ពលករខ្មែរមួយចំនួនត្អូញត្អែរពីទុក្ខលំបាក បន្ទាប់ពីពួកគេបានជាប់គាំងនៅតាមបណ្ដោយព្រំដែនខ្មែរ-ថៃអស់រយៈពេលជាច្រើនថ្ងៃ។ មន្ត្រីសង្គមស៊ីវិលជំរុញឲ្យអាជ្ញាធរខេត្តនៅជាប់ព្រំដែនជាមួយប្រទេសថៃទាំងអស់ពន្លឿនអនុវត្តវិធានការរបស់រដ្ឋាភិបាល ដើម្បីឱ្យពលករ ដែលកំពុងជាប់គាំងនៅតំបន់ព្រំដែនចូលក្នុងប្រទេសវិញឲ្យបានឆាប់រហ័ស។
ប្រជាពលរដ្ឋមួយចំនួនដែលបានជាប់គាំងនៅតំបន់ព្រំដែនថៃត្អូញត្អែរថា ពួកគាត់កំពុងលំបាកវេទនា ព្រោះពួកគាត់ស្នាក់នៅក្នុងតង់អស់ជាច្រើនថ្ងៃហើយ អាជ្ញាធរខ្មែរមិនទាន់ឱ្យពួកគេចូលស្រុកវិញនៅឡើយទេ។
ពលករមានស្រុកកំណើតនៅខេត្តពោធិ៍សាត់លោកស្រី សាន សម្ភស្ស ប្រាប់វិទ្យុអាស៊ីសេរីនៅថ្ងៃទី១០ សីហា ថា លោកស្រីបានជាប់គាំងនៅតំបន់ព្រំដែនថៃជាប់ស្រុកម៉ាឡៃ ខេត្តបន្ទាយមានជ័យជាង ១០ថ្ងៃមកហើយ ប៉ុន្តែអាជ្ញាធរខ្មែរមិនទាន់អនុញ្ញាតឱ្យលោកស្រីចូលស្រុកវិញនោះទេ។ ពេលនេះ លោកស្រី និងពលករខ្មែរចំនួន ២៦នាក់ និងកូនតូចៗ មួយចំនួនទៀត កំពុងស្នាក់នៅក្រោមតង់តាមបណ្ដោយអូរជាប់ព្រំដែនកម្ពុជា និងថៃយ៉ាងលំបាក។ ស្ត្រីរូបនេះឱ្យដឹងថា លោកស្រីសម្រេចចិត្តវិលត្រឡប់មកខ្មែរវិញទាំងប្រថុយប្រថានបែបនេះ ដោយសារលោកស្រីបាត់ការងារ និងគ្មានលុយបង់ថ្លៃបន្ទប់ជួល ជាពិសេស បារម្ភឆ្លងជំងឺកូវីដ១៩ គ្មានគ្រូពេទ្យព្យាបាល។
លោកស្រី សាន សម្ភស្ស និយាយថា ប្រសិនបើអាជ្ញាធរខ្មែរបន្តអូសបន្លាយឱ្យពលករចូលស្រុកវិញ នោះវានឹងធ្វើឱ្យពួកគាត់កាន់តែលំបាកបន្ថែមទៀត។ ស្ត្រីវ័យ ២៦ឆ្នាំរូបនេះបញ្ជាក់ថា អាជ្ញាធរខ្មែរមិនសូវអើពើពីទុក្ខលំបាករបស់ពលករវិលចូលស្រុកវិញនោះទេ៖ «ព្រោះអីនៅខាងថៃនោះជំងឺកូវីដហ្នឹងវាច្រើនអ៊ីចឹងណាមួយតាមតូបលក់អាហារគេបិទច្រើនអ្នកខ្លះអត់មានការងារធ្វើអ៊ីចឹងទៅគាត់សម្រេចចិត្តមកហ្មងទៅណា មួយបើកើតកូវីដនៅប្រទេសគេខ្លាចអត់ព្យាបាលយើង ពេលភ្លៀងអ៊ីចឹងក៏សាចនាំគ្នាងើបសើម នៅកន្លែងនេះអូរមួយ ងូតទឹកអូរប្រើប្រាស់ក៏ទឹកអូរ អ៊ីចឹងពិបាកមិនដឹងធ្វើមិចទ្រាំសិនទៅព្រោះអីអត់ទាន់ឱ្យចូលបានចឹង ព្រួយបារម្ភចង់ឱ្យទៅលឿនៗ អ៊ីចឹង»។
រដ្ឋមន្ត្រីក្រសួងការងារលោក អ៊ិត សំហេង ធ្លាប់អួតសរសើរ និងលើកពលករខ្មែរនៅក្រៅប្រទេសថា ជាវីរបុរសជាតិ ដោយសារតែខំលក់កម្លាំងពលកម្ម ប្តូរយកប្រាក់មកជួយសេដ្ឋកិច្ចជាតិ។ ប៉ុន្តែក្រសួងការងារ និងរដ្ឋាភិបាលលោក ហ៊ុន សែន រងការរិះគន់ថា បោះបង់ពលករជាង ២០០នាក់ចោល ពេលពួកគាត់មានទុក្ខ ព្រោះពួកគាត់មកដល់ព្រំដែនខ្មែរទៅហើយ មិនឲ្យពួកគាត់ចូល ដោយទុកឲ្យនៅដាច់ដោយឡែកក្នុងព្រៃ ដោយខ្លាចឆ្លងជំងឺកូវីដ-១៩។
ក្រោយការរិះគន់នេះ កាលពីថ្ងៃទី១ ខែសីហា លោក ហ៊ុន បានចេញបទបញ្ជាឲ្យកងទ័ពត្រៀមកន្លែងទុកទទួលពលករខ្មែរថ្មី ដែលកំពុងវិលត្រឡប់មកពីប្រទេសថៃ បន្ទាប់ពីពួកគេបានសម្រុកត្រឡប់មកវិញ ព្រោះតែប្រទេសថៃកំពុងផ្ទុះការរីករាលដាលជំងឺកូវីដ-១៩ កាន់តែខ្លាំង។ ប៉ុន្តែ រហូតមកដល់ពេលនេះ ពលករដែលរដ្ឋាភិបាល មិនឲ្យចូលស្រុកទាំងនោះ នៅបន្តជាប់គាំងក្នុងតង់ដដែល។
ជុំវិញរឿងនេះប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន ប្រាប់វិទ្យុអាស៊ីសេរីថា រដ្ឋាភិបាលកម្ពុជា និងថៃបានសហការគ្នាផ្តល់ស្បៀងអាហារដល់ពលករជាប់គាំងនៅតាមព្រំដែនរួចហើយ។ លោកថា រដ្ឋាភិបាលក៏បានរៀបចំកន្លែងព្យាបាលជំងឺកូវីដ១៩ និងធ្វើចត្តាឡីស័កនៅតាមព្រំដែន រួមទាំងរថយន្តរបស់ក្រសួងការពារជាតិ ដើម្បីដឹកពួកគាត់ទៅធ្វើចត្តាឡីស័កនៅស្រុកកំណើតដែរ។ ទោះជាយ៉ាងណា ក្ដី លោកមិនបកស្រាយជុំវិញពលករបន្តជាប់គាំងជាច្រើនថ្ងៃលើទឹកដីថៃដោយអាជ្ញាធរខ្មែរ មិនអនុញ្ញាតឱ្យពួកគាត់ចូលមកកម្ពុជានោះទេ ដោយលោករុញឱ្យទៅសួររដ្ឋបាលខេត្តនៅតាមព្រំដែនវិញ៖ «ពីដើមយើងរក្សា ១៥ថ្ងៃនៃថេរវេលាធ្វើចត្តាឡីស័កដល់ឥឡូវនេះក្នុងការចង្អុលប្រាប់ថ្មីរបស់សម្ដេចអគ្គមហាសេនាបតីតេជោ ហ៊ុន សែន គឺតែ ៧ថ្ងៃទេ បន្ទាប់ពី ៧ថ្ងៃហ្នឹងទៅមធ្យោបាយដឹកជញ្ជូនតាមរយៈកងទ័ពដឹកជញ្ជូនចេញពីកន្លែងព្រំដែនហ្នឹងមកកាន់ស្រុកកំណើតរបស់ខ្លួនដើម្បីធ្វើចត្តាឡីស័ក»។
ដោយឡែកអ្នកនាំពាក្យក្រសួងការពារជាតិ លោក អ៊ុន សុវណ្ណ ប្រាប់វិទ្យុអាស៊ីសេរីយ៉ាងខ្លីថា លោកមិនបកស្រាយជំរុញរឿងនេះទេ ដោយលោកប្រាប់ថា ក្តាប់ព័ត៌មាននេះ មិនទាន់គ្រប់ជ្រុងជ្រោយនៅឡើយ ដូច្នេះលោករុញឱ្យទៅសួរអាជ្ញាធរតាមព្រំដែនវិញ។
វិទ្យុអាស៊ីសេរីមិនអាចទាក់ទងអភិបាលរងខេត្តបន្ទាយមានជ័យ លោក ង៉ោ ម៉េងជ្រួន និងអភិបាលខេត្តប៉ៃលិន អ្នកស្រី បាន ស្រីមុំ ដើម្បីសុំការបកស្រាយជុំវិញរឿងនេះបានទេ នៅថ្ងៃទី១០ សីហា ដោយលើកទូរស័ព្ទតែចុចផ្ដាច់ទៅវិញ។
ទោះជាយ៉ាងណារដ្ឋមន្ត្រីការពារជាតិលោក ទៀ បាញ់ ប្រាប់សារព័ត៌មានក្នុងស្រុកថា ពលករជាង ១ម៉ឺននាក់ បានធ្វើចត្តាឡីស័កជាច្រើនថ្ងៃហើយ ប៉ុន្តែត្រូវដឹកជញ្ជូនឱ្យទៅធ្វើចត្តាឡីស័កបន្ត នៅក្នុងខេត្តស្រុកកំណើតពួកគេវិញ។ លោកថា នេះជាការត្រៀមសម្រាប់ពលករ ដែលកំពុងជាប់គាំងនៅលើទឹកដីថៃ ដែលគ្រោងនឹងអនុញ្ញាតឲ្យចូលកម្ពុជាវិញ។
ជុំវិញរឿងនេះ មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបន្ទាយមានជ័យ លោក ស៊ុំ ច័ន្ទគា មានប្រសាសន៍ថា ពលករខ្មែរបន្តជាប់គាំងនៅតាមបណ្ដោយព្រំដែនដែលកំពុងជួបទុកលំបាកជាខ្លាំង ព្រោះពួកគេប្រឈមខ្វះខាតស្បៀងអាហារ សុខភាព និងទីជម្រកជាដើម។ លោកយល់ថា អាជ្ញាធរមិនគួរយឺតយ៉ាវ សម្រួលដល់ពលករដែលកំពុងជាប់គាំងនៅតាមបណ្ដោយព្រំដែននេះទេ។ លោកជំរុញឱ្យអាជ្ញាធរពន្លឿនការវិធានការរបស់រដ្ឋាភិបាលឲ្យបានឆាប់រហ័ស ដើម្បីបញ្ចៀសបញ្ហានានា លើពួកគាត់ ព្រោះរដ្ឋមានកាតព្វកិច្ចធានាការពារសុខភាព សិទ្ធិរស់រានមានជីវិតដល់ពលរដ្ឋគ្រប់រូប៖ «ប៉ុន្តែបើរស់នៅឱ្យបានយូររហូតជាង ១០ថ្ងៃយើងវាហួសចិត្តដែរត្រង់ថារដ្ឋាភិបាលបានរៀបចំដើម្បីដោះស្រាយជូនពលកររបស់ខ្លួនបែរជាអត់ឃើញដោះស្រាយនៅតែស្រែក ជួបបញ្ហាដដែល ហើយនាំគ្នាឱ្យទឹក ស្បៀង អង្ករវារួចផុតពីការទទួលខុសត្រូវទេ វាអត់ទេព្រោះថានៅនឹងតង់ក្តីនៅនឹងអីក្ដីឃើញថាពួកគាត់សើចញញឹម មិនមែនក្នុងចិត្តពួកគាត់សប្បាយចិត្តប៉ុន្មានទេ ប៉ុន្តែអ្វីចំពោះមុខការរស់នៅយូរអ៊ីចឹងមិនមែនជាដំណោះស្រាយល្អទេ ត្រូវធ្វើយ៉ាងណាបញ្ចេញពួកគាត់»។
រដ្ឋាភិបាល បានបិទខ្ទប់ខេត្តចំនួន៨ ជាប់ព្រំដែនប្រទេសថៃ រយៈពេល ១៤ថ្ងៃ ចាប់ពីថ្ងៃទី២៩ កក្កដា រហូតដល់ថ្ងៃទី១២ សីហា ដើម្បីទប់ស្កាត់ការឆ្លងរាលដាលវីរុសកូវីដ១៩ បំប្លែងថ្មី ឌែលតា (Delta Variant) ដែលកំពុងរាតត្បាតកាន់តែច្រើន ជាពិសេស ក្នុងចំណោមពលករចំណាកស្រុក ដែលវិលត្រឡប់ពីប្រទេសថៃ។ វិធានការនេះបានធ្វើឱ្យពលរដ្ឋខ្មែរជាច្រើននាក់ជាប់គាំងនៅតាមបណ្ដោយព្រំដែន។
របាយការណ៍របស់អាជ្ញាធរថៃ បង្ហាញថា ចាប់ពីចុងខែមីនា ដល់ថ្ងៃទី៥ សីហា មានពលករខ្មែរ ១៤.១៩៤នាក់ ឆ្លងជំងឺកូវីដ១៩។ ក្នុងនោះយ៉ាងហោចណាស់មានពលករខ្មែរចំនួន ២នាក់ ស្លាប់ កាលពីខែមេសា និងខែឧសភា ខណៈពលករឆ្លងជំងឺកូវីដ១៩ ជាច្រើនទៀត កំពុងព្យាបាលក្នុងការដ្ឋានសំណង់ និងបន្ទប់ជួលតាមយថាកម្មរៀងៗ ខ្លួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។