ក្រសួងព័ត៌មាន ឲ្យបញ្ឈប់ការផ្សាយពាណិជ្ជកម្មគ្រឿងស្រវឹង នៅថ្ងៃវិសាខបូជា និងមាឃបូជា
2019.05.03
ផ្ទាំងផ្សព្វផ្សាយស្រាបៀរ GANZBERG ដ៏ធំ ត្រូវបានគេដាក់ផ្សាយនៅតាមបណ្ដោយមហាវិថីមួយ ក្នុងរាជធានីភ្នំពេញ។
រូប៖ RFA
ក្រសួងព័ត៌មានបញ្ជាឲ្យប្រព័ន្ធផ្សព្វផ្សាយទាំងអស់ ផ្អាកផ្សាយពាណិជ្ជកម្មផលិតផលគ្រឿងស្រវឹង នៅថ្ងៃវិសាខបូជា និងមាឃបូជា រៀងរាល់ឆ្នាំ ចាប់ពីពេលនេះទៅ។
លិខិតរបស់ក្រសួងព័ត៌មាន ចេញផ្សាយថ្ងៃទី៣០ មេសា ដែលអាស៊ីសេរីទទួលបាននៅថ្ងៃទី២ ឧសភា រដ្ឋមន្ត្រី ខៀវ កាញារីទ្ធ បញ្ជាក់ថា ការហាមផ្សាយពាណិជ្ជកម្មគ្រឿងស្រវឹង នៅថ្ងៃបុណ្យជាតិទាំង២ នេះ ដើម្បីលើកស្ទួយវិស័យព្រះពុទ្ធសាសនា។ លោកថា ចំពោះការហាមផ្សាយពាណិជ្ជកម្មនៅថ្ងៃវិសាខបូជា ដោយសារចង់រំលឹកដល់ព្រឹត្តិការណ៍ ប្រសូត ត្រាស់ដឹង និងចូលបរិនិព្វានរបស់ព្រះពុទ្ធ។ ចំណែកថ្ងៃមាឃបូជា គឺរំលឹកដល់ព្រឹត្តិការណ៍ ព្រះពុទ្ធប្រកាសបង្កើតសាសនា ក្រោយពេលព្រះអង្គត្រាស់ដឹង។ លោក ខៀវ កាញារីទ្ធ មិនបានកំណត់ទោសទណ្ឌ ឬ ពិន័យ ចំពោះប្រព័ន្ធផ្សព្វផ្សាយទេ ដោយគ្រាន់តែស្នើសុំឲ្យម្ចាស់ប្រព័ន្ធផ្សព្វផ្សាយទាំងអស់ អនុវត្តបម្រាមនេះ ឲ្យមានប្រសិទ្ធិភាព។
ព្រះតេជគុណ សឺង សេងហុង គង់នៅវត្តពិភទ្ទរង្សី នៅរាជធានីភ្នំពេញ មានថេរដីកាថា វិធានការក្រសួង ជាការល្អទាំងសម្រាប់សាសនា និងសង្គម។ ព្រះអង្គបន្តថា ក្នុងបញ្ញត្តិព្រះសម្មាសម្ពុទ្ធ ឲ្យវៀរចាក គ្រឿងស្រវឹង ចែងក្នុងសីល៥ គឺត្រង់សុរា។ ព្រះអង្គ យល់ថា ក្រៅពីផ្អាកការផ្សាយពាណិជ្ជកម្មគ្រឿងស្រវឹង ក្រសួងព័ត៌មានគួរជំរុញប្រព័ន្ធផ្សព្វផ្សាយឱ្យបន្ថែមការផ្សាយពីព្រឹត្តិការណ៍ពិសាខបូជា និងមាឃបូជាឲ្យទូលំទូលាយបន្ថែមទៀត។
ចំណែកប្រធានស្ដីទីសហព័ន្ធនិស្សិត បញ្ញវន្តកម្ពុជា លោក អែម ប៉ុណ្ណារិទ្ធិ យល់ថា ការហាមប្រាមចាក់ផ្សាយពាណិជ្ជកម្មគ្រឿងស្រវឹង មិនទាន់គ្រប់គ្រាន់ទេ។ លោក ចង់ឃើញ បម្រាបលក់គ្រឿងស្រវឹង ក្នុងថ្ងៃបុណ្យសាសនាទាំងពីរ និងការកាត់បន្ថយការ ផ្សាយពាណិជ្ជកម្ម ផលិតផលគ្រឿងស្រវឹង ឲ្យបានច្រើនជាងនេះ។
តំណាងសង្គមស៊ីវិលរូបនេះ សង្កេតឃើញថា កន្លងមកបម្រាម របស់អាជ្ញាធរ ជុំវិញការផ្សាយពាណិជ្ជកម្មគ្រឿងស្រវឹង មិនទាន់មានប្រសិទ្ធិភាពទេ។ លោកជំរុញឲ្យអាជ្ញាធរ រឹតបន្តឹងវិធានការអនុវត្តច្បាប់ គ្រឿងស្រវឹង និងត្រូវដំឡើងពន្ធ លើការផ្សាយពាណិជ្ជកម្មផលិតផលគ្រឿងស្រវឹងឲ្យបានមានកម្រិតខ្ពស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ថេង សាវឿន និងសហការីសរសេរលិខិតសុំទោសលោក ហ៊ុន សែនដើម្បីរួចពីការឃុំខ្លួន
- ហេតុអ្វីលោក ឡេង ណាវ៉ាត្រា និងអតិថិជនមិនប្រើប្រាស់តុលាការដោះស្រាយវិវាទបែរជាវាយប្រហារគ្នាតាមបណ្ដាញសង្គម?
- លោក ហ៊ុន សែន ផ្ដល់មរតកនយោបាយកំសាកដល់លោក ហ៊ុន ម៉ាណែត ជាបន្តបន្ទាប់
- កម្មករត្រូវបានបង្ខំឱ្យទៅស្ដាប់លោក ហ៊ុន សែន និយាយ
- អាមេរិកនិងប្រទេសប្រជាធិបតេយ្យធំៗព្រមានកម្ពុជាក្រោយផាត់ភ្លើងទៀនចេញពីការបោះឆ្នោត