អង្គការសុខភាពពិភពលោក (WHO)ចេញសេចក្ដីប្រកាសព័ត៌មានមួយ កាលពីថ្ងៃទី១៩ ខែកុម្ភៈ ស្នើឱ្យកម្ពុជាត្រៀមលក្ខណៈឱ្យបានល្អ ដើម្បីឆ្លើយតបរហ័សនិងទាន់ពេលវេលា ចំពោះលទ្ធភាពនៃការរីករាលដាលវីរុសកូរ៉ូណាថ្មី ឬជំងឺកូវីត១៩ (Covid-19) ដែលអាចកើតមាននៅកម្ពុជា។
ដើម្បីត្រៀមបង្ការការឆ្លងរាលដាលនេះ អង្គការសុខភាពសុភាពពិភពលោក កំពុងធ្វើការជាមួយក្រសួងសុខាភិបាល និងដៃគូដទៃទៀត ដើម្បីឱ្យប្រទេសកម្ពុជាធ្វើបច្ចុប្បន្នភាព អំពីផែនការត្រៀមលក្ខណៈ និងការឆ្លើយតបកម្រិតថ្នាក់ជាតិ ហើយនិងកំណត់ចំណុចខ្វះខាតចំពោះសកម្មភាពត្រៀមជាអាទិភាព។
ចំណុចអាទិភាពដែលត្រូវត្រៀមទុក រួមមាន ការគ្រប់គ្រងឧប្បត្តិហេតុ ការធ្វើផែនការ ការសម្របសម្រួលផ្នែកពហុវិស័យ ការវាយតម្លៃតាមដានហានិភ័យ មន្ទីរពិសោធន៍ ការគ្រប់គ្រងគ្លីនិក និងសេវាកម្មថែទាំសុខភាព ការត្រួតពិនិត្យនិងបង្ការការឆ្លង វិធានការសុខភាពសាធារណៈមិនមែនឱសថ និងសម្ភារៈសម្រាប់ធ្វើប្រតិបត្តិការជាដើម។ ក្រសួងសុខាភិបាលកម្ពុជា ប្រកាសនៅថ្ងៃទី២០ ខែកុម្ភៈ ថា មកដល់ពេលនេះ មិនមានពលរដ្ឋខ្មែរណាម្នាក់មានផ្ទុកវីរុសកូរ៉ូណាថ្មី ឬកូវីត១៩ នោះទេ។ ចំណែកនៅឯប្រទេសថៃវិញ រដ្ឋាភិបាលថៃ បានហាមមិនឱ្យអ្នកដំណើរដែលធ្លាប់ជិះកប៉ាល់ វេស្ទើដាម (Westerdam) ចូលក្នុងប្រទេសថៃទេ។
បម្រាមនេះ បន្ទាប់ពីករណីអ្នកដំណើរអាមេរិកាំងម្នាក់នៅលើកប៉ាល់ វេស្ទើដាមត្រូវបានរកឃើញថា មានកូវីដ-១៩ បន្ទាប់ហោះចេញពីកម្ពុជាទៅប្រទេសម៉ាឡេស៊ី ។ ក្រសួងសុខភាពសាធារណៈស្នើសុំទៅក្រសួង ស្ថាប័នពាក់ព័ន្ធថៃទាំងអស់ ហាមឃាត់អ្នកដំណើរលើកប៉ាល់ វេស្ទើដាម កុំឱ្យចូលប្រទេសថៃគ្រប់ករណី រហូតដល់ផុតរយៈពេលចម្លងមេរោគវីរុសនេះ បាន ១៤ថ្ងៃ គឺចាប់រាប់ពីថ្ងៃទី១៤ កុម្ភៈ តាមវិធានការបង្ការរោគឆ្លងរបស់ប្រទេសថៃ។
ក្នុងសប្ដាហ៍នេះអាជ្ញាថៃ ក៏បានចាប់ផ្ដើមរឹតបន្តឹងការត្រួតពិនិត្យរករោគសញ្ញានៃជំងឺកូវីត១៩ ចំពោះអ្នកដំណើរទាំងអស់ដែលហោះហើរចេញពីកម្ពុជាទៅតាមព្រលានយន្តហោះនានាក្នុងប្រទេសថៃ។ គិតត្រឹមថ្ងៃទី២០ ខែកុម្ភៈ នេះ ចំនួនអ្នកឆ្លងមេរោគបង្កជំងឺ កូវីត១៩ នៅទូទាំងពិភពលោក ឡើងដល់ជាង ៧ម៉ឺន ៥ពាន់នាក់ (៧៥.៧២៧) គឺលើសពីម្សិលមិញចំនួន ជាង៥រយនាក់ (៥២៧នាក់)។ ទន្ទឹមគ្នានេះ ចំនួនអ្នកស្លាប់ឡើងដល់ជាង ២ពាន់នាក់ (២.១២៩នាក់)។ អ្នកបានព្យាបាលជាសះស្បើយមានចំនួនជាង ១ម៉ឺន ៦ពាន់នាក់ (១៦.៥២៦នាក់)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។