ក្រសួងសុខាភិបាល បានប្រកាសពីករណីមានអ្នកស្លាប់ដោយជំងឺកូវីដ-១៩ ឡើងវិញ បន្ទាប់ពីគ្មានអ្នកស្លាប់ដោយជំងឺនេះអស់រយៈពេលជិត ៥០ ថ្ងៃកន្លងមក។ករណីស្លាប់ថ្មីនេះ មានចំនួន ២ នាក់ ហើយសុទ្ធតែជាអ្នកបានចាក់វ៉ាក់សាំងរួចរាល់ ប៉ុន្តែក្រសួង មិនបានបញ្ជាក់អំពីអត្តសញ្ញាណ និងទីកន្លែងអ្នកស្លាប់នោះទេ។
ចំណែកករណីឆ្លងថ្មីវិញ ក្រសួងសុខាភិបាល ប្រកាសថា មានជាង៧រយនាក់ (៧៣៦) ដែលសុទ្ធតែជាមេរោគបំប្លែងខ្លួនថ្មី អូមីក្រុង (Omicron) ក្នុងនោះ៧៣០នាក់ទៀតជាករណីឆ្លងក្នុងសហគមន៍និង៦នាក់ជាករណីនាំចូលពីក្រៅប្រទេស។ ករណីឆ្លងថ្មីនេះ ចាប់ផ្តើមហក់ឡើងវិញជាបន្តបន្ទាប់រយៈពេលជាងមួយសប្តាហ៍ចុងក្រោយនេះ។
គិតត្រឹមព្រឹកថ្ងៃទី២០ ខែកុម្ភៈនេះ កម្ពុជាមានអ្នកកើតជំងឺកូវីដ-១៩ ប្រមាណ ១សែន ២ម៉ឺននាក់ (១២៦.៤៨៩) ក្នុងនោះអ្នកជាសះស្បើយមានជាង ១ សែន ២ម៉ឺននាក់ (១២០.៤៦២) និងអ្នកស្លាប់មានចំនួន ៣ពាន់ ១៧នាក់ (៣.០១៧)។
ក្រសួងសុខាភិបាល ប្រកាសថា គិតត្រឹមថ្ងៃទី១៩ ខែកុម្ភៈ ម្សិលមិញ រដ្ឋាភិបាល ចាក់វ៉ាក់សាំងគ្រប់ដូសជូនពលរដ្ឋបានជាង ១៣លាន ៨សែននាក់ ក្នុងចំណោមពលរដ្ឋដែលត្រូវចាក់ប្រមាណ ១៤លាននាក់ ដែលរាប់ពីកុមារអាយុចាប់ពី ៥ឆ្នាំ រហូតដល់មនុស្សពេញវ័យ។ រីឯដូសជំរុញទី៣ និងទី៤ វិញ រដ្ឋាភិបាលចាក់ជូនពលរដ្ឋបានសរុបជាង ៧លាន ១សែននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។