ក្រសួង​សុខាភិបាល រក​ឃើញ​ករណី​ចម្លង​ជំងឺ​កូវីដ-១៩ ក្នុង​សហគមន៍ ៤នាក់​ទៀត

ដោយ ជាតិ ចំណាន
2020-12-09
Share
ក្រសួង​សុខាភិបាល រក​ឃើញ​ករណី​ចម្លង​ជំងឺ​កូវីដ-១៩ ក្នុង​សហគមន៍ ៤នាក់​ទៀត មណ្ឌល​សុខភាព​ ចាក់អង្រែ ស្ថិត​នៅ​ក្នុង​សង្កាត់​ចាក់​អង្រែ​ក្រោម ខណ្ឌ​មាន​ជ័យ រាជធានី​ភ្នំពេញ ដែល​ជា​ទីតាំង​ធ្វើ​ចត្តាឡីស័ក​អ្នក​សង្ស័យ​ឆ្លង​ជំងឺ​កូវីដ១៩។
រូប៖ ពលរដ្ឋ

ក្រសួង​សុខាភិបាល បន្ត​រក​ឃើញ​អ្នក​ឆ្លង​ជំងឺ​កូវីដ-១៩ ក្នុង​សហគមន៍ ចំនួន ៤នាក់​បន្ថែម​ទៀត នៅ​ថ្ងៃ​ទី៩ ធ្នូ។ ក្រសួង​ប្រកាស​ថា ការ​រក​ឃើញ​ជំងឺ​កូវីដ-១៩ នៅ​រយៈ​ពេល​ប៉ុន្មាន​ថ្ងៃ​ចុង​ក្រោយ មាន​ប្រភព​ពី​ហាង​លក់​ទំនិញ ប៉េត្រូ (Pedro) និង ហ្សែនដូ (Zendo) ក្នុង​រាជធានី​ភ្នំពេញ។ ក្រសួង​ស្នើសុំ​ឲ្យ​ពលរដ្ឋ​ ដែល​ពាក់​ព័ន្ធ​ដោយ​ផ្ទាល់ និង​ប្រយោល នៃ​ហាង​លក់​ទំនិញ​ទាំង​ពីរ​នេះ ចាប់​តាំង​ពី​ថ្ងៃ​ទី២៧ វិច្ឆិកា​ មក ត្រូវ​ទៅ​ធ្វើ​ចត្តាឡីស័ក នៅ​សណ្ឋាគារ​រ៉េស៊ីដង់​សុខា​ភ្នំពេញ ដោយ​ការ​ចំណាយ​ជា​បន្ទុក​របស់​រដ្ឋ។

ក្រសួង​សុខាភិបាល បាន​រក​ឃើញ​ អ្នក​ជំងឺ​កូវីដ-១៩ ចំនួន ៤នាក់​ទៀត នៅ​ថ្ងៃ​ទី៩ ធ្នូ ដោយ​អ្នក​ជំងឺ​​​ម្នាក់ រស់​នៅ​សង្កាត់​បឹង​កេង​កង​ទី៣ ជា​ភ្ញៀវ​នៃ​ហាង ហ្សែនដូ។ ចំណែក អ្នក​ជំងឺ ២នាក់​ទៀត រស់​នៅ​ក្រុង​តា​ខ្មៅ ខេត្ត​កណ្ដាល ជា​បុគ្គល​ហាង​ប៉េត្រូ និង​អ្នក​ជំងឺ​ម្នាក់​ទៀត រស់​នៅ​សង្កាត់​បឹងទំពុន​ ខណ្ឌ​មានជ័យ។ អ្នក​ទាំង ៤នាក់ ឆ្លង​ជំងឺ​កូវីដ១៩ តាម​រយៈ​ព្រឹត្តិការណ៍​សហគមន៍ ២៨ វិច្ឆិកា។​

ពួក​គេ ៣នាក់ កំពុង​សម្រាក​ព្យាបាល​នៅ​មណ្ឌល​សុខភាព​ចាក់​អង្រែ និង​ម្នាក់​ទៀត ព្យាបាល​នៅ​មន្ទីរ​ពេទ្យ​មិត្តភាព​ខ្មែរ​សូវៀត។ អ្នក​ជំងឺ​ទាំង ៤នាក់ រក​ឃើញ​ មាន​ផ្ទុក​ជំងឺ​កូវីដ១៩ តាម​រយៈ​ការ​ធ្វើ​តេស្ត​សំណាក​ពី​មនុស្ស ៣.៤៦៧​នាក់ កាល​ពី​ថ្ងៃ​ទី៧ ធ្នូ។

អាជ្ញាធរ​ខេត្ត​កណ្ដាល​បាន​បិទ​ទីតាំង​ផ្សារ​បឹង​ខ្យាង និង​វត្ត​វិហារ​ត្រាញ់ នៅ​ស្រុក​កណ្ដាល​ស្ទឹង បណ្ដោះអាសន្ន នៅ​ថ្ងៃ​ទី៩ ធ្នូ ដោយសារ​មាន​អ្នក​ជំងឺ​កូវីដ១៩ ម្នាក់ ធ្លាប់​ចេញ​ចូល​ផ្សារ​នោះ មុន​ពេល​ធ្វើតេស្ត​រក​ឃើញ​ជំងឺ​កូវីដ១៩។

ដោយ​ឡែក នៅ​ថ្ងៃ​ដដែល​នេះ អាជ្ញាធរ​ បាន​បើក​ដំណើរការ​អគារ​កាណាឌីយ៉ា នៅ​មហាវិថី​ព្រះ​មុនីវង្ស​ឡើង​វិញ​ហើយ ក្រោយ​បិទ​បាន​មួយ​សប្ដាហ៍ ដោយសារ​រក​ឃើញ​បុគ្គលិក​ធនាគារ​ចិន​ម្នាក់ ដែល​ធ្វើ​ការ​ក្នុង​អគារ​នោះ មាន​ផ្ទុក​ជំងឺ​កូវីដ១៩ កាល​ពី​ថ្ងៃ​ទី២ ធ្នូ។ ប៉ុន្តែ ហាង​លក់​ទំនិញ​មួយ​ចំនួន (Pedro, Zendo) ក្រសួង​មហាផ្ទៃ និង​ពន្ធនាគារ​ព្រៃ​ស​ជា​ដើម នៅ​បន្ត​បិទ​ដដែល។

អាស៊ី​សេរី មិន​អាច​សុំ​ការ​បញ្ជាក់​បន្ថែម​រឿង​នេះ​ពី​អ្នក​នាំ​ពាក្យ​ក្រសួង​សុខាភិបាល លោកស្រី ឱ វណ្ណឌីន និង​ប្រធាន​មន្ទីរ​សុខាភិបាល​រាជធានី​ភ្នំពេញ លោក ងី មាន​ហេង បាន​ទេ នៅ​ថ្ងៃ​ទី៩ ធ្នូ។

ចំណែក​ក្រុម​អ្នក​ជំនួញ មន្ត្រី​នយោបាយ មន្ត្រី​រាជការ ព្រះសង្ឃ និង​ប្រជាពលរដ្ឋ នៅ​តែ​បន្ត​ចូលរួម​ផ្ដល់​ថវិកា​ទិញ​វ៉ាក់សាំង​ជា​បន្ត​បន្ទាប់។ គិត​ត្រឹម​យប់​ថ្ងៃ​ទី៨ ធ្នូ លោក​នាយករដ្ឋមន្ត្រី ហ៊ុន សែន ប្រកាស​តាម​ហ្វេសប៊ុក (facebook) ថា រដ្ឋាភិបាល​ទទួល​បាន​ថវិកា​ជាង ៣០លាន​ដុល្លារ​ហើយ។

លោក ហ៊ុន សែន បន្ត​ថា លោក​មាន​បំណង​ទិញ​វ៉ាក់សាំង​ចាក់​ឲ្យ​ពលរដ្ឋ ១០លាន​នាក់ ដែល​ត្រូវ​ការ​វ៉ាក់សាំង ២០លាន​ដូស (Dose) ហើយ​ចំពោះ​មុខ​ក្នុង​ដំណាក់កាល​ដំបូង លោក​នឹង​ផ្ដល់​ជូន​ចំនួន ១លាន​ដូស សម្រាប់​ចាក់​ឲ្យ​ពលរដ្ឋ ចំនួន ៥០ម៉ឺន​នាក់ ដែល​កំពុង​បំពេញ​ការងារ​នៅ​កន្លែង​​មាន​ហានិភ័យ​ជា​អាទិភាព ដូច​ជា គ្រូពេទ្យ គ្រូបង្រៀន កង​កម្លាំង​ប្រដាប់​អាវុធ នគរបាល​យុត្តិធម៌​គ្រប់​ប្រភេទ រហូត​ដល់​កម្មករ​បោស​សំរាម​សំអាត​ទី​ប្រជុំ​ជន។

ប្រធាន​សមាគម​កម្មករ​កម្ពុជា​សេដ្ឋកិច្ច​ក្រៅ​ប្រព័ន្ធ លោក សុខ ឈុនអឿង គាំទ្រ​វិធានការ​ទប់​ស្កាត់​ការ​រាល​ដាល​ជំងឺ​កូវីដ១៩ របស់​រដ្ឋាភិបាល មួយ​រយៈ​ចុង​ក្រោយ​នេះ ដោយ​ពង្រឹង​ការ​លាង​ដៃ ពាក់​ម៉ាស់ រក្សា​គម្លាត នៅ​ទី​សាធារណៈ និង​ការ​រៀបចំ​ទីតាំង​សណ្ឋាគារ​ ឲ្យ​ធ្វើ​ចត្តាឡីស័ក​ជាដើម។

ប៉ុន្តែ​លោក សុខ ឈុនអឿង ព្រួយ​បារម្ភ​ថា ក្រុម​កម្មករ និង ​អ្នក​ប្រកប​របរ​ក្រៅ​ប្រព័ន្ធ ប្រឈម​​ការ​ឆ្លង​ជំងឺ និង​ប្រឈម​ទាំង​ជីវភាព ប្រសិន​បើ​ជំងឺ​កូវីដ១៩ នៅ​តែ​បន្ត​អូស​បន្លាយ​ធ្ងន់ធ្ងរ​ទៀត៖ «ខ្ញុំ​មើល​ឃើញ​វិធានការ​របស់​រដ្ឋាភិបាល គឺ​ជា​ការ​ល្អ។ ចង់​និយាយ​ថា យុទ្ធសាស្ត្រ​របស់​រដ្ឋាភិបាល គឺ​តាម​រក​អ្នក​ដែល​ពាក់ព័ន្ធ កុំ​ឲ្យ​ដាច់​ព័ត៌មាន។ ហ្នឹង ខ្ញុំ​គិត​ថា ជា​ការ​ល្អ ប៉ុន្តែ​សម្រាប់​បងប្អូន​កម្មករ​សេដ្ឋកិច្ច​ក្រៅ​ប្រព័ន្ធ គឺ​ពួកគាត់​មិន​បាន​ដឹង​ថា ភ្ញៀវ​ ឬ​ម៉ូយ​របស់​គាត់​ មាន​ការ​ពាក់ព័ន្ធ​អ្វី គឺ​គាត់​អត់​ដឹង​ទេ»

ចំណែក​អ្នក​គ្រប់​គ្រង​កម្ម​វិធី​ការ​ងារ​ នៃ​មជ្ឈ​មណ្ឌល​សម្ព័ន្ធ​ភាព​ការងារ និង​សិទ្ធិ​មនុស្ស (CENTRAL) លោក ឃុន ថារ៉ូ ជំរុញ​រដ្ឋាភិបាល ឱ្យ​ព្យាយាម​រក​វិធី​ផ្ដល់​វ៉ាក់សាំង​ដល់​ពលរដ្ឋ​ឲ្យ​បាន​គ្រប់​គ្នា ដើម្បី​ធានា​ថា ពលរដ្ឋ​ទទួល​បាន​សិទ្ធិ​រស់​រាន​មាន​ជីវិត​ស្មើ​ភាព​គ្នា។ លោក​បន្ត​ថា វិធានការ​របស់​រដ្ឋាភិបាល​ មួយ​រយៈ​ចុង​ក្រោយ​នេះ មាន​ភាព​ប្រសើរ ប៉ុន្តែ​ លោក​ជំរុញ​រដ្ឋាភិបាល​ឱ្យ​ពង្រីក​ប្រព័ន្ធ​គាំពារ​សង្គម​បន្ថែម​ទៀត ដើម្បី​ឲ្យ​ពលរដ្ឋ​ជា​អ្នក​ងាយ​រងគ្រោះ និង​អ្នក​រង​ផល​ប៉ះពាល់ ទទួល​បាន​អត្ថ​ប្រយោជន៍​សង្គម៖ «អ៊ីចឹង ដល់​ពេល​បញ្ហា​នេះ ខ្ញុំ​មើល​ឃើញ​ថា ប្រជា​ពលរដ្ឋ ទោះ​បី​គាត់​ទទួល​ដំណឹង ព័ត៌មាន​ថា មាន​ការ​ឆ្លង​ជា​លក្ខណៈ​សហគមន៍ ជា​ក្ដី​បារម្ភ​របស់​គាត់​ហើយ។ តែ​រឿង​ក្រពះ គឺ​គាត់​មាន​ការ​បារម្ភ​ជាង​បញ្ហា​កូវីដ​ទៀត។ ជាពិសេស យើង​មើល​កម្មករ​ និយោជិត អ្វី​ជា​ដើម ដែល​តាម​ការ​ដែល​យើង​សាកសួរ​ព័ត៌មាន ធ្វើ​ការ​សម្ភាសន៍​អ្វី បច្ចុប្បន្ន​ហ្នឹង គាត់​បារម្ភ​ហើយ តែ​គាត់​គ្មាន​ជម្រើស​អ្វី ដែល​មិន​អាច​អត់​ទៅ​ធ្វើការ​ងារ​ ប្រឈម​ហានិភ័យ​ទេ»

រីឯ​សម្ព័ន្ធ​អ្នក​សារ​ព័ត៌មាន​កម្ពុជា (Camboja) ក៏​អំពាវនាវ​ដល់​រដ្ឋាភិបាល​ឱ្យ​ដាក់​អ្នក​សារ​ព័ត៌មាន ទៅ​ក្នុង​កន្សោម​អាទិភាព នៃ​អ្នក​គួរ​ទទួល​បាន​វ៉ាក់សាំង​ជំងឺ​កូវីដ១៩ មុន​គេ​ដែរ ព្រោះ​អ្នក​សារ​ព័ត៌មាន​កំពុង​បំពេញ​តួនាទី​ជា​ភ្នាក់ងារ​ទំនាក់​ទំនង​យ៉ាង​សកម្ម ដើម្បី​បម្រើ​ផល​ប្រយោជន៍​ពលរដ្ឋ​ទូទៅ។

គិត​ត្រឹម​ព្រឹក​ថ្ងៃ​ទី៩ ធ្នូ កម្ពុជា​រក​ឃើញ​អ្នក​ឆ្លង​កូវីដ១៩ ចំនួន ៣៥៤នាក់។ ក្នុង​នោះ អ្នក​ជា​សះ​ស្បើយ ៣០៧នាក់ និង​អ្នក​កំពុង​សម្រាក​ព្យាបាល នៅ​មន្ទីរពេទ្យ​ចំនួន ៤៧នាក់៕



កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល