អាជ្ញាធរខេត្តកណ្ដាល ឲ្យដឹងថា នាវាដឹកភ្ញៀវទេសចរ កម្សាន្តតាមទន្លេមេគង្គ ទាំង៥គ្រឿង ដែលអាជ្ញាធរប្រទេសវៀតណាម មិនឲ្យចូលចត បានត្រលប់មកដល់កម្ពុជាវិញអស់ហើយ គិតត្រឹមព្រឹក ថ្ងៃទី១៧ មីនា។ ឯអ្នកជិះលើនាវា ទាំងនាវិក និងភ្ញៀវទេសចរណ៍គ្មានផ្ទុកជំងឺកូវីដ១៩ ទេ។
អភិបាលខេត្តកណ្ដាល លោក គង់ សុភ័ណ្ឌ ប្រាប់អាស៊ីសេរី តាមទូរស័ព្ទ ក្រោយពេលលោក បានចុះទៅដល់ច្រកក្អមសំណ ថា កាណូតដឹកភ្ញៀវទេសចរណ៍ចំនួន២គ្រឿង បានត្រលប់មកដល់ច្រកព្រំដែនអន្តរជាតិក្អមសំណ កាលពីយប់ថ្ងៃទី១៦ មីនា ឯ ៣គ្រឿងទៀត បានត្រឡប់មកដល់ព្រមៗ គ្នា នៅព្រឹក ថ្ងៃទី១៧ មីនា។
លោក ឲ្យដឹងថា កាណូតទាំង ៥គ្រឿងនោះ មិនបានចូលអែបខាងឡើងគោកទេ គឺមន្ត្រីចត្តាឡឺស័ក នៃក្រសួងសុខាភិបាល បានទៅត្រួតពិនិត្យសុខភាពអ្នកនៅលើនាវាទាំង៥គ្រឿង លើផ្ទៃទន្លេ។ លោកអភិបាលខេត្ត បន្តថា ក្រោយការត្រួតពិនិត្យសុខភាពរួច មនុស្សទាំងអស់ នៅលើនាវាទាំង៥គ្រឿង ( ២គ្រឿងចូលពេលយប់ គ្មានទេសចរណ៍ទេ មានតែនាវិក ១គ្រឿង ៣១នាក់ មួយគ្រឿងទៀត ២២នាក់។ ៣គ្រឿងចូលពេលព្រឹក ថ្ងៃទី១៧ មីនា មាននាវិកសរុប៧០នាក់ ទេសចរណ៍ជាតិ និងអន្តរជាតិ ៦៩នាក់ )សរុប ១៩២នាក់ គ្មានផ្ទុកជំងឺកូវីដ១៩ (Covid-19) ទាំងអស់គ្នា។
លោក អះអាងថា អាជ្ញាធរវៀតណាម បានជូនដំណឹងថា គ្រូពេទ្យនៅប្រទេសវៀតណាម ក៏បានត្រួតពិនិត្យសុខភាពអ្នកនៅលើនាវាម្ដងរួចហើយដែរ ហើយបញ្ជាក់ថា គ្មានជំងឺកូវីដ១៩ ទេ តែដោយសារបម្រាបរបស់រដ្ឋាភិបាលវៀតណាម ទើបមិនអាចឲ្យចូលអែបខាងបាន។
លោក ថា គិតត្រឹមថ្ងៃត្រង់ ថ្ងៃទី១៧ មីនា នាវាទាំងអស់ បានអនុញ្ញាតឲ្យធ្វើដំណើរទៅកំពង់ផែក្រុងភ្នំពេញ ហើយមន្ត្រីសុខាភិបាល នឹងបន្តត្រួតពិនិត្យសុខភាពអ្នកលើនាវាទាំងអស់ម្ដងទៀត មុននឹងអនុញ្ញាតឲ្យត្រលប់ទៅតាមគោលដៅរៀងៗ ខ្លួន ដោយលែងស្ថិតក្នុងការឃ្លាំមើលទៀតហើយ៖ « បើតាមការប៉ាន់ស្មានមក ប្រហាក់ប្រហែលជិតដល់ទីក្រុងភ្នំពេញហើយ ហើយយើងសួរទៀតថា ដល់ទីក្រុងភ្នំពេញ យើងមានវិធានការអ្វីទៀត ទៅដល់ភ្នំពេញនោះ គឺយើងនឹងមានគ្រូពេទ្យចត្តាឡឺស័ក នៅភ្នំពេញ គឺពិនិត្យសុខភាពគាត់ម្ដងទៀត។ បើអត់មានបញ្ហាអ្វីទេ ទាំងនាវិក ទាំងអ្នកទេសចរណ៍នោះ ទាំង៥នាវា យើងនឹងអនុញ្ញាតឲ្យគាត់ធ្វើដំណើរទៅតាមគោលដៅរបស់គាត់ ដូចជាផ្ទះសម្បែង គ្រួសាររបស់គាត់។ ជនបរទេស ក៏យើងពិនិត្យដោយយកចិត្តទុកដាក់។ និយាយរួមគឺសុខភាពរបស់គាត់ គឺល្អធម្មតា អត់មានបញ្ហាអ្វីទេ គឺល្អធម្មតា»។
ចំណែកជនបរទេសនៅលើនាវាទេសចរណ៍ទាំងអស់វិញ លោក គង់ សុភ័ណ្ឌ ឲ្យដឹងថា តាមការលើកឡើងរបស់មន្ត្រីក្រសួងសាធារណការ ថ្លែងប្រាប់ក្រុមអ្នកសារព័ត៌មាន នៅច្រកក្អមសំណ គឺម្ចាស់នាវា ឲ្យកក់សំបុត្រយន្តហោះឲ្យជនបរទេសទាំងអស់ត្រលប់ ទៅប្រទេសកំណើតពួកគេវិញរៀងៗ ខ្លួន បន្ទាប់ពីចុះពីលើនាវាទេសចរណ៍ភ្លាម។
អភិបាលខេត្តកណ្ដាល បញ្ជាក់ថា អស់មានកាណូតទេសចរណ៍កម្ពុជា ជាប់នៅក្នុងប្រទេសវៀតណាមទៀតហើយ។ មូលហេតុ ដែលកាណូតទេសចរណ៍ទាំង៥ ជាប់នៅកណ្ដាលទន្លេប្រទេសវៀតណាម រកទីចតពុំបាន គឺដោយសារតែកាណូតទេសចរណ៍ទាំងនោះ បានដឹកអ្នកដំណើរចេញក្រៅប្រទេស មុនថ្ងៃទី១៣ មីនា ដែលមានសេចក្ដីណែនាំឲ្យផ្អាកការដឹកអ្នកដំណើរទេសចរណ៍តាមច្រកក្អមសំណ ខណៈដែលអាជ្ញាធរវៀតណាម ក៏បានដាក់បម្រាមឲ្យផ្អាកការដឹកភ្ញៀវទេសចរណ៍ចេញចូលតាមព្រំដែនទឹកនេះដូចគ្នា។
ទោះយ៉ាងណា លោក អភិបាលខេត្តកណ្ដាល ប្រាប់ថា ច្រកព្រំដែនអន្តរជាតិក្អមសំណ នឹងត្រូវបិទចរាចរណ៍កាណូតដឹកមនុស្សចេញចូលតាមសេចក្ដីណែនាំរបស់រដ្ឋាភិបាលដដែល លើកលែងតែការចរាចរណ៍ទំនិញ ដែលនៅតែបន្ត ជាធម្មតា ព្រោះមិនមានសេចក្ដីណែនាំឲ្យបិទឡើយ។
អនុរដ្ឋលេខាធិការក្រសួងសាធារណការ និងដឹកជញ្ជូន លោក រស់ វណ្ណា បានប្រាប់ក្រុមអ្នកសារព័ត៌មាននៅច្រកព្រំដែនក្អមសំណ ថា កាណូតទេសចរណ៍ ដែលមានម្ចាស់ជាជនជាតិវៀតណាម ចំនួន៥គ្រឿង កំពុងនៅលើទឹកដីកម្ពុជា។ ប៉ុន្តែនាវាទាំង៥នោះ មានតែនាវិកទេ គ្មានអ្នកដំណើរទេ ហើយម្ចាស់នាវា កំពុងស្នើសុំ ទៅអាជ្ញាធរវៀតណាម ដើម្បីសុំចូលចតនៅប្រទេសវៀតណាមវិញ៖ « អ៊ីចឹង ជាបឋមក្រុមការងារបានណែនាំឲ្យគាត់ ទំនាក់ទំនងជាមួយអាជ្ញាធរខាងច្រកទ្វារវៀតណាម ថា តើអនុញ្ញាតឲ្យនាវាគាត់ត្រលប់ទៅវិញឬអត់ទេ។ អ៊ីចឹង យើងត្រូវការជាលាយលក្ខណអក្សរឆ្លើយតប ពីខាងអាជ្ញាធរវៀតណាម ឲ្យបានច្បាស់លាស់ ថា ពេលដែលនាវាហ្នឹង ត្រលប់ទៅវិញ នាវារបស់ប្រទេសវៀតណាមត្រលប់ទៅវិញ ថា គាត់ឲ្យចូលទឹកដីរបស់ប្រទេសវៀតណាមដែរឬទេ ? ហេតុអ្វីយើងតម្រូវការនៃនីតិវិធីនេះ ដោយសារបទពិសោធន៍ដែលយើងទទួលបានកន្លងមក គឺមានប្រទេសជាច្រើន សូម្បីតែជនជាតិរបស់គាត់ផ្ទាល់ ក៏គាត់មិនឲ្យចូលប្រទេសរបស់គាត់ផង ហើយនាវាក៏អ៊ីចឹងដែរ។ កន្លងមកមាននាវារបស់សញ្ញាតិគាត់ចុះបញ្ជីនៅប្រទេសរបស់គាត់ ប៉ុន្តែគាត់អត់ឲ្យចូលដែរ។ អ៊ីចឹង ដើម្បីជៀសវាងនាវាទាំង៥គ្រឿងនេះ ចុះមកដល់ច្រកទ្វារព្រំដែនក្អមសំណ ហើយបែរជាអាជ្ញាធរវៀតណាម គាត់មិនអនុញ្ញាតនោះ អ៊ីចឹងយើងសំណូមពរឲ្យមានការបញ្ជាក់ជាផ្លូវការ។ អ៊ីចឹងនីតិវិធីនេះ យើងកំពុងតែធ្វើ គ្រាន់តែមិនទាន់បានលទ្ធផល»។
អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ នៃក្រសួងសាធារណការ និងដឹកជញ្ជូន បានជូនដំណឹងឲ្យផ្អាកការធ្វើដំណើរតាមច្រកព្រំដែនទឹកក្អមសំណ តាមនាវាទេសចរណ៍ទាំងអស់ ចាប់ពីថ្ងៃទី១៣ មីនាទៅ។ បម្រាបនេះ ធ្វើឡើងក្រោយពេលក្រសួងសុខាភិបាល បានប្រកាសពីការរកឃើញ អ្នកដំណើរជនជាតិអង់គ្លេស ចំនួន៣នាក់ ក្នុងចំណោមអ្នកដំណើរជាង៦០នាក់ តាមនាវាទេសចរណ៍មួយគ្រឿងឈ្មោះ វ៉ាយឃីង គូ្រស ជ្យូណី (Viking Cruise Journey) ដែលចាកចេញពីប្រទេសវៀតណាម ហើយបានចូលចត នៅទីរួមខេត្តកំពង់ចាម មានផ្ទុកជំងឺកូវីដ១៩។
លោក រស់ វណ្ណា ប្រាប់ក្រុមអ្នកសារព័ត៌មានថា បម្រាបផ្អាកនាវាទេសចរណ៍ តាមច្រកក្អមសំណនេះ ដោយសារក្រសួងសាធារណការ ទទួលបានដំណឹងថា អាជ្ញាធរវៀតណាម បានចេញបម្រាបឲ្យហាមឃាត់នាវាដឹកភ្ញៀវទេសចរណ៍ទាំងអស់ មិនឲ្យចូលចតអែបខាងចូលគោកឡើង ដោយសារខ្លាចមានជំងឺកូវីដ១៩។
ប្រធានសហព័ន្ធសហជីពកម្មករនិយោជិកវិស័យទេសចរណ៍ និងសេវាកម្មកម្ពុជា លោក ម៉ម រិទ្ធី ស្វាគមន៍ ការសម្របសម្រួល និងវិធានការសុខាភិបាលលើអ្នកដំណើរលើនាវាទេសចរណ៍ទាំង៥គ្រឿង ដែលវិលត្រលប់នេះ។ ទោះយ៉ាងណា លោក ម៉ម រិទ្ធិ ផ្ដល់យោបល់ឲ្យរដ្ឋាភិបាល ត្រូវបង្កើនសមត្ថភាពសុខាភិបាលឲ្យពលរដ្ឋជឿជាក់ និងការយកចិត្តទុកដាក់ ត្រួតពិនិត្យសុខភាព ពលរដ្ឋខ្មែរ ដែលទើបធ្វើដំណើរពីក្រៅប្រទេសចូលមកកម្ពុជា៖ « ស្នើយ៉ាងណា ក៏ដោយឲ្យមានការព្រឹកព្រាង ព្រោះកាលណា យើងឲ្យគាត់ចេញទៅក្រៅស្រុក គាត់ចេញ ក៏ចេញចុះ ប៉ុន្តែមកវិញ ទុកគាត់ឲ្យនៅកន្លែងមួយដុំទៅ ទុកគាត់នៅកន្លែងណា មួយខែ ពីរខែ បីខែ យើងអាចដាក់កម្រិតជាមួយគាត់ ដូចយើងត្រូវប្រយ័ត្នប្រយែង។ ដូចឥឡូវនេះ ដូចអ្នកមកពីប្រទេសម៉ាឡេស៊ីវិញ មិនដឹងគាត់ដើរទៅណាខ្លះ យើងមិនដឹងគាត់ដើរទៅណាខ្លះ ជួបនរណាគេខ្លះ ឆ្លងមនុស្សប៉ុន្មាននាក់ទៀត»។
មកដល់ពេលនេះ បើទោះរដ្ឋាភិបាល បានបង្ហាញវិធានការច្រើន ក្នុងការទប់ទល់នឹងការរាតត្បាតជំងឺកូវីដ១៩ ក៏ដោយចុះ ក៏នៅតែមានសេចក្ដីរាយការណ៍ពីពលរដ្ឋ សង្ស័យថា ការរីករាលដាលជំងឺកូវីត១៩ មានសភាពច្រើននៅលើពលរដ្ឋខ្មែរដែរ។
តែយ៉ាងណា រដ្ឋាភិបាល បានអំពាវនាវឲ្យពលរដ្ឋ ប្រុងប្រយ័ត្នខ្លួន ដោយរក្សាអនាម័យជានិច្ច និងត្រូវរាយការណ៍ ទៅក្រសួងសុខាភិបាលភ្លាមៗ ប្រសិនបើសង្ស័យថា ខ្លួនឯង ឬអ្នកដទៃ ឆ្លងជំងឺកូវីដ១៩។
ក្រសួងសុខាភិបាល ស្នើសុំឲ្យពលរដ្ឋ ជឿជាក់ តែលើព័ត៌មានផ្លូវការ នៃការវិវត្តរបស់ជំងឺកូវីដ១៩ នៅកម្ពុជា តាមដំណឹងផ្លូវការរបស់ក្រសួងសុខាភិបាលតែមួយគត់បានហើយ ដើម្បីបង្ការហានិភ័យផ្សេងៗ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។