គ្រូពេទ្យខ្មែរអាមេរិកាំងដាក់ការសង្ស័យទៅលើជនបរទេសដួលសន្លប់ និងស្លាប់ នៅកម្ពុជាថ្មីៗនេះ ថា អាចទាក់ទងនឹងជំងឺរលាកផ្លូវដង្ហើមប្រភេទថ្មី ឬកូវីដ-១៩ ច្រើនជាងថា ការដួលសន្លប់ដែលបណ្ដាលមកពីខ្យល់គ ឬគាំងបេះដូង។
លោក គ្រូពេទ្យ ឆាន ទូច អំពាវនាវឲ្យរដ្ឋាភិបាលកម្ពុជាបើកទូលាយ ឬកុំលាក់បាំងព័ត៌មាន បើសិនជាមានករណីឆ្លងជំងឺរលាកផ្លូវដង្ហើមប្រភេទថ្មី ឬកូវីដ-១៩ នៅកម្ពុជា ដើម្បីឲ្យពលរដ្ឋមានការប្រុងប្រយ័ត្នខ្ពស់ទាំងអស់គ្នា។ លោកគ្រូពេទ្យ ឆាន ទូច បន្ថែមថា លោកមិនជឿទេថា ករណីជនចិន ដែលដួលស្លាប់នៅខេត្តព្រះសីហនុ និងជនបរទេសផ្សេងទៀតដួលសន្លប់ភ្លាមៗ នៅរាជធានីភ្នំពេញ ថា មិនទាក់ទងនឹងជំងឺកូវីដ-១៩ នោះឡើយ។
លោកបន្ថែមថា ក្រសួងសុខាភិបាលគួរតែពិនិត្យឲ្យបានច្បាស់លាស់ និងបង្ហាញហេតុផលឲ្យមានតម្លាភាពវិញករណីនេះ ប្រសើរជាង ពីព្រោះថា វីរុសសារស៍-ស៊ីអូវី (SARS-COV2) ឬកូរ៉ូណានេះ ពេលដែលឆ្លងតាមរយៈផ្លូវដង្ហើម ធ្វើឲ្យពិបាកដកដង្ហើមខ្លាំងមានន័យថា សួតរបស់អ្នកជំងឺអាចប្រមូលផ្ដុំសារធាតុរាវដែលអាចបង្កជាជំងឺរលាកសួត ហើយវាក៏ជាការយាយីដល់ផ្លូវដង្ហើម ឬឈានទៅដល់ស្ទះដង្ហើម និងចង្វាក់បេះដូង ដែលនាំឲ្យអ្នកជំងឺស្លាប់ភ្លាមៗ បាន៖ «ការលាក់ក្នុងរយៈពី ថ្ងៃទី១៤ ថ្ងៃហ្នឹង អត់មានរោគសញ្ញាមិនមែនពិត តែដល់ពេលដែលវាចេញមកភ្លាមក្រោយពីពេលនេះ គឺថប់ដង្ហើមខ្លាំងពិបាកដកដង្ហើមអាចស្លាប់ភ្លាមតែម្ដង»។
ជនបរទេសនៅកម្ពុជាកាលពីពេលថ្មីៗ បានស្លាប់ និងដួលសន្លប់ជាបន្តបន្ទាប់នៅទីកន្លែងផ្សេងៗ ដួចជា ករណីជនជាតិចិនម្នាក់ដួលស្លាប់នៅខែត្រព្រះសីហនុកាលពីថ្ងៃទី២៨កុម្ភៈ ជនជាតិឥណ្ឌាសញ្ជាតិអង់គ្លេសសន្លប់នៅឯវាលយន្តហោះអន្តរជាតិភ្នំពេញកាលពីថ្ងៃទី៩កម្ភៈ ជនជាតិអង់គ្លេសម្នាក់ទៀតដួលសន្លប់នៅក្បែរសាលារចនារាជធានីភ្នំពេញ និងករណីជនជាតិជប៉ុនម្នាក់ដួលសន្លប់នៅប្រាសាទអង្គរវត្ត ខែត្រសៀមរាប។ ករណីមួយទៀត ពលរដ្ឋខ្មែរម្នាក់ស្លាប់នៅក្នុងកំឡុងកំពុងគេងនៅលើអង្រឹងនៅខែត្រឧត្តរមានជ័យកាលពីថ្ងៃទី២៩ កុម្ភៈ។
ករណីស្លាប់ និងដួលសន្លប់នេះ ត្រូវបានអ្នកលេងបណ្ដាញសង្គមហ្វេសប៊ុកចែកចាយព្រោងព្រាត ហើយពួកគេលើកឡើងថា អ្នកស្លាប់ និងដួលសន្លប់ទាំងនេះ ដោយសារតែឆ្លងជំងឺរលាកផ្លូវដង្ហើម ឬកូវីដ-១៩។ ក៏ប៉ុន្តែអ្នកនាំពាក្យក្រសួងសុខាភិបាលបដិសេធ ហើយអះអាងថា ករណីមនុស្សស្លាប់ និងដួលសន្លប់ទាំងនេះថា បណ្ដាលមកពីស្រវឹងស្រា ធ្វើឱ្យខ្យល់គរ និងគាំងបេះដូង។
ទោះបីជាបែបនេះក្ដីដើម្បីបង្កាពីការឆ្លងជម្ងឺកូវីត១៩នេះ លោក គ្រូពេទ្យ ឆាន ទូច អំពាវនាវឲ្យពលរដ្ឋទាំងអស់ប្រុងប្រយ័ត្ន ដោយរស់នៅឲ្យមានអនាម័យជាប្រចាំ ដូចជា ត្រូវលាងដៃនឹងសាប៊ូឲ្យញឹកញាប់ជាដើម៖ «កត្តាសំខាន់ គេថាខ្យល់គ ឬគាំងបេះដូងមិនសំខាន់ទេ សំខាន់យើងម្នាក់ៗ ត្រូវប្រយ័ត្នខ្លួន ហើយបើសិនជាក្ដៅខ្លួន ត្រូវទៅពេទ្យភ្លាម បើសិនជារដ្ឋាភិបាលរៀបចំកន្លែងទុកដាក់ត្រឹមត្រូវនោះ ត្រូវទៅសម្រាកព្យាបាលនៅកន្លែងនោះ នៅដាច់ដោយឡែកពីគេ កុំនៅក្បែរគេ បងប្អូន » ។
សារព័ត៌មានក្នុងស្រុកបានចុះផ្សាយថា ក្រសួងសុខាភិបាលនឹងធ្វើសន្និសីទសារព័ត៌មាននៅរសៀលចន្ទថ្ងៃទី២មិនានេះស្តីពីការឆ្លើយតប ការការពារ និងការត្រៀមអន្តរាគមន៍លើការចម្លងរលាកផ្លូវដង្ហើម ឬ COVID-19 នៅកម្ពុជា ដោយមានការចូលរួមពីតំណាងអង្គការសុខភាពពិភពលោក និង ប្រធានវិទ្យាស្ថានប៉ាស្ទ័រជាដើម។
ជំងឺរលាកផ្លូវដង្ហើមប្រភេទថ្មីនេះ បានឆ្លងរាតត្បាតដល់ប្រទេសចំនួន ៦៥ប្រទេស និងដែនដី នៅលើពិភពលោក ដែលមានចំនួនអ្នកឆ្លងជិត ៨ម៉ឺន ៧ពាន់ ៧រយនាក់។ រីឯអ្នកស្លាប់បានកើនដល់ឡើងជិត ៣ពាន់នាក់។ អង្គការសុខភាពពិភពលោកបានប្រកាសឲ្យប្រទេសទាំងអស់នៅលើពិភពលោកឲ្យប្រុងប្រយ័ត្នខ្ពស់ ហើយថា ជំងឺនេះ បានឆ្លងរីករាលដាលពីប្រទេសមួយទៅប្រទេសមួយគួរឲ្យព្រួយបារម្ភខ្លាំងជាទីបំផុត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។