កម្ពុជា​​មាន​អ្នក​ស្លាប់​ដោយសារ​ជំងឺ​កូវីដ១៩ ជា​ករណី​ដំបូង​បង្អស់​

ដោយ ខែ សុណង
2021-03-11
Share
កម្ពុជា​​មាន​អ្នក​ស្លាប់​ដោយសារ​ជំងឺ​កូវីដ១៩ ជា​ករណី​ដំបូង​បង្អស់​ អ្នក​ជំងឺ​កូវីដ-១៩ ​ម្នាក់​បាន​​ស្លាប់​​នៅព្រឹក​​ថ្ងៃទី​១១ ​ខែមីនា នៅមន្ទីរពេទ្យ​​មិត្តភាព​ខ្មែរ​-​សូវៀត ​បន្ទាប់​​​ពី​គាត់​​ត្រូវ​បាន​រកឃើញថា ​មាន​​​ផ្ទុក​ជំងឺនេះ​​ ​កាល​ពី​​ចុងខែ​កុម្ភៈ​។​
រូប៖ ហ្វេសប៊ុក នាយកដ្ឋានចត្តាឡីស័ក

ក្រសួង​​សុខា​ភិបាល​ប្រកាស​ករណី​អ្នក​​ស្លាប់​ដោយសារ​ជំងឺ​កូវីដ-១៩ ដំបូង​បង្អស់ នៅ​​កម្ពុជា​ នៅថ្ងៃ​ទី១១​ ខែមីនា ​នេះ។ ​ប្រជាពលរដ្ឋ​​ និង​​មន្ត្រី​សង្គម​​ស៊ី​វិល​យល់​ថា ​ករណី​ស្លាប់នេះ​ ​ជាសញ្ញា​មួយ​​ដាស់តឿន​​ឲ្យកម្ពុជា​​​​យកចិត្តទុកដាក់​ក្នុង​ការ​​ទប់ស្កាត់​ជំងឺកូវីដ​-១៩ ​ដែល​កំពុង​​រីករាល​ដាល​​ធ្ងន់ធ្ងរ​នេះ​។​ អ្នក​ជំងឺ​កូវីដ-១៩ ​ម្នាក់​បាន​​ស្លាប់​​នៅព្រឹក​​ថ្ងៃទី​១១ ​ខែមីនា នៅមន្ទីរពេទ្យ​​មិត្តភាព​ខ្មែរ​-​សូវៀត ​បន្ទាប់​​​ពី​គាត់​​ត្រូវ​បាន​រកឃើញថា ​មាន​​​ផ្ទុក​ជំងឺនេះ​​ ​កាល​ពី​​ចុងខែ​កុម្ភៈ​។​

ក្រសួង​សុខាភិបាល​ឱ្យដឹងតាម​សេចក្តីប្រកាសព័ត៌មាន​ថា​ អ្នក​ជំងឺ​ដែល​​បាន​​ស្លាប់នោះ ​គឺជា​​បុរស​ខ្មែរ​ អាយុ ៥០ឆ្នាំ។ ​បុរសរូបនោះ​មាន​ទីលំនៅ​​នៅ​​សង្កាត់​​ចាក់​អង្រែ ខណ្ឌមានជ័យ​ រាជ​ធានី​​ភ្នំពេញ​។​ គាត់ជា​អ្នកបើកបរ​ឱ្យថៅកែ​ជនជាតិចិន​​នៅ​​ខេត្តព្រះសីហនុ ​ដែលមាន​ផ្ទុក​ជំងឺ​​កូវីដ-១៩​ ក្នុង​ព្រឹត្តិការណ៍​សហគមន៍​២០ កុម្ភៈ​។​

ក្រសួង​​បាន​​បញ្ជាក់​​ប្រាប់​ពត៌មាន​ក្នុង​ស្រុក​​ដែលជិត​​ស្នឹត​នឹង​​រដ្ឋាភិបាល​ថា ​សព​របស់​​អ្នកជំងឺ​មិន​អាច​រក្សាទុក​បាន​យូរទេ ​ពោលគឺ​ត្រូវរៀបចំ​បូជា​តាមការ​កំណត់​​របស់​រដ្ឋាភិបាល​ដើម្បី​ទប់ស្កាត់​​ការ​ឆ្លង​​រីករាលដាល​​ជំងឺនេះ។​

អាស៊ី​សេរី​​បាន​​ព្យាយាម​ទាក់ទងទៅ​អ្នកនាំពាក្យ​​ក្រសួង​​សុខាភិបាល​​អ្នកស្រី​ ឱ វណ្ណឌីន ដើម្បី​​សួរ​នាំបន្ថែម​ពី​​ករណី​​ស្លាប់​​របស់​អ្នកជំងឺរូបនេះ ​នៅថ្ងៃទី១១ ខែមីនា​ ដោយ​​ទូរស័ព្ទចូល ​ប៉ុន្តែពុំមាន​​អ្នក​ទទួល​។​

ប៉ុន្តែ​អ្នកស្រី​បាន​​ផ្តល់​បទសម្ភាសន៍​​ឲ្យ​សារព័ត៌មាន​​ក្នុង​ស្រុក​​​ថា ​ជំងឺ​កូវីដ-១៩​ ដែល​​បុរស​នោះ​​បានឆ្លង​​ពី​​ថៅកែ​ជនជាតិចិននោះ ​បាន​​វិវត្តយ៉ាងលឿន ​និង​មានសភាព​​ធ្ងន់ធ្ងរ​។​ អ្នកស្រី​បន្តថា ​ក្រុម​គ្រូពេទ្យ​​បាន​​ពិនិត្យ​​ឃើញថា ​សួតទាំងសងខាង​​​របស់​​បុរស​នោះ​មាន​​សភាព​​ធ្ងន់ធ្ងរ​​ធ្វើ​ឲ្យ​​កង្វះ​អុក​ស៊ីសែន​​នៅក្នុងសួត ​និង​​រលាក​ខ្លាំង​​ រហូត​​សរីរាង្គ​របស់​បុរសរូបនោះ​​ទ្រាំទ្រលែង​បាន​​​។​ អ្នកស្រី​ ឱ វណ្ណឌីន​ បន្ថែម​​ថា ​អ្នក​ជំងឺ​មួយ​ចំនួន​​ទៀត ​ក៏ស្ថិត​​ក្នុង​សភាព​ធ្ងន់ធ្ងរ​គួរឱ្យ​​ព្រួយ​បារម្ភ​​ដែរ​៖​«បច្ចុប្បន្ន​នេះ ​ស្ថានភាព​​អ្នក​ជំងឺ​​ក៏​មាន​អ្នក​ជំងឺ​​មួយ​ចំនួន​​ទៀត ក៏​​ស្ថិត​នៅ​ក្នុង​​លក្ខណៈ​មិន​​សូវ​ល្អ​​ប៉ុន្មាន​​ទេ ​ហើយ​ក្រុម​​គ្រូពេទ្យ​របស់​យើង​ក៏​កំពុង​តែខ្នះ​ខ្នែង នៅក្នុង​ការ​ជួយ​សង្គ្រោះ​​ពួកគាត់ផងដែរ។ តែស្ថាន​ភាព​បែប​ណា​នោះ​ យើង​នឹង​ធ្វើការ​តាម​ដាន​ជា​បន្ត​ទៅទៀត។ យើង​មាន​ករណី​ស្លាប់​ទីមួយ​នៅក្នុង​កម្ពុជា​របស់​យើងដោយ​សារ​ការវាយលុក​ពីវីរុស​កូវីដ១៩»​​​​​​​

ក្រៅពីការស្លាប់​អ្នក​ជំងឺម្នាក់ ក្រសួងបាន​​រកឃើញ​ករណី​ឆ្លងថ្មី ៣៩នាក់ ​បន្ថែមទៀត ដែល​ជាសុទ្ធ​តែ​ជា​ករណីចម្លង​ក្នុង​ព្រឹត្តិការណ៍​សហគមន៍​ ២០ កុម្ភៈ ធ្វើ​ឱ្យ​តួលេខ​អ្នក​ឆ្លង​ក្នុង​សហគមន៍​​កើន​ដល់ជាង ៦រយ (៦៥២) នាក់ គិត​ត្រឹម​ថ្ងៃទី១១ ខែមីនា។

ករណី​ស្លាប់​ដំបូង​នៅកម្ពុជា​នេះ គឺ​ជាក្តី​បារម្ភមួយ​របស់​ប្រជាពលរដ្ឋ​ និង​សង្គម​ស៊ី​វិល ជុំ​វិញការ​រីក​រាល​ដាល​នៃ​ជំងឺ​នេះ នៅទូទាំង​ប្រទេសកម្ពុជា។ ខេត្ត​ជាច្រើន​ដែល​រងផល​ប៉ះពាល់ និង​រីក​រាល​ដាលដល់​នោះ រួមមាន ខេត្ត​កណ្តាល ខេត្តបាត់ដំបង ខេត្តសៀមរាប ខេត្ត​កំពង់ចាម ខេត្តកំពង់ធំ​ ខេត្តព្រៃវែង ខេត្តព្រះសីហនុ ខេត្តស្វាយរៀង ខេត្តកោះកុង និង​រាជធានីភ្នំពេញ​ជាដើម។

ពលរដ្ឋ​រស់នៅ​រាជធានីភ្នំពេញលោកស្រី សុខ ស្រីនិច ថ្លែងថា លោកស្រី​ព្រួយ​បារម្ភ​ចំពោះ​សុវត្ថិ​ភាព​របស់ខ្លួន​ និង​ក្រុម​គ្រួសារ​ជាខ្លាំង​ ក្រោយ​មានករណី​ស្លាប់​ដោយ​សារជំងឺ​កូវីដ-១៩​នេះ។ លោកស្រី ខកចិត្ត​ដែល​រាជរដ្ឋាភិបាល​មិន​បាន​ប្រកាស​បិទទាំងស្រុងនូវ​​ពិធី​ជួប​ជុំ​មួយ​ចំនួន ដូចជា​ពិធី​មង្គលការ​ ពិធី​ផ្សេងៗទៀត ដែលអាច​បង្កហានិភ័យដល់​ប្រជាពលរដ្ឋ។ លោកស្រី​​ទទូច​ឲ្យ​រដ្ឋាភិបាល​គួរយកចិត្ត​ទុក​ដាក់​លើ​ប្រជាពលរដ្ឋ​ឲ្យ​បាន​ខ្លាំង​ជាងនេះ និង​ស្នើ​ឲ្យ​ពលរដ្ឋ​គួរ​ចួលរួម​សហការ​ទប់ស្កាត់ ដោយ​អនុវត្ត​វិធាន​ការ​សុខាភិបាល​ឲ្យ​បាន​ត្រឹម​ត្រូវ៖ «សេដ្ឋកិច្ច​ខ្ញុំក៏​ធ្លាក់​ចុះ​ខ្លាំង​មែន​ទែន រក​លុយ​ក៏​អត់​សូវ​បាន​ដែរ​ ព្រោះ​ឥឡូវ​មាន​បញ្ហា​អញ្ចឹង គឺ​ប្រជា​ពលរដ្ឋ​យើង​អត់សូវ​មាន​ថវិកា​ក្នុង​ការ​ទិញ​អី​ផ្សេងៗ​ទេ។ ខ្ញុំ​លែង​ហ៊ាន​ចេញ​ទៅណា​ហើយ និយាយ​ទៅ​ឥឡូវ​រាង​ខ្លាច​ដែរ។ ហើយ​ងាក​ជួលតែ​គេ​ឲ្យ​ដឹក​ឲ្យ។ សូម្បី​តែ​ទៅផ្សារទិញ​ម្ហូប​អី​ក៏​លែង​ហ៊ាន​ដែរ ព្រោះ​ខ្ញុំ​ព្រួយ​បារម្ភ​ពី​បញ្ហា​ខ្លាច​មាន​ការ​ឆ្លង​ពី​ខ្លួន​ឯង​ទៅ​ដល់​កូន​ ដល់​គ្រួសារ​អីអញ្ចឹង»។​​​​​​​​​​

ចំណែកនាយក​រង​ទទួល​បន្ទុក​ផ្នែក​ឃ្លាំ​មើល​សិទ្ធិ​មនុស្ស​នៃ​អង្គការ​លីកាដូលោក អំ សំអាត ទទូចឲ្យ​រដ្ឋាភិបាល​គួរ​បន្ថែម​នូវ​សំភារៈបរិក្ខារ​ និង​ក្រុមគ្រូពេទ្យ​បន្ថែមទៀត ដើម្បី​បំរុង​ក្នុងការ​ព្យាបាល​អ្នកជំងឺ​កូវីដ-១៩។ លោកបន្តថា ករណី​ស្លាប់ដំបូង​នៅ​ប្រទេស​កម្ពុជា​នេះ គឺ​ជាសញ្ញា​ដាស់តឿនដល់​រដ្ឋាភិបាល ជាពិសេស​​ក្រសួង​​សុខាភិបាល គួរ​យក​ចិត្ត​ទុក​ដាក់​ ពង្រឹង​វិធានការ​សុខាភិបាល និង​រិះរក​វិធាន​ការបន្ថែម​ទៀត​ ដើម្បី​ទប់​ស្កាត់​នូវ​ការ​ឆ្លងរីករាលដាល​នៃជំងឺ​នេះ៖ «បច្ចុប្បន្ន​រដ្ឋាភិបាល​ត្រូវ​ផ្តល់​ពត៌មាន​ឲ្យ​បាន​ជាក់​លាក់​ ហើយ​ពលរដ្ឋ​ទាំង​អស់ គឺ​រួម​គ្នា​យ៉ាង​ណា ដើម្បី​ចូលរួម​ចាត់​វិធាន​ការ​ខ្លួន​ឯង​ហ្នឹង​ ដើម្បី​បង្កា និង​ទប់ស្កាត់កុំ​ឲ្យ​មាន​ការ​រីក​រាល​ដាល ទី១គឺ​ការពារ​ខ្លួន​ឯង ទី២ការ​ពារ​ទៅ​ដល់​គ្រួសារ ហើយ​នឹង​អនុវត្ត​ទៅ​តាម​វិ​ធាន​ការ និង​គោល​ការណ៍​ណែនាំរបស់​ក្រសួង​សុខាភិបាល​ក៏​ដូចជា​អង្គការសុខភាព​ពិភព​លោក​នោះ»​​​​​​​​​​​​

គិត​ត្រឹម​ថ្ងៃ​ទី​១១ ខែមីនា​ កម្ពុជា​មាន​អ្នក​ស្លាប់​ដោយ​សារជំងឺ​កូវីដ-១៩​ម្នាក់ អ្នក​ឆ្លង​​សរុប​ជិត ១ពាន់​២រយ (១១៦៣)​ នាក់ ក្នុង​នោះ ព្យាបាល​​ជា​សះ​ស្បើយ​ជិត​​ ៦​រយ (៥៩៧)​ នាក់ និង​កំពុង​សម្រាក​ព្យាបាល​ជិត​ ៦​រយ (៥៦៥)នាក់​​៕​

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល