ប្រជាពលរដ្ឋមួយចំនួនចង់ចាក់វ៉ាក់សាំងកូវីដ-១៩ ដែលទទួលស្គាល់ដោយអង្គការសុខភាពពិភពលោក (WHO) ស្របពេលដែលប្រមុខរដ្ឋាភិបាល បានជំរុញពលរដ្ឋចាក់វ៉ាក់សាំងចិន ស៊ីណូវ៉ាក់ (Sinovac)។ សំណើនេះធ្វើឡើងក្រោយពេលក្រសួងសុខាភិបាលប្រកាសថា អ្នកជំងឺcovid-19 ចំនួនបីនាក់បានស្លាប់។
ប្រជាពលរដ្ឋមួយចំនួនស្នើលោកនាយករដ្ឋមន្ត្រី ហ៊ុន សែន ឱ្យទិញវ៉ាក់សាំងដែលទទួលស្គាល់ដោយអង្គការសុខភាពពិភពលោក។
ប្រជាពលរដ្ឋរស់នៅខេត្តសៀមរាប លោក នីញ ធារ៉ា មិនទុកចិត្តលើវ៉ាក់សាំងណាដែលមិនមានភាពច្បាស់លាស់នោះទេ ហើយរដ្ឋាភិបាលមិនគួរបែងលក្ខខណ្ឌទទួលបានការចាក់វ៉ាក់សាំងក្នុងស្ថានភាពនេះឡើយ៖ «កុំរើសអើងថា អ្នកនេះចង់បានចង់ចាក់ដែរ មិនឱ្យគេចាក់ ហើយគេចង់ចាក់ AstraZeneca ដែរ ហើយមិនឱ្យគេចាក់ ទៅទិញវ៉ាក់សាំងពីចិនដោយពុំទទួលស្គាល់ដោយអង្គការសុខភាពពិភពលោក ជាពលរដ្ឋម្នាក់ដែរគាត់ក៏ចង់បានសុខភាពល្អ»។
ស្រដៀងគ្នានេះដែរ ប្រជាពលរដ្ឋរស់នៅខេត្តព្រះសីហនុ លោក ម៉ៃ ហុងស្រៀង ប្រាប់អាស៊ីសេរីថា មេដឹកនាំគួរមានការទទួលខុសត្រូវឱ្យបានខ្ពស់ចំពោះសុខភាពរបស់ប្រជាពលរដ្ឋខ្មែរ។ លោកស្នើឱ្យមេដឹកនាំគិតគូរឱ្យបានច្បាស់លាស់ មុនទិញវ៉ាក់សាំងណាមួយ ដើម្បីទទួលបានគុណភាព និងនាំឱ្យពលរដ្ឋជឿទុកចិត្តបាន៖ «អ៊ីចឹងមានជីវិតត្រូវតែមានតម្លៃ អ៊ីចឹងទុកតម្លៃឱ្យស្មើគ្នា កុំគិតតម្លៃ តួនាទីនេះចាក់របស់ល្អ ពលរដ្ឋអ្នកទន់ខ្សោយ ក្រីក្រ ចាក់របស់អន់ទៅ ខ្ញុំមើលទៅមិនសមរម្យទេ ប៉ុន្តែអ្វីជាសេចក្តីថ្លៃថ្នូរ ជាការសមរម្យ ជាភាពត្រឹមត្រូវ ធ្វើអ្វីឱ្យមានតម្លាភាព ស្មើគ្នា ក្នុងនាមមនុស្សជាតិដូចគ្នា»។
ការលើកឡើងនេះ បន្ទាប់ពី លោក ហ៊ុន សែន លើកឡើងថា កម្ពុជាចំណាយលុយទិញវ៉ាក់សាំង ស៊ីណូវ៉ាក់ (Cinovac) ពីភាគីចិន ចំនួន១លាន ៥សែនដូស នឹងមកដល់កម្ពុជានៅថ្ងៃ២៦ មីនា ប៉ុន្តែលោកមិនបង្ហើបពីចំនួនលុយដែលត្រូវទិញវ៉ាក់សាំងរបស់ចិនប៉ុន្មាននោះទេ។ ចំណែកវ៉ាក់សាំងស៊ីណូហ្វាម (Sinopharm) ដែលជាជំនួយរបស់ចិននៅសល់៤០ម៉ឺនដូស នឹងមកដល់កម្ពុជាមុនពិធីបុណ្យចូលឆ្នាំខ្មែរ ក្នុងខែមេសាខាងមុខ។ លោក ហ៊ុន សែន បានអំពាវនាវទៅប្រជាពលរដ្ឋខ្មែរកុំប្រកាន់វ៉ាក់សាំងផលិតនៅចិន និងវ៉ាក់សាំងផលិតនៅឥណ្ឌា។ ទោះបីយ៉ាងណា លោកទទួលស្គាល់ថា ប្រជាពលរដ្ឋកម្ពុជា ជឿជាក់លើលើសុវត្ថិភាព វ៉ាក់សាំង AstraZeneca ដែលទទួលស្គាល់ដោយអង្គការសុខភាពពិភពលោក។
ជុំវិញរឿងនេះ អាស៊ីសេរីមិនអាចទាក់ទង អ្នកនាំពាក្យក្រសួងសុខាភិបាល អ្នកស្រី ឱ វណ្ណឌីន ដើម្បីសាកសួរព័ត៌មាននេះ បានទេ កាលថ្ងៃទី១៩ មីនា។ ប៉ុន្តែ លោកនាយករដ្ឋមន្ត្រី ហ៊ុន សែន បានថ្លែងសារជាសំឡេងលើទំព័រហ្វេសប៊ុក នៅថ្ងៃទី១៩ មីនា ថា រយៈពេលកន្លងទៅ នៅតាមមន្ទីរពេទ្យមួយចំនួនបានផ្តល់វ៉ាក់សាំង AstraZeneca ឱ្យអ្នកដែលមានអាយុក្រោម៦០ឆ្នាំ ដែលលោកហៅថាខុសគោលនយោបាយវ៉ាក់សាំងរបស់រដ្ឋាភិបាល។ លោក ហ៊ុន សែន ប្រាប់ឱ្យអនុគណៈកម្មការចំពោះកិច្ចការចាក់វ៉ាក់សាំងកូវីដ-១៩ នៅរាជធានីភ្នំពេញ ត្រូវហាមឃាត់ប្រជាពលរដ្ឋណាមានអាយុក្រោយ៦០ឆ្នាំ ដែលមកចាក់វ៉ាក់សាំង Astra Zeneca នៅតាមខណ្ឌ៖ «ឥឡូវនេះខ្ញុំសូមស្នើឱ្យមន្ទីរពេទ្យដែលកកកុញទៅដោយមនុស្ស ហើយមនុស្សនោះអាយុមិនទាន់ដល់៥៩ឆ្នាំ ហើយគ្រូពេទ្យបន្តឱ្យចាក់ អនុញ្ញាតឱ្យចាក់ គឺសូមបញ្ឈប់ការចាក់ ប៉ុន្តែបើបានចាក់រួចហើយត្រូវបន្តដូសទី២ ហើយហាមឃាត់ការមកដណ្តើមវ៉ាក់សាំងពីមនុស្សចាស់ពីសំណាក់ប្អូនកូនក្មួយដែលជាក្រុមយុវជនមិនទាន់ដល់អាយុ»។
គិតត្រឹមថ្ងៃទី១៩ មីនា មានអ្នកកើតជំងឺកូវីដ-១៩ សរុប ១ ៥៧៨ករណី ក្នុងនោះ អ្នកឆ្លងថ្មីមាន ៣៧នាក់។ អ្នកជាសះស្បើយ មាន ៩១៧នាក់។ រហូតដល់ល្ងាចថ្ងៃទី១៩ មីនា ចំនួនអ្នកស្លាប់ដោយសារជំងឺនេះ កើនឡើងដល់ ៣នាក់ហើយ។ ក្រសួងសុខាភិបាលឱ្យដឹងថា ករណីស្លាប់ទីពីរដោយសារជំងឺនេះ កើតឡើងចំពោះស្ត្រីជនជាតិខ្មែរ អាយុ ៦២ ឆ្នាំ នៅមន្ទីរពេទ្យមិត្តភាពខ្មែរសូវៀត ដោយសារជំងឺនេះធ្វើឱ្យរលាកសួតខ្លាំង និងស្ទះសរសៃឈាមបេះដូង ស្របពេលដែលស្ត្រីរូបនោះ ក៏មានជំងឺទឹកនោមផ្អែម លើសឈាម និងធាត់ខ្លាំង។ អ្នកជំងឺទីពីរនេះ ជាប្រពន្ធរបស់តារាចម្រៀងល្បីឈ្មោះ លោក ហួរ ឡាវី រីឯករណីស្លាប់ទីបី កើតឡើងចំពោះអ្នកជំងឺម្នាក់ទៀត អាយុ ៤៦ឆ្នាំ នៅសង្កាត់បឹងសាឡាង ខណ្ឌទួលគោក ដោយអ្នកជំងឺបានរលាកសួតធ្ងន់ធ្ងរ។
ប្រធានអង្គការតម្លាភាពកម្ពុជា លោក ប៉ិច ពិសី មានប្រសាសន៍ថា ការសម្រេចចាក់វ៉ាក់កូវីដ-១៩ ជាសិទ្ធិរបស់ពលរដ្ឋ ប៉ុន្តែវ៉ាក់សាំងល្អ គឺមានការទទួលស្គាល់ដោយអង្គការសុខភាពពិភពលោក។
លោក ប៉ិច ពិសី បន្តទៀតថា ទំនុកចិត្តរបស់ប្រជាពលរដ្ឋគឺជារឿងសំខាន់ ដែលរដ្ឋាភិបាលនិងអ្នកវេជ្ជសាស្ត្រ គួរបង្ហាញការពិតឱ្យទូលំទូលាយ ពីលក្ខណៈវិទ្យាសាស្ត្រ ដោយធ្វើយ៉ាងណាឱ្យប្រជាពលរដ្ឋជឿទុកចិត្តទៅលើវ៉ាក់សាំងដែលបានប្រើប្រាស់ ប្រសិនបើប្រជាពលរដ្ឋភាគច្រើនមិនសូវជឿជាក់៖ «អ៊ីចឹងយើងពឹងទាំងស្រុង ប្រហែលពឹងលើវ៉ាក់សាំងដែលផ្តល់ដោយកូវ៉ាក់ទី១ ទី២យើងអាចទទួល ឬទទួលរួចហើយវ៉ាក់សាំងដែលផ្តល់ជំនួយដោយសាមីប្រទេសនីមួយៗ ដូចជាចិន អង់គ្លេសជាដើម អ៊ីចឹងមិនអាចមានវ៉ាក់សាំងគ្រប់ទេ អ្វីដែលយើងត្រូវធ្វើទី១ បញ្ហាទិញឱ្យបានធានាថាប្រទេសយើងត្រូវបានដាក់ក្នុងបញ្ជីនៃការកម្ម៉ង់ ទី២ ទាមទារឱ្យមានការជជែកជាមួយនឹងអ្នកពាក់ព័ន្ធអង្គការសហប្រជាជាតិ»។
ក្រសួងសុខាភិបាល កាលពីថ្ងៃទី១៩ មីនា បានប្រកាសអាសន្នករណីចម្លងជំងឺកូវីដ១៩ ក្រោយអ្នកជំងឺនេះ ៣នាក់បានស្លាប់ ក្រោយព្រឹត្តិការណ៍ ២០ កុម្ភៈ។ ការប្រកាសអាសន្ននេះ ធ្វើឡើងនៅក្នុងសេចក្តីជូនព័ត៌មានរួមគ្នាមួយរវាងក្រសួងសុខាភិបាល និងអង្គការសុខភាពពិភពលោក ចេញផ្សាយនៅថ្ងៃទី១៩ មីនា។ ក្រសួងសុខាភិបាល និងអង្គការសុខភាពពិភពលោក អំពាវនាវដល់ពលរដ្ឋទាំងអស់ឱ្យចូលរួមសាមគ្គីគ្នាក្នុងការប្រយុទ្ធប្រឆាំងនឹងជំងឺកូវីដ១៩នេះ។ តំណាងអង្គការសុខភាពពិភពលោកប្រចាំកម្ពុជាអ្នកស្រី លី អៃឡាន (Li Ailan) ថ្លែងក្នុងសេចក្តីថ្លែងការណ៍ថា កម្ពុជាកំពុងស្ថិតនៅក្នុងដំណាក់កាលសំខាន់ណាស់ក្នុងការរួមគ្នាប្រយុទ្ធប្រឆាំងនឹងជំងឺកូវីដ១៩។ អ្នកស្រីថា នៅមានឱកាសដើម្បីបញ្ឈប់ការឆ្លងរាលដាលនៃវីរុសនេះ ប្រសិនបើពលរដ្ឋទាំងអស់គ្នាចូលរួមសហការបញ្ឈប់ជំងឺនេះទាំងអស់គ្នាដោយសាមគ្គីភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។