កម្ពុជារកឃើញវីរុសកូរ៉ូណាប្រភេទថ្មីមួយករណីដំបូង នៅខេត្តព្រះសីហនុ
2020.01.27
មន្ទីរពេទ្យបង្អែកខេត្តព្រះសីហនុ។ រូបថតថ្ងៃទី២៥ ខែវិច្ឆិកា ឆ្នាំ២០១៤
កម្ពុជារកឃើញជំងឺរលាកសួតបង្កឡើងដោយមេរោគកូរ៉ូណាវីរុស (Coronavirus) ប្រភេទថ្មី មួយករណីដំបូង នៅខេត្តព្រះសីហនុ នៅថ្ងៃទី២៧ មករា។
សង្គមស៊ីវិលស្នើសុំឲ្យអាជ្ញាធរខេត្តព្រះសីហនុ ប្រកាសផ្សព្វផ្សាយលម្អិតជាសាធារណ:អំពីព័ត៌មាននៃការឆ្លងជំងឺរលាកផ្លូវដង្ហើមដែលបង្កដោយវីរុសកូរ៉ូណា។ ការព្រួយបារម្ភនេះធ្វើឡើងបន្ទាប់ពីក្រសួងសុខាភិបាលរកឃើញជនជាតិចិនម្នាក់មានផ្ទុកជំងឺនេះ។
សង្គមស៊ីវិលបារម្ភថាប្រជាពលរដ្ឋខេត្តព្រះសីហនុ អាចនឹងមានហានិភ័យខ្ពស់ក្នុងការឆ្លងជំងឺរលាកផ្លូវដង្ហើម ដែលបង្កដោយវីរុសកូរ៉ូណាថ្មីនេះ ព្រោះមានជនជាតិចិនច្រើនបានវិលត្រឡប់ពីប្រទេសចិន មកខេត្តជាប់សមុទ្រមួយនេះ បន្ទាប់ពីពួកគេបានទៅលេងគ្រួសារក្នុងពេលចូលឆ្នាំចិន។
អ្នកសម្របសម្រួលសមាគមអាដហុក (Adhoc) ខេត្តព្រះសីហនុអ្នកស្រី ជាប សុធារី ប្រាប់អាស៊ីសេរីនៅថ្ងៃច័ន្ទទី២៧ខែមករាថា ប្រជាពលរដ្ឋភាគច្រើនមិនបានយកចិត្តទុកដាក់ ពាក់ម៉ាសការពារទេ ព្រោះអាជ្ញាធរបានប្រកាសជារឿយៗថា នៅខេត្តនេះមិនមានអ្នកឆ្លងជំងឺរលាកសួត ដែលបង្កដោយវីរុសកូរ៉ូណានេះទេ។
អ្នកស្រីសង្ស័យថា អាជ្ញាធរខេត្ត ទំនងជាចង់អូសទាញភ្ញៀវទេសចរមកលេងខេត្តព្រះសីហនុ ឲ្យបានច្រើនក្នុងពេលចូលឆ្នាំចិន ប៉ុន្តែឥឡូវប្រជាពលរដ្ឋចាប់ផ្តើមបារម្ភបន្ទាប់ពីក្រសួងប្រកាសថា មានជនជាតិចិនម្នាក់ផ្ទុកវីរុសខូរូណានៅខេត្តព្រះសីហនុមួយនេះ៖ «អាជ្ញាធរខេត្តព្រះសីហនុគួរតែផ្សព្វផ្សាយជាសាធារណ: ឲ្យប្រជាពលរដ្ឋនៅតាមមូលដ្ឋានឆ្ងាយពីទីប្រជុំជនហ្នឹង ឲ្យគាត់ចាប់ផ្តើមធ្វើការការពារទៅ ព្រោះអីចង់និយាយថាពួកជនជាតិចិនឬអ្នកផ្ទុកជំងឺហ្នឹង យើងមិនដឹងថាគាត់មានឬអត់ទេ ប៉ុន្តែយើងធ្វើការការពារ វាប្រសើរជាង»។
ក្រសួងសុខាភិបាលប្រកាសថា បានរកឃើញមួយករណីនៃជំងឺឆ្លងវីរុសកូរ៉ូណានៅប្រទេសកម្ពុជា បើគិតត្រឹមម៉ោង៧យប់ថ្ងៃទី២៧ខែមករា។
រដ្ឋមន្ត្រីក្រសួងសុខាភិបាលលោកវេជ្ជបណ្ឌិត ម៉ម ប៊ុនហេង បានមានប្រសាសន៍ក្នុងសន្និសីទកាសែតមួយនៅថ្ងៃចន្ទម្សិលមិញនេះថា កម្ពុជាបានរកឃើញករណីជំងឺរលាកផ្លូវដង្ហើមដែលបង្កដោយវីរុសកូរ៉ូណានេះនៅលើជនជាតិចិនម្នាក់នៅខេត្តព្រះសីហនុ ហើយបុរសនេះទើបតែវិលត្រឡប់មកពីប្រទេសចិនចូលមកកម្ពុជាវិញ។
លោកថា បុរសជនជាតិចិនដែលឆ្លងវីរុសកូរ៉ូណានេះ បានធ្វើដំណើរមកពីទីក្រុងវូហាន (Wuhan) ប្រទេសចិន ជាមួយក្រុមគ្រួសារ ៤នាក់ មកខេត្តព្រះសីហនុ ហើយក្រោយពីមានការសង្ស័យបុគ្គលិកសុខាភិបាល បានយកសំណាកទឹករំអិលពីច្រមុះ និងបំពង់ករបស់ពួកគេ ទៅវិភាគ ហើយរកឃើញម្នាក់ក្នុងចំណោម៤នាក់នោះ មានផ្ទុកវីរុសកូរ៉ូណានេះ។ ទោះជាយ៉ាងណា រដ្ឋមន្ត្រីក្រសួងសុខាភិបាល លោក ម៉ម ប៊ុនហេង មានប្រសាសន៍ថា អ្នកជំងឺជនជាតិចិនរូបនោះ មានសភាពថេរ ស្ថិតក្រោមការត្រួតពិនិត្យរបស់អាជ្ញាធរ៖ «»
រដ្ឋលេខាធិការក្រសួងសុខាភិបាលលោកស្រីវេជ្ជបណ្ឌិត ឱ វណ្ណឌីន មានប្រសាសន៍ក្នុងសន្និសីទកាសែត នៅថ្ងៃទី២៧ មករានោះដែរថា វិធានការចម្បងក្នុងការការពារ មិនឱ្យឆ្លងមេរោគវីរុសកូរ៉ូណានេះ គឺត្រូវលាងដៃនឹងសាប៊ូ៖ «»
អ្នកនាំពាក្យក្រសួងសុខាភិបាលលោកវេជ្ជបណ្ឌិត លី សូវ៉ាន់ ប្រាប់អាស៊ីសេរីថា ក្រសួងសុខាភិបាលបានធ្វើវិភាគទៅលើបុគ្គលិកម្នាក់នៃសណ្ឋាគារ ឃ្វីនកូ (Queenco Hotel) ដែលអ្នកជំងឺចិនរូបនោះស្នាក់នៅ ប៉ុន្តែមិនបានរកឃើញថា បុគ្គលិករូបនោះមានផ្ទុកវីរុសកូរ៉ូណាទេ។
លោកថា បុគ្គលិកសណ្ឋាគារម្នាក់នេះត្រូវបានរក្សាទុកជាមួយជនជាតិចិន ៦នាក់ទៀតនៅសណ្ឋាគារនោះដើម្បីតាមដាន បើទោះបីពួកគេមិនទាន់បង្ហាញរោគសញ្ញាណាមួយនៅឡើយ។
របាយការណ៍ក្រសួងមហាផ្ទៃបានឲ្យដឹងថា សព្វថ្ងៃមានជនជាតិចិនរស់នៅក្នុងប្រទេសកម្ពុជារយ:ពេលវែងចំនួន ២៥ ម៉ឺននាក់ ក្នុងនោះមានជាង១១ម៉ឺននាក់នៅខេត្តព្រះសីហនុ និងប្រមាណ ១០ម៉ឺននាក់នៅទីក្រុងភ្នំពេញ។
រហូតមកដល់ពេលនេះវីរុសកូរ៉ូណាថ្មីនេះ បានឆ្លងដល់មនុស្សចំនួន ២ពាន់៧រយសែសិបបួននាក់ (២.៧៤៤) នៅក្នុងប្រទេសចិន ហើយបានសម្លាប់មនុស្ស ៨០ នាក់ នេះបើយោងតាមតួលេខដែលផ្ដល់ដោយគណៈកម្មការសុខភាពជាតិរបស់ប្រទេសចិនកាលពីយប់ថ្ងៃអាទិត្យទី២៦៕
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ