ពលការិនី​​ឆ្លង​ជំងឺ​កូវីដ-១៩ នៅ​ម៉ាឡេស៊ី សុំ​ស្ថានទូត​ខ្មែរ​ឱ្យ​​ជួយ​អន្តរាគមន៍​ថ្លៃ​ព្យាបាល​នៅ​មន្ទីរ​ពេទ្យ

ដោយ ឡេង ម៉ាលី
2021-09-20
Share
ពលការិនី​​ឆ្លង​ជំងឺ​កូវីដ-១៩ នៅ​ម៉ាឡេស៊ី សុំ​ស្ថានទូត​ខ្មែរ​ឱ្យ​​ជួយ​អន្តរាគមន៍​ថ្លៃ​ព្យាបាល​នៅ​មន្ទីរ​ពេទ្យ ពលការិនី​ឆ្លង​ជំងឺ​កូវី១៩ ឈ្មោះ គ្រី ម៉ាស នៅ​បន្ទាប់​សង្គ្រោះ​បន្ទាន់ រដ្ឋយូហូ (Johor) ប្រទេស​ម៉ាឡេស៊ី នៅ​ថ្ងៃ​ទី១៩ ខែកញ្ញា ឆ្នាំ២០២១។
រូប៖ ប្ដី​អ្នក​ជំងឺ គឺ​លោក យ៉ាន ណារី

គ្រួសារ​ពលការិនី​ដែល​ឆ្លង​ជំងឺ​កូវីដ-១៩ នៅ​ប្រទេស​ម៉ាឡេស៊ី ស្នើ​ស្ថានទូត​ខ្មែរ​ជួយ​អន្តរាគមន៍ ឬ​សម្រប​សម្រួល​តម្លៃ​ព្យាបាល​ជំងឺ​កូវីដ-១៩ របស់​មន្ទីរពេទ្យ ដោយ​សារ​ពួក​គាត់ ពុំ​មាន​លទ្ធភាព និង​កំពុង​ជួប​ការ​លំបាក​ក្នុង​ជីវភាព។ ចំណែក​មន្ត្រី​កិច្ច​ការ​កុង​បញ្ជាក់​ថា ស្ថានទូត​ពុំ​មាន​លទ្ធភាព​ឆ្លើយ​តប​តាម​សំណើ​របស់​ពលករ​ទេ។ មន្ត្រី​​​សង្គម​ស៊ីវិល​ទទូច​ឱ្យ​រដ្ឋាភិបាល​កម្ពុជា​តាម​រយៈ​ស្ថានទូត​គួរ​យក​បញ្ហា​របស់​ពលករ​ខ្មែរ​ជជែក​ជា​មួយ​រដ្ឋាភិបាល​ម៉ាឡេស៊ី និង​រក​ដំណោះ​ស្រាយ​និង​ឆ្លើយ​តប​បន្ទាន់​ជុំវិញ​រឿង​នេះ។

គ្រួសារ​ពលរដ្ឋ​ខ្មែរ​ធ្វើ​នៅ​ប្រទេស​ម៉ាឡេស៊ី​មួយ បាន​ឆ្លង​ជំងឺ​កូវីដ-១៩ ដែល​កំពុង​សង្គ្រោះ​បន្ទាន់​នៅ​មន្ទីរ​ពេទ្យ​រដ្ឋ​មួយ​នៅ​រដ្ឋ​យូហូ (Johor) ប៉ុន្តែ​គ្មាន​ប្រាក់បង់​ថ្លៃ​ព្យាបាល។

កម្មករ​សំណង់​មាន​ស្រុក​កំណើត​ត្បូង​ឃ្មុំ លោក យ៉ាន ណារី រៀប​រាប់​ប្រាប់​អាស៊ី​សេរី​នៅ​ថ្ងៃ​ទី២០ កញ្ញា​ថា ដំបូង​ឡើយ​ប្រពន្ធ​លោក ឈ្មោះ គ្រីម៉ាស អាយុ ២៥ឆ្នាំ ដែល​មាន​ផ្ទៃ​ពោះ​ប្រាំ ៨ខែ​បាន​បញ្ជូន​ទៅ​ពិនិត្យ និង​ព្យាបាល​នៅ​មន្ទីរ​ពេទ្យ​នៅ​ថ្ងៃ​ទី១៦ ខែកញ្ញា ដោយ​សារ​មាន​អាការៈ​ក្ដៅ​ខ្លួន។ លោក​បន្ត​ថា គ្រូពេទ្យ​ធ្វើ​តេស្ត​រក​ឃើញ​ថា​ប្រពន្ធ​របស់​លោក​ឆ្លង​ជំងឺ​កូវីដ-១៩ ហើយ​ភ្លាមៗ នោះ​ខាង​មន្ទីរ​ពេទ្យ​បាន​អនុញ្ញាត​ឱ្យ​ប្រពន្ធ​លោក​សម្រាក​ព្យាបាល តែ​មន្ទីរពេទ្យ​តម្រូវ​ឱ្យ​លោក​កក់​ប្រាក់​ចំនួន​៧.០០០រីងហ្គីត (Ringgit) ឬ​ស្មើ​ប្រមាណ ១.៧៥០ដុល្លារ​អាមេរិក។

លោក យ៉ាន ណារី ត្អូញត្អែរ​ថា លោក​គ្មាន​ប្រាក់​សម្រាប់​បង់​ឱ្យ​មន្ទីរ​ពេទ្យ​នោះ​ទេ ព្រោះ​ស្ថានភាព​រីក​រាល​ដាល​ជំងឺ​កូវីដ-១៩ គ្រួសារ​លោក​បាត់​បង់​ការងារ និង​គ្មាន​ប្រាក់​ចំណូល​ដោយ​កំពុង​រស់​នៅ​ទាំង​ត្រដាបត្រដួស។ បុរស​វ័យ​៣៧ឆ្នាំ​រូប​នេះ ថា​លោក​មិន​ដឹង​ទៅ​ពាក់​ស្ថាប័ន​ខាង​ណា​ដើម្បី​ដោះ​ស្រាយ​បញ្ហា​នេះ​ទេ ខណៈ​ប្រពន្ធ​របស់​លោក​កំពុង​ដាក់​អុកស៊ីហ្សែន នៅ​ក្នុង​បន្ទប់​សង្គ្រោះ​បន្ទាន់ (ICU) ដោយ​គ្រូពេទ្យ​បញ្ជាក់​ថា​អ្នក​ជំងឺ​មាន​សង្ឃឹម​ត្រឹម ៥០ភាគ ហើយ​ប្រសិន​បើ​អាការៈ​មិន​ថមថយ គ្រូពេទ្យ​នឹង​វះកាត់​សង្គ្រោះ​កូន​បន្ទាន់៖ «យើង​អត់​លុយ​ប្រពន្ធ​ធ្លាក់​ខ្លួន​ឈឺ​អត់​បាន​ធ្វើ​ការ​អី ពិបាក​ប្រទេស​គេ​មិន​ដូច​ប្រទេស​យើង​ណា ជន​ជាតិ​គេ​អត់​គេ​លុយ​អត់​គិត​អី​ទេ​ថ្លៃ​ពេល​ឈឺ​ថ្កាត់​ពេល​ចូល​សង្គ្រោះ​បន្ទាន់​អី យើង​ជន​ជាតិ​អន្តោប្រវេសន៍​គេ​គិតលុយ​ជា​មួយ​យើង ពលរដ្ឋ​នៅ​ម៉ាឡេ​ជួយ​យក​ចិត្ត​ទុក​ដាក់​ពួក​គាត់​ផង អ្នក​ធ្វើ​ការ​នៅ​ទីនេះ​មិន​មែន​អ្នក​មាន​លុយ​ទាំង​អស់​នោះ​ទេ»

ឆ្លើយ​តប​ជុំវិញ​រឿង​នេះ មន្ត្រី​កិច្ច​ការ​កុងស៊ុល​នៃ​ស្ថានទូត​ខ្មែរ​ប្រចាំ​ប្រទេស​ម៉ាឡេស៊ី ដែល​សុំ​មិន​បញ្ចេញ​ឈ្មោះ​ប្រាប់​អាស៊ី​សេរី​ថា ខាង​ស្ថានទូត​ពុំ​មាន​លទ្ធភាព​ជួយ​អន្តរាគមន៍​ទៅ​រដ្ឋាភិបាល​ម៉ាឡេ ឬ​បង់​ថ្លៃ​សេវា​ព្យាបាល​ជំងឺ​កូវីដ-១៩ តប​តាម​សំណើ​របស់​ពលករ​នោះ​ទេ។ លោក​ទទួល​ស្គាល់​ថា ករណី​នេះ តែងតែ​កើត​លើ​ពលករ​ខ្មែរ​ដែល​ធ្វើការ​នៅ​ប្រទេស​ម៉ាឡេស៊ី។ មន្ត្រី​រូប​នេះ​មិន​បាន​ផ្តល់​ដំណោះ​ស្រាយ​បែប​ណា​ទេ ដោយ​លោក​រុញ​ឱ្យ​សួរ​មន្ត្រី​ស្ថាន​ទូត​ទទួល​បន្ទុក​ពលករ​វិញ៖ «នៅ​ម៉ាឡេ​ខាង​ពេល​ខ្លះ​ស្ថានទូត​ក៏​អត់​បាន​ដឹង​ដែរ ទាល់​តែ​ខាង​មន្ទីរ​ពេទ្យ​គេ​ទំនាក់​ទំនង​មក​ថា​ពលករ​មក​ព្យាបាល​ជំងឺ​គ្មាន​លុយ​កាក់​ទេ​ឱ្យ​ខាង​ស្ថាន​ទូត​ជួយ​ចេញ ស្ថាន​ទូត​មាន​លុយ​ឯណា​ចេញ មាន​តែ​រក​សប្បុរស​ជន សប្បុរសធម៌​ដែរ​ហ្នឹង ករណី​អ៊ីចឹង​ច្រើន​ហើយ»

វិទ្យុ​អាស៊ី​សេរី មិន​អាច​ទាក់ទង​អ្នក​នាំ​ពាក្យ​ក្រសួង​ការ​បរទេស និង​សហប្រតិបត្តិការ​អន្តរជាតិ លោក កុយ គួង និង​មន្ត្រី​ទទួល​បន្ទុក​កិច្ចការ​ពលករ​ស្ថានទូត ដើម្បី​សុំ​ការ​ឆ្លើយ​តប​បន្ថែម​ជុំ​វិញ​រឿង​នេះ បាន​ទេ នៅ​ថ្ងៃ​ទី២០ កញ្ញា ។

ជុំវិញ​​រឿង​​នេះ​​មន្ត្រី​​​អង្គការ​​​សង់ត្រាល់ (Central) ទទួល​បន្ទុក​សិទ្ធិ​ការងារ លោក ឌី ថេហូយ៉ា មាន​ប្រសាសន៍​ថា ការ​ទប់​ស្កាត់​ជំងឺ​កូវីដ-១៩ គឺ​បញ្ហា​សកល ទោះ​បី​ពលករ​ខ្មែរ​ធ្វើការ​ស្រប​ច្បាប់ ឬ​ខុស​ច្បាប់​ក៏​ដោយ​ពួក​គេ​ត្រូវ​ទទួល​បាន​សេវា​ព្យាបាល​ជំងឺ​កូវីដ-១៩ ពី​ប្រទេស​ទាំង​នោះ​ដោយ​ឥត​គិត​ថ្លៃ និង​គ្មាន​ការ​រើស​អើង​ជាតិ​សាសន៍។ លោក​យល់​ថា ប្រសិន​មន្ត្រី​សុខាភិបាល​ម៉ាឡេស៊ី​តម្រូវ​ឱ្យ​ពលករ​បង់​ថ្លៃ​សេវា​ព្យាបាល គឺ​ជា​អំពី​អមនុស្ស​ធម៌ និង​រំលោភ​សិទ្ធិ​មនុស្ស​ធ្ងន់ធ្ងរ ដែល​ផ្ទុយ​ពី​គោលការណ៍​អង្គការ​សុខភាព​ពិភពលោក។ លោក​សង្កេត​ឃើញ​ថា​ពលករ​ខ្មែរ​ធ្វើ​ការ​នៅ​ក្រៅ​ប្រទេស​នេះ ពុំ​សូវ​ទទួល​បាន​កិច្ច​អន្តរាគមន៍​ពី​ស្ថានទូត​ខ្មែរ​នោះ​ទេ ហើយ​លោក​លើក​ទឹក​ចិត្ត​ដល់​ពួក​គេ​ត្រូវ​ហ៊ាន​បង្ហាញ​ទុក្ខ​កង្វល់​របស់​ខ្លួន​នៅ​លើ​បណ្ដាញ​សង្គម​ដើម្បី​ជំរុញ​រដ្ឋាភិបាល​ឱ្យ​ឆ្លើយ​តប​បន្ទាន់​អំពី​បញ្ហា​ទាំង​អស់​នេះ៖ «ខ្ញុំ​គិត​ថា​ស្ថាន​ទូត​ត្រូវ​ដើរ​តួនាទី​របស់​ខ្លួន​ឱ្យ​បាន​ពេញលេញ​ពាក់​ព័ន្ធ​ការ​ការ​ពារ​ផល​ប្រយោជន៍​របស់​ប្រជា​ពលរដ្ឋ អ៊ីចឹង​ប្រសិន​បើ​ប្រជា​ពលរដ្ឋ​មាន​បញ្ហា កាតព្វកិច្ច​របស់​ហើយ​រដ្ឋ​តំណាង​ស្ថាន​ទូត ស្ថាន​កុងស៊ុល​ហ្នឹង​ហើយ​ដែល​ជា​អាណា​ព្យាបាល​ជា​អ្នក​បម្រើ​សេវា​កម្ម អ៊ីចឹង​ត្រូវ​តែ​សម្រប​សម្រួល​គាត់​ឱ្យ​បាន​ការ​ព្យាបាល​សមស្រប​ត្រឹម​ត្រូវ​ឱ្យ​ស្មើ​មុខ​ស្មើ​មាត់​នឹង​គេ»

ចាប់​តាំង​ពី​ការ​រីក​រាល​ដាល​ជំងឺ​កូវីដ-១៩ កម្មករ​ខ្មែរ​ដែល​ធ្វើ​ការ​នៅ​ក្រៅ​ប្រទេស​ប្រឈម​បញ្ហា​អស់​សុពលភាព​ឯកសារ​ស្រប​ច្បាប់ ការ​គំរាម​កំហែង​ផ្លូវ​ច្បាប់ កេង​ប្រវ័ញ្ច​កម្លាំង​ពល​កម្ម បាត់​បង់​ការ​ងារ និង​មិន​បាន​យក​ចិត្ត​ទុក​ដាក់​ត្រឹម​ត្រូវ​ផ្នែក​សុខាភិបាល​នោះ​ទេ អំឡុង​ពេល​អាជ្ញាធរ​ប្រទេស​ម៉ាឡេស៊ី​ដែល​ពួក​គេ​ធ្វើ​ការ​អនុវត្ត​វិធានការ​ទប់​ស្កាត់​ជំងឺ​កូវីដ-១៩។

អាជ្ញាធរ​ម៉ាឡេស៊ី​បន្ត​បិទ​ខ្ទប់​ប្រទេស​នេះ​រយៈ​ពេល​ជិត ៥ខែ​មក​ហើយ ដើម្បី​ទប់​ស្កាត់​ការ​រាតត្បាត​ជំងឺ​កូវីដ-១៩។ មន្ត្រី​ស្ថាន​ទូត​ខ្មែរ​ប្រចាំ​ប្រទេស​ម៉ាឡេស៊ី​បញ្ជាក់​ថា គិត​ត្រឹម​ខែ​សីហា​មាន​ពលរដ្ឋ​ខ្មែរ​ចំនួន​៦នាក់​ស្លាប់​ដោយ​សារ​ជំងឺ​កូវីដ-១៩ ដែល​សាច់​ញាតិ​មក​បំពេញ​ឯក​សារ​នៅ​ស្ថាន​ទូត។

របាយការណ៍​របស់​អង្គការ​សង់ត្រាល់​បង្ហាញ​ថា គិត​ត្រឹម​ឆ្នាំ២០២០ ពលករ​ខ្មែរ​ស្រប​ច្បាប់ និង​ពលករ​ខុស​ច្បាប់ មាន​ចំនួន​ប្រមាណ​ជាង ១០ម៉ឺន​នាក់ (១០០.០០០) កំពុង​ធ្វើ​ការ​នៅ​ក្នុង​ប្រទេស​ម៉ាឡេស៊ី៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល