សាច់ញាតិ​សព​អ្នក​​ជំងឺ​កូវីដ-១៩ បុគ្គលិក​​បម្រើ​​ការងារ​​នៅ​​ក្រុមហ៊ុន​​បន​ល្បែង​​ខេត្ត​ព្រះសីហនុ ប្ដឹង​​ក្រុមហ៊ុន​​ឲ្យ​​ទទួល​​ខុស​ត្រូវ​​ផ្ដល់​សំណង

ដោយ ខែ សុណង
2021-10-05
Share
សាច់ញាតិ​សព​អ្នក​​ជំងឺ​កូវីដ-១៩ បុគ្គលិក​​បម្រើ​​ការងារ​​នៅ​​ក្រុមហ៊ុន​​បន​ល្បែង​​ខេត្ត​ព្រះសីហនុ ប្ដឹង​​ក្រុមហ៊ុន​​ឲ្យ​​ទទួល​​ខុស​ត្រូវ​​ផ្ដល់​សំណង ក្រុមគ្រូពេទ្យបានដឹកសពកញ្ញា ហៀន ស្រីនិច បុគ្គលិក​កាស៊ីណូ​អនឡាញ ដឺសេនជូរី ចេញពីកាស៊ីណូដើម្បីយកទៅបូជាកាលពីថ្ងៃទី៣០ ខែកញ្ញា ឆ្នាំ២០២១។
រូប៖ ហ្វេសប៊ុក Sreypov Nalin

សាច់ញាតិ​សព​អ្នក​ជំងឺ​កូវីដ-១៩ ជា​បុគ្គលិក​បម្រើ​ការងារ​​នៅ​​កាស៊ីណូ​​អនឡាញ​(Online)​ដឺ​សេនជូរី ​ខេត្ត​ព្រះសីហនុ​រំពឹង​ថា​ ក្រុមហ៊ុន​​នេះ​នឹង​​ទូទាត់​​ប្រាក់​​អត្ថប្រយោជន៍​​តាម​​ច្បាប់​​ស្ដីពី​​ការងារ​​​ដល់​​​គ្រួសារ​​​សព។ ​ក្ដី​សង្ឃឹម​​នេះ ​បន្ទាប់​ពី​​គ្រួសារ​​ជនរងគ្រោះ និង​តំណាង​ក្រុមហ៊ុន​បាន​ជួប​គ្នាកាល​ពី​ថ្ងៃ​ទី៤ ខែតុលា ដោយ​មាន​​មន្ត្រី​​មន្ទីរ​​ការងារ​ជា​អ្នក​សម្របសម្រួល។ សហជីព និង​អ្នក​ច្បាប់ស្នើ​ឱ្យ​អាជ្ញាធរ​ពាក់ព័ន្ធ​ស៊ើបអង្កេត បនល្បែង​អនឡាញ​នេះ បន្ទាប់​ពី​បុគ្គលិក​លាតត្រដាង​​ព័ត៌មាន​ថា មាន​ករណី​រំលោភ​ច្បាប់ លួងលោម​ឱ្យ​បុគ្គលិក​ធ្វើការ​ទាំង​មាន​ជំងឺ​កូវីដ-១៩ និង​រហូត​ដល់​​បុគ្គលិក​ម្នាក់​បាន​ស្លាប់​ថែម​ទៀត។

សាច់ញាតិ​សព​អ្នក​​ជំងឺ​កូវីដ-១៩​ជា​​បុគ្គលិក​​បម្រើ​ការងារ​​នៅ​​កាស៊ីណូ​អនឡាញ​(Online)​ដឺសេនជូរី​(The Century)​​ខេត្ត​ព្រះសីហនុ​ កំពុង​​រង់ចាំ​​ការ​​ឆ្លើយតប​​ផ្ដល់​​សំណង​​ពី​​ភាគី​​ក្រុម​ហ៊ុន​ បន្ទាប់​​ពី​​បាន​​ដាក់​​ពាក្យ​​ប្ដឹង​​ទៅ​​មន្ទីរ​​ការងារ​​ឲ្យ​អន្តរាគមន៍​​ករណី​​នេះ។

ក្មួយ​ប្រុស​របស់​សពកញ្ញា ហៀន ស្រីនិច បុគ្គលិក​កាស៊ីណូ​អនឡាញ ដឺសេនជូរីលោក រស់ ឡេង ឲ្យ​ដឹង​ថា មន្ត្រី​មន្ទីរ​ការងារ​បាន​ទទួល​ពាក្យ​បណ្ដឹង​របស់​គ្រួសារ​សព កាល​ពី​ថ្ងៃ​ចន្ទ ទី​៤ ខែ​តុលា ដែល​ពួកគាត់​បាន​ប្ដឹង​ទាមទារ​ឲ្យ​ក្រុមហ៊ុន​កាស៊ីណូ​នេះ​ផ្ដល់​សំណង​ដល់​គ្រួសារ​សព ដែល​បាន​ឈឺ​ស្លាប់​ក្នុង​កន្លែង​បំពេញ​ការងារ។ លោក​ថា លោក​នឹង​ម្ដាយ​សពនៅ​ថ្ងៃ​ដដែល​នោះ ក៏​បាន​ជួប​ជាមួយ​តំណាង​ខាង​រដ្ឋបាល​ក្រុមហ៊ុន​តាម​វីដេអូ​ខល (video call) ដែល​មាន​ការ​សម្របសម្រួល​ពី​ប្រធាន​​មន្ទីរ​ការងារ​ជជែក​គ្នា​អំពី​ការ​ទាមទារ​នេះ។ ប៉ុន្តែ​លោក​ថា មិន​ទាន់​មាន​ការ​សន្យា ​ឬ​ ដំណោះស្រាយ​ណា​មួយ​ជាក់លាក់ ពី​ខាង​ក្រុមហ៊ុន​ថា ​យ៉ាង​ណា​នៅ​ឡើយ​ទេ៖ «ខ្ញុំ​រំពឹង​លើ​មន្ទីរ​ការងារ​ដែរ ព្រោះ​គេ​បាន​អះអាង​ច្បាស់លាស់​ថា នឹង​ផ្ដល់​មតិ​យោបល់​ឲ្យ​យើង​វិញ នៅ​ពេល​គេ​បាន​ព័ត៌មាន​ពី​ខាង​កាស៊ីណូ ពីព្រោះ​អី​សង្ឃឹម​ថា​ មាន​ដំណោះស្រាយ​ពី​ខាង​កាស៊ីណូ​ដែរ។ បើ​សម្រាប់​ខ្ញុំ​ៗគិត​ថា ​វា​ជា​រឿង​មិន​អាច​ទទួល​យក​បាន ប៉ុន្តែ​បើ​សិន​ជា​គេ​ឲ្យ​សំណង​ខ្លះ ហើយ​ខ្ញុំ​ក៏​សួរ​ទៅ​ខាង​យាយ​ជា​ម្ដាយ​របស់ ហៀន ស្រីនិច ហ្នឹង​ដែរ បើ​សិន​ជា​គាត់​អាច​ទទួល​យក​បាន​ខ្ញុំ​ក៏​អាច​ទទួល​យក​បាន​ដែរ ប៉ុន្តែ​បើ​មិន​អាច​ទទួល​យក​បាន​ខ្ញុំ​ក៏​មិន​អាច​ទទួល​យក​បាន​ដូច​គ្នា។ គាត់​ធ្វើការ​នៅ​ទីតាំង​ហ្នឹង ហើយ​រដ្ឋបាល​និង​មន្ទីរ​ការងារ​ក៏​បាន​យក​កន្លែង​ហ្នឹង​ជា​អន្តរកាល​នៃ​ការ​ធ្វើ​ចត្តាឡឺស័ក​ដែរ»។

វិទ្យុ​អាស៊ី​សេរី​មិន​អាច​ទាក់ទង អ្នក​គ្រប់គ្រង​ធនធាន​មនុស្ស​នៅ​កាស៊ីណូ ដឺសេនជូរី លោក សំណាង និង​ប្រធាន​មន្ទីរ​ការងារ និង​បណ្ដុះបណ្ដាល​វិជ្ជាជីវៈ​ខេត្ត​ព្រះសីហនុលោក យ៉ូវ ខេមារា ដើម្បី​ឆ្លើយតប​សំណើ​របស់​គ្រួសារ​សព​បាន​នៅ​ឡើយ​ទេ កាល​ពី​ថ្ងៃ​ទី៥ ខែតុលា ដោយ​ទូរស័ព្ទ​ហៅ​ចូល​តែ​គ្មាន​អ្នក​ទទួល។

ប៉ុន្តែលោក យ៉ូវ ខេមារា ប្រាប់​វិទ្យុ​អាស៊ី​សេរីកាល​ពី​ថ្ងៃ​ទី២ ខែតុលា ថា ករណី​ស្លាប់​ដោយ​ជំងឺ​កូវីដ-១៩​នេះ ពុំ​ត្រូវ​បាន​រ៉ាប់រង​ដោយ​បេឡា​ជាតិ​របប​សន្តិសុខ​សង្គម​នោះ​ឡើយ ប៉ុន្តែ​អាច​មាន​ជា​ជំនួយ​សង្គម​ខ្លះ តាម​រយៈ​ការចរចា​ជាមួយ​ភាគី​ក្រុមហ៊ុន​និង​សុំ​គោលការណ៍​ពី​ស្ថាប័ន​ពាក់ព័ន្ធ​ ពី​រដ្ឋាភិបាល ដូចជា ​ក្រសួង​សុខាភិបាល ​និង​ក្រសួង​សេដ្ឋកិច្ច​ជាដើម។

ប៉ុន្តែ​ប្រធាន​សហភាព​ការងារ​កម្ពុជាលោក អាត់ ធន់ ពុំ​យល់​ដូច្នេះ​ទេ។ លោក​ថា បើ​សិន​ជា​ក្រុមហ៊ុន​ព្រម​ផ្ដល់​សំណង​ដល់​គ្រួសារ​សព តាម​ច្បាប់​ដែល​បាន​កំណត់​ទើប​ក្រុមហ៊ុន​អាច​ចប់​កាតព្វកិច្ច​របស់​ខ្លួន ពុំ​នោះ​ទេ​សាមីខ្លួន​ឬ​គ្រួសារ​ជនរងគ្រោះ អាច​ប្ដឹង​ទៅ​មន្ត្រី​អធិការកិច្ច​ការងារ​ទៀត។ ប៉ុន្តែ​ប្រសិន​នៅ​តែ​គ្មាន​ដំណោះស្រាយ​ទៀត​នោះ សាមីខ្លួន​ឬ​គ្រួសារ​ជនរងគ្រោះ​អាច​ប្ដឹង​តតាំង​បន្ត​ទៅ​តុលាការ៖ «មួយ​ទៀត​បើ​សិន​ជា​ជាប់​ពាក់ព័ន្ធ​ការ​ប្រើ​រហូត​ដល់​ស្លាប់​នៅ​ក្នុង​ពេល​ដែល​គាត់​ធ្វើការ​មាន​ន័យ​ថា កូន​ត្រូវ​បាន​គេ​ផ្ដល់​ឲ្យ​បើ​សិន​មាន​គ្រួសារ ឬ​ចាស់​ជរា​នៅ​ក្នុង​បន្ទុក គឺ​ជា​កាតព្វកិច្ច​ដែល​ក្រុមហ៊ុន​ត្រូវ​បង់ ពុំ​ដូច្នោះ​ទេ​ក្រុមហ៊ុន​ហ្នឹង​ខុស​ច្បាប់ អ៊ីចឹង​គាត់​នៅ​តែ​បន្ត​ការ​ប្ដឹង​ទៅ​រដ្ឋាភិបាល​ឬ​មន្ត្រី​អធិការកិច្ច​ដើម្បី​ចុះ​អង្កេត ឬ​ប្ដឹង​ទៅ​តុលាការ»។

កញ្ញា ហៀន ស្រីនិច អាយុ ២៨​ឆ្នាំ គឺ​ជា​បុគ្គលិក​បម្រើ​ការងារ​ជិត ២​ឆ្នាំ ផ្នែក​ចែក​បៀរ​អនឡាន (Dealer Online) ឲ្យ​កាស៊ីណូ​អនឡាញ​ចិន ដឺសេនជូរី (The Century)​ ស្ថិត​នៅ​ភូមិ ៥ សង្កាត់​លេខ ៤ ខេត្ត​ព្រះសីហនុ ត្រូវ​បាន​រក​ឃើញ​មាន​ជំងឺ​កូវីដ-១៩ កាល​ពី​ថ្ងៃ​ទី២៥ ខែកញ្ញា។ នាង​បាន​ស្លាប់​កាល​ពី​ថ្ងៃ​ទី​៣០ ខែ​កញ្ញា។ អាជ្ញាធរ​អះអាង​ថា នាង​បាន​ស្លាប់​ដោយសារ​ពុល​ចំណី ក្អួតចង្អោរ ខ្វះ​ជាតិ​ទឹក ខណៈ​នាង​កំពុង​ឈឺ​ជំងឺ​កូវីដ-១៩។ ប៉ុន្តែ​មិន​បាន​និយាយ​ចំ​ថា ជនរងគ្រោះ​ស្លាប់​ដោយសារ​ជំងឺ​កូវីដ-១៩ នោះ​ទេ។ ក្រោយ​ករណី​ស្លាប់​របស់​កញ្ញា ហៀន ស្រីនិច ​នេះ ទើប​បែក​រឿង​ធំ​ថា ​ក្រុមហ៊ុន​កាស៊ីណូចិន​ដែល​មាន​បុគ្គលិក​ជាង ៤​រយនាក់​នេះ អាច​ជា​បន​ល្បែង​អនឡាញ​ខុស​ច្បាប់ និងមាន​ករណី​សង្ស័យ​ពី​ការ​បង្ខាំង​បុគ្គលិក​រាប់​ឆ្នាំ រហូត​ឆ្លង​ជំងឺ​កូវីដ-១៩ ពេញ​កាស៊ីណូ ថែម​ទាំង​ប្រើ​វិធី​លួងលោម ឬ​បង្ខំ​បុគ្គលិក​ឲ្យ​បន្ត​ធ្វើការ​ទាំង​ឈឺ ក្រោម​ហេតុផល​ជួយ​ស្រោចស្រង់​ការ​ខាតបង់​របស់​ក្រុមហ៊ុន។

អ្នក​សិក្សា​ផ្នែក​ច្បាប់លោក ហេង គឹមហុង ប្រធាន​ផ្នែក​កម្មវិធី​ស្រាវជ្រាវ​និង​តស៊ូ​មតិ​​នៃ​សមាគម​​បណ្ដាញ​យុវជន​កម្ពុជា ហៅ​កាត់​ថា ស៊ី​វាយ​អេន (CYN) យល់​ថា បើ​​សិន​​ជា​​អាជ្ញាធរ ឬ​ស្ថាប័ន​ពាក់ព័ន្ធ​ចង់​ដោះស្រាយ​ករណី​នេះ ដើម្បីលាត​ត្រដាង​ការពិត និង​វិនិច្ឆ័យ​រក​យុត្តិធម៌​ជូន​បុគ្គលិក​កម្មករ គឺ​អាច​ទៅ​រួច ប៉ុន្តែ​អាស្រ័យ​ទៅ​លើ​ឆន្ទៈ​របស់​អ្នក​ពាក់ព័ន្ធ៖ «ទី​១​បញ្ជូន​មន្ត្រី​សុខាភិបាល​ដើម្បី​ព្យាបាល​ពួកគាត់ ទី​២ មន្ត្រី​ទាំងអស់​ចាប់​ផ្ដើម​ប្រមែប្រមូល​ភស្តុតាង​ដែល​មាន​ស្រាប់​ ទី​៣ ចាប់​ផ្ដើម​ធ្វើការ​សម្ភាសន៍​ឬ​ក៏​សាកសួរតាម​រយៈ​Conferenceតាម​អនឡាញ​ក្ដី ឬ​ខល​តាម​ទូរស័ព្ទ​អី ទៅ​ជជែក​ទាំង​ភាគី​ជនរងគ្រោះ ទាំង​ភាគី​កម្មករ​ដែល​ត្រូវ​បាន​គេ​បង្ខាំង និង​ភាគី​ផ្សេង​ទៀត​ទាំង​ថៅកែ ទាំង​អី​ជា​ដើម។ ខ្ញុំ​គិត​ថា រឿង​នេះ​អាច​អូស​បន្លាយ​រហូត​ដល់​ពួកគាត់​ជា​ជំងឺ​កូវីដ-១៩ ហើយ​បន្ត​នីតិវិធី​ទៀត​ក៏​មិន​ទាន់​ហួស​ពេល​ដែរ សំខាន់​តើ​គោល​បំណង​ តើ​យើង​មាន​ឆន្ទៈ​ពិត​ប្រាកដ​សម្រាប់​ស្វែងរក​យុត្តិធម៌​មួយ​ពិត​ប្រាកដ​សម្រាប់​ពួកគាត់​ដែរ​ឬ​ទេ​បាទ»។

សហជីព និង​អ្នក​ច្បាប់​ទទូច​ឲ្យ​មន្ទីរ​ការងារនិង​អាជ្ញាធរ​ខេត្ត ធ្វើ​ការងារ​នេះ​ឲ្យ​បាន​ល្អ កុំ​ប្រញាប់​សន្និដ្ឋាន​ឆ្លើយតប​ការពារ​ជំនួស​ក្រុមហ៊ុន ខណៈ​ស្ថាប័ន​រដ្ឋាភិបាល​ គឺ​ជា​ភាគី​កណ្ដាល​ជួយ​សម្របសម្រួល​រឿង​នេះ។ ពួកគេ​ស្នើ​ឲ្យ​ធ្វើការ​ស៊ើបអង្កេត​ថ្នាក់​ជាតិ​ជា​បន្ទាន់​មួយ ជាជាង​ការពារ​ក្រុមហ៊ុន ឬ​ការពារ​មន្ត្រី​ពុករលួយ​ដែល​ឃុបឃិត​អនុញ្ញាត​ឱ្យ​អំពើ​ខុស​ច្បាប់ កើត​មាន​នៅ​ក្នុង​បនល្បែង ដឺសេនជូរី (The Century) ក្នុង​កណ្ដាល​ក្រុង​ព្រះសីហនុនេះ ដើម្បី​រក​យុត្តិធម៌​ជូន​បុគ្គលិក​ដែល​រងគ្រោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល