អ្នកជំងឺចំនួន ៤នាក់ទៀតបានស្លាប់ នៅថ្ងៃនេះ ដែលធ្វើឱ្យករណីស្លាប់ដោយសារជំងឺកូវីដ-១៩ កើនឡើងដល់ជាង ២ពាន់ ៩រយ៨៩នាក់ហើយ (២.៩៨៩)។ ក្រសួងសុខាភិបាល ឱ្យដឹងថា ក្នុងចំណោមអ្នកស្លាប់ទាំង ៤ នាក់នោះ មាន ២ នាក់មិនបានចាក់វ៉ាក់សាំងបង្ការជំងឺកូវីដ-១៩ នោះទេ។
ចំណែកករណីឆ្លងថ្មីវិញ ក្រសួងសុខាភិបាលប្រកាសថាមាន ១៥ នាក់ដែលជាលទ្ធផលបញ្ជាក់ដោយម៉ាស៊ីនពិសោធន៍ភីស៊ីអា (PCR)។
នៅថ្ងៃដដែលនេះ កម្ពុជា ទទួលបានវ៉ាក់សាំងបង្ការជំងឺកូវីដ-១៩ ប្រភេទស៊ីណូវ៉ាក់ (Sinovac) ចំនួន ៣ សែនដូស (៣០.០០០)បន្ថែមទៀត តាមរយៈយន្តការកូវ៉ាក់(Covax)។
គិតត្រឹមព្រឹកថ្ងៃទី១៣ ខែធ្នូ កម្ពុជាមានអ្នកកើតជំងឺកូវីដ-១៩ ជាង ១សែន ២ម៉ឺននាក់ (១២០.៣៧០) ក្នុងនោះអ្នកជាសះស្បើយមានជាង ១ សែន ១ម៉ឺននាក់(១១៦.៧២០)។
ក្រសួងសុខាភិបាលប្រកាសថា គិតត្រឹមថ្ងៃទី១១ ខែធ្នូ រដ្ឋាភិបាលចាក់វ៉ាក់សាំងជូនពលរដ្ឋដែលគ្រប់អាយុបានប្រមាណ ១០ លាននាក់សម្រាប់ដូសទីមួយ និងជាង ៩លាន ៧សែននាក់សម្រាប់ដូសទីពីរ។ ចំណែកកុមារ និងយុវជនដែលមានអាយុពី ៥ ឆ្នាំ ដល់ ១៧ ឆ្នាំវិញ ក្រសួងបញ្ជាក់ថា ចាក់វ៉ាក់សាំងបានប្រមាណ ៤ លាននាក់ ក្នុងចំណោមអ្នកដែលត្រូវចាក់សរុបជាង ៤ លាននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។