មន្ត្រី​សុខាភិបាល​សន្និដ្ឋាន​បឋម​ថា​ព្រះសង្ឃ​វត្ត​បារាយណ៍​ពុល​ចំណី​អាច​បណ្ដាល​មក​ពី​ជ្រក់​ស្ពៃ

ដោយ សូត សុខប្រាថ្នា
2016-08-31
Share
មន្ទីរ​សុខាភិបាល ខេត្ត​កំពង់ចាម ៨៥៥ មន្ទីរ​សុខាភិបាល ខេត្ត​កំពង់ចាម ថ្ងៃ​ទី​៣១ ខែ​សីហា ឆ្នាំ​២០១៦។ RFA/Saut Sokprathna
RFA/Saut Sokprathna

ប្រធាន​មន្ទីរ​សុខាភិបាល ខេត្ត​កំពង់ចាម ឲ្យ​ដឹង​ថា ករណី​ព្រះសង្ឃ និង​ពលរដ្ឋ​ដែល​គង់​នៅ​វត្ត​បារាយណ៍​ព្រះជីវ៍ ស្ថិត​នៅ​ឃុំ​បារាយណ៍ ស្រុក​ស្រីសន្ធរ ពុល​ចំណី​អាហារ​នោះ គឺ​អាជ្ញាធរ​មិន​ទាន់​កំណត់​មូលហេតុ​ច្បាស់លាស់​នៅ​ឡើយ ប៉ុន្តែ​ប្រធាន​មន្ទីរ​សុខាភិបាល​ខេត្ត​សន្និដ្ឋាន​ថា អាច​បណ្ដាល​មក​ពី​ការ​បរិភោគ​ជ្រក់​ស្ពៃ​ច្រើន​ជាង។

ទោះ​បី​ជា​យ៉ាង​ណា អាជ្ញាធរ​នៅ​រង់ចាំ​លទ្ធផល​ការ​ធ្វើ​កោសល្យវិច័យ​អាហារ និង​ភស្តុតាង​ជា​ផ្លូវ​ការ​សិន។ ចំណែក​ព្រះចៅ​អធិការ​វត្ត​បារាយណ៍​ព្រះជីវ៍ ហៅ​វត្ត​បារាយណ៍ បារម្ភ​ចំពោះ​សុវត្ថិភាព​ចំណី​អាហារ ក្រោយ​ពេល​មាន​ហេតុការណ៍​ពុល​អាហារ​កើត​ឡើង​ក្នុង​វត្ត​របស់​ព្រះអង្គ។

ក្រោយ​ពេល​មាន​ព្រះសង្ឃ​នៅ​វត្ត​បារាយណ៍​ព្រះជីវ៍​ធំ ពុល​អាហារ​កាល​ពី​ពេល​ថ្មីៗ​នេះ មន្ត្រី​ក្រសួង​សុខាភិបាល និង​មន្ទីរ​សុខាភិបាល​ខេត្ត បាន​ធ្វើ​ការងារ​នេះ​យ៉ាង​យក​ចិត្ត​ទុក​ដាក់។ ការងារ​ទាំងនោះ​រួម​មាន ជួយ​សង្គ្រោះ​ព្រះសង្ឃ និង​កូន​សិស្ស​លោក ព្រម​ទាំង​ប្រមូល​យក​សំណាក ឬ​សំណល់​ចំណី​អាហារ និង​គ្រឿង​ផ្សំ ដែល​ព្រះសង្ឃ​បាន​ឆាន់ យក​ទៅ​ធ្វើ​កោសល្យវិច័យ​នៅ​មន្ទីរ​ពិសោធន៍​ប៉ាស្ទ័រ (Pasteur) រាជធានី​ភ្នំពេញ ដើម្បី​ឲ្យ​ប្រាកដ​ថា តើ​បណ្ដាល​មក​ពី​មូលហេតុ​អ្វី?

ករណី​ពុល​អាហារ​នេះ កើត​ឡើង​កាល​ពី​ថ្ងៃ​ទី​២៩ សីហា គឺ​មាន​ព្រះសង្ឃ និង​ពលរដ្ឋ​ចំនួន​ជាង ៦០​អង្គ និង​នាក់ បាន​ពុល ប៉ុន្តែ​មិន​មាន​អ្នក​គ្រោះថ្នាក់​ដល់​អាយុ​ជីវិត​ទេ។

ប្រធាន​មន្ទីរ​សុខាភិបាល​ខេត្ត​កំពង់ចាម លោក គីម សួរភារុណ មាន​ប្រសាសន៍​នៅ​ថ្ងៃ​ទី​៣១ សីហា ថា ករណី​ព្រះសង្ឃ​ពុល​អាហារ​នេះ គឺ​ខាង​លោក​មិន​ទាន់​ទទួល​បាន​លទ្ធផល​ធ្វើ​កោសល្យវិច័យ​នៅ​ឡើយ។ លោក​បន្ត​ថា មូលហេតុ​បណ្ដាល​ឲ្យ​ពុល​នៅ​មិន​ទាន់​ដឹង​ប្រាកដ ប៉ុន្តែ​លោក​សន្និដ្ឋាន​ថា អាច​បណ្ដាល​មក​ពី​ជ្រក់​ស្ពៃ ព្រោះ​អាហារ​ប្រភេទ​ផ្សេង​មិន​អាច​បណ្ដាល​ឲ្យ​ព្រះសង្ឃ​មាន​គ្រោះថ្នាក់​បាន​ទេ៖ «ជា​បឋម​អាច​មក​ពី​ស្ពៃ​ជ្រក់​ហ្នឹង​ហើយ ព្រោះ​យើង​មើល​អាហារ​ផ្សេងៗ​ទៀត ដូច​មិន​ទំនង​ឲ្យ​ពួក​គាត់​ក្អួត​ចង្អោរ។ អ៊ីចឹង​ទេ អាហារ​ស្ពៃ​ជ្រក់​ហ្នឹង​អាច​មក​ពី​គាត់​ធ្វើ​ទុក​យូរ​ថ្ងៃ ឬ​មិន​ត្រឹមត្រូវ​ម៉េច គឺ​មាន​តែ​បញ្ហា​ហ្នឹង»

ប្រធាន​មន្ទីរ​សុខាភិបាល​ដដែល​បញ្ជាក់​ថា អ្នក​ដែល​ពុល​នោះ​មាន​អាការៈ​វិល​មុខ ក្អួត​ចង្អោរ រាករូស ជាដើម។ លោក​ថា កន្លង​មក អាជ្ញាធរ​ធ្លាប់​អប់រំ​ពលរដ្ឋ​អ្នក​ប្រើប្រាស់​ផលិតផល និង​អ្នក​លក់​ដូរ​ទាំងឡាយ​ឲ្យ​ប្រុង​ប្រយ័ត្ន និង​ត្រូវ​លក់​ផលិតផល​ណា​ដែល​មាន​គុណភាព​ល្អ ព្រម​ទាំង​ទទួល​ស្គាល់​ពី​ក្រសួង​សុខាភិបាល។

ចៅ​អធិការ​វត្ត​បារាយណ៍​ព្រះជីវ៍​ធំ ហៅ​វត្ត​បារាយណ៍ ព្រះតេជព្រះគុណ ហាក់ សំណាង មាន​ថេរ​ដីកា​ថា ព្រះសង្ឃ​ជាង ៤០​អង្គ​ដែល​គង់​នៅ​វត្ត​បារាយណ៍ និង​កូន​សិស្ស​លោក​ពីរ​នាក់​ដែល​ពុល​អាហារ គឺ​បាន​ធូរ​ស្បើយ ហើយ​ព្រះសង្ឃ​ទាំងនោះ​បាន​និមន្ត​ទៅ​គង់​នៅ​វត្ត​ជា​ធម្មតា​វិញ​ហើយ។ ព្រះអង្គ​មាន​ថេរ​ដីកា​បន្ត​ថា ថ្ងៃ​កើត​ហេតុ គឺ​មាន​ពុទ្ធបរិស័ទ​បាន​ធ្វើ​ចង្ហាន់​ប្រគេន​ព្រះសង្ឃ ប៉ុន្តែ​ព្រះអង្គ​នៅ​មិន​ទាន់​ដឹង​ពី​មូលហេតុ​ប្រាកដ​ទេ។ ព្រះចៅ​អធិការ​វត្ត​បារាយណ៍ ជំនាន់​ទី​១២ អង្គ​នេះ បារម្ភ​ចំពោះ​សុវត្ថិភាព​ចំណី​អាហារ​នៅ​ពេល​បច្ចុប្បន្ន ពីព្រោះ​ការ​ពុល​អាហារ​នេះ គឺ​កើត​ឡើង​ជា​លើក​ទី​១ នៅ​វត្ត​បារាយណ៍៖ «អ៊ីចឹង​សូម​បិណ្ឌបាត​ថា ជាពិសេស​ដល់​ញាតិញោម​អ្នក​ធ្វើ​ខាង​បន្លែ​ហ្នឹង ដូច​ថា​យើង​កុំ​ប្រើ​ជាតិ​គីមី​ហ្នឹង​ច្រើន​ពេក ក៏ដូចជា​ញាតិញោម​ខាង​អាជីវករ​ក៏​អ៊ីចឹង​ដែរ ប្រសិន​បើ​របស់​ណា​ដែល​ហួស​ឌឺឡេ (ផុត​កាល​កំណត់​ប្រើប្រាស់) ហើយ យើង​គួរ​ណា​ទុក​ដាក់​វា​ចោល​ទៅ យើង​កុំ​យក​វា​មក​ធ្វើ​ការ​លក់​ដូរ​បន្ត​ទៀត»

ព្រះអង្គ​បន្ថែម​ថា ក្រោយ​ពេល​កើត​ហេតុ​ភ្លាម មន្ត្រី​សុខាភិបាល​ថ្នាក់​ឃុំ និង​ថ្នាក់​ស្រុក បាន​យក​ចិត្ត​ទុក​ដាក់​ចំពោះ​អ្នក​ជំងឺ​ទាំង​ការ​ដឹក​ជញ្ជូន​ទៅ​មន្ទីរពេទ្យ ហើយ​មើល​ថែទាំ​អ្នក​ជំងឺ​ជា​ប្រចាំ ដើម្បី​បញ្ចៀស​គ្រោះថ្នាក់​ដល់​អ្នក​ពុល​អាហារ​ទាំងនោះ។

ទាក់ទង​បញ្ហា​នេះ ប្រធាន​មជ្ឈមណ្ឌល​ប្រជាពលរដ្ឋ​ដើម្បី​ការ​អភិវឌ្ឍ និង​សន្តិភាព លោក យង់ គិមអេង មាន​ប្រសាសន៍​ថា សុវត្ថិភាព​ចំណី​អាហារ​នៅ​ប្រទេស​កម្ពុជា បច្ចុប្បន្ន គឺ​ប្រឈម​នឹង​ហានិភ័យ​ខ្ពស់។ លោក​បន្ត​ថា ដោយសារ​ប្រព័ន្ធ​ត្រួត​ពិនិត្យ​សុវត្ថិភាព​ចំណី​អាហារ​មាន​ភាព​ធូរ​រលុង និង​មិន​ច្បាស់លាស់ ព្រម​ទាំង​មាន​អំពើ​ពុក​រលួយ​ថែម​ទៀត​នោះ ជា​ហេតុ​ធ្វើ​ឲ្យ​ប្រជាពលរដ្ឋ​នៅ​តែ​ក្លាយ​ជា​ជន​រងគ្រោះ​ជា​បន្តបន្ទាប់៖ «អ៊ីចឹង​នេះ​ជា​បញ្ហា​មួយ​ដែល​រដ្ឋាភិបាល ក៏ដូចជា​ស្ថាប័ន​ពាក់ព័ន្ធ ជាពិសេស​អ្នក​មាន​កាតព្វកិច្ច​ត្រួត​ពិនិត្យ​ខាង​ចំណី​អាហារ គប្បី​ធ្វើ​ការងារ​នេះ​ឲ្យ​បាន​ហ្មត់ចត់ ឲ្យ​បាន​ទូលំទូលាយ»

កាល​ពី​ពេល​កន្លង​មក ពលរដ្ឋ​ខ្មែរ​មួយ​ចំនួន​ធ្លាប់​រងគ្រោះ​ដោយសារ​ពុល​ចំណី​អាហារ រួម​មាន​ពុល​នំ​បញ្ចុក ពុល​ស្រា​ស ពុល​ត្រី​កំពត ពុល​នំ​កញ្ចប់​នាំ​ចូល​ពី​វៀតណាម ពុល​ត្រសក់​ជ្រក់ ឬ​ត្រសក់​ត្រាំ ពុល​នំបុ័ង​សាច់ ដែល​ជនជាតិ​វៀតណាម យក​មក​លក់ ហើយ​មាន​ពលរដ្ឋ​ខ្លះ​ពុល​រហូត​ដល់​ស្លាប់​ក៏​មាន។

លោក យង់ គិមអេង ថា​ប្រសិន​បើ​គ្រោះថ្នាក់​បែប​នេះ​នៅ​តែ​កើត​ឡើង​ទៀត ផល​ប៉ះពាល់​គឺ​មិន​ត្រឹម​តែ​កើត​មាន​ចំពោះ​ពលរដ្ឋ​ខ្មែរ​ទេ ប៉ុន្តែ​វា​ធ្វើ​ឲ្យ​ប៉ះពាល់​ដល់​ភ្ញៀវ​ទេសចរ​អន្តរជាតិ​ដែល​មក​លេង​កម្សាន្ត ម្យ៉ាង​ធ្វើ​ឲ្យ​បាត់បង់​ប្រាក់​ចំណូល​តាម​រយៈ​លក់​ចំណី​ម្ចាស់​ស្រុក​ជូន​ភ្ញៀវ​ទេសចរ ជាដើម៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល