អ្នកឃ្លាំមើលបញ្ហាសង្គមកម្ពុជា មើលឃើញថា ការផ្អាកជើងហោះហើរបណ្ដោះអាសន្ន និង ការជម្លៀសពលរដ្ឋខ្មែរពីតំបន់រីករាលដាលវីរុសកូរ៉ូណា ក្នុងប្រទេសចិន មិនប៉ះពាល់ ធ្ងន់ធ្ងរដល់សេដ្ឋកិច្ច និងទំនាក់ទំនងជាមួយប្រទេសចិននោះទេ ប៉ុន្តែថែមទាំងជួយសម្រាលបន្ទុករបស់រដ្ឋាភិបាលចិនទៀតផង។ ការលើកឡើងនេះ បន្ទាប់ពីប្រមុខរដ្ឋាភិបាលកម្ពុជា ប្រកាសថា ការផ្អាកជើងហោះហើរ និងជម្លៀសពលរដ្ឋខ្មែរពីប្រទេសចិនគឺស្មើនឹងសម្លាប់សេដ្ឋកិច្ចកម្ពុជា និងកាត់បន្ថយទំនាក់ទំនងជាមួយប្រទេសចិន។
ក្រុមអ្នកតាមដានស្ថានការណ៍កម្ពុជាមើលឃើញថា ការបន្តអនុញ្ញាតឱ្យជនជាតិចិនចេញចូលកម្ពុជា ដោយសេរី និងមិនជម្លៀសពលរដ្ឋខ្មែរដែលកំពុងជាប់ផុងក្នុងតំបន់រីករាលដាលនៃវីរុសកូរ៉ូណា ក្នុង ប្រទេសចិននោះ គឺបង្ហាញថា រដ្ឋាភិបាលកម្ពុជា គ្មានសមត្ថភាព និងមិនយកចិត្តទុកដាក់ជួយពលរដ្ឋ របស់ខ្លួននោះទេ។
តំណាងក្រុមប្រឹក្សាឃ្លាំមើលកម្ពុជាលោក រ៉ុង ឈុន ថ្លែងថា ការលើកឡើងរបស់លោកនាយករដ្ឋមន្ត្រី ហ៊ុន សែន គឺមិនសមស្របទៅនឹងស្ថានការណ៍ដែលកំពុងកើតឡើង និងការព្រួយបារម្ភរបស់ពិភពលោកនោះឡើយ។ លោកបន្តថា ក្នុងនាមជាមេដឹកនាំប្រទេសមួយរូប លោក ហ៊ុន សែន គួរតែគិតគួរអំពីសុខទុក្ខ និងសុវត្ថិភាពរបស់ប្រជាពលរដ្ឋ ព្រោះក្នុងករណីថ្លោះធ្លោយបណ្ដាលឱ្យមានការចម្លងវីរុសកូរ៉ូណាថ្មីនេះនៅកម្ពុជា គឺនឹងធ្វើឱ្យមានវិបត្តិធ្ងន់ធ្ងរជាងការអះអាងរបស់រដ្ឋាភិបាលទៅទៀត។
ប្រធានសហភាពសហជីពកម្ពុជារូបនេះ ស្នើឱ្យរដ្ឋាភិបាលកម្ពុជា ពិចារណាឡើងវិញ ក្នុងការផ្អាកជើងហោះហើរពីប្រទេសចិន និងរកវិធីសាស្ត្រជួយជម្លៀសប្រជាពលរដ្ឋខ្មែរ ដូចរដ្ឋាភិបាលប្រទេសដទៃទៀតកំពុងតែធ្វើយ៉ាងដូច្នេះដែរ៖ «ការលើកឡើងគ្រាន់តែជាការបិទបាំងនិងបង្ហាញពីសមត្ថភាពរបស់ខ្លួនជួនកាលយើងមើលឃើញថា យើងអាចខ្វះធនធាន ខ្វះសមត្ថភាពក្នុងការជម្លៀសក្នុង ការទប់ស្កាត់។ ទី២ យើងឃើញថា វាមិនខូចការទំនាក់ទំនងអីទេ ក្នុងការបិទជើងហោះហើរជាមួយចិនបណ្ដោះអាសន្ន ហើយសេដ្ឋកិច្ចក៏មិនប៉ះពាល់ធំដំដែរ។ ប៉ុន្តែផ្ទុយទៅវិញនៅពេលពលរដ្ឋ ប្រឈម គឺធ្វើឱ្យប៉ះពាល់ពលរដ្ឋខ្លាំងមែនទែន។ ឧទាហរណ៍ថា ជំងឺនេះវាយលុកខ្លាំងនៅតាមបណ្ដារោងចក្រជាច្រើន ដូច្នេះនឹងប៉ះពាល់ដល់សេដ្ឋកិច្ចហើយ។
ជាមួយគ្នានេះ លោក រ៉ុង ឈុន ទទួលស្គាល់ថា ប្រទេសកម្ពុជា នៅមានភាពទន់ខ្សោយផ្នែកប្រព័ន្ធ សុខាភិបាល និងមិនបានត្រៀមខ្លួនគ្រប់គ្រាន់សម្រាប់បង្ការ និងទប់ស្កាត់ការរីករាលដាលនៃជំងឺ រលាកសួតបង្កឡើងដោយវីរុសកូរ៉ូណា ដូចគ្នានឹងសេចក្ដីប្រកាសរបស់អង្គការសុខភាពពិភពលោក(WHO)ដែរ៖ «នៅកម្ពុជា បើយើងមើលទៅលើប្រព័ន្ធសុខាភិបាលនៅខ្សោយមែនទែន ក្នុងការពារសុវត្ថិភាពដល់ប្រជាពលរដ្ឋ ព្រោះយើងមើលឃើញកន្លងមកហើយថា ការព្យាបាលដែលធ្វើឱ្យប្រជាពលរដ្ឋបាត់ទំនុកចិត្តហើយគ្រូពេទ្យ មួយចំនួនខ្វះសមត្ថភាពនិងខ្វះការទទួលខុសត្រូវដែលតែងតែធ្វើឱ្យប្រជាពលរដ្ឋ ចេញទៅព្យាបាលនៅប្រទេសជិតខាង»។
លោក ហ៊ុន សែន បានប្រកាសកាលពីថ្ងៃទី៣០ មករាថា អាជ្ញាធរគ្មានវិធានការបិទជើងហោះហើរ និងជម្លៀសពលរដ្ឋខ្មែរពីប្រទេសចិននោះទេ ដោយលោកអះអាងថា វិធានការនេះគឺស្មើនឹងសម្លាប់សេដ្ឋកិច្ចកម្ពុជា និងកាត់បន្ថយទំនាក់ទំនងជាមួយចិន។ លោក ហ៊ុន សែន ក៏អំពាវនាវកុំឱ្យនិស្សិតខ្មែរវិលមកកម្ពុជាវិញ ដោយត្រូវនៅរួមសុខរួមទុក្ខជាមួយប្រជាជនចិន ហើយលោកថែមទាំង អំពាវនាវកុំឱ្យប្រជាពលរដ្ឋក្នុងប្រទេសកម្ពុជា ភ័យជ្រុលហួសហេតុពេក។
ប្រធានមជ្ឈមណ្ឌលប្រជាពលរដ្ឋសម្រាប់ការអភិវឌ្ឍន៍ និងសន្តិភាព លោក យង់ គិមអេង ថ្លែងថា រដ្ឋាភិបាលកម្ពុជា គួរតែពិចារណាឡើងវិញក្នុងការផ្អាកជើងហោះហើរពីខេត្តមួយចំនួនរបស់ចិនដែលកំពុងរាលដាលវីរុសកូរ៉ូណា និងជម្លៀសពលរដ្ឋខ្មែរមកកម្ពុជាវិញ ព្រោះអង្គការសុខភាពពិភពលោក(WHO) បានប្រកាសដាក់ពិភពលោកក្នុងភាពអាសន្នដោយសារវីរុសកូរ៉ូណា។ លោកយល់ថា ការដែលរដ្ឋាភិបាលកម្ពុជា ជួយពលរដ្ឋខ្មែរឱ្យមានសុវត្ថិភាពគេចផុតពីការឆ្លង វីរុសកូរ៉ូណា គឺជាការជួយសម្រាលបន្ទុករបស់រដ្ឋាភិបាលចិន និងពិភពលោក ហើយគ្មានខូចខាត សេដ្ឋកិច្ចធ្ងន់ធ្ងរនិងប៉ះពាល់ទំនាក់ទំនងជាមួយចិនឡើយ។ លោក យង់ គិមអេង សង្កេតឃើញថា កំណើនសេដ្ឋកិច្ចកម្ពុជាសព្វថ្ងៃ មិនពឹងផ្អែកលើភ្ញៀវទេសចរណ៍ចិននោះទេ ប៉ុន្តែពឹងផ្អែកខ្លាំង ទៅលើការនាំចេញទៅកាន់ទីផ្សារសហភាពអឺរ៉ុប៖ «បើយើងការពារ ពលរដ្ឋឱ្យមានសុខភាពល្អបាន គឺអាចធ្វើឱ្យសេដ្ឋកិច្ចរបស់យើងកើនឆាប់រហ័សវិញ បន្ទាប់ពីវីរុសត្រូវបានគេទប់ស្កាត់។ ខ្ញុំគិតថា រដ្ឋាភិបាល នឹងមានការគិតគូរបន្ថែមទៀត បន្ទាប់ពីអង្គការសុខភាពពិភពលោកបានប្រកាស»។
កាលពីថ្ងៃយប់ថ្ងៃទី៣០ ខែមករា អង្គការសុខភាពពិភពលោក (WHO) បានចេញសេចក្តីប្រកាស ដាក់ពិភពលោកក្នុងភាពអាសន្នបង្កឡើងដោយវីរុសកូរ៉ូណាថ្មី ក្រោយពិនិត្យឃើញថា មេរោគបង្កឱ្យរលាកសួតនេះ បានសម្លាប់មនុស្ស និងឆ្លងរីករាលដាលពីមនុស្សម្នាក់ទៅមនុស្ស កើនឡើងជាលំដាប់យ៉ាងឆាប់រហ័ស រហូតឆ្លងដល់ប្រទេសជាច្រើនក្នុងពិភពលោក។ អង្គការសុខភាពពិភពលោក មានក្តីកង្វល់ខ្លាំងបំផុតចំពោះសក្ដានុពលភាពនៃការរីករាលដាលនៃវីរុសដ៏កាចសាហាវនេះទៅកាន់ប្រទេសដែលមានប្រព័ន្ធសុខាភិបាលទន់ខ្សោយ និងមិនបានត្រៀមខ្លួនគ្រប់គ្រាន់សម្រាប់បង្ការ និងទប់ស្កាត់ការរីករាលដាលនៃវីរុសថ្មីនេះ។ អង្គការសុខភាពពិភពលោក ណែនាំឱ្យប្រទេសនានា ធ្វើសកម្មភាពរួមគ្នា ដើម្បីប្រឆាំងជំងឺឆ្លងនេះ។
អ្នកនាំពាក្យក្រសួងសុខាភិបាល លោកវេជ្ជបណ្ឌិត លី សូវ៉ាន់ មានប្រសាសន៍ថា រដ្ឋាភិបាលកម្ពុជា គ្មានការពិចារណាឡើងវិញក្នុងផ្អាកជើងហោះហើរ និងជម្លៀសពលរដ្ឋខ្លួនចេញពីចិននោះទេ ហើយអ្វីដែលអង្គការសុខភាពពិភពលោក បានប្រកាសនោះ គឺកម្ពុជា បានត្រៀមខ្លួន និងអនុវត្តរួចរាល់ហើយ ដើម្បីបង្ការ និងទប់ស្កាត់មេរោគនេះ៖ «ប្រទេសកម្ពុជា យើងបានត្រៀមអស់ហើយក្នុងការបង្ការ និងទប់ស្កាត់នៅគ្រប់ពេលវេលាទាំងអស់ហើយនៅក្នុងសំណើរបស់អង្គការសុខភាពពិភពលោក គឺឱ្យយើងតម្លាភាពហើយ តាមពិតកម្ពុជា គឺជាប្រទេសតម្លាភាពបំផុតហើយ។យើងផ្លាស់ប្ដូរព័ត៌មានអ្វីដែលយើងបានរកឃើញភ្លាម យើងផ្ដល់ដល់ប្រជាជននិងដល់អង្គការសុខភាពពិភពលោក និងប្រទេសនានាទាំងអស់»។
មន្ត្រីនាយកដ្ឋានប្រយុទ្ធនឹងជំងឺឆ្លងរូបនេះ ឱ្យដឹងដែរថា គិតត្រឹមល្ងាចថ្ងៃទី៣១ ខែមករា កម្ពុជាមិន ទាន់រកឃើញករណីឆ្លងថ្មីដែលបង្កឡើងដោយវីរុសកូរ៉ូណានោះទេ ក្រៅពីបុរសជនជាតិចិនម្នាក់ដែលកំពុងសម្រាកព្យាបាលក្នុងមន្ទីរពេទ្យខេត្តព្រះសីហនុ ហើយដែលកំពុងមានស្ថានភាពសុខភាពល្អធម្មតានោះ។
ជំងឺរលាកប្រព័ន្ធដង្ហើមដែលបង្កដោយវីរុសកូរ៉ូណាថ្មីនេះ បានផ្ទុះឡើងនៅទីក្រុងវូហាន ខេត្តហ៊ូបេ (Hubei) ប្រទេសចិន ចាប់តាំងពីចុងខែធ្នូ ឆ្នាំ២០១៩។ គិតត្រឹមថ្ងៃទី៣១ ខែមករា វីរុសកូរ៉ូណាថ្មីនេះ បាន សម្លាប់មនុស្សនៅក្នុងប្រទេសចិនជាង ២រយនាក់ និងបានឆ្លងទៅមនុស្សជិត ១ម៉ឺននាក់ហើយ។ ចំណែកប្រទេសចំនួន២០ បានសម្រេចជម្លៀសប្រជាជនរបស់ខ្លួនចេញពីប្រទេសចិន ដើម្បីគេចពីវីរុសកូរ៉ូណា ហើយមានតែរដ្ឋាភិបាលកម្ពុជាទេ ដែលទុកពលរដ្ឋខ្មែរឱ្យបន្តស្នាក់នៅប្រទេសចិន ដើម្បីរួមសុខរួមទុក្ខជាមួយប្រជាជនចិន ក្រោមហេតុផលថា ជឿជាក់លើចិនក្នុងការគ្រប់គ្រងស្ថាន ការណ៍នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។