អ្នកជំងឺកូវីដម្នាក់ស្លាប់ ក្រោយមន្ទីរពេទ្យមួយចំនួនបដិសេធព្យាបាល និងទារសេវាថ្លៃ
2021.05.03
ស្ត្រីអ្នកជំងឺកូវីដ-១៩ ម្នាក់ បានស្លាប់ ក្រោយទទួលបានការព្យាបាលយឺតយ៉ាវ ដោយសារមន្ទីរពេទ្យមួយចំនួនក្នុងក្រុងភ្នំពេញ បដិសេធការព្យាបាល និងទាមទារតម្លៃសេវាព្យាបាលថ្លៃខ្ពស់ពេក។ ស្ត្រីរូបនេះមានឈ្មោះ សូ ហៀង អាយុ ៥៨ឆ្នាំ មានស្រុកកំណើតនៅក្នុង ឃុំត្រងិល ស្រុកកំពង់លែង ខេត្តកំពង់ឆ្នាំ។ គាត់បានស្លាប់នៅព្រឹកថ្ងៃទី៣ ខែឧសភា ក្រោយធ្វើដំណើរពីភ្នំពេញ ចូលទៅសម្រាកព្យាបាលក្នុងមន្ទីរសុខាភិបាលខេត្តកំពង់ឆ្នាំងបានមួយថ្ងៃ។ កូនចំនួនពីរនាក់របស់ស្ត្រីដែលស្លាប់នេះ ក៏បានឆ្លងជំងឺកូវីដពីគាត់ដែរ។
អាស៊ីសេរី មិនទាន់អាចទាក់ទងសាច់ញាតិរបស់ស្ត្រីដែលស្លាប់នេះ បាននៅឡើយទេ។ ប៉ុន្តែសារព័ត៌មានគាំទ្ររដ្ឋាភិបាលហ្វេ្រសញូវ (Fresh News) ចុះផ្សាយនៅថ្ងៃទី៣ ឧសភាដោយស្រង់សម្ដីកូនៗ របស់ស្ត្រីរូបនេះថា ពួកគាត់ និងម្តាយ បានស្នាក់នៅធ្វើការក្នុងសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ ហើយកាលពីថ្ងៃទី១ ខែឧសភា ម្ដាយរបស់គាត់ មានអាការៈក្ដៅខ្លួន ឈឺក ហត់ ពិបាកដកដង្ហើម និងពិបាកទទួលទានអាហារ។ នៅថ្ងៃដដែលនោះ ពួកគាត់ បាននាំម្តាយទៅពិនិត្យសុខភាពនៅមន្ទីរពេទ្យមួយ ប៉ុន្តែក្រោយពីគ្រូពេទ្យបានសួរនាំ និងដឹងថា ម្ដាយរបស់គាត់មានអាការៈទាក់ទងនឹងកូវីដ១៩ គ្រូពេទ្យ បានបដិសេធក្នុងការព្យាបាល។ បន្ទាប់មក ពួកគាត់ បានបញ្ជូនម្ដាយទៅមន្ទីរពេទ្យឯកជនមួយទៀត (មិនចាំឈ្មោះ)នៅជិតទួលគោក ដើម្បីពិនិត្យបន្ត ប៉ុន្តែគ្រូពេទ្យទីនោះទាមទារតម្លៃនៃការធ្វើតេស្តសំណាករកមេរោគកូវីដក្នុងមួយលើក ១៤០ដុល្លារ។ ដោយសារតម្លៃថ្លៃពេក នៅព្រឹកព្រលឹមថ្ងៃទី២ ខែឧសភា កូនៗ ទាំងពីរនាក់ សម្រេចជួលម៉ូតូកង់បី ដឹកម្ដាយយកមកព្យាបាលនៅមន្ទីរពេទ្យបង្អែកខេត្តកំពង់ឆ្នាំង។ ពួកគាត់បានទៅដល់មន្ទីរពេទ្យខេត្តកំពង់ឆ្នាំង នៅម៉ោង១២ ថ្ងៃត្រង់ថ្ងៃទី២ ខែឧសភា ហើយភ្លាមៗនោះ គ្រូពេទ្យបានធ្វើតេស្តរកឃើញថា ពួកគាត់ទាំង៣នាក់ម្ដាយកូនមានជំងឺកូវីដ-១៩ និងដាក់ឲ្យសម្រាកព្យាបាលនៅក្នុងមន្ទីរពេទ្យបង្អែកខេត្តកំពង់ឆ្នាំងតែម្ដង។ ទោះជាយ៉ាងណា ដោយសារស្ត្រីជាម្ដាយមានស្ថានភាពជំងឺធ្ងន់ធ្ងរពេក ក្រុមគ្រូពេទ្យមិនអាចជួយសង្គ្រោះជីវិតបានឡើយ ហើយគាត់បានស្លាប់នៅម៉ោងជិត ៣ រំលងអធ្រាត្រឈានចូលថ្ងៃទី៣ ខែឧសភា។
អាស៊ីសេរី មិនទាន់អាចទាក់ទងប្រធានមន្ទីរសុខាភិបាលខេត្តកំពង់ឆ្នាំង លោកវេជ្ជបណ្ឌិត ប្រាក់ វ៉ុន និងអ្នកនាំពាក្យក្រសួងសុខាភិបាល អ្នកស្រី ឱ វណ្ណឌីន ដើម្បីសុំការបញ្ជាក់ជុំវិញនេះបាននៅឡើយទេ ដោយទូរស័ព្ទចូលពុំមានអ្នកទទួល។ ករណីស្លាប់របស់ស្ត្រីរូបនេះ ក្រសួងសុខាភិបាល ក៏មិនទាន់ដាក់បញ្ចូលក្នុងសេចក្ដីជូនដំណឹង របស់ខ្លួនដែលចេញនៅថ្ងៃ៣ ខែឧសភានៅឡើយទេ។
ទាក់ទងករណីនេះ ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង មានប្រសាសន៍ថា រដ្ឋាភិបាល គួរពិនិត្យមើលករណីនេះឡើងវិញ ព្រោះទង្វើរបស់មន្ទីរពេទ្យដែលបដិសេធការព្យាបាលអ្នកជំងឺកូវីដ និងទាមទារតម្លៃសេវាពិនិត្យនិងព្យាបាលតាមចិត្តនេះ មិនត្រឹមត្រូវឡើយ។ លោក បន្តថា រដ្ឋាភិបាល គួរតែបញ្ចេញឈ្មោះមន្ទីរពេទ្យឯកជន ដែលស្ម័គ្រចិត្តធ្វើតេស្ត និងព្យាបាលជំងឺកូវីដជាសាធារណៈ និងកំណត់តម្លៃច្បាស់លាស់ ឬរដ្ឋាភិបាលគួរតែទទួលបន្ទុកចំណាយ ព្រោះជំងឺកូវីដជាវិបត្តិសកល ដូច្នេះពលរដ្ឋគួរតែព្យាបាលជំងឺដោយឥតគិតថ្លៃដូចៗ គ្នា៖ «បើសិនជាខ្លួនឯង (មន្ទីរពេទ្យ) មិនព្រមព្យាបាលម៉េចមិនព្រមរាយការណ៍ ឬមិនជួយអន្តរាគមន៍ឲ្យគាត់ទៅទទួលបានការព្យាបាលទេ ដូច្នេះអាហ្នឹង គួរតែមានការដាក់ពិន័យគាត់ (មន្ទីរពេទ្យ)។ បើសិនមន្ទីរពេទ្យឯកជនមិនព្រមស្វែងរកកិច្ចអន្តរាគមន៍ឲ្យអ្នកជំងឺទៅព្យាបាលទេ គាត់នឹងដើរពីកន្លែងមួយទៅកន្លែងហើយអាចបង្កឲ្យមានការឆ្លងកូវីដកាន់តែរាលដាលទៅអ្នកផ្សេងៗ ទៀត។ នេះគឺជារឿងមួយសំខាន់ណាស់ ហើយរឿងមួយទៀត គឺតម្លៃនៃជីវិតរបស់មនុស្ស ត្រូវតែមានតម្លៃស្មើៗ គ្នា ដូច្នេះត្រូវតែផ្តល់ការយកចិត្តទុកដាក់ដល់គាត់ទាំងអស់»។
កន្លងមក ក៏មានអ្នកជំងឺកូវីដមួយចំនួន បានស្លាប់ដោយសារយឺតយ៉ាវក្នុងការទទួលបានសេវាពិនិត្យនិងព្យាបាលត្រឹមត្រូវនៅតាមមន្ទីរពេទ្យដែរ ដោយក្នុងនោះអ្នកជំងឺកូវីដខ្លះបានស្លាប់នៅក្នុងផ្ទះ ឬស្លាប់តាមផ្លូវមុនពេលបញ្ជូនទៅព្យាបាលជាដើម។
ដោយឡែក នៅថ្ងៃចន្ទ ទី៣ សភាដដែលនេះ ក្រសួងសុខាភិបាលប្រកាសថា មានអ្នកជំងឺកូវីដចំនួន៤នាក់ទៀត បានស្លាប់ និងរកឃើញអ្នកឆ្លងថ្មី ៨៤១នាក់។
ក្រសួងសុខាភិបាលប្រកាសថា អ្នកស្លាប់ទី១ ជាបុរសជនជាតិខ្មែរ អាយុ ២៤ឆ្នាំ រស់នៅស្រុកបាធាយ ខេត្តកំពង់ចាម ស្លាប់កាលពីថ្ងៃទី១ ឧសភា។ អ្នកស្លាប់ទី២ ជាបុរសជនជាតិខ្មែរ អាយុ ៤០ឆ្នាំ រស់នៅខណ្ឌទួលគោក រាជធានីភ្នំពេញ ស្លាប់ថ្ងៃទី២ ខែឧសភា។ អ្នកស្លាប់ទី៣ ជាបុរសជនជាតិខ្មែរ អាយុ ៥៥ឆ្នាំ រស់នៅខណ្ឌមានជ័យ រាជធានីភ្នំពេញ ស្លាប់ថ្ងៃទី២ ឧសភា។ អ្នកស្លាប់ទី៤ ជាបុរសជនជាតិខ្មែរ អាយុ៦១ រស់នៅខណ្ឌមានជ័យ រាជធានីភ្នំពេញ ស្លាប់នៅព្រឹកថ្ងៃទី៣ ឧសភា។
ចំណែកអ្នកឆ្លងថ្មីទាំង ៨៤១នាក់វិញ ក្រសួង បញ្ជាក់ថា ភាគច្រើននៅក្នុងរាជធានីភ្នំពេញ ដែលមានចំនួនដល់ ៥២៥នាក់ ខេត្តកណ្ដាល ៣៣នាក់ ខេត្តព្រះសីហនុ ៦២នាក់ និងខេត្តកំពង់ចាម ២១នាក់។ សម្រាប់ខេត្តបន្ទាយមានជ័យ ក៏មានសន្ទុះអ្នកឆ្លងកើនឡើងដែរ ដោយមានចំនួនរហូតដល់ ១៥៣នាក់។
ជាមួយគ្នានេះ ក្រសួង ប្រកាសថា អ្នកជាសះស្បើយមានចំនួន ៦១នាក់។
គិតត្រឹមថ្ងៃទី៣ ខែឧសភា ឆ្នាំ២០២១ នេះ កម្ពុជាបានរកឃើញអ្នកឆ្លង ១៥.៣៦១នាក់ ក្នុងនោះ អ្នកជាសះស្បើយ ៥.៤៣០នាក់ និង អ្នកកំពុងសម្រាកព្យាបាល ៩.៨១៨នាក់ ។ ចំពោះករណីស្លាប់វិញ ក្រសួងទទួលស្គាល់ថា កើនឡើងដល់ចំនួន ១០៦នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។