នាយកមជ្ឈមណ្ឌលជាតិកម្ចាត់ជំងឺគ្រុនចាញ់ប៉ារ៉ាស៊ីតសាស្រ្ត បាណកសាស្រ្តនៃក្រសួងសុខាភិបាល លោក ច ម៉េងចូ ឲ្យដឹងថា រយៈពេល ៦ខែ ឆ្នាំ២០១៤ នេះ ចំនួនករណីគ្រុនចាញ់ដែលព្យាបាលនៅមន្ទីរពេទ្យរដ្ឋ ឬមណ្ឌលសុខភាពរដ្ឋ ឬភ្នាក់ងារស្ម័គ្រចិត្តភូមិមានចំនួនជាង ១៥.៩៨២ករណី គឺថយចុះ ១៨ភាគរយ បើប្រៀបធៀបរយៈពេលដូចគ្នាកាលពីឆ្នាំ២០១៣ ដែលមានចំនួនជិត ២ម៉ឺនករណី (១៩.៥៦២)។
ក្នុងរបាយការណ៍របស់លោក ច ម៉េងចូ ចេញផ្សាយកាលពីថ្ងៃទី១៩ កក្កដា បង្ហាញថា ក្នុងរយៈពេល ៦ខែនេះ មានមនុស្ស ៥នាក់ស្លាប់ដោយសារជំងឺគ្រុនចាញ់។ ចំនួនអ្នកស្លាប់ក៏មានការថយចុះជាងឆ្នាំ២០១៣ ក្នុងរយៈពេលដូចគ្នាដែរ គឺមាន ៦នាក់ស្លាប់ ហើយកាលពី ៦ខែ ឆ្នាំ២០១២ មានអ្នកស្លាប់រហូត ៣០នាក់។
លោកបញ្ជាក់ថា ចំនួននៃការថយចុះជាបន្តបន្ទាប់នៃករណីគ្រុនចាញ់នៅកម្ពុជានេះ គឺមានន័យថា ជំងឺគ្រុនចាញ់លែងជាមូលហេតុចម្បងនៃការស្លាប់ទូទៅរបស់ប្រជាពលរដ្ឋកម្ពុជា ទៀតហើយ។ តាមគម្រោងកម្ពុជា គ្រោងលុបបំបាត់ជំងឺគ្រុនចាញ់ឲ្យអស់ទាំងស្រុងនៅឆ្នាំ២០២៥៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។