ការទន្ទឹងរង់ចាំវ៉ាក់សាំងបង្ការជំងឺកូវីដ-១៩ ដែលមានគុណភាពប្រសើរជាងវ៉ាក់សាំងចិន បានធ្វើឲ្យពលរដ្ឋជ្រួលច្របល់ ស្នើសុំចាក់វ៉ាក់សាំងអង់គ្លេស អាស្រ្តាហ្សេណេកា (AstraZeneca) តាំងពីដូសដំបូង និងដូសទី៣ ក្រោយរដ្ឋាភិបាលបើកយុទ្ធនាការ ចាក់វ៉ាក់សាំងដូសទី៣ (ដូសជំរុញ) សម្រាប់អ្នកដែលបានចាក់វ៉ាក់សាំងចិនគ្រប់ពីរដូសរួចហើយ។
នៅក្នុងសារដ៏កម្ររបស់លោកនាយករដ្ឋមន្ត្រី ហ៊ុន សែន ដែលបង្ហាញឲ្យឃើញអំពីបំណងរបស់ពលរដ្ឋ ចង់បានវ៉ាក់សាំងមានគុណភាពល្អ អាស្រ្តាហ្សេណេកា ធ្វើឡើងតាមរយៈសារជាសំឡេងពិសេសមួយ ដែលបានចាក់ផ្សាយព្រោងព្រាតតាមប្រព័ន្ធឃោសនា និងគណនីហ្វេសប៊ុករបស់លោក នៅថ្ងៃទី៩ ខែ សីហា នេះ៖ « ក៏មានសំណូមពរខ្លះទៀត អ្នកចាក់ដូសទីមួយ ដែលមិនទាន់បានចាក់ បែរជាឃើញអាស្រ្តាហ្សេណេកា បានមកដល់ បែរជាសុំចាក់អាស្រ្តាហ្សេណេកា ដោយមិនគិតទៅដល់ការលំបាករបស់រដ្ឋ ដែលកំពុងតែខ្វះវ៉ាក់សាំង »។
លោក ហ៊ុន សែន បញ្ជាឲ្យបដិសេធសំណើរបស់ពលរដ្ឋ ដែលចង់បានវ៉ាក់សាំងអង់គ្លេសជាដូសដំបូង និងឲ្យផ្អាកការចាក់វ៉ាក់សាំងអង់គ្លេសដូសទី៣ (ដូសជំរុញ) សម្រាប់អ្នកដែលបានចាក់វ៉ាក់សាំង អាស្រ្តាហ្សេណេកា គ្រប់ពីរដូសរួចហើយ។ លោក ហ៊ុន សែន អះអាងថា ការមិនអាចឲ្យចាក់វ៉ាក់សាំងអង់គ្លេសដូសទី ៣ សម្រាប់អ្នកចាក់វ៉ាក់សាំងនេះគ្រប់ពីរដូសរួចហើយនោះ គឺដោយសារតែមិនទាន់មានការសិក្សាអំពីគម្លាតនៃរយៈចាក់វ៉ាក់សាំងនៃដូសនីមួយៗ។ ជាងនេះទៅទៀត លោកបន្ថែមថា វ៉ាក់សាំងអង់គ្លេសដូសទី៣ នេះ គឺទុកសម្រាប់ចាក់ឲ្យកម្លាំងជួរមុខ ដែលបានចាក់វ៉ាក់សាំងចិនពីរដូសរួចហើយ។
វ៉ាក់សាំងចិន រងការរិះគន់ថាមានប្រសិទ្ធភាពទាប។ មន្រ្តីជាន់ខ្ពស់សុខាភិបាលចិន ក៏ធ្លាប់ទទួលស្គាល់បញ្ហានេះដែរ និងធ្លាប់ពិចារណារឿងចាក់លាយវ៉ាក់សាំងបរទេស ដែលមានគុណភាពល្អជាងនេះ ដើម្បីជំរុញប្រសិទ្ធភាពរបស់វា។
ប្រទេសមួយចំនួនក្នុងតំបន់ ដូចជាប្រទេសថៃ ឥណ្ឌូនេស៊ី និងម៉ាឡេស៊ី បានជ្រើសរើសចាក់វ៉ាក់សាំង អាមេរិក និងអង់គ្លេស ជាដូសទី៣ លើវ៉ាក់សាំងចិន ដើម្បីប្រសិទ្ធភាពបង្ការជំងឺកូវីដ-១៩ ជាពិសេសបង្ការមេរោគបំប្លែងថ្មីប្រភេទ ឌែលតា (Delta)។
ប៉ុន្តែប្រធានអង្គការសុខភាពពិភពលោក (WHO) ស្នើឲ្យប្រទេសទាំងឡាយ កុំអាលនិយាយពីរឿងចាក់វ៉ាក់សាំងដូសទី៣ នៅពេលនេះ ព្រោះប្រទេសក្រីក្រជាច្រើននៅលើពិភពលោក មិនទាន់មានវ៉ាក់សាំងគ្រប់ ដើម្បីចាក់ដូសទីមួយផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។