ចំ​ពោះ​វីរុស​ហ្នឹង​បាន​ឬ​ទេ»

ការ​លើក​ឡើង​នេះ​បន្ទាប់​ពី​សារ​ព័ត៌មាន​ចិន​មួយ​មាន​ឈ្មោះ​ថា​ The Cambodia China Times បាន​ចេញ​ផ្សាយ​កាល​ពី​​ថ្ងៃ​ទី២ ខែ​កុម្ភៈ​ថា ជន​ជាតិ​ចិន ៣នាក់ ដែល​បាន​ចាក​ចេញ​ពី​ប្រទេស​កម្ពុជា​ ត្រូវ​បាន​រក​ឃើញ​ថា​មាន​ផ្ទុក​មេរោគ​កូរ៉ូណា​នៅ​ពេល​ទៅ​ដល់​ប្រទេស​ចិន។ ជន​ជាតិ​ចិន​ទាំង​៣​នាក់​នេះ​ គឺ​ជា​អ្នក​ដែល​បាន​រួម​ដំណើរ​តាម​យន្ត​ហោះ​ជា​មួយ​អ្នក​ឆ្លង​មេរោគ​កូរ៉ូណា​ដំបូង​បំផុត​នៅ​កម្ពុជា។

ទាក់ទង​នឹង​ការ​ចុះ​ផ្សាយ​នេះ អ្នក​នាំ​ពាក្យ​ក្រសួង សុខាភិបាល លោក លី សូវ៉ាន់ បាន​ឲ្យ​អាស៊ី​សេរី​ដឹង​នៅ​ថ្ងៃ​ទី៣ កុម្ភៈ​ថា ជន​ជាតិ​ចិន ៣នាក់​ឆ្លង​មេរោគ​កូរ៉ូណា​នោះ ក្រោយ​ពេល​ពួក​គេ​បាន​ចាក​ចេញ​ពី​កម្ពុជា​កាល​ពី​ថ្ងៃ​ទី២៩ ខែ​មករា។

លោក លី សុវណ្ណ បញ្ជាក់​ថា ជន​ជាតិ​ចិន​ទាំង ៣នាក់​នោះ​ អាច​ប្រហែល​ឆ្លង​ពី ​ជន​ជាតិ​ចិន​ដូច​គ្នា​ពេល​ធ្វើ​ដំណើរ​តាម​យន្ត​ហោះ ឫ ពេល​ទៅ​ដល់ ប្រទេស​ចិន​វិញ​ មិន​មែន​ឆ្លង​មេរោគ​កូរ៉ូណា ក្នុង​កំឡុង​ពេល​ពួក​គេ​ស្នាក់​នៅ​កម្ពុជា​ឡើយ។

ការ​រក​ឃើញ​ថា ជន​ជាតិ​ចិន ៣នាក់ ឆ្លង​មេរោគ​កូរ៉ូណា ក្រោយ​ពី​ត្រឡប់​ពី​កម្ពុជា​វិញ​នេះ បង្កើត​ឲ្យ​មាន​មន្ទិល​សង្ស័យ​ជា​ច្រើន អំពី​អសមត្ថភាព​របស់​ក្រសួង​សុខាភិបាល​កម្ពុជា។

លោក​វេជ្ជ​បណ្ឌិត លី សុវ៉ាន់ មាន​ប្រ​សាសន៍​បន្ត​ថា ក្រសួង​សុខាភិបាល​បាន​យក​ចិត្ត​ទុក​ដាក់​ខ្លាំង​ណាស់​ទៅ​លើ​ការ​ពិនិត្យ​ឈាម​ចំ​ពោះ​ពលរដ្ឋ​​ណា​ដែល​មាន​ការ​សង្ស័យ​ថា​មាន​ផ្ទុក​វីរុស​កូរ៉ូណា​ថ្មី​នេះ​ ប៉ុន្តែ​មក​ទល់​ថ្ងៃ​ច័ន្ទ ទី៣ កុម្ភៈ​ម្សិល​មិញ គឺ​មិន​បាន​រក​ឃើញ​មាន​ករណី​ថ្មី​ទៀត​ទេ។

លោក​ថា មន្ត្រី​ក្រសួង​សុខាភិបាល បាន​ពិនិត្យ​ឈាម​ទៅ​លើ​និស្សិត​ខ្មែរ​ម្នាក់ ​ក្នុង​ចំណោម​និស្សិត​មួយ​ចំនួន​ទៀត ​ដែល​បាន​វិល​ត្រឡប់​មក​ពី​ប្រទេស​ចិន​វិញ​កាល​ពី​ពេល​ថ្មីៗ នេះ​ ហើយ​សង្ស័យ​ថា​និស្សិត​ម្នាក់​នេះ​មាន​ផ្ទុក​វីរុស​កូរ៉ូណា​​ ដោយសារ​​គាត់​មាន​រោគ​សញ្ញា​ ក្អក​និង​ឈឺ​បំពង់​ក ប៉ុន្តែ​លទ្ធផល​បញ្ជាក់​ថា​អវិជ្ជមាន។

លោក​ថា មន្ត្រី​ក្រសួង​សុខាភិបាល ក៏​បាន​ពិនិត្យ​ឈាម​ទៅ​លើ​ជន​ជាតិ​ចិន​ច្រើន​នាក់​​ផង​ដែរ​ បន្ទាប់​ពី​សង្ស័យ​ថា​ ពួក​គេ​មាន​ផ្ទុក​វីរុស​កូរូ​ណា​នេះ ប៉ុន្តែ​មិន​បាន​រក​ឃើញ​លទ្ធផល​វេជ្ជ​មាន​ទេ។​ ទោះបី​យ៉ាង​ណា​លោក​បដិសេធ​ផ្ដល់​ព័ត៌មាន​ថា មាន​ជន​ជាតិ​ចិន​ចំនួន​ប៉ុន្មាន​នាក់ ដែល​បាន​យក​ឈាម​ទៅ​ពិនិត្យ​​នៅ​វិទ្យា​ស្ថាន​ប៉ាស្ទ័រ​នោះ​ទេ៖ «យើង​មាន​ការ​បង្កើន​មន្ត្រី​ដែរ​ ដើម្បី​ត្រៀម​លក្ខណ:​ជា​យថា​ហេតុ​ណា​មួយ​ បើ​សិន​ជា​ករណី​ហ្នឹង​មាន​ការ​រាតត្បាត​ យើង​មាន​មន្ត្រី​របស់​យើង​ទប់​ស្កាត់​ទាន់​ពេល​វេលា»

លោក​បន្ត​ថា មក​ទល់​ពេល​នេះ ក្រសួង​សុខាភិបាល​បាន​បង្កើន​ការ​ដាក់​ម៉ាស៊ីន​កម្ដៅ និង​ដាក់​ពង្រាយ​ពេទ្យ​បន្ថែម​ទៀត​គ្រប់​ខេត្ត​ទាំង​អស់​នៅ​ទូ​ទាំ​ង​ប្រទេស ជា​ពិសេស​​នៅ​តាម​ច្រក​ព្រំ​ដែន​ជាប់​ប្រទេស​វៀតណាម ឡាវ និង​ថៃ​ផង​ដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល