ប្រជាពលរដ្ឋកម្ពុជា កាន់តែបារម្ភអំពីវីរុសកូរ៉ូណា និងស្នើសុំឲ្យរដ្ឋាភិបាលផ្អាកជើងហោះហើរ ពីប្រទេសចិនបណ្ដោះអាសន្ន ដើម្បីបង្ការ និងទប់ស្កាត់ជំងឺឆ្លងដ៏កាចសាហាវមួយនេះ។ ទោះបីជាយ៉ាងណា អាជ្ញាធរអាកាសចរណ៍ស៊ីវិលកម្ពុជា បញ្ជាក់ថា គ្មានផែនការផ្អាកជើងហោះហើរនោះទេ ព្រោះ បារម្ភពីការខាតបង់ផ្នែកសេដ្ឋកិច្ចជាតិ។
ប្រជាពលរដ្ឋកម្ពុជា កាន់តែព្រួយបារម្ភអំពីសុខភាព និងនាំគ្នាពាក់ម៉ាស់ក្នុងពេលធ្វើដំណើរ និង ពេលធ្វើការ បន្ទាប់ពីក្រសួងសុខាភិបាល រកឃើញមានបុរសជនជាតិចិនម្នាក់ផ្ទុកវីរុសកូរ៉ូណា នៅខេត្តព្រះសីហនុ។
បុគ្គលិកកាស៊ីណូ ណាហ្គា វើលដ៍ លោកស្រី រ៉េត ធារ៉ាត់ ប្រាប់ថា មុនពេលចូលធ្វើការ គឺក្រុមហ៊ុន បានពិនិត្យកម្តៅបុគ្គលិក និងបានចែកម៉ាស់ការពារ ប៉ុន្តែលោកស្រី និងបុគ្គលិកដទៃទៀត នៅតែភ័យខ្លាចឆ្លងមេរោគកូរ៉ូណានេះ ដោយសារក្នុងមួយថ្ងៃៗ មានជនជាតិចិនជាច្រើន ចូលលេងល្បែងក្នុងកាស៊ីណូ៖ « ភ្ញៀវចូលទៅក៏គេស្កែន និងចែកម៉ាស់ឲ្យពាក់ដែរ តែភាគច្រើនភ្ញៀវខ្មែរពាក់ តែភ្ញៀវចិនភាគច្រើន អត់ពាក់ទេ។ ខ្ញុំបារម្ភណាស់ព្រោះអីធ្វើការក្នុងកាស៊ីណូនេះ ចម្រុះជាតិសាសន៍ចូលទៅ ហើយយើងធ្វើការផ្ទាល់ជាមួយភ្ញៀវទៀត។ ពួកខ្ញុំចង់ឲ្យកន្លែងដាក់ទឹកអាកុលលាងដៃតាមតុល្បែង ដើម្បីលាងមេរោគបានគ្រប់ពេល » ។
បន្ថែមពីនេះ លោកស្រី រ៉េត ធារ៉ាត់ ស្នើសុំឲ្យរដ្ឋាភិបាលផ្អាកជើងហោះហើរពីប្រទេសចិនជាបណ្តោះអាសន្ន ដើម្បីបង្ការ និងការពារកុំឲ្យជនជាតិចិននាំមេរោគប្រភេទថ្មីនេះ ចូលកម្ពុជាកាន់តែ ច្រើនដែលធ្វើឲ្យពិបាកទប់ស្កាត់៖ « ខ្ញុំចង់ឲ្យរដ្ឋាភិបាលផ្អាកជើងហោះហើរពីស្រុកខ្មែរ និងសុំឲ្យផ្អាកសាលារៀនកូនក្មេង ព្រោះដោយសារកូនក្មេង អត់ចេះថែរក្សាសុខភាពពាក់ម៉ាស់អីទេ » ។
ពលរដ្ឋរស់នៅក្នុងក្រុងភ្នំពេញម្នាក់ទៀត លោក ចាន់ ធឿន មានក្តីបារម្ភអំពីសុខភាពដូចគ្នា ដោយសារលោក បានដឹងថា មានជនជាតិចិនជាច្រើនបានចូលមកកម្ពុជា ជាពិសេសមានជនជាតិចិន ៣ ពាន់នាក់ ដែលមកពីទីក្រុងវ៉ូហាន (wunan) ប្រទេសចិនដែលជាតំបន់ផ្ទុះវីរុសថ្មីនេះ។ លោកបន្តថា រដ្ឋាភិបាលកម្ពុជា មិនគួរមើលស្រាលស្ថានការណ៍នោះទេ គួរតែគិតអំពីសុខទុក្ខប្រជាពលរដ្ឋ ដោយផ្អាកជើងយន្តហោះពីប្រទេសចិនទាំងអស់ជាបណ្ដោះអាសន្ន៖ « ហេតុមិនបិទ ខ្ញុំឆ្ងល់ដែរ។ ប្រទេសខ្លះគេគិតអំពីពលរដ្ឋរបស់គេ គឺគេបិទជើងយន្តហោះដែរ មានតែខ្មែរហេតុអីមិនបិទ » ។
ចំណែកបុគ្គលិកកាស៊ីណូនៅខេត្តព្រះសីហនុ លោក សាំង វីន រៀបរាប់ថា ពលរដ្ឋក្នុងខេត្តដែលមាន ជនជាតិចិនរស់នៅច្រើននេះ ជ្រួលច្របល់ខ្លាំង បន្ទាប់ពីដឹងថា នៅខេត្តនេះ មានបុរសជនជាតិចិន ម្នាក់ផ្ទុកមេរោគកូរ៉ូណាថ្មី។ លោកថា ពលរដ្ឋពាក់ម៉ាស់ស្ទើរគ្រប់គ្នា ហើយនៅថ្ងៃទី២៨ ខែមករា គឺ លោក និងពលរដ្ឋខ្លះទៀត សម្រេចចាកចេញពីខេត្តព្រះសីហនុបណ្ដោះអាសន្ន។ បុគ្គលិកកាស៊ីណូ រូបនេះបារម្ភថា ប្រសិនបើរដ្ឋាភិបាលកម្ពុជា នៅតែមិនផ្អាកជើងហោះហើរពីប្រទេសចិន ដោយបណ្ដោយឲ្យជនជាតិចិនច្រើននៅតែចូលមកកម្ពុជា គឺអាចនឹងមានករណីវីរ៉ុសកូរ៉ូណាជាបន្ត បន្ទាប់ទៀត៖ « ខ្លាចជនជាតិចិនមានផ្ទុកជំងឺនេះ ហើយមកប្រទេសនេះមកកម្ពុជា ដូច្នេះធ្វើឲ្យពិបាកខ្លាំងក្នុងការ គ្រប់គ្រងសភាពការណ៍ ព្រោះយើងដឹងហើយថា វិស័យសុខាភិបាល យើងមិនទាន់ជឿនលឿនទេ សូម្បីតែចិនគេជឿនលឿនផង នៅតែទប់មិនចង់ជាប់មានអ្នកស្លាប់ និងឆ្លងច្រើន » ។
ការស្នើសុំឲ្យផ្អាកជើងហោះហើរពីប្រទេសចិនទាំងអស់ជាបណ្ដោះអាសន្ននេះ បន្ទាប់ពីក្រសួងសុខា ភិបាលកម្ពុជា បានរកឃើញករណីជំងឺឆ្លង ប្រភេទថ្មីនេះ កាលពីថ្ងៃ២៧ មករា ទៅលើបុរសជនជាតិ ចិនម្នាក់ ក្នុងចំណោមជនជាតិចិនជាង ៣ពាន់នាក់ ដែលធ្វើដំណើរមកពីក្រុងវ៉ូហាន (Wuhan) ប្រទេស ចិនមកកម្ពុជា មុនថ្ងៃទី២៣ ខែមករា។
អ្នកនាំពាក្យរដ្ឋលេខាធិការដ្ឋាននៃអាកាសចរស៊ីវិលកម្ពុជា លោក ជា អូន ថ្លែងប្រាប់អាស៊ីសេរីថា នរណាក៏ព្រួយបារម្ភអំពីមេរោគថ្មីនេះដែរ ប៉ុន្តែកម្ពុជា គ្មានគម្រោងបិទជើងហោះហើរប្រទេសចិន ឡើយ ដោយសារខ្លាចប៉ះពាល់ដល់សេដ្ឋកិច្ចជាតិទាំងមូល។ ទោះជាយ៉ាងណាលោកបញ្ជាក់ថា ចំពោះជើងហោះហើរពីទីក្រុងវ៉ូហាន និងខេត្តហ៊ូបេ (Hubei) ទាំងមូល គឺរដ្ឋាភិបាលចិនបានបិទ តាំងពីថ្ងៃទី២៣ ខែមករាមកម្លេះ៖ « មធ្យោបាយធ្វើដំណើរប្រៀប ដូចជាសរសៃឈាមរបស់យើងអ៊ីចឹង បើយើងបិទសរសៃឈាមទៅ body ឬខ្លួនរបស់យើងនឹងស្លាប់។ ទោះបីជាមានការបារម្ភ ក៏រដ្ឋាភិបាលយើង កំពុងដុតដៃដុតជើងដែរ ដើម្បីធ្វើការងារនេះ » ។
រីឯអ្នកនាំពាក្យក្រសួងសុខាភិបាល លោកវេជ្ជបណ្ឌិត លី សូវ៉ាន់ មានប្រសាសន៍ថា គិតត្រឹមម៉ោង៤ល្ងាចថ្ងៃ ទី២៨ មករា កម្ពុជា ពុំទាន់រកឃើញមានករណីវីរុសកូរ៉ូណាលើមនុស្សផ្សេងទៀតនោះទេ ក្រៅពីបុរសជនជាតិចិនម្នាក់ នៅខេត្តព្រះសីហនុ។ លោកអះអាងថា បុរសជនជាតិចិនដែលផ្ទុកវីរូសកូរ៉ូណានោះ ត្រូវបានក្រុមគ្រូពេទ្យកម្ពុជា ដាក់ឲ្យស្ថិតក្នុងបន្ទប់ព្យាបាលដាច់ដោយឡែកពីគេ នៅក្នុង មន្ទីរពេទ្យខេត្តព្រះសីហនុ ហើយស្ថានភាពរបស់គាត់នៅល្អប្រសើរធម្មតា ដែលសង្ឃឹមថា នឹងព្យាបាលជាសះស្បើយវិញ។ លោក លី សូវ៉ាន់ បញ្ជាក់ដែរថា សមាជិកគ្រួសាររបស់បុរសជនជាតិចិនដែលផ្ទុកមេរោគកូរ៉ូណានោះ រួមទាំងអ្នកធ្វើដំណើរតាមយន្តហោះជាមួយគ្នា គឺពុំមានរោគ សញ្ញាអ្វីទេ។ ប្រធាននាយកដ្ឋានប្រយុទ្ធនឹងជំងឺឆ្លងរូបនេះ បន្ថែមថា អាជ្ញាធរពាក់ព័ន្ធកម្ពុជា នឹងបន្តស្វែង រកជនជាតិចិនផ្សេងទៀតមកទីក្រុងវ៉ូហាន ដើម្បីពិនិត្យរកវីរុសកូរ៉ូណា៖ « យើងបានរកឃើញអ្នកប៉ះពាល់មួយចំនួនធំ ជាពិសេស អ្នកដែលជិះយន្តហោះជាមួយបុរសផ្ទុកវីរុសថ្មីនេះដែល គាត់ធ្វើដំណើរទៅខេត្តនានានេះ គឺយើងមិនទាន់រកឃើញរោគសញ្ញាអ្វីទេ។ ទោះជាយ៉ាងណាអ្នកប៉ះពាល់ ទាំងអស់នេះ យើងនឹងបន្តតាមដានសុខភាពរបស់គាត់ជារៀងរាល់ថ្ងៃ។ សំណូមពរដល់អ្នកនាំភ្ញៀវ និងកន្លែងគាត់ស្នាក់នៅ បើឃើញគាត់មានករណីសង្ស័យ សូមជួយរាយការណ៍ 115 » ។
ជំងឺរលាកសួតដែលបង្កដោយវីរុសកូរូណាថ្មីនេះ បានផ្ទុះឡើងនៅទីក្រុងវ៉ូហាន ខេត្តហ៊ូបេ (Hubei) ប្រទេសចិន ចាប់តាំងពីដើមខែមករា។ គិតត្រឹមថ្ងៃទី២៨ ខែមករា វីរុសថ្មីនេះ បានសម្លាប់មនុស្ស ១០៦នាក់ និងបានឆ្លងដល់មនុស្សជិត ៥ពាន់នាក់។ ករណីវីរុសថ្មីនេះ កំពុងរីករាលដាលដល់ប្រទេសជាច្រើនក្នុងពិភពលោកដោយសារតែជនជាតិចិនធ្វើដំណើរទៅប្រទេសទាំងនោះ រួមមាន កោះតៃវ៉ាន់ ថៃ វៀតណាម សិង្ហបុរី ម៉ាឡេស៊ី ជប៉ុន នេប៉ាល់ កូរ៉េខាងត្បូង បារាំង អូស្ត្រាលី កាណាដា អារ៉ាប់ប៊ីសាអូឌីត និងសហរដ្ឋអាមេរិក។
អ្នកសម្របសម្រួលសមាគម អាដហុក (Adhoc) ខេត្តព្រះសីហនុ អ្នកស្រី ជាប សុធារី ស្នើសុំឲ្យ
រដ្ឋាភិបាលផ្សព្វផ្សាយឲ្យបានទូលំទូលាយនូវគ្រោះថ្នាក់នៃមេរោគថ្មីនេះ និងរបៀបការពារ ជាពិសេស ត្រូវទប់ស្កាត់ឲ្យមានប្រសិទ្ធភាព។ អ្នកស្រីបារម្ភថា ប្រជាពលរដ្ឋខេត្តព្រះសីហនុ អាចនឹងមានហានិភ័យខ្ពស់ក្នុងការឆ្លងជំងឺរលាកផ្លូវដង្ហើម ដែលបង្កដោយវីរុសកូរ៉ូណាថ្មីនេះ ព្រោះមានជនជាតិចិនច្រើនបានវិលត្រឡប់ពីប្រទេសចិន មកខេត្តជាប់សមុទ្រមួយនេះ បន្ទាប់ពីពួកគេបានទៅលេងគ្រួសារក្នុងពេលចូលឆ្នាំចិន៕
(យន្តហោះកំពុងហោះចេញពីអាកាសយានដ្ឋានអន្តរជាតិភ្នំពេញ ថ្ងៃទី២៨ ខែមករា ឆ្នាំ២០២០)
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។