មន្ត្រី​បក្ស​ប្រឆាំង​ស្នើ​ឲ្យ​រដ្ឋាភិបាល​រក​ថវិកា​ផ្គត់ផ្គង់​ពលរដ្ឋ​ផ្ទុក​មេរោគ​អេដស៍​នៅ​បាត់ដំបង

ដោយ ហ៊ុំ ចំរើន
2014-12-22
Share
អេដស៍ បាត់ដំបង ៦២០ ប្រជាពលរដ្ឋ​រួម​ទាំង​អ្នក​ផ្ទុក​មេរោគ​អេដស៍​ផង អង្គុយ​ស្ដាប់​អ្នក​តំណាងរាស្ត្រ​ពន្យល់​និង​ផ្ដល់​កម្លាំង​ចិត្ត ខណៈ​ជួប​សំណេះសំណាល​នៅ​វត្ត​រកា ឃុំ​រកា ស្រុក​សង្កែ ខេត្ត​បាត់ដំបង កាល​ពី​រសៀល​ថ្ងៃ​ទី​២០ ធ្នូ ឆ្នាំ​២០១៤។
RFA/Hun Chamroeun

ប្រធាន​គណៈកម្មការ​ទី​៨​នៃ​រដ្ឋសភា​ ទទួល​បន្ទុក​ផ្នែក​សុខាភិបាល​សង្គមកិច្ច​ អតីត​យុទ្ធជន និង​យុវនីតិ​សម្បទា​ ការងារ​បណ្ដុះបណ្ដាល​វិជ្ជាជីវៈ​​ និង​កិច្ចការ​នារី អំពាវនាវ​ឲ្យ​រដ្ឋាភិបាល​ស្វែង​រក​កញ្ចប់​ថវិកា​ផ្គត់ផ្គង់​ដល់​ប្រជាពលរដ្ឋ​ដែល​ផ្ទុក​មេរោគ​អេដស៍​នៅ​ភូមិ​រកា ស្រុក​សង្កែ ខេត្ត​បាត់ដំបង ដើម្បី​ជួយ​សម្រួល​ដល់​​ការ​រស់​នៅ​ប្រចាំ​ថ្ងៃ​របស់​ពួកគាត់។

​​​​​អ្នក​តំណាង​រាស្ត្រ​ថ្លែង​បែប​នេះ​ គឺ​នៅ​ពេល​ផ្ដល់​បទ​សម្ភាសន៍​ដល់​​អ្នក​កាសែត ខណៈ​ចុះ​​ជួប​សំណេះសំណាល​ផ្ដល់​កម្លាំង​ចិត្ត​ដល់​ប្រជាពលរដ្ឋ​​នៅ​វត្ត​រកា ឃុំ​រកា​ កាល​ពី​​រសៀល​ថ្ងៃ​ទី​២០ ធ្នូ កន្លង​ទៅ។

ប្រធាន​គណៈកម្មការ​ទី​៨​នៃ​រដ្ឋ​សភា អ្នកស្រី កែសុវណ្ណរតន៍ មាន​ប្រសាសន៍​ទៅ​កាន់​ប្រជាពលរដ្ឋ​ថា កុំ​ឲ្យ​ព្រួយបារម្ភ​និង​បាត់​ស្មារតី​ចំពោះ​មេរោគ​ដែល​កើត​ឡើង​​ក្នុង​ភូមិ​រកា​នោះ។ទោះ​ជា​យ៉ាង​នេះ​អ្នកស្រី​អំពាវនាវ​ឲ្យ​រដ្ឋាភិបាល​គួរ​ស្វែង​រក​កញ្ចប់​ថវិកា​ផ្គត់ផ្គង់​ទៅ​ដល់​​ប្រជាពលរដ្ឋ​ដែល​រក​ឃើញ​មាន​ផ្ទុក​មេរោគ​អេដស៍​នៅ​មណ្ឌល​សុខភាព​រកា​នោះ ដើម្បី​យក​ទៅ​ដោះស្រាយ​ជីវភាព​ប្រចាំ​ថ្ងៃ​របស់​ពួកគាត់៖ «ត្រូវ​តែ​គិតគូរ​ចំពោះ​រឿង​នេះ​ ពីព្រោះ​ប្រជាពលរដ្ឋ​ដែល​ឆ្លង​មេរោគ​អេដស៍​នេះ​មាន​ចំនួន​ច្រើន​ណាស់​ ហើយ​មាន​គ្រួសារ​ខ្លះ​កើត​ដល់​ទៅ ៣​នាក់​អី​អ៊ីចឹង​ ហើយ​មាន​ទាំង​ក្មេង​ទាំង​មនុស្ស។ដូច្នេះ​ពួកគាត់​ច្បាស់​ជា​ជួប​នៅ​ការ​លំបាក​ជា​មិន​ខាន»

អ្នកស្រី​បន្ត​ទៀត​ថា ហេតុ​ដែល​​ឆ្លង​មេរោគ​អេដស៍​ដល់​ប្រជាពលរដ្ឋ​ដ៏​ច្រើន​បែប​នេះ​ គឺ​កើត​ឡើង​​ដោយសារ​ការ​ធ្វេសប្រហែស​របស់​មន្ត្រី​សុខាភិបាល​ដែល​ពុំ​មាន​វិធានការ​ទៅ​លើ​គ្រូពេទ្យ​ឲ្យ​បាន​ត្រឹម​ត្រូវ៖ «អ៊ីចឹង​ដើម្បី​ធានា​នូវ​អាយុ​ជីវិត​របស់​មនុស្ស​ក្រសួង​សុខាភិបាល​ត្រូវ​រឹត​បន្តឹង​ទៅ​លើ​គ្រូពេទ្យ​​ដែល​គ្មាន​សញ្ញាប័ត្រ​ត្រឹមត្រូវ​មិន​ឲ្យ​ព្យាបាល​ប្រជាពលរដ្ឋ​​ និង​ឲ្យ​គ្រូពេទ្យ​​ទទួល​ខុស​ត្រូវ​ខ្ពស់​ដល់​​ការ​ព្យាបាល​អ្នក​ជំងឺ»។

ទាក់​ទង​នឹង​បញ្ហា​នេះ​រដ្ឋមន្ត្រី​ក្រសួង​សុខាភិបាល​ លោក ម៉ម ប៊ុនហេង​ មាន​ប្រសាសន៍​​​ខណៈ​ចុះ​សំណេះ​សំណាល​ផ្ដល់​កម្លាំង​ចិត្ត​ដល់​​ប្រជាពលរដ្ឋ​នៅ​ភូមិ​រកា​ កាល​ពី​ថ្ងៃ​ទី​១៨ ធ្នូ ថា ឲ្យ​ពួកគាត់​​យក​ចិត្ត​ទុកដាក់​ថែរក្សា​សុខភាព​របស់​ខ្លួន​ឲ្យ​បាន​ល្អ​ ហើយ​ថា លោក​នឹង​បញ្ជូន​ក្រុម​គ្រូពេទ្យ​ជំនាញ​បន្ថែម​ទៀត​ចុះ​មក​ស្រាវជ្រាវ និង​តាមដាន​មេរោគ​នេះ​​​​​ដល់​ប្រជាពលរដ្ឋ​នៅ​មណ្ឌល​សុខភាព​រកា៖ «សូម​ជម្រាប​ជូន​​ថា យើង​មាន​ក្រុម​ពេទ្យ​របស់​យើង​ហ្នឹង​ចុះ​ធ្វើ​ការ​ការងារ​នេះ​ជាមួយ​អាជ្ញាធរ​មូលដ្ឋាន​បន្ថែម​ទៀត​ ដូច​នេះ​សុំ​ឲ្យ​បងប្អូន​ដែល​បាន​មក​ពិនិត្យ​ជំងឺ​ជួយ​សហការ​ឲ្យ​បាន​ល្អ​ជាមួយ​នឹង​គ្រូពេទ្យ​របស់​យើង»

​​​​​ទោះ​ជា​យ៉ាង​នេះ​ក្ដី ក្រុម​ប្រជាពលរដ្ឋ​នៅ​តំបន់​ឃុំ​រកា កំពុង​ព្រួយ​បារម្ភ​​យ៉ាង​ខ្លាំង​ចំពោះ​មេរោគ​អេដស៍​​ដែល​កើត​នៅ​ក្នុង​ភូមិ​ស្រុក​របស់​ពួកគាត់​នេះ។ អ្នក​ភូមិ​ថ្លែង​បន្ត​ថា​ រហូត​មក​ទប់​ពេល​នេះ ​ពុំ​មាន​អាជ្ញាធរ​ណា​ផ្ដល់​ជំនួយ​ដល់​ក្រុម​​អ្នក​ដែល​​ផ្ទុក​មេរោគ​អេដស៍ ​ដើម្បី​យក​ទៅ​ដោះស្រាយ​ជីវភាព​គ្រួសារ​​នៅ​ឡើយ​ទេ៖ «សុំ​ឲ្យ​រដ្ឋាភិបាល​ជួយ​ដោះ​ស្រាយ​ដល់​ប្រជាពលរដ្ឋ​ដែល​ផ្ទុក​មេរោគ​អេដស៍​ផង ព្រោះ​ភាគ​ច្រើន​សុទ្ធតែ​អ្នក​ក្រីក្រ ជួប​ការ​ខ្វះខាត មិន​អាច​ជួយ​ខ្លួន​ឯង​បាន​នោះ​ទេ។ ខ្ញុំ​ព្រួយ​បារម្ភ​ណាស់​បាន​ជា​ពួក​​នាំ​គ្នា​មក​ពិនិត្យ​ឈាម​នេះ ហើយ​មិន​ទាន់​បាន​ទទួល​ថ្នាំ​ពី​​គ្រូពេទ្យ​នៅ​ឡើយ​ទេ»

ទាក់​ទង​នឹង​បញ្ហា​នេះ​ដែរ​ ​ទី​ប្រឹក្សា​បច្ចេកទេស​​អង្គការ​សម្ព័ន្ធ​ភាព​ខ្មែរ​ប្រយុទ្ធ​នឹង​ជំងឺ​អេដស៍ ហៅ​កាត់​ថា អង្គការ​ខាណា (Khana) លោក​វេជ្ជបណ្ឌិត​ នី​ សុជាតិ​ មាន​ប្រសាសន៍​បញ្ជាក់​ថា​ ប្រជាពលរដ្ឋ​ដែល​ផ្ទុក​មេរោគ​អេដស៍​ត្រូវ​ថែរក្សា​សុខភាព​ឲ្យ​បាន​ល្អ​ ហើយ​ត្រូវ​​ទៅ​រក​​​​សេវា​ព្យាបាល​ពី​គ្រូពេទ្យ​ឲ្យ​បាន​ឆាប់​ជា​ការ​ប្រសើរ។

លោក​បន្ត​ទៀត​ថា​ នៅ​ពេល​ដែល​អ្នក​ឆ្លង​មេរោគ​​បាន​ទទួល​សេវា​ហើយ​ ពួកគាត់​ត្រូវ​ទៅ​ជួប​គ្រូពេទ្យ​តាម​ការ​កំណត់​ឲ្យ​បាន​ទៀងទាត់៖ «បាទ! ចំពោះ​ជំងឺ​អេដស៍​នេះ​យើង​ដឹង​ហើយ​​ពុំ​មាន​ថ្នាំ​ណា​ព្យាបាល​ជា​នោះ​ទេ។ ប៉ុន្តែ​មាន​ថ្នាំ​អាច​ជួយ​កាត់​បន្ថយ​ឲ្យ​អ្នក​ដែល​ផ្ទុក​មេរោគ​អេដស៍​ឲ្យ​រស់​បាន​ដូច​មនុស្ស​ធម្មតា​ដែរ»

នាយក​វិទ្យាស្ថាន​ប៉ាស្ទ័រ​កម្ពុជា លោក​វេជ្ជបណ្ឌិត ដេលីយ៉េ ហ្វង់តេនីល (Didier Fontenille) ប្រាប់​អ្នក​កាសែត​ក្នុង​ស្រុក​ថា អ្នក​ផ្ទុក​មេរោគ​អេដស៍​ឃុំ​រកា ស្រុក​សង្កែ នៅ​ខេត្ត​បាត់ដំបង កើន​ឡើង​រហូត​ដល់ ១៤០​នាក់​ហើយ កាល​ពី​​រសៀល​ថ្ងៃ​ទី​២០ ខែ​ធ្នូ។ ចំនួន​នេះ​អាច​នឹង​កើន​ឡើង​បន្ត​ទៀត នៅ​ពេល​ពលរដ្ឋ​កាន់​តែ​ច្រើន​សម្រុក​ធ្វើ​តេស្ត​ឈាម​រក​មេរោគ​អេដស៍​នោះ។

ទាក់​ទង​នឹង​បញ្ហា​នេះ​ដែរ​ នៅ​រសៀល​ថ្ងៃ​ទី​២១​ ធ្នូ សមត្ថកិច្ច​ខេត្ត​បាត់ដំបង បាន​បញ្ជូន​​ខ្លួន​គ្រូពេទ្យ​ ឈ្មោះ​ លោក យ៉ែម ជ្រិន អាយុ ៥៥​ឆ្នាំ​ ដែល​អ្នក​ភូមិ​សង្ស័យ​ថា ជា​ដើម​ចង​ចម្លង​មេរោគ​អេដស៍​ដល់​ប្រជាពលរដ្ឋ​នៅ​ឃុំ​រកា​នោះ ទៅ​តុលាការ​ខេត្ត​បាត់ដំបង​ហើយ​ ដើម្បី​ធ្វើ​ការ​ចោទ​ប្រកាន់​តាម​ផ្លូវ​ច្បាប់៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល