មន្ត្រីសង្គមស៊ីវិលបារម្ភថាជំងឺកូវីត១៩ អាចនឹងរាលដាលតាមសហគមន៍បន្ថែមទៀតក្រោយពេលចូលឆ្នាំខ្មែរដោយសារតែប្រជាពលរដ្ឋនៅតាមតំបន់ជនបទនៅតែជួបជុំគ្នាទទួលទានអាហាររួមគ្នា និងចាក់ធុងបាសរាំកម្សាន្តនៅតាមភូមិដោយមិនខ្លាចការឆ្លងនៃជំងឺដ៏កាចសាហាវនេះទេ។ ទោះបីជាយ៉ាងណា ក្រសួងសុខាភិបាលបានប្រកាសថា នៅថ្ងៃទី១៥ មេសានេះគ្មានអ្នកឆ្លងជំងឺកូវីត១៩បានរកឃើញថ្មីនោះទេ។
មន្ត្រីសម្របសម្រួលសមាគមការពារសិទ្ធិ អាដហុក (Adhoc) ខេត្តបន្ទាយមានជ័យ លោក ស៊ុំ ច័ន្ទគាប្រាប់អាស៊ីសេរីថា ប្រជាពលរដ្ឋនៅតាមតំបន់ជនបទហាក់មិនសូវខ្លាចនឹងជំងឺកូវីត១៩ ប៉ុន្មានទេ បើទោះបីជាក្រសួងសុខាភិបាលបានចេញសារាចរណែនាំមិនឲ្យមានការជួបប្រជុំគ្នាក្នុងពេលពិធីបុណ្យចូលឆ្នាំ ខ្មែរនិងពិធីបុណ្យទានផ្សេងៗយ៉ាងណាក៏ដោយ។
លោកបញ្ជាក់ថា នៅឯស្រុកកំណើតរបស់លោកក្នុងខេត្តកំពង់ឆ្នាំង នៅតាមទីប្រជុំជនក្នុងទីរួមខេត្តប្រជាពលរដ្ឋមានការប្រុងប្រយ័ត្នពាក់ម៉ាសនៅពេលធ្វើដំណើរតាមផ្លូវនឹងទៅផ្សារនានា។ប៉ុន្តែសម្រាប់នៅតាមតំបន់ជនបទវិញប្រជាពលរដ្ឋមិនចាប់អារម្ភនឹងជំងឺកូវីត១៩ ទេ ដោយសារតែពួកគេចាត់ទុកថាជំងឺនេះជាជំងឺនយោបាយ ជាជំងឺមហាអំណាចចង់ឈ្នះចង់ចាញ់គ្នា។
លោកបញ្ជាក់ថា នៅតាមវត្តអារាមមួយចំនួនក្នុងឃុំត្រពាំងច័ន្ទ ស្រុកបរិបូរ ខេត្តកំពង់ឆ្នាំង មានមនុស្សប្រមាណតិចតួចពាក់ម៉ាសចំណែកអ្នកផ្សេងទៀតគ្មានពាក់ម៉ាសទេគឺពួកគេដើរពពាក់ពពូនចុះឡើងពីកន្លែងមួយទៅកន្លែងមួយដោយគ្មានភ័យខ្លាចជំងឺឆ្លងអ្វីទាំងអស់៖ « បាននៅសល់៩៩ . ៩៩ % ហ្នឹងគឺគាត់អត់ប្រើអត់អី ហាក់ដូចជាធម្មតា ។គាត់អត់ខ្លាចអត់ញញើតអី ហើយធ្វើបុណ្យធ្វើទានហាក់ដូចជាមិនបានគិតខ្វល់ខ្វាយកូវីតអីហ្នឹងទេ ហើយនៅឆ្ងាយពីគ្នាពីអីអ៊ីចឹង អត់សោះ ហើយនៅជិតគ្នា ប្រមូលផ្ដុំគ្នាគិតថា ហាក់ដូចជាធម្មតាចាត់ទុកថាពួកគ្នាគាត់ហ្នឹងមិនមានមេរោគហ្នឹងទេ » ។
ក្រសួងសុខាភិបាលនិងអង្គការសុខភាពពិភពលោកបានណែនាំដល់ប្រជាពលរដ្ឋនៅទូទាំងប្រទេសដើម្បីការពារជំងឺកូវីត១៩ត្រូវចៀសវាងការជួបប្រជុំគ្នាជាពិសេសពេលចូលឆ្នាំខ្មែរ និងពិធីបុណ្យផ្សេងៗ។
ក្រសួងសុខាភិបាលបានណែនាំទៀតថាប្រជាពលរដ្ឋត្រូវលាងដៃឱ្យបានញឹកញាប់ជាមួយសាប៊ូ និងប្រើទឹកលាងដៃដែលមានជាតិអាល់កុល ពាក់ម៉ាស ខ្ទប់មាត់ និងច្រមុះរបស់អ្នកដោយប្រើកន្សែងដៃ ឬក្រដាសជូតមាត់ នៅពេលក្អក ឬកណ្ដាស់ ហើយបោះចោលក្រដាសជូតមាត់ទៅក្នុងធុងសំរាមបិទជិត។ ក្រសួងឲ្យពលរដ្ឋចៀសវាងប៉ះពាល់ផ្ទាល់ជាមួយអ្នកដែលមានរោគសញ្ញា ដូចជា មានជំងឺផ្ដាសាយ ហើយបើមានគ្រុនក្ដៅលើសពី ៣៧អង្សា ត្រូវទៅជួបគ្រូពេទ្យ មានរោគសញ្ញា ក្អក ឬមានអារម្មណ៍ថា ពិបាកដកដង្ហើមជាដើម។
មន្ត្រីការពារសិទ្ធិមនុស្សលីកាដូប្រចាំតំបន់ភូមិភាគពាយព្យ លោក អ៊ិន គង់ជិត មានប្រសាសន៍ថា នៅក្នុងសង្កាត់វត្តគរ ដែលជាភូមិមួយនៅជាយក្រុងជាប់នឹងស្រុកបាណន់ខេត្តបាត់ដំបងប្រជាពលរដ្ឋនៅតែចាក់ធុងបាស់រាំលេងកម្សាន្ត និង ជួបជុំគ្នាទទួលទានស្រាបៀ ក្នុងអំឡុងពេលចូលឆ្នាំ។
លោកបារម្ភថាជំងឺកូវីត១៩ អាចនឹងរាលដាលកាន់តែច្រើននៅតាមសហគមន៍ក្រោយពីពិធីបុណ្យចូលឆ្នាំបានបិទបញ្ចប់។
លោកបញ្ជាក់ថា កន្លងមកអាជ្ញាធរមូលដ្ឋានបានផ្សព្វផ្សាយស្តីពីវិធីសាស្ត្រការពារនៃការឆ្លងរីករាលដាលនៃជំងឺកូវីត១៩ នៅតាមតំបន់ជនបទ។តែប្រជាពលរដ្ឋគ្រាន់តែបានយល់ដឹងប៉ុណ្ណោះ មិនបានយកមកអនុវត្តតាមនោះទេ។ ដោយសារតែប្រជាពលរដ្ឋភាគច្រើនមិនមានលទ្ធភាពគ្រប់គ្រាន់ដើម្បីទិញម៉ាស អាល់កុលដើម្បីលាងសម្អាតដៃឲ្យបានញឹកញាប់ទេ៖ « ចំពោះម៉ាស់ហ្នឹង គឺ ១០០ % គ្មានអ្នកណាមានលទ្ធភាពទិញម៉ាស់ពាក់ទេ។ គាត់អត់ប្រើម៉ាស់ទេ។ អ៊ីចឹងជាចំណុចមួដែលឃើញមានការព្រួយបារម្ភ ហើយមួយទៀតគាត់នៅផ្តុំគ្នាជាលក្ខណៈក្រុមតូចៗ ៤នាក់ ៥នាក់ ដោយមិនបានរក្សាគម្លាតពីរម៉ែត្រអ៊ីចឹងគាត់ឈរកៀកគ្នានិយាយគ្នាទៅវិញទៅមកសន្ទនាគ្នាដោយមិនមានការប្រុងប្រយ័ត្ន » ។
ទាក់ទងនឹងក្តីបារម្ភនេះ អ្នកនាំពាក្យក្រសួងសុខាភិបាលអ្នកស្រី ឱ វណ្ណឌីន មិនបានឆ្លើយតបនឹងការព្រួយបារម្ភរបស់មន្ត្រីសង្គមស៊ីវិលទេដោយអ្នកស្រីនិយាយថា កំពុងជាប់រវល់។ ប៉ុន្តែរដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានបញ្ជាក់នៅក្នុងសន្និសីទសារព័ត៌មានកាលពីថ្ងៃទី១៣មេសាថា នៅក្នុងទីក្រុងភ្នំពេញក្នុងរយៈពេលប៉ុន្មានថ្ងៃចុងក្រោយនេះ មានករណីចម្លងទៅនៅក្នុងសហគមន៍ទ្រង់ទ្រាយតូច ហើយក្រុមការងារក្រសួងសុខាភិបាល និង អាជ្ញាធរពាក់ព័ន្ធ រកមិនទាន់ឃើញពីប្រភពនៃការចម្លងជំងឺកូវីដ-១៩ ច្បាស់លាស់នៅឡើយទេ។ លោក ម៉ម ប៊ុនហេង បានបញ្ជាក់ទៀតថា ក្រុមការងារក្រសួងសុខាភិបាលកំពុងត្រៀមចាត់វិធានការដើម្បីទប់ស្កាត់ការចម្លងចូលសហគមន៍ក្នុងលក្ខណៈទ្រង់ទ្រាយធំ។
ក្រសួងសុខាភិបាលនៅថ្ងៃទី១៥ មេសានេះ បានចេញសេចក្ដីប្រកាសព័ត៌មានថា មិនមានអ្នកជំងឺថ្មីណាម្នាក់បានរកឃើញមានផ្ទុកជំងឺកូវីត១៩ នោះទេ ពោលគឺ ចំនួនអ្នកកើតជំងឺនេះនៅទូទាំងប្រទេសគឺមានចំនួន១២២នាក់ដដែល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។