អ្នកជំនាញផ្នែកសុខាភិបាលលើកឡើងពីហានិភ័យធ្ងន់ធ្ងរដល់សុខភាព និងសេដ្ឋកិច្ចកម្ពុជា ដោយសារជំងឺកូវីដ១៩ ហក់ឡើងវិញ។ ពួកគេព្រមានថា ប្រសិនបើរដ្ឋាភិបាលមិនចាត់វិធានការដើម្បីទប់ទល់នឹងបញ្ហារីករាលដាលនៃជំងឺនេះឱ្យបានទាន់ពេលវេលាទេនោះ កម្ពុជានឹងធ្លាក់ចូលវិបត្តិធ្ងន់ធ្ងរជាន់លើវិបត្តិចាស់នៅក្នុងសង្គម។ ការលើកឡើងនេះបន្ទាប់ពីក្រសួងសុខាភិបាលរកឃើញថា វីរុសកូវីដ១៩បំប្លែងថ្មីអូមីក្រុង ជេអិនវ័ន (Omicron JN1) កើនឡើង ហើយកំពុងមានវត្តមាននៅក្នុងសហគមន៍ និងអាចមានករណីឆ្លងជាបន្តបន្ទាប់។
អ្នកជំនាញផ្នែកសុខាភិបាលព្រមានថាបើសិនអ្នកពាក់ព័ន្ធនៅតែធ្វេសប្រហែលនោះ ចំនួនអ្នកឆ្លងជំងឺកូវីដ១៩ នឹងកើនដល់ចំណុចគ្រោះថ្នាក់ និងគំរាមកំហែងដល់សុខភាពសាធារណៈ សេដ្ឋកិច្ច និងប្រាក់ចំណូលគ្រួសាររបស់ពលរដ្ឋជាដើម។
អ្នកជំនាញផ្នែកឱសថនៅប្រទេសអូស្ត្រាលីលោកឱសថការី លឹម សួរ មានប្រសាសន៍ថា រដ្ឋាភិបាល និងពលរដ្ឋទូទៅហាក់ភ្លេចកូវីដ-១៩ ខណៈអ្នកវេជ្ជសាស្ត្រនៅតែព្រួយបារម្ភដដែល ពីព្រោះមេរោគនេះអាចបំប្លែងខ្លួនលឿនពីប្រភេទមួយទៅមួយទៀត ដោយពួកគេព្យាករណ៍ថា អ្នកជំងឺកូវីដអាចមានចំនួនកើនឡើងកាន់តែច្រើនក្នុងរយៈពេល ៤ ទៅ ៥ខែខាងមុខ បើសិនរដ្ឋាភិបាលគ្មានវិធានការទប់ស្កាត់ឱ្យមានប្រសិទ្ធភាពនោះទេ។ ម្យ៉ាងទៀតលោក លឹម សួរ មើលឃើញថា ស្ថានភាពជីវភាពក្រីក្រ គឺកម្ពុជាប្រឈមវីរុសកូវីដ១៩ និងជំងឺផ្សេងទៀតដោយសារតែពលរដ្ឋខ្មែរភាគច្រើនមិនសូវយកចិត្តដាក់ការពារខ្លួនពីជំងឺឆ្លង។
លោកឱសថការី លឹម សួរ៖ «កូវីដនេះបំប្លែងខ្លួនលឿនណាស់ យើងមើលមិនដឹងវាទៅជាអ្វីមួយទេ។ សព្វថ្ងៃយើងមានវ៉ាក់សាំង តែវ៉ាក់សាំងហ្នឹងមិនមែនទប់ទប់ហ្នឹងកូវីដមកថ្មីៗទេ អង្គការសុខភាពពិភពលោកព្រួយបារម្ភមែនទែន ឧទាហរណ៍យើងមានកាំភ្លើងចាស់ អាវុធចាស់ ចំពោះមេរោគថ្មីជានិច្ច វាចេះបំប្លែងខ្លួនជានិច្ច ថ្ងៃណាមួយវាខ្លាំងមែនទែនអាវុធ(វ៉ាក់សាំង)របស់យើងទប់ទល់លែងជាប់ចប់តែម្តង»។
ការលើកឡើងរបស់អ្នកជំនាញដូច្នេះ បន្ទាប់ពីក្រសួងសុខាភិបាលកាលពីថ្ងៃទី៣០ ខែធ្នូ បានប្រកាសព័ត៌មានអំពីការរកឃើញវីរុសកូវីដ១៩បំប្លែងថ្មីប្រភេទអូមីក្រុង ជេអិនវ័ន (Omicron JN1) ចំនួន១១ករណីបន្ថែមទៀត។ ក្រសួងអះអាងថា អ្នកជំងឺទាំងនោះពុំមានរោគសញ្ញាធ្ងន់ធ្ងរ និងពុំមានប្រវត្តិធ្វើដំណើរទៅក្រៅប្រទេសនោះទេ ប៉ុន្តែករណីឆ្លងកើនឡើងបែបនេះ គឺបញ្ជាក់ថា មេរោគកូវីដ១៩ បំប្លែងថ្មីនេះកំពុងមានវត្តមាននៅក្នុងសហគមន៍ និងអាចមានករណីឆ្លងជាបន្តបន្ទាប់។
ក្រសួងសុខាភិបាលបានអះអាងដោយផ្អែកតាមអង្គការសុខភាពពិភពលោកថា ជំងឺកូវីដ១៩ ប្រភេទថ្មីនេះមិនសូវមានសភាពធ្ងន់ធ្ងរទេ ដោយសារតែជាមេរោគ ប្រភេទចាប់អារម្មណ៍(Variant of Interest) មិនមែនជាមេរោគកូវីដ១៩ បំប្លែងថ្មីដែលជាប្រភេទព្រួយបារម្ភ(Variant of Concern)នោះទេ។
វិទ្យុអាស៊ីសេរីមិនអាចទាក់ទងរដ្ឋមន្ត្រីក្រសួងសុខាភិបាលលោក ឈាង រ៉ា និងប្រធានយកដ្ឋានប្រយុទ្ធ និងជំងឺឆ្លងលោក លី សូវ៉ាន់ ដើម្បីសាកសួរបន្ថែមបានទេនៅថ្ងៃទី៣១ ខែធ្នូ។
លោក លឹម សួរ បញ្ជាក់ថា លទ្ធផលធ្វើតេស្តវីរុសកូវីដ១៩ ដោយស៊ីភីអ (CPR) របស់ក្រសួងសុខាភិបាលមិនទាន់បង្ហាញតួលេខពិតប្រាកដ ដែលឆ្លងនៅសហគមន៍នោះទេ ដូច្នេះក្រសួងត្រូវបង្ហាញលទ្ធផលធ្វើតេស្តទាំងស៊ីភីអ (CPR) និងតេស្ដរហ័ស(Rapid Test) បន្ទាប់មកត្រូវរាយការណ៍ និងកត់ត្រាចំនួនអ្នកជំងឺឆ្លងឱ្យច្បាស់លាស់ដើម្បីងាយស្រួលតាមដានអន្តរាគមន៍ឆ្លើយតបទាន់ពេលវេលា។
អ្នកជំនាញលើកឡើងថា សាររបស់ក្រសួងសុខាភិបាលនេះ ជាសារក្រើនរំឮកដល់ពលរដ្ឋត្រូវការពារខ្លួនដើម្បីជៀសផុតពីជំងឺកូវីដ១៩។ តែយ៉ាងណាពួកគេថា ទោះបីកូវីដ-១៩ បំប្លែងថ្មីប្រភេទអូមីក្រុង ជេអិនវ័ន ធ្វើឱ្យអ្នកជំងឺមានសភាពមិនធ្ងន់ធ្ងរក៏ដោយ ក៏បញ្ហានេះបើសិនពលរដ្ឋណាម្នាក់មានជំងឺហើយនឹងនាំឱ្យខាតបង់ប្រាក់កាក់ ពេលវេលាដែលជះឥទ្ធិពលមិនល្អដល់សេដ្ឋកិច្ច និងជីវភាពនៅពេលសម្រាកព្យាបាលជំងឺ។ ដោយឡែកមនុស្សវ័យចាស់ និងអ្នកមានប្រព័ន្ធការពាររាងកាយចុះខ្សោយប្រឈមប៉ះពាល់ដល់អាយុជីវិតផងដែរ ដូច្នេះរដ្ឋាភិបាលគួរចាត់វិធានការឱ្យបានស្វាហាប់បន្ថែមទៀតដើម្បីបង្ការ ឆ្លើយតបនឹងតម្រូវការជាក់ស្តែង។
ប្រធានសមាគមគ្រូពេទ្យគុណធម៌កម្ពុជាលោកវេជ្ជបណ្ឌិត អ៊ូច វុទ្ធី លើកឡើងថា រដូវរងារគួបផ្សំនឹងការធ្វេសប្រហែលក្នុងការការពារជាមូលហេតុងាយឱ្យពលរដ្ឋឆ្លងវីរុសវីដ-១៩។ លោកបន្តថា វត្តមានវីរុសបំប្លែងថ្មីដែលឆ្លងដល់សហគមន៍គឺពលរដ្ឋត្រូវប្រុងប្រយ័ត្នឱ្យបានខ្ពស់ ហើយបើករណីមានរោគសញ្ញាក្អកក្តៅខ្លួន ឬពិបាកដកដង្ហើមត្រូវប្រញាប់ទៅមន្ទីរពេទ្យជាបន្ទាន់។
វេជ្ជបណ្ឌិត អ៊ូច វុទ្ធី៖ «មេត្តាបងប្អូនទៅចាក់វ៉ាក់សាំងដូសជំរុញឱ្យបានគ្រប់គ្នា បើសិនជាបងប្អូនគ្មានប្រព័ន្ធការពាររាងកាយដោយវ៉ាក់សាំងទេ វាអត់មានហានិភ័យខ្លះដែរបាទ បើសិនបងប្អូនមានប្រព័ន្ធការពារហើយ កូវីដអូមីក្រុងជេអិនវ័ន មិនអាចបំផ្លាញនូវប្រព័ន្ធរាងកាយបងប្អូនបានទេ។ សូមបងប្អូនប្រុងប្រយ័ត្នកុំឱ្យឈឺពីព្រោះនៅពេលបងប្អូនឈឺខាតបង់ថវិកា»។
ក្រសួងសុខាភិបាលកាលពីថ្ងៃទី២៩ ខែធ្នូ ក៏បានកត់សម្គាល់ដោយរកឃើញថា ករណីឆ្លងជំងឺកូវីដ១៩តាមរយៈការធ្វើតេស្តរហ័សនៅក្នុងចំណោមអ្នកជំងឺដែលមកទទួលសេវាសុខាភិបាលនៅតាមមន្ទីរពេទ្យមានចំនួនកើនឡើងដែរ។
ករណីកូវីដបំប្លែងថ្មីអូមីក្រុង ជេអនវ័ន (Omicron JN1) កើនឡើងនេះ ក្រសួងសុខាភិបាលបានអំពាវនាវដល់ប្រជាពលរដ្ឋប្រុងប្រយ័ត្នដោយត្រូវអនុវត្តគោលការណ៍អនាម័យ ដូចជាពាក់ម៉ាស លាងដៃ រក្សាគម្លាតពីគ្នា បន្តចាក់វ៉ាក់សាំងឱ្យបានគ្រប់ដូស ហើយអ្នកដែលមានហានិភ័យដូចជាកុមារ ចាស់ជរា និងបុគ្គលដែលមានជំងឺប្រចាំកាយ ស្ត្រីមានផ្ទៃពោះមិនត្រូវចូលរួមកម្មវិធីដែលមានមនុស្សច្រើនជាដើម។
គិតត្រឹមព្រឹកថ្ងៃទី៣១ ខែធ្នូ កម្ពុជាមានអ្នកឆ្លងជំងឺកូវីដ-១៩ សរុបជាង ១៣ម៉ឺន ៩ពាន់នាក់ (១៣៩.០១៤) ក្នុងនោះអ្នកជាសះស្បើយមានជាង ១៣ម៉ឺននាក់ ៥ពាន់នាក់ (១៣៥.៩៣៥) និងអ្នកស្លាប់នៅចំនួន ៣ពាន់ ៥៦នាក់ (៣.០៥៦)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។