ឳពុក​របស់​សព​អ្នក​​ជំងឺ​​កូវីដ​​-​​១៩​​ បាន​កញ្ចប់​ធាតុ​របស់​​កូន​ តែ​នៅ​​មិន​អស់​ចិត្ត​​

ដោយ មួង ណារ៉េត
2021-05-27
Share
ឳពុក​របស់​សព​អ្នក​​ជំងឺ​​កូវីដ​​-​​១៩​​ បាន​កញ្ចប់​ធាតុ​របស់​​កូន​ តែ​នៅ​​មិន​អស់​ចិត្ត​​ កញ្ញា​ ភិន​ សុដាលីន​ អាយុ ១៧​ ឆ្នាំ​ ដែលសន្និដ្ឋានថាស្លាប់ដោយសារជំងឺកូវីដ១៩ កាលពីថ្ងៃទី២៦ ខែមេសា ឆ្នាំ២០២១ បន្ទាប់ពីបាត់ដំណឹងអស់រយៈពេលជិត១ខែ។
រូប៖ គេ​ផ្ដល់​ឱ្យ

ក្រោយ​ពី​​​ដើរ​​រក​កូន​ស្រី​​អស់​រយៈពេល​ពេញ​មួយ​ខែ​ លោក​​ ភិន​​ ទិត្យ​​ ដែល​​ជា​​ឳពុក​​កញ្ញា​​ ភិន​​ សុដាលីន​​ បាន​ទទួល​កញ្ចប់​ធាតុ​របស់​កូន​ ពី​​បុគ្គលិក​​សុខាភិបាល​ហើយ​ កាល​ពី​ថ្ងៃ​ទី​២៦​ ខែ​ឧសភា​។​ ពេល​បាន​ទទួល​​ធាតុ​នោះ​ភ្លាម​ លោក​បាន​ធ្វើ​ដំណើរ​​វិល​ត្រឡប់​ទៅ​លំនៅដ្ឋាន​នៅ​ស្រុក​អូរ​យ៉ាដាវ​ខេត្ត​រតនគិរី​ ដើម្បី​ធ្វើ​បុណ្យ​តាម​ប្រពៃណី​។​ ប៉ុន្តែ​​លោក​ថា ​លោក ​និង​​ក្រុម​គ្រួសារ​​នៅ​តែ​មិន​អស់​ចិត្ត​នឹង​​ការ​ស្លាប់​របស់​កូន​ស្រី​របស់​លោក​នៅឡើយទេ៖ «ខ្ញុំ​អត់​ទាន់​អស់​ចិត្ត​។ ​ខ្ញុំ​ចង់​និយាយ​ថា​ព័ត៌មាន​អត់​ច្បាស់​ ឈ្មោះ​មែន​ឬ​អត់​ ពិត​ឬ​អត់​?»។

កញ្ញា​​ ភិន​​ សុដាលីន​​ ជា​​កូន​​ច្បង​​ក្នុង​​ចំណោម​​កូន​​ពីរ​​នាក់​​ ប្រុស​​មួយ​​ស្រី​​មួយ​​ក្នុង​​គ្រួសារ​​លោក​​ ភិន​​ ទិត្យ​​ ដែល​​មាន​​ទីលំនៅ​​ នៅ​​ភូមិ​​កាទែ​​ ឃុំ​​លំជ័រ​​។​​ កញ្ញា​​​ជា​​​សិស្ស​​​​ថ្នាក់​​​ទី១០​​​ នៅ​​​វិទ្យាល័យ​​​មួយ​​​នៅ​​​ក្នុង​​​ខេត្ត​​​​នេះ​​​​។​ កញ្ញា​ឆ្លង​ជំងឺ​កូវីដ​-​១៩​ ​កាល​ពី​ថ្ងៃ​ទី​២៦​ ខែ​មេសា​ ​ពេល​​​កំពុង​​​សម្រាក​​ព្យាបាល​​សង្គ្រោះ​​បន្ទាន់​​ នៅ​​មន្ទីរ​​ពេទ្យ​​ព្រះ​​កេតុ​មាលា​​ (​​ឬ​​​ពេទ្យ​​យោធា​​)​​។​​

ពេល​ធ្លង​ជំងឺ​នេះ​ មន្រ្តី​សុខាភិបាល​បាន​ដឹក​កញ្ញា​ទៅ​ព្យាបាល​នៅ​មណ្ឌល​សម្រាក​​​ព្យាបាល​ជំងឺ​កូវីដ​-​១៩​ ព្រីមៀរ​ (​Premier​)​ ស្របពេល​ដែល​លោក​​ ភិន​​ ទិត្យ​​ និង​​ភរិយា​​ត្រូវ​​ធ្វើ​​ចត្តា​​ឡី​ស័ក​នៅ​កន្លែង​ផ្សេង​ គឺ​​ព្រែក​​ព្នៅ​។​ តាំង​ពី​ពេល​នោះ​ម​ក​ លោក​បាត់​ដំណឹង​​កូន​ឈឹង​។​

បើ​តាម​អ្វី​ដែល​ជា​ការ​អះអាង​របស់​មន្រ្តី​សុខា​ភិបាល​ កញ្ញា​ ភិន​ សុដាលីន​ ស្លាប់​ភ្លាម​ៗ​ តាំង​ថ្ងៃ​ទី​២៦​ ខែ​មេសា​នោះ​ ប៉ុន្តែ​​លោក​ ភិន​ ទិត្យ​ មិន​ដែល​បាន​​ទទួល​ដំណឹង​នេះ​សោះ​ ទោះ​លោក​ខំដើរ​សួរ​ដំណឹង​​នេះ​​គ្រប់​ច្រក​ល្ហក​។​

ទើប​​តែ​​​កាល​ពី​​ថ្ងៃ​​ទី​​២២​​ ខែ​​ឧសភា​​ ក្រោយ​​​លោក​​សម្រេច​​ចិត្ត​​​ឲ្យ​​គេ​​ជួយ​​ផ្សាយ​​រក​​កូន​​ តាម​​​បណ្តាញ​​សង្គម​​ហ្វេសប៊ុក​​ ទើប​​មាន​​មន្រ្តី​​សុខាភិបាល​​ ដែល​​លោក​​មិន​​ចាំ​​​ឈ្មោះ​​បាន​​ទូរស័ព្ទ​​ប្រាប់​​លោក​​ថា​​ កូន​ស្រី​​របស់​លោក​​ស្លាប់​​ដោយសារ​​​ជំងឺ​​កូវីដ​​-​​១៩​​ ជិត​​មួយ​​ខែ​​ទៅ​​ហើយ​​។​​ ដំណឹង​​សោក​​សៅ​​ និង​​​យឺត​​ពេល​​នេះ​​លោក​​ ភិន​​ ទិត្យ​​ ថា​​​លោក​​មិន​​អាច​​ទទួល​​យក​​បាន​​ ព្រោះ​​លោក​​ឆ្ងល់​​ថា ​​ហេតុអ្វី​​បាន​​ជា​​កូន​​ស្រី​​រ​បស់​​លោក​​ស្លាប់​​ជិត​​មួយ​​ខែ​​ទៅ​​ហើយ​​ គ្មាន​​នរណា​​ទាក់​​ទង​​ ឬ​​ផ្តល់​​ដំណឹង​​ឲ្យ​​លោក​​ និង​​​ក្រុម​​គ្រួសារ​​បាន​​ដឹង​​ដូច្នេះ​។

មន្រ្តី​​សិទ្ធិ​​មនុស្ស​​យល់​​ថា ​​រឿង​​នេះ​​ ជា​​ការ​​ធ្វេស​​ប្រហែស​​​របស់​​ក្រុម​​គ្រូពេទ្យ​​ពាក់ព័ន្ធ​​ទៅនឹង​​​ការ​​រៀប​​ចំ​​​អត្តសញ្ញាណ​​​របស់​​អ្នក​​ជំងឺ​​​និង​ការ​ជូន​ដំណឹង​​ដំណឹង​​ទៅ​ដល់​​​​ក្រុម​​គ្រួសារ​​​របស់​​ពួក​គាត់​​​​។​​

ឥឡូវ​គ្រួសារ​សព​​បាន​ទទួល​ត្រឹម​ធាតុ​មួយ​កញ្ចប់​ ដែល​មាន​បិទ​ឈ្មោះ​របស់​កញ្ញា​ ភិន​ សុដាលីន​។​ ប៉ុន្តែ​ក្រុម​គ្រួសារ​សព​ នៅតែ​មិន​អស់​ចិត្ត​ ព្រោះ​​គ្មាន​មធ្យោបាយ​អ្វី​ ដើម្បី​បញ្ជាក់​ថា​ ធាតុ​នោះ​ ជា​ធាតុ​របស់​​សពកូន​របស់​ពួក​គាត់​​នោះ​ដែរ​។​

វិទ្យុ​អាស៊ីសេរី​​ នៅ​តែ​​មិន​​ទាន់​​អាច​​សុំ​​ការ​​បំភ្លឺ​​ពី​​​ប្រធាន​​មន្ទីរ​​ពេទ្យ​​មិត្តភាព​​ខ្មែរ​​-​​សូវៀត​​ លោក​​ ងី​​ ម៉េង​​ និង​​អ្នក​​នាំ​​ពាក្យ​​ក្រសួង​​​សុខាភិបាល​​អ្នកស្រី​​ ឱ​ វណ្ណឌីន​​ បាន​​នៅ​​ឡើយ​​ទេ​​ កាល​​ពី​​ថ្ងៃ​​ទី​​២៦​​ ខែ​​ឧសភា​​។​​

ប៉ុន្តែ​​ប្រធាន​​សមាគម​​គ្រូពេទ្យ​​គុណធម៌​​កម្ពុជា​លោក​ អ៊ូច​ វុទ្ធី​ ថា ​ដើម្បី​តម្លាភាព​ ភាព​ជឿជាក់​លើ​ប្រព័ន្ធ​គ្រប់គ្រង​របស់​ក្រសួង​​សុខាភិបាល​ និង​​ដើម្បី​​ឲ្យ​ក្រុម​គ្រួសារ​​សព​អស់​ចិត្ត​ លោក​ស្នើ​ឲ្យ​អាជ្ញាធរ​ពាក់ព័ន្ធ​ រួម​ទាំង​តំណាង​​អង្គការ​សុខភាព​ពិភព​លោក​ប្រចាំ​នៅ​កម្ពុជា​ផង​ ជួយ​​បង្កើត​គណៈកម្មការ​ស្រាវជ្រាវ​ពិសេស​ ពិនិត្យ​មើល​ករណី​នេះ​៖ «​ភាគ​ច្រើន​​គេ​ឲ្យ​បង​ប្អូន​ និង​​ឳពុក​ម្ដាយ​​ដឹង​​ឈ្មោះ​ និង​​អត្តសញ្ញាណ​​មុន​នឹង​​គេ​​យក​ទៅ​បូជា​។ កាល​ដែល​មិន​ឲ្យ​បង​ប្អូន​ដឹង​​ អាហ្នឹង​​ជារឿង​មួយ​វា​អាថ៌កំបាំង​។ ដូច្នេះ​ គួរតែ​សមត្ថកិច្ច​​ឯករាជ្យ​ទាំងអស់គ្នា​​ហ្នឹង​ ជួយ​ដល់​ឳពុកម្ដាយ​ជនរងគ្រោះ​។​ អាហ្នឹង​​បើ​​យើង​​មាន​ឆន្ទៈ​​ថា ​ចង់​​ឲ្យ​ដឹង​​អត្តសញ្ញាណ​ ដើម្បី​​ឲ្យ​​ឳពុកម្ដាយ​​​ និ​ង​បងប្អូន​​អស់​ចិត្ត​។ កូន​យើង​​ខំ​ចិញ្ចឹម​​ បំបៅ​តាំង​ពី​ក្មេង​​បាត​ជើង​​ក្រហម​រងាល​ ចុង​ក្រោយ​​ស្លាប់​អត់​ដឹង​​មុខ​មាត់​​។ កន្លែង​ហ្នឹង​​ហើយ​ ទាំង​គេ​ទាំង​ខ្ញុំ​ក៏​សោកស្ដាយ​ដែរ​។ សម័យ​នេះ​ទៅ​ហើយ​!​»។​

មន្រ្តី​សុខាភិបាល​សាធារណៈ​នៃ​អង្គការ​សង្គម​ស៊ីវិល​រូប​នេះ​បន្ត​​ថា ​ក្រុម​គ្រួសារ​សព​មាន​សិទ្ធិ​ទទួល​បា​ន​ព័ត៌មាន​លម្អិត​ អំពី​ការ​ស្លាប់​របស់​កូន​ស្រី​របស់​ខ្លួន​ ហើយ​អាជ្ញាធរ​ពាក់ព័ន្ធ​គួរ​ធ្វើ​យ៉ាង​ណា​ ធានា​ឲ្យ​បាន​នូវ​តម្លាភាព​ និង​​ភាព​សុក្រិត​នៃ​ប្រព័ន្ធ​គ្រប់​គ្រង​ ទំនាក់​ទំនង​ និង​​ផ្តល់​ព័ត៌មាន​អំពី​អ្នក​ស្លាប់​។​

កញ្ញា​ ភិន​ សុដាលីន​ ជា​អ្នក​ជំងឺ​កូវីដ​-​១៩​ ដែល​ស្លាប់​ក្នុង​វ័យ​ក្មេង​ជាង​គេ​ ក្នុង​ចំណោម​​អ្នក​ជំងឺ​ជិត​ ២០០នាក់ ​ដែល​ស្លាប់​ដោយ​សារ​ជំងឺ​កូវីដ​-​១៩​។

ប្រព័ន្ធ​សុខាភិបាល​កម្ពុជា​ ​បាន​ពិន្ទុ​ ៣៩​.​២​ លើ​ ១០០​ និង​ជាប់​ចំណាត់​ថ្នាក់​លេខ​ ៨៩​ ក្នុង​ចំណោម​ប្រទេស​ ១៩៥​ ក្នុង​សន្ទស្សន៍​សន្តិសុខ​​​សុខភាព​ពិភពលោក​ឆ្នាំ​ ២០១៩​៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល