ប្រជាពលរដ្ឋមួយចំនួន លើកឡើងថា អាជ្ញាធរពាក់ព័ន្ធមិនបានយកចិត្តទុកដាក់ផ្សព្វផ្សាយ និងទប់ស្កាត់ជំងឺរលាកផ្លូវដង្ហើមកូវីដ១៩ (Covid-19) ឱ្យមានប្រសិទ្ធភាពតាមសំណើរបស់ក្រសួងសុខាភិបាលនោះទេ។ ពួកគេបន្តថា ការព្រងើយកន្តើយរបស់អាជ្ញាធររដ្ឋាភិបាលនេះ បានធ្វើឱ្យពលរដ្ឋជាច្រើន ខ្វះការទទួលបានព័ត៌មានអំពីការរីករាលដាលនៃជំងឺឆ្លងនេះ និងមានការធ្វេសប្រហែសក្នុងការពារនិងថែទាំសុខភាពផងដែរ។
ប្រជាពលរដ្ឋមួយចំនួន អះអាងថា ពួកគេ បានដឹងព័ត៌មានអំពីរបៀបការពារ និងគ្រោះថ្នាក់នៃជំងឺរលាកផ្លូវដង្ហើមកូវីដ១៩ តាមរយៈបណ្តាញសង្គមហ្វេសប៊ុក ខណៈពលរដ្ឋដែលមិនមានទូរស័ព្ទទំនើបសម្រាប់ប្រើប្រាស់ហ្វេសប៊ុក នៅតែមិនទទួលបានព័ត៌មានច្បាស់លាស់អំពីការរីករាលដាលដ៏ឆាប់រហ័សនៃជំងឺឆ្លងដ៏កាចសាហាវនេះទេ។
បុគ្គលិកក្នុងផ្សារទំនើបអ៊ីអន២សែនសុខ លោក ឡុង សុគីម ប្រាប់អាស៊ីសេរីថា បើទោះបីជាជំងឺកូវីដ ១៩ បានសម្លាប់មនុស្សអស់ជិត៣ពាន់នាក់ នៅទូទាំងពិភពលោក និងមនុស្សជាង ៨ម៉ឺននាក់បានឆ្លងមេរោគនេះក៏ដោយ ក៏ប្រជាពលរដ្ឋខ្មែរភាគច្រើន ហាក់មិនបានដឹងអំពីគ្រោះថ្នាក់និងរបៀបការពារ មេរោគនេះឡើយ។ លោកសង្កេតឃើញថា នៅក្នុងផ្សារទំនើបនីមួយៗ មិនមានដាក់ម៉ាស៊ីនស្កែន កម្លៅនោះទេ ហើយទាំងបុគ្គលិក និងភ្ញៀវភាគច្រើន ក៏មិនពាក់ម៉ាស់ការពារដែរ ប៉ុន្តែក្នុងផ្សារទំនើប មានដាក់ទឹកអាល់កុលសម្រាប់លាងដៃសម្លាប់មេរោគ។ លោកបន្តថា ការដែលពលរដ្ឋធ្វេសប្រហែសបែបនេះ ដោយសារតែអាជ្ញាធរពាក់ព័ន្ធរបស់រដ្ឋាភិបាល មិនបានយកចិត្តទុកដាក់ផ្សព្វផ្សាយ អប់រំដល់ប្រជាពលរដ្ឋឱ្យបានទូលំទូលាយដូចនៅបណ្ដាប្រទេសផ្សេងៗនោះទេ៖ «យើងមិនបាច់និយាយដល់ស្រុកស្រែទេ យើងនិយាយត្រឹមភ្នំពេញគឺថា ៨០ ទៅ៩០ភាគរយ គឺពួកគេមានអារម្មណ៍ថាធម្មតាវិញ ដោយគាត់គិតថាជំងឺនេះស្ងប់ស្ងាត់ទៅវិញ ខណៈដែលនៅស្រុកគេមានការបារម្ភភ័យខ្លាំងណាស់ ព្រោះអត្រាមនុស្សស្លាប់និងឆ្លងវានៅតែមាន។ ខ្មែរយើងមានអារម្មណ៍ធម្មតានេះដោយសារតែគាត់ ទទួលបានព័ត៌មានតាមទូរទស្សន៍ និងតាមប្រមុខរដ្ឋាភិបាល ប្រកាសថា មិនអីៗអ៊ីចឹង ដែលធ្វើឱ្យពលរដ្ឋគិតអ៊ីចឹងដែរ»។
បុគ្គលិកក្រុមហ៊ុនឯកជនក្នុងក្រុងភ្នំពេញម្នាក់ទៀត គឺលោក គីម ឈិត រៀបរាប់ថា លោកមិនដែលឃើញអាជ្ញាធរចុះផ្សព្វផ្សាយអប់រំដល់ពលរដ្ឋ និងមានវិធានការទប់ស្កាត់ជំងឺកូវីដ ១៩ ឱ្យមានប្រសិទ្ធភាពនោះទេ។ ទោះជាយ៉ាងណា ក្រុមហ៊ុនរបស់លោក គឺបានអប់រំបុគ្គលិកអំពីអនាម័យ ត្រូវពាក់ ម៉ាស់ការពារ និងមានការចែកទឹកលាងដៃសម្លាប់មេរោគជាដើម៖ «ខ្ញុំចេះតែព្រួយបារម្ភដែរ មិនសូវទុកចិត្តទេព្រោះខ្ញុំចេះតែគិតថា ប្រព័ន្ធសុខាភិបាលយើងនៅខ្សោយ ដូច្នេះការពារខ្លួនឯងល្អជាង»។
ចំណែកពលរដ្ឋម្នាក់ទៀតដែលកំពុងរស់នៅខេត្តព្រះសីហនុ ដែលជាខេត្តជាប់មាត់សមុទ្រសំបូរភ្ញៀវ ទេសចរណ៍បរទេស និងជនជាតិចិនរស់នៅច្រើននោះ រៀបរាប់ថា លោកក៏មិនទាន់ឃើញក្រសួង សុខាភិបាល និងមន្ត្រីរដ្ឋាភិបាល ចុះផ្សព្វផ្សាយព័ត៌មាននេះ ឱ្យបានទូលំទូលាយដើម្បីឱ្យពលរដ្ឋ មានការប្រុងប្រយ័ត្នដែរ។ លោក បន្តថា រដ្ឋាភិបាលកម្ពុជា មិនគួរមើលស្រាលស្ថានការណ៍នោះទេ ទោះ បីជារដ្ឋាភិបាល អះអាងថា នៅកម្ពុជា មិនទាន់រកឃើញមានអ្នកជំងឺកូវីដ១៩ទៀតក្ដី៖ «ក្នុងក្រុងព្រះសីហនុបច្ចុប្បន្ននេះ គឺស្ទើរតែគ្រប់កន្លែងភាគច្រើន គឺគាត់មិនបានពាក់ម៉ាស់ទេ ដោយសារតែទីមួយគាត់មិនបានខ្វាយខ្វល់ជំងឺឆ្លងកូរ៉ូណានេះ និងដោយសារគាត់មិនបានទទួលព័ត៌មានទូលំទូលាយ។ ចាស់ៗជាច្រើនគឺមិនចេះអង់គ្លេស ហើយគ្មានទូរស័ព្ទទំនើបទេ គឺមានតែយុវជនទេ ដែលគាត់ទទួលបានព័ត៌មានច្រើន។ ខ្ញុំចង់ឃើញ អាជ្ញាធរឃុំសង្កាត់ចូលរួមជាមួយមន្ទីរសុខាភិបាល សហការគ្នាចុះតាមភូមិផ្សព្វផ្សាយឱ្យបានទូលំទូលាយ ព្រោះអីរឿងនេះផ្អើលពេញពិភពលោក។
ការលើកឡើងនេះ បន្ទាប់ពីរដ្ឋមន្ត្រីក្រសួងសុខាភិបាល លោក ម៉ម ប៊ុនហេង កាលពីថ្ងៃទី២៥ ខែកុម្ភៈ បានចេញសេចក្តីណែនាំមួយជំរុញឱ្យអភិបាលនៃគណៈអភិបាលគ្រប់រាជធានី-ខេត្ត យកចិត្តទុកដាក់ ផ្សព្វផ្សាយព័ត៌មាន និងវិធានការទប់ស្កាត់ជំងឺកូវីដ១៩ ជូនដល់ប្រជាពលរដ្ឋតាមភូមិឃុំដោយស្មារតី ទទួលខុសត្រូវខ្ពស់។
អ្នកសម្របសម្រួលសមាគមអាដហុក (Adhoc) ប្រចាំខេត្តព្រះសីហនុ អ្នកស្រី ជៀប សុធារី មានប្រសាសន៍ថា អាជ្ញាធរខេត្តព្រះសីហនុ មិនទាន់បានអនុវត្តតាមសេចក្តីណែនាំរបស់ក្រសួងសុខាភិបាលឡើយ។
អ្នកស្រី ជំរុញឱ្យអាជ្ញាធរខេត្តនេះ គួរតែចាប់ផ្ដើមផ្សព្វផ្សាយអំពីរបៀបការពារ និងគ្រោះថ្នាក់ នៃជំងឺនេះដល់ពលរដ្ឋគ្រប់ទីកន្លែង ព្រោះខេត្តព្រះសីហនុ គឺជាខេត្តមួយដែលមានជើងហោះហើរត្រង់ ហើយមានជនជាតិចិនចេញចូលរាល់ថ្ងៃ៖ «ខ្ញុំនៅតែមានការព្រួយបារម្ភអំពីជំងឺកូវីដ១៩នេះ ព្រោះអីទោះបីជាកម្ពុជាមានសីតុណ្ហភាពក្តៅយ៉ាងណាក៏ដោយ ប៉ុន្តែការឆ្លងនេះ ដូចថា វានៅក្នុងខ្លួន យើងបានយូរ។ មួយទៀត ការយល់ដឹងរបស់ពលរដ្ឋនៅមានកម្រិតពាក់ព័ន្ធនឹងអនាម័យនិងការការពារកុំឱ្យឆ្លងមេរោគ»។
អាស៊ីសេរី មិនអាចសុំការឆ្លើយតបពីអ្នកនាំពាក្យក្រសួងសុខាភិបាល លី សូវ៉ាន់ និងអ្នកនាំពាក្យសាលាខេត្តព្រះសីហនុ លោក ឃាង ភារម្យ បានទេ ដោយទូរស័ព្ទចូលពុំមានអ្នកទទួល។
គិតត្រឹមថ្ងៃទី២៧ ខែកុម្ភៈ ចំនួនអ្នកស្លាប់នៅទូទាំងពិភពលោកដោយសារជំងឺរលាកផ្លូវដង្ហើមកូវីដ១៩ (Covid-19) បានកើនឡើងដល់ជាង ២ពាន់ ៨រយ(២.៨០៥) នាក់ហើយ ខណៈអ្នកឆ្លងកើនដល់ ជាង ៨ ម៉ឺន២ពាន់ (៨២.៣២០)នាក់។ ចំណែកអ្នកព្យាបាលជាសះស្បើយចំនួនជាង ៣ម៉ឺន ២ពាន់( ៣២.៧៥៦)នាក់។ អ្នកស្លាប់ និងអ្នកឆ្លងភាគច្រើនបំផុតនៅប្រទេសចិន។ ផ្អែកតាមល្បឿននៃការឆ្លងរីករាលដាលយ៉ាងឆាប់រហ័សនៃជំងឺរលាកផ្លូវដង្ហើមកូវីដ១៩ (Covid-19)នេះ អង្គការសុខភាពពិភពលោក WHO ព្យាករណ៍ថា មនុស្សរាប់លាននាក់អាចនឹងឆ្លងជំងឺដ៏កាចសាហាវនេះ នៅពេលខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។