ក្រសួង​សុខាភិបាល​ទើប​ព្រមាន​អំពី​គ្រោះ​ថ្នាក់ឆ្លង​ជំងឺកូវីដ-១៩ តាម​ចំណី​អាហារ

ដោយ អាស៊ីសេរី
2021-07-27
Share
ក្រសួង​សុខាភិបាល​ទើប​ព្រមាន​អំពី​គ្រោះ​ថ្នាក់ឆ្លង​ជំងឺកូវីដ-១៩ តាម​ចំណី​អាហារ ក្រសួង​សុខាភិបាល​​ព្រមាន​អំពី​គ្រោះ​ថ្នាក់ឆ្លង​ជំងឺកូវីដ-១៩ តាម​រយៈចំណី​អាហារកកៗ​ កាលពីថ្ងៃទី២៤ ខែកក្កដា ឆ្នាំ២០២១។
រូប៖ ក្រសួងសុខាភិបាល

ក្រសួង​សុខាភិបាល ទើបចេញ​សេចក្តីព្រមាន​អំពី​គ្រោះថ្នាក់​នៃការ​ឆ្លងជំងឺកូវីដ-១៩ តាម​ចំណី​អាហារ ក្រោយការ​ផ្ទុះរីករាល​ដាល​នៃ​ជំងឺកូវីដ-១៩ កើតឡើង​ជាង​មួយ​ឆ្នាំ​មក​ហើយ។

ក្រសួង​សុខាភិបាល តាមរយៈ​អ្នកនាំពាក្យ​ក្រសួង​សុខាភិបាលអ្នកស្រី ឱ វណ្ណឌីន កាលពីថ្ងៃទី២៤ ខែកក្កដា ចេញ​សេចក្តី​ជូនដំណឹង​មួយដោយព្រមាន​ថា មេរោគ​នៃជំងឺ​កូវីដ-១៩​ អាច​រស់​នៅ​លើ​ចំណី​អាហារ ឬ​អាហារ​វេចខ្ចប់​ជាពិសេស​អាហារ​កកៗ។ ក្រសួង​សុខាភិបាលបន្ថែម​ថា បុគ្គល​អាច​មិន​ឆ្លង​ជំងឺ​កូវីដ-១៩ ពី​ចំណី​អាហារ​ទាំង​នោះ ប្រសិន​បើ​អនុវត្ត​វិធានការ​អនាម័យ​ចំណី​អាហារឲ្យ​បាន​ជាប់​ជានិច្ច។

ក្រសួង​ដដែល​អះអាង​ទៀត​ថា មេរោគ​នៃ​ជំងឺកូវីដ-១៩ អាច​រស់​រហូត​ដល់ ៧២ ម៉ោង​នៅ​លើ​ផ្ទៃ​ប្លាស្ទិក ២៤​ម៉ោងនៅលើ​ផ្ទៃក្រដាស​កាតុង​ធ្វើ​កេស និង ៤ម៉ោង​នៅលើផ្ទៃ​ដែកអ៊ីណុក ឬស្ព័ន។

ក្នុង​ន័យ​នេះ ក្រសួង​ណែនាំ ឲ្យអ្នក​ផលិត និង​អ្នក​វេចខ្ចប់​ចំណី​អាហារ​ និង​អតិថិជន ត្រូវ​លាង​សម្អាត​បន្លែ ឬផ្លែឈើ ជាមួយ​ទឹក​ស្អាតឲ្យបាន​ត្រឹមត្រូវ មុន​ទទួល​ទាន។ ជាងនេះ​ទៅ​ទៀត ទាំង​អតិថិជន​ និង​បុគ្គលិក និង​អ្នកលក់ដូរ​ ត្រូវ​យកចិត្តទុកដាក់​ខ្ពស់​លើ​ម្ហូប​អាហារ​កក សាច់​កក អាហារ​ស្រស់ និង​បន្លែ​ផ្លែ​ឈើ​ជា​ដើម ដោយត្រូវ​ប្រញាប់ និង​ឧស្សាហ៍លាង​សម្អាត​ដៃជានិច្ច​ ក្រោយ​ប៉ះពាល់ ឬ​ចាប់​កាន់​អាហារ​ឆៅ អាហារ​ស្រស់ទាំង​អស់​នោះ។ ជា​មួយ​គ្នា​នេះដែរ ក្រសួង​ណែនាំ​ពលរដ្ឋ ឲ្យ​លាង​សម្អាត​ឲ្យ​ស្អាត​ជានិច្ច ដោយ​លាង​ជាមួយសាប៊ូ និង​ទឹកស្អាត ឬជូត​សម្អាត​វត្ថុ និង​ផ្ទៃនានា​ ដែល​សង្ស័យថា​មានប្រឡាក់។

ផ្ទុយ​ពី​ការ​អះអាង​របស់​ក្រសួងសុខាភិបាល​កម្ពុជា អំពីលទ្ធភាព​នៃ​ការ​ចម្លង​ជំងឺកូវីដ-១៩ តាម​រយៈ​ចំណី​អាហារ​នេះ អង្គការ​សុខភាព​ពិភពលោក (WHO) ថា​គ្មាន​ភ័ស្តុតាង​ណា ដែល​បញ្ជាក់​ថា​អ្នក​ជំងឺ​កូវីដ-១៩ ឆ្លង​ជំងឺ​នេះ តាមរយៈ​ចំណី​អាហារ​កកៗ ឬ​ផ្លែឈើ និង​បន្លែស្រស់​នោះ​ឡើយ។ ជាមួយ​គ្នា​នេះ​ដែរ មជ្ឈមណ្ឌល​ត្រួត​ពិនិត្យ​ជំងឺ​ឆ្លង​របស់​សហរដ្ឋអាមេរិក (CDC) ថា​គ្រោះ​ថ្នាក់​នៃការ​ឆ្លង​ជំងឺកូវីដ-១៩ តាម​រយៈការ​ហូប​អាហារ ឬ​ប៉ះពាល់​អាហារ ដូចជា​អាហារ​កកៗ​ ឬ​ប៉ះពាល់​កញ្ចប់​អាហារ គឺ​មាន​កម្រិត​តិច​តួច​ខ្លាំង​ណាស់។

ប៉ុន្តែ ស្ថាប័ន​សុខាភិបាល​ពិភពលោក និង​សហរដ្ឋអាមេរិក​នេះលើកទឹក​ចិត្ត​ឲ្យ​ប្រជាពលរដ្ឋ​ទាំង​អស់ ប្រកាន់​គោលការណ៍​អនាម័យ​ចំណី​អាហារ ដើម្បី​សុវត្ថិភាព​សុខភាព​ទូទៅ។

ចំណែក​ឯ​មន្រ្តី​តំណាងអង្គការសុខភាព​ពិភពលោក​នៅ​កម្ពុជា​ឯណោះ​វិញ គឺអ្នកស្រី លី អៃឡែន (Li Ailan) អ្នកស្រី​ថា មាន​បញ្ហា​ប្រឈមយ៉ាង​ដែល​លំបាក​ខ្លាំង ក្នុងការ​ប្រយុទ្ធប្រឆាំង​ជំងឺកូវីដ-១៩ ដោយ​មិន​មាន​បញ្ចូល​បញ្ហា​ចំណីអាហារ​នេះទេ។ កត្តា​ឆ្លច្រើន គឺទី១. បណ្តាលមក​ពី​មេរោគ​បំប្លែង​ថ្មី ទី២.ការ​ចម្លង​ក្នុង​សហគមន៍​ដែល​មើល​មិន​ឃើញ ទី៣. ការ​នឿយ​ណាយ និង​ភាព​ព្រងើយ​កន្តើយ​នឹង​ជំងឺកូវីដ-១៩ ទី៤.ការ​មិន​គោរព​ឲ្យ​បាន​ខ្ជាប់ខ្ជួន​តាម​វិធានការ​រដ្ឋបាល និង​សុខាភិបាល និងទី ៥. គឺ​ការ​ជឿ និង​សង្ឃឹម​លើ​វ៉ាក់សាំង​បង្ការ​ជំងឺ​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល