រដ្ឋបាល​ខេត្ត​ក្រចេះ បិទ​ទីប្រជុំជន​ផ្សារ​កាបី​បណ្តោះ​អាសន្ន ដោយ​សារ​កូវីដ១៩

ដោយ អាស៊ីសេរី
2021-07-13
Share
រដ្ឋបាល​ខេត្ត​ក្រចេះ បិទ​ទីប្រជុំជន​ផ្សារ​កាបី​បណ្តោះ​អាសន្ន ដោយ​សារ​កូវីដ១៩ លោក សាម ណាល់ អភិបាលស្រុកស្នួល បានដឹកនាំកម្លាំងគណៈបញ្ជាការឯកភាពស្រុក ចុះបិទខ្ទប់ទីតាំងទីប្រជុំជនផ្សារកាបី (K3) ស្ថិតនៅស្រុកស្នួលខេត្តក្រចេះ កាលពីថ្ងៃទី១៣ ខែកក្កដា បន្ទាប់ពីរកឃើញប្រជាពលរដ្ឋមានផ្ទុកវីរុសកូវីដ១៩ ចំនួន១៥នាក់។
រូប៖ រដ្ឋបាលស្រុកស្នួល។

រដ្ឋបាលខេត្ត​ក្រចេះ ប្រកាស​បិទខ្ទប់​ទីតាំងទី​ប្រជុំជន​ផ្សារកាបី​ (K3) ជា​បណ្ដោះ​អាសន្ន ​ក្រោយ​ពី​មាន​ករណី​វិជ្ជមាន​កូវីដ១៩ ជាច្រើន​នាក់ ចាប់ពីថ្ងៃទី១៣ ខែកក្កដា រហូតដល់​មាន​សេចក្ដីសម្រេច​ជាថ្មី

ទន្ទឹម​នឹង​ការ​បិទខ្ទប់​នេះ រដ្ឋបាល​ខេត្តក្រចេះ ក៏នឹង​ស្រាវជ្រាវ​រក​អ្នក​ពាក់ព័ន្ធ​ដោយ​ផ្ទាល់ ​ឬ​ដោយ​ប្រយោល​ដើម្បី​ធ្វើចត្តាឡីស័ក និង​យក​សំណាក​ទៅ​ពិនិត្យ​រកមេរោគ​កូវីដ១៩

បន្ថែមពី​នេះ ចំពោះ​ប្រជាពលរដ្ឋ​ដែល​ធ្លាប់ ចេញចូល​និង​មាន​ការ​ពាក់ព័ន្ធ​ដោយ​ផ្ទាល់ ​ឬ​ប្រយោល​ក្នុង​ទីតាំង​ខាងលើ ត្រូវមក​តាមដានសុខភាព​របស់​ខ្លួនជា​ប្រចាំ ករណី​មាន​រោគសញ្ញាផ្ដាសាយ ក្អក ហៀសំបោរ ឈឺបំពងក និងថប់ដង្ហើម និងមានរោគសញ្ញាផ្សេងៗ ត្រូវមក​ជួប​ក្រុម​គ្រូពេទ្យ នៅ​តាម​មណ្ឌល​សុខភាព

ចំណែក​រដ្ឋបាល​ខេត្តកំពង់ឆ្នាំង ក៏បាន​សម្រេច​បិទ​ជា​បណ្តោះ​អាសន្ន​ផ្សារលើ​ ក្នុង​ភូមិសាស្រ្ត​ភូមិ​ត្រពាំងបី សង្កាត់​ផ្សារឆ្នាំង ក្រុងកំពង់ឆ្នាំង ចាប់ពីថ្ងៃទី១០ ខែកក្កដា រហូត​ដល់​មាន​សេចក្តីជូន​ដំណឹង​ជាថ្មីអភិបាល​ខេត្តឲ្យដឹង​ថា ការបិទ​ខ្ទប់​នេះ ដើម្បីទប់ស្កាត់​ការឆ្លង​រាលដាល​ជំងឺ​កូវីដ១៩ បន្ទាប់​ពីបាន​រកឃើញ​អ្នកឆ្លង​វិជ្ជមាន​កូវីដ១៩ ធ្លាប់​បាន​ចេញ​ចូលទី​តាំង​ខាងលើ


ដោយឡែក​នៅ​ក្រុងភ្នំពេញ​ឯណេះវិញ​ រដ្ឋបាលរាជធានី​ភ្នំពេញ បានប្រកាស​ផ្អាកជា​បណ្ដោះ​អាសន្ន ចំពោះ​សកម្មភាព​ការងារ មុខរបរ និងអាជីវកម្ម ដែល​មាន​ហានិភ័យ​ខ្ពស់​នៃការ​ឆ្លងរាល​ដាល​ជំងឺ​កូវីដ​១៩ និង​ការ​ប្រមូល​ផ្ដុំមនុស្ស​ជា​លក្ខណៈឯកជន ក្នុង​ភូមិសាស្ដ្រ​រាជធានី​ភ្នំពេញ ចាប់ពី​ថ្ងៃទី១០​ ខែកក្កដា រហូត​ដល់ថ្ងៃទី២៣ ខែកក្កដា ខាងមុខ។

ទីកន្លែង​ដែល​ត្រូវ​បិទ​ទាំង​នោះ រួមមាន សាលារៀន សាលា​បណ្ដុះបណ្ដាលវិជ្ជាជីវៈ ទាំង​រដ្ឋ​និង​ឯកជន​ អាជីវកម្ម​ក្លឹបកម្សាន្ដ គ្រប់​ប្រភេទ ដូចជា ខារ៉ាអូខេ រង្គសាល ឌីស្កូតែក បៀហ្គាឌីន កាស៊ីណូ អាជីវកម្ម​ម៉ាស្សា រមណីយដ្ឋាន សារមន្ទីរ និងសួនកម្សាន្ដនានា។ ចំណែក​រោងភាពយន្ដ រោង​សម្ដែង​សិល្បៈ ក្លឹបហាត់​ប្រាណ និង​មជ្ឈមណ្ឌល​កីឡាវិញ ក៏ត្រូវបិទ​បណ្តោះអាសន្ន​១៤ថ្ងៃផងដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល