វិស័យសុខាភិបាល បានរងការរិះគន់ជាច្រើនក្នុងរយៈពេលចុងក្រោយនេះ ជុំវិញគ្រូពេទ្យមិនបានគោរពក្រមសីលធម៌គ្រូពេទ្យ និងបាត់បង់ការទទួលខុសត្រូវចំពោះអ្នកជំងឺ ជាពិសេសករណីដែលធ្វើឲ្យស្ត្រីលក់លៀសហាលម្នាក់ សម្រាលកូននៅលើផ្លូវរថភ្លើងចំថ្ងៃបុណ្យចូលឆ្នាំចិនកន្លងមក។
រឿងអាស្រូវនេះ ត្រូវបានក្រសួងសុខាភិបាល ព្យាយាមកែខៃឡើងវិញ តាមរយៈចាត់វិធានការហ្មត់ចត់ដាក់ទោសទណ្ឌចំពោះគ្រូពេទ្យដែលប្រព្រឹត្តខុស អប់រំពង្រឹងពីក្រមសីលធម៌គ្រូពេទ្យ និងដាស់តឿនឲ្យគ្រូពេទ្យទាំងអស់ បង្កើនការយកចិត្តទុកដាក់ខ្ពស់ មើលថែអ្នកជំងឺឲ្យបានល្អ ជាពិសេសចំពេលពិធីបុណ្យចូលឆ្នាំខ្មែរ ដែលភាគច្រើនគ្រូពេទ្យត្រូវឈប់សម្រាក។
មន្ត្រីសុខាភិបាល បានប្រកាសថា គ្រូពេទ្យគ្រប់ជំនាញទទួលខុសត្រូវការងារយាម ឬប្រចាំការ ត្រូវតែមានការទទួលខុសត្រូវខ្ពស់ ក្នុងអំឡុងពេលបីថ្ងៃនៃពិធីបុណ្យចូលឆ្នាំ ដើម្បីកុំឲ្យមានថ្លោះធ្លោយកើតមានចំពោះអ្នកជម្ងឺដែលមកពិនិត្យព្យាបាល។
ប្រធានមន្ទីរសុខាភិបាលរាជធានីភ្នំពេញ លោក សុខ សុគន្ធ បានឲ្យដឹងថា ថ្វីត្បិតគ្រូពេទ្យខ្លះត្រូវឈប់សម្រាកក្នុងពិធីបុណ្យចូលឆ្នាំ ប៉ុន្តែនៅតាមមន្ទីរពេទ្យ និងមណ្ឌលសុខភាពចំនួន ៣៤ នៅរាជធានីភ្នំពេញ បានបែងចែក និងដាក់វេនគ្នាប្រចាំការតាមថ្ងៃនីមួយៗ។ លោកពន្យល់ថា កាតព្វកិច្ចរបស់គ្រូពេទ្យ មានភារៈសំខាន់សម្រាប់សង្គ្រោះអ្នកជំងឺ ដូច្នេះគ្រប់មន្ទីរពេទ្យ និងមណ្ឌលសុខភាពទាំងអស់ បានបើកទ្វារ ២៤ម៉ោង លើ ២៤ម៉ោង ដោយមិនបិទទ្វារឈប់សម្រាកដូចស្ថាប័នរដ្ឋ និងក្រុមហ៊ុនឯកជនឯទៀតនោះទេ៖ «ថ្វីត្បិតតែថ្ងៃឈប់សម្រាកបុណ្យទានមែន ប៉ុន្តែមន្ទីរពេទ្យ និងមណ្ឌលសុខភាពយើងមិនឲ្យសម្រាកទេ គឺពេទ្យប្រចាំការ គឺផ្លាស់ប្ដូរវេនគ្នារហូត»។
លោក សុខ សុគន្ធ បន្ថែមថា ក្នុងពិធីបុណ្យចូលឆ្នាំ ក្រសួងសុខាភិបាលក៏បានត្រៀមឡានសាម៉ុយជាច្រើនគ្រឿង ឲ្យប្រចាំការនៅតាមមន្ទីរពេទ្យ និងនៅតាមគោលដៅសំខាន់ៗ សម្រាប់សង្គ្រោះបន្ទាន់ ជាពិសេសនៅជិតរមណីយដ្ឋានវត្តភ្នំ ដែលមានការប្រគំតន្ត្រី មានលេងល្បែងរបាំប្រជាប្រិយ ដែលមានមនុស្សម្នាជាច្រើនចូលរួមកុះករ។ បញ្ហាមួយទៀតដែលគ្រូពេទ្យត្រូវយកចិត្តទុកដាក់ដែរចំពោះការជួយសង្គ្រោះបន្ទាន់ គឺករណីគ្រោះថ្នាក់ចរាចរណ៍៖ «គ្រោះថ្នាក់ចរាចរណ៍ ក៏យើងមានឡានសាម៉ុយ ប្រចាំការនៅតាមមន្ទីរពេទ្យដែរ យើងត្រៀមរហូតមិនថាថ្ងៃបុណ្យចូលឆ្នាំមែនតែយើងត្រៀមអ៊ីចឹងចំពោះពេទ្យត្រៀមប្រចាំការ និងទទួលជួយសង្គ្រោះគ្រប់ពេល»។
ការបែងចែកមន្ត្រីពេទ្យឲ្យប្រចាំការមានជាទៀងទាត់នៅតាមមន្ទីរពេទ្យ និងមណ្ឌលសុខភាព មិនថាក្នុងថ្ងៃបុណ្យទាន ឬថ្ងៃឈប់សម្រាកចុងសប្ដាហ៍ទេ។ ប៉ុន្តែ បញ្ហាធ្វេសប្រហែស ឬការមិនទទួលខុសត្រូវលើការងាររបស់បុគ្គលពេទ្យផ្ទាល់ជារឿងចាំបាច់។
កន្លងមក មានរឿងអាស្រូវជាច្រើនជុំវិញការធ្វេសប្រហែស ការមិនគោរពក្រមសីលធម៌ និងការរើសអើងអ្នកជំងឺ សុទ្ធសឹងជាដើមចមធ្វើឲ្យមានការថ្លោះធ្លោយអាយុជីវិតមនុស្ស និងធ្វើឲ្យស្ត្រីមានផ្ទៃពោះត្រូវសម្រាលកូននៅតាមផ្លូវជាដើម។
កាលពីឆ្នាំ២០១២ កន្លងទៅ កុមារាម្នាក់នៅខេត្តបន្ទាយមានជ័យ បានស្លាប់ដោយសារពស់ចឹក ក្រោយពីវេជ្ជបណ្ឌិតបានបដិសេធមិនផ្តល់ឱសថព្យាបាលចំពោះកុមារនោះ ដោយសម្អាងថា ឱសថនេះគឺរក្សាទុកព្យាបាលចំពោះក្រុមយុវជនស្ម័គ្រចិត្តវាស់ដីធ្លីរបស់ប្រមុខរាជរដ្ឋាភិបាល លោក ហ៊ុន សែន។
ហើយចំពេលពិធីបុណ្យចូលឆ្នាំចិន កាលពីដើមខែកុម្ភៈ មានស្ត្រីលក់លៀសហាលម្នាក់ ឈ្មោះ ជា ចែត បានឈឺពោះសម្រាលកូនស្រីនៅលើផ្លូវរថភ្លើងក្នុងសង្កាត់គីឡូម៉ែត្រលេខ៦ ក្រោយពីវេជ្ជបណ្ឌិតនៅមន្ទីរពេទ្យបង្អែកសម្ដេចឪ ក្នុងរាជធានីភ្នំពេញ បានបដិសេធមិនទទួលព្យាបាល។
បញ្ហាសម្រាលកូនក្នុងអំឡុងពេលបុណ្យចូលឆ្នាំខ្មែរ ជាការបារម្ភរបស់គ្រូពេទ្យ។ អនុប្រធានមណ្ឌលសុខភាពទឹកថ្លា លោក ឃួន សាវ៉ន ឲ្យដឹងថា ក្នុងថ្ងៃបុណ្យចូលឆ្នាំខ្មែរទាំង ៣ថ្ងៃ ខាងមណ្ឌលសុខភាពពង្រឹងសំខាន់ទៅលើជំនាញពេទ្យឆ្មប និងបានចាត់ចែងឲ្យពេទ្យឆ្មប ៣ ទៅ ៤នាក់ ត្រូវប្រចាំការពេញ ២៤ម៉ោង ទៅតាមវេនរបស់ខ្លួន ហើយគ្រូពេទ្យជំងឺទូទៅ ១ ឬ ២នាក់ ក៏ត្រូវប្រចាំការដែរ៖ «ការពិតទៅ យើងពង្រឹងឆ្មបខ្លាំង ឆ្មបខ្ញុំមួយយប់ ៤នាក់ ព្រោះអ៊ីចេះ យើងដឹងហើយពាក្យខ្មែរយើងថាឆ្លងទន្លេ អ៊ីចឹងមានការលំបាក ហើយប្រជាជនគាត់ភ័យខ្លាចពេលណាគាត់មកទៅឃើញឆ្មបយើងតិច បច្ចេកទេសយើងអត់ ហើយដល់អ៊ីចឹង កន្លែងខ្ញុំទទួលបានជោគជ័យមិនមានបញ្ហាគ្រោះថ្នាក់ដល់ជីវិតដល់អ្នកសម្រាលកូន ព្រោះយើងមានឡានពេទ្យក៏ជិត ហើយយើងក៏មានពេទ្យធំរបស់យើងក៏នៅជិតដែរ»។
បើទោះបីជាថ្ងៃបុណ្យចូលឆ្នាំមានគ្រូពេទ្យជាងពាក់កណ្ដាល ត្រូវឈប់សម្រាកក៏ពិតមែន ប៉ុន្តែលោក ឃួន សាវ៉ន បញ្ជាក់ថា គ្រូពេទ្យប្រចាំការតាមវេននីមួយៗនោះ អាចនឹងបម្រើសេវាទាន់ពេលដល់អតិថិជនបាន។ ភាគច្រើន អតិថិជនដែលមករកសេវាព្យាបាលនៅតាមមណ្ឌលសុខភាព ក៏មានថយចុះដូចគ្នាដែរក្នុងពិធីបុណ្យចូលឆ្នាំ ដោយអ្នកខ្លះត្រូវទៅស្រុកកំណើត ហើយភាគច្រើនមានតែសេវាសម្រាលកូនប៉ុណ្ណោះដែលមមាញឹកជាងគេ។
ស្ត្រីពរពោះម្នាក់ អ្នកស្រី ឆេង ស្រីម៉ៅ ដែលត្រូវសម្រាលកូនទី២ ក្នុងចន្លោះថ្ងៃចូលឆ្នាំ មានគម្រោងទៅសម្រាលកូននៅក្នុងមជ្ឈមណ្ឌលជាតិគាំពារមាតា និងទារក ឬស្គាល់ជាទូទៅថា មន្ទីរពេទ្យជប៉ុន។ អ្នកស្រីបារម្ភថា ពេទ្យឆ្មបតិចតួចពេកប្រចាំការនៅថ្ងៃបុណ្យចូលឆ្នាំ អាចបង្កការលំបាកដល់អ្នកជំងឺ និងធ្វើឲ្យអ្នកជំងឺខ្វះទំនុកចិត្ត៖ «ពេលគេនៅជុំគ្នា ពេទ្យច្រើនអ៊ីចឹងទៅ ដល់ពេលគេទៅអស់ យើងចេះតែបារម្ភមិនដឹងថាគេនៅប៉ុន្មាន ទៅប៉ុន្មានអ៊ីចឹង»។
អ្នកស្រីធ្លាប់ឮពីព័ត៌មានដែលមានស្ត្រីម្នាក់សម្រាលកូននៅតាមផ្លូវរថភ្លើង កាលពីបុណ្យចូលឆ្នាំចិន កាលពីខែកុម្ភៈ ដូច្នេះអ្នកស្រីមិនចង់ឲ្យមានប្រវត្តិនេះច្រំដែលទៅលើស្ត្រីពរពោះឯទៀតនោះទេ បើទោះបីជាតាមរូបភាពណាក៏ដោយ រួមមានការមិនយកចិត្តទុកដាក់ចំពោះអ្នកជំងឺ ការមិនទទួលខុសត្រូវលើវិជ្ជាជីវៈគ្រូពេទ្យ និងការរើសអើងអ្នកជំងឺមាន ឬក្រ ជាដើម៖ «មិនចង់ឲ្យមានអ៊ីចឹងទេ ព្រោះអីយើងក៏ពោះធំ គ្នាក៏ពោះធំ ព្រោះអីឈឺពោះមិនធម្មតាទេ មែនចេះតែយើងឈឺពោះដូចយើងឈឺចុកពោះធម្មតាណា អានេះសុទ្ធតែប្ដូរចិត្តប្ដូរជីវិតយើង»។
ជុំវិញបញ្ហានេះ ពេទ្យឆ្មបម្នាក់នៅមណ្ឌលសុខភាពស្ទឹងមានជ័យ អ្នកស្រី ប្រាក់ ផល្លា ទទួលស្គាល់ថា ក្រោយពីមានរឿងអាស្រូវភ្លាមៗជុំវិញកំហុសឆ្គងឆ្មប នៅមន្ទីរពេទ្យសម្ដេចឪ ដែលបណ្តោយឲ្យស្ត្រីម្នាក់សម្រាលកូននៅតាមផ្លូវរថភ្លើងរួចមក ខាងក្រសួងសុខាភិបាល និងប្រធានមណ្ឌលសុខភាពរបស់គាត់ បានប្រជុំរាល់ខែ ដើម្បីពង្រឹងពីការទទួលខុសត្រូវរបស់បុគ្គលិកពេទ្យឡើងវិញ៖ «ពង្រឹងរឿងឆ្លងទន្លេ មិនឲ្យពេទ្យដើរទៅណាទៅណី ប៉ុន្តែដោយឡែកកន្លែងខ្ញុំ មិនហ៊ានដើរទេ ទោះបីថាភ្ជុំចូលឆ្នាំអី គឺថា ២៤ម៉ោង មកពេទ្យស្ទឹងមានជ័យ គឺថា ២៤ម៉ោង ត្រូវតែជួបបុគ្គលិកពេទ្យហើយ»។
ក្រៅតែពីបញ្ហាសម្រាលកូន លោក ឡឹក សារិន វ័យ ៦០ឆ្នាំ ដែលអង្គុយចាំបើកថ្នាំនៅមណ្ឌលសុខភាពទឹកថ្លា យល់ឃើញថា ការបង្កើនចំនួនគ្រូពេទ្យប្រចាំការឲ្យបានច្រើននៅតាមប៉ុស្តិ៍សុខភាព ក្នុងពិធីបុណ្យទាន ជាការប្រសើរចំពោះពលរដ្ឋដែលមករកសេវាព្យាបាល និងម្យ៉ាងទៀត ដើម្បីបង្ការការសង្គ្រោះបន្ទាន់ភ្លាមៗ ពេលមានករណីគ្រោះថ្នាក់ចរាចរណ៍កើតឡើងជាយថាហេតុ ក្នុងពិធីបុណ្យនោះ៖ «បុណ្យទានអ៊ីចឹងទៅ គ្រោះថ្នាក់ចរាចរណ៍វាចេះតែមានហើយ ជួនកាលនៅជិតអ៊ីចឹងវាល្អដែរ មានពេទ្យប្រចាំការ ដែលអ្នករបួសមកបានអីជួយមួយគ្រាក្នុងការរុំរបួសលាងរបួសអីអ៊ីចឹងទៅ ទម្រាំទៅដល់ពេទ្យយើងធំអីអ៊ីចឹង»។
របាយការណ៍គម្រោងទ្រទ្រង់វិស័យសុខាភិបាលទី២ របស់ក្រសួងសុខាភិបាល បង្ហាញថា ត្បិតតែមានភាពជឿនលឿនគួរឲ្យភ្ញាក់ផ្អើលក្នុងវិស័យសុខាភិបាលក៏ដោយ ក៏នៅមានបញ្ហាប្រឈមជាច្រើនលេចឡើង។ ស្ថានភាពសុខភាពនៃប្រជាពលរដ្ឋនៅតែអន់ជាងប្រទេសថៃ ភូមា និងឥណ្ឌូនេស៊ី។ បញ្ហាប្រឈមនៅមាន ជាពិសេសទាក់ទងនឹងអត្រាមរណភាពមាតា មិនសូវមានភាពជឿនលឿនក្នុងការកាត់បន្ថយកង្វះអាហារូបត្ថម្ភ គុណភាព និងតម្លៃនៃការថែទាំ និងទាក់ទងវិសមធម៌ ឬភាពទទួលបានមិនស្មើគ្នានៃលទ្ធភាពទទួលយកសេវាសុខភាព។ ចំពោះលទ្ធភាពទទួលសេវានៅមានកម្រិត និងគុណភាពនៅអន់ នាំឲ្យសមាមាត្រនៃអ្នកដែលប្រើប្រាស់សេវាសុខភាព ដែលផ្តល់ដោយរដ្ឋាភិបាល នៅមានកម្រិតទាប គឺមានតែ ១៧ភាគនៃអ្នកដែលធ្លាក់ខ្លួនឈឺប៉ុណ្ណោះ ដែលប្រើសេវាសុខភាពដែលពឹងផ្អែកលើប្រព័ន្ធរដ្ឋាភិបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។