ក្រសួងសុខាភិបាលប្រកាសនៅថ្ងៃនេះថា អ្នកឆ្លងជំងឺកូវីដ-១៩ មាន ៥៣៨នាក់ថែមទៀត ដោយក្នុងនោះភាគច្រើនជាកម្មកររោងចក្រ។ ករណីឆ្លងថ្មីទាំងនេះ ធ្វើឱ្យចំនួនអ្នកឆ្លងជំងឺកូវីដ-១៩ ក្នុងព្រឹត្តិការសហគមន៍ ២០ កុម្ភៈ កើនឡើងដល់ ១៨.១៥៥នាក់ហើយ។ ដោយឡែកអ្នកជំងឺ ៤៥៦នាក់ទៀត បានជាសះស្បើយនៅថ្ងៃដដែលនេះ។
អាជ្ញាធរខេត្តកំពង់ស្ពឺឱ្យដឹងថា មានអ្នកជំងឺម្នាក់នៅក្នុងខេត្តនេះ បានស្លាប់កាលពីយប់ថ្ងៃទី៧ ឧសភា។ លិខិតមរណភាពដែលចេញដោយមន្ទីរពេទ្យខេត្តកំពង់ស្ពឺនៅថ្ងៃទី៨ ឧសភា ឱ្យដឹងថា អ្នកជំងឺដែលបានស្លាប់នោះ គឺជាកម្មការិនីរោងចក្រ រស់នៅស្រុកគងពិសី ខេត្តកំពង់ស្ពឺ។ អភិបាលខេត្តកំពង់ស្ពឺ លោក វ៉ី សំណាង ប្រាប់កាសែតក្នុងស្រុកថា កម្មការិនីរូបនោះមានផ្ទៃពោះ ៧ខែ និងមានអាការៈធ្ងន់ធ្ងរ ទើបក្រុមគ្រួសារបានបញ្ជូនមកមន្ទីរពេទ្យ ប៉ុន្តែគាត់បានស្លាប់នៅប្រហែលកន្លះម៉ោងក្រោយមក។
គិតត្រឹមព្រឹកថ្ងៃទី៨ ឧសភា កម្ពុជាមានអ្នកកើតជំងឺកូវីដ-១៩ ចំនួន ១៨.៧១៧នាក់ក្នុងនោះអ្នកជាសះស្បើយមាន ៧.៣៤០នាក់និងអ្នកកំពុងសម្រាកព្យាបាលជាង ១ម៉ឺន ១ពាន់នាក់ រីឯអ្នកស្លាប់វិញ មានចំនួន ១១៥នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។